February

Ho mamella ho ka re thusa joang? Ho re thusa ho ‘ba ba feletseng le ba phethahetseng ka litsela tsohle, re sa haelloe ke letho.’ (Jak. 1:4) Ha re tobana le teko e itseng, re ka ’na ra lemoha hore re lokela ho ikitlaelletsa ho bontša mamello, kananelo le lerato haholoanyane. Ha re mamella liteko, re tla bona hore re lokela ho sebeletsa lintlheng tsena ’me seo se tla re thusa hore re be batho bao Jehova a ba amohelang. Kaha ho mamella liteko ho re tiisa tumelo, re ke ke ra batla ho tlola litaelo tsa Jehova e le hore feela re qobe teko. Ka mohlala, haeba u loantšana le maikutlo a litšila, u se ke ua inehela tekong! Kopa Jehova hore a u thuse ho a loantša. Na u tobana le khanyetso ka lapeng? Mamella. Ikemisetse ho tsoela pele u sebeletsa Jehova. Hopola hore re lokela ho mamella, e le hore Molimo a tle a re amohele.—Bar. 5:3-5; Jak. 1:12. w16.04 2:15, 16

Rea tseba hore Jehova ha a nke hore batho ba merabe e meng ba phahametse ba bang. Kaofela rea tšoana ho eena. Ha se hore o batla hore re lahle setso sa rona. Empa le teng ha a batle hore re nke hore setso sa rona se phahametse sa ba bang. (Bar. 10:12) Ha rea lokela ho rata naha ea habo rona haholo hoo re nkang hore e phahametse tse ling. Ha re ikutloa ka tsela eo, re ka ’na ra thatafalloa ho lula re sa nke lehlakore. Ho ile ha e-ba joalo le mehleng ea baapostola. Bakreste ba bang ba Baheberu ba ile ba tšoara bahlolohali ba Bagerike ka leeme. (Lik. 6:1) Re ka bona ka eng haeba re qala ho ikhohomosa? Ha mora kapa morali’abo rona ea tsoang naheng e ’ngoe a fana ka tlhahiso, na u potlakela ho re, ‘Re etsa lintho ka tsela e fapaneng mona,’ ebe oa e hana? Haeba ho joalo, hopola keletso ena ea bohlokoa e hlahang temaneng ea letsatsi ea kajeno. w16.04 4:12, 13

Jesu o ne a phatlalatsa “litaba tse molemo tsa ’muso oa Molimo,” ’me o batla hore barutuoa ba hae ba etse se tšoanang. Ke batho bafe ba phatlalatsang molaetsa oo hohle? (Mat. 28:19) Ke Lipaki Tsa Jehova! Nahana ka seo moruti e mong eo e bileng moromuoa linaheng tse sa tšoaneng a se buileng ho Paki e ’ngoe ea Jehova. Ha a ntse a le linaheng tseo, o ile a botsa Lipaki Tsa Jehova hore na li phatlalatsa molaetsa ofe. O re: “Li tšerehane, kaha kaofela li ne li re: ‘Re bolela litaba tse molemo tsa ’Muso.’” Ha e le hantle mantsoe a moruti eo a bontša hore ha rea tšerehana, empa re Bakreste ba ’nete ba momahaneng. (1 Bakor. 1:10) ’Muso oa Molimo ke oona molaetsa o ka sehloohong oa Molula-Qhooa o Tsebahatsa ’Muso oa Jehova. Khoeli le khoeli ho hatisoa likopi tse ka bang 59 000 000 tsa makasine ena, ka lipuo tse 254, e leng se bolelang hore ke eona makasine e ajoang ka ho fetisisa lefatšeng. w16.05 2:6

Mohlomong u batla ho ba pula-maliboho. U entse liphetoho tse itseng bophelong ba hao, e le hore u be le nako e eketsehileng tšimong. Empa u ntse u sa kholiseha hore na u tla hle u lule u thabile ha u se u phela ka chelete e nyenyane le ka lintho tse fokolang. Ke ’nete hore Bibele ha e re re tlameha ho ba bo-pula-maliboho ha re sebeletsa Jehova. Re ka tsoela pele ho mo sebeletsa ka botšepehi re ntse re le bahoeletsi feela. Leha ho le joalo, Jesu o ile a re Jehova o hlohonolofatsa batho ba itelang molemong oa ’Muso. (Luka 18:29, 30) Bibele e boetse e re Jehova oa thaba ha re etsa sohle seo re ka se khonang tšebeletsong ea hae, ’me o batla hore re thabele ho mo sebeletsa. (Pes 119:108) Ha re kopa Jehova hore a re thuse lintlheng tsena re bile re thuisa ka tsona, re ka etsa qeto e nepahetseng le eo a tlang ho e hlohonolofatsa. w16.05 3:13

Bakreste ba holileng ha baa lokela ho tsoafa ho bala lihlooho tse buang ka bacha. Boholo ba mathata a tšohloang lihloohong tseo, a ama Bakreste bohle. Kaofela re lokela ho emela seo re se lumelang, ho laola maikutlo a rona, ho hana khatello ea lithaka le ho qoba ho tloaelana le batho ba sa itšoarang hantle le boithabiso bo sa lokang. Joale, na Bakreste ba holileng ha baa lokela ho bala lihlooho tse ngoletsoeng bacha? Che! Le hoja lihlooho tsena li ngoletsoe bacha, likeletso tsa tsona li tsoa Bibeleng ’me Bakreste bohle ba ka rua molemo ho tsona. Lihlooho tse ngoletsoeng bacha li ka boela tsa ba thusa ho matlafatsa kamano ea bona le Jehova. Empa li ka boela tsa matlafatsa le tumelo ea Bakreste ba holileng.—Moek. 12:13. w16.05 5:15, 16

“Jehova Molimo oa rōna ke Jehova a le mong.” Ruri mantsoe ana aa khothatsa. A ile a matlafatsa Baiseraele, a ba thusa hore ba mamelle maemo a boima ha ba kena Naheng e Tšepisitsoeng. Le rona a ka re matlafatsa kajeno e le hore re pholohe matšoenyeho a maholo ’me re thabele bophelo Paradeiseng. A re tsoeleng pele ho inehela ho Jehova ka ho feletseng. Re lokela ho mo rata le ho mo sebeletsa ka pelo, kelello le matla ’ohle a rona, ’me re sebetse ka thata ho boloka khotso le bonngoe ka phuthehong. Haeba re lula re etsa lintho tsena, Jesu o tla re khetha re le linku ’me re tla bona ha mantsoe ana a hae a phethahala: “Tloong, lōna ba hlohonolofalitsoeng ke Ntate, le rue ’muso oo le o lokiselitsoeng ho tloha ho thehoeng ha lefatše.”—Mat. 25:34. w16.06 3:2, 20

Boikhohomoso bo ka etsa hore re rate ho ikemela. Ha seo se etsahala, ha re sa tšoana le letsopa le bonolo. Na u kile oa khopisoa ke mora kapa morali oabo rona e mong? Na u kile oa utloa bohloko ka lebaka la ho lahleheloa ke tokelo ea tšebeletso? U ile oa itšoara joang? Na u ile oa ikhohomosa, kapa u ile oa hlokomela hore ke habohlokoa ho bopa khotso le mor’eno le ho lula u tšepahala ho Jehova? (Pes. 119:165; Bakol. 3:13) Ha motho a tloaetse ho etsa sebe le ho se pata, a ka ’na a thatafalloa ho amohela likeletso tse thehiloeng Bibeleng. Ho etsa sebe ho ka qetella e se e le ntho e sa reng letho ho eena. (Moek. 8:11) Mor’abo rona e mong ea neng a tloaetse ho shebella livideo tsa boitšoaro bo bobe, o re o ile a itloaetsa ho nyatsa-nyatsa baholo. Seo se ile sa senya kamano ea hae le Jehova. Empa baholo ba ile ba khona ho mo thusa ka mor’a hore ba bang ba hlokomele bothata ba hae. Ke ’nete hore kaofela ha rona ha rea phethahala. Empa haeba re tšoaea-tšoaea ba bang liphoso ha ba re eletsa kapa re ikemela ha re entse phoso, ho e-na le ho kopa Molimo hore a re tšoarele, lipelo tsa rona li tla thatafala. w16.06 2:5, 6

Bamameli ba Jesu ba ne ba tšoenyehile ka lintho tseo ba sa lokelang ho tšoenyeha ka tsona. Jesu o ne a e-na le lebaka le utloahalang la hore ba khaotse ho tšoenyeha. Ho tšoenyeha ho sa hlokahale, esita le ka lintho tseo re li hlokang e le hore re phele ho ka re ferekanya ’me ha re sitisa ho matlafatsa kamano ea rona le Molimo. Jesu o ne a amehile ka balateli ba hae hoo a ileng a ba lemosa ka boemo bona bo kotsi ka makhetlo a mang a mane Thutong ea hae ea Thabeng. (Mat. 6:27, 28, 31, 34) Jesu o ne a tseba hore na batho ba hloka’ng e le hore ba phele. Ho phaella moo, o ne a tseba mathata ao balateli ba hae ba neng ba tla tobana le ’ona “matsatsing a ho qetela.” Matsatsi ao a tla tšoauoa ka “linako tse mahlonoko tseo ho leng thata ho sebetsana le tsona.” (2 Tim. 3:1) Batho ba bangata ba hula ka thata ka lebaka la ho hloka mosebetsi, ho phahama ha theko ea lintho, bofutsana le ho haelloa ke lijo. Leha ho le joalo, Jesu o ne a boetse a tseba hore ‘moea ke oa bohlokoa ho feta lijo le ’mele ke oa bohlokoa ho feta liaparo.’ w16.07 1:8, 9

Haeba re ne re etsa lintho tsohle tseo Jehova a batlang hore re li etse, mosa oa hae o ne o tla be o re tšoanela. Empa rea hloleha. Ke kahoo Morena Solomone ea bohlale a ileng a ngola a re: “Ha ho motho ea lokileng lefatšeng ea tsoelang pele ho etsa se molemo ’me a sa etse sebe.” (Moek. 7:20) Moapostola Pauluse le eena o ile a re: “Bohle ba entse sebe ’me ba haelloa ke khanya ea Molimo.” A boela a re “moputso oo sebe se o lefang ke lefu.” (Bar. 3:23; 6:23a) Ke oona moputso o re tšoanelang. Empa kaha Jehova o rata batho, le hoja e le baetsalibe, o ile a ba bontša mosa o sa tšoanelang. Mpho e kholo ka ho fetisisa eo a ileng a re fa eona, ke “Mora oa hae ea tsoetsoeng a ’notši” ea ileng a tla lefatšeng ho tla re shoela. (Joh. 3:16) Kahoo, Pauluse o ile a ngola hore Jesu o “roesitsoe moqhaka oa khanya le tlhompho ka lebaka la hore o ile a utloisoa bohloko ke lefu, e le hore ka mosa o sa tšoanelang oa Molimo a ka latsoa lefu bakeng sa motho e mong le e mong.” (Baheb. 2:9) Ka sebele, “mpho eo Molimo a fanang ka eona ke bophelo bo sa feleng ka Kreste Jesu Morena oa rōna.”—Bar. 6:23b. w16.07 3:3, 4

Ho tloaelehile hore batho ba kene lenyalong. Ho hlahloba hore na lenyalo le simolohile joang le hore na morero oa lona ke ofe ho tla re thusa ho ba le boikutlo bo loketseng ka lona le ho le thabela haholoanyane. Ha Molimo a qeta ho bopa motho oa pele, e leng Adama, o ile a tlisa liphoofolo e le hore Adama a li rehe mabitso. Empa ‘motho o ne a se na mothusi eo e leng motlatsi oa hae.’ Ka hona, Molimo o ile a robatsa Adama boroko bo tebileng, eaba o nka khopo ea hae o mo etsetsa mosali ka eona, a ntan’o mo tlisa ho eena. (Gen. 2:20-24) Kahoo, lenyalo le simoloha ho Molimo. Jesu o ile a netefatsa hore ke Jehova ea ileng a re: “Monna o tla siea ntat’ae le ’m’ae ’me o tla khomarela mosali oa hae, ’me bao ba babeli e tla ba nama e le ’ngoe.” (Mat. 19:4, 5) Hore ebe Molimo o ile a sebelisa khopo ea Adama ha a bopa mosali oa pele, ho ne ho lokela ho bontša banyalani bao ba pele hore ke nama e le ’ngoe. Molimo o ne a sa rera hore ho be le tlhalo kapa hore motho a nyale sethepu. w16.08 1:1, 2

Jesu o ne a atisa ho buisana le batho ka ’Muso. Mohlala, o ile a ba le puisano e ntle le mosali e mong pel’a seliba sa Jakobo, se haufi le motse oa Sikare. (Joh. 4:5-30) O ile a boela a buisana le molekhetho e mong oa Molevi ea bitsoang Matheu. Matheu le ba bang ba ne ba utloile ha Jesu a bua moketeng o neng o tšoaretsoe lelapeng la Matheu. (Mat. 9:9; Luka 5:27-39) Ketsahalong e ’ngoe, Jesu o ile a bua hantle le Nathanaele, ea neng a sa rate batho ba tsoang Nazaretha. Qetellong, Nathanaele o ile a susumelletseha ho fetola tsela eo a nahanang ka eona. O ile a etsa qeto ea ho mamela seo Jesu oa Nazaretha a se rutang. (Joh. 1:46-51) Kahoo, re na le lebaka le utloahalang la ho rupela bahoeletsi ba bacha hore ba buisane le batho ka tsela e botsoalle ba bile ba phutholohile. Ha re ba thusa ka tsela ena ba ka ’na ba thabela ho bona kamoo batho ba lipelo li ntle ba mamelang molaetsa kateng ha ho buuoa le bona ka tsela e mosa. w16.08 4:7-9

Haeba banyalani ba e-na le mathata a tebileng a tsoelang pele, seo se ka ’na sa etsa hore molekane e mong kapa ka bobeli ba batle ho arohana kapa ho hlalana. Ha balekane ba arohana, eo ke taba e tebileng. Ho ka ’na ha bonahala eka ho molemo hore balekane ba arohane ha ba e-na le mathata a tebileng, empa karohano e atisa ho hlahisa mathata a eketsehileng. Ka mor’a hore Jesu a phete seo Molimo a se buileng ha a re monna o tla siea ntat’ae le ’m’ae, ’me a khomarele mosali oa hae, o ile a re: “Seo Molimo a se kopantseng hammoho jokong ho se ke ha e-ba le motho ea se arolang.” (Mat. 19:3-6; Gen. 2:24) Sena se bolela hore esita le banyalani ka bobona ha baa lokela ‘ho arola seo Molimo a se kopantseng hammoho.’ Jehova o nka lenyalo e le tlamo ea bophelo bohle. (1 Bakor. 7:39) Haeba balekane ba hopola hore kaofela ha rona re tla ikarabella ka pel’a Molimo, seo se tla ba susumelletsa ho rarolla liqabang ka potlako e le hore li se ke tsa fetoha mathata a tebileng. w16.08 2:10, 11

Lira tsa rona li ka ’na tsa re tsometsa kapa tsa re hlasela ha re nyahame, kahoo re lokela ho lula re falimehile. Keletso e reng ‘re se ke ra itlohella hore re hloloe ke bobe’ e bontša hore re ka bo hlola. Re ka bo hlola haeba re bo loantša. Ka lehlakoreng le leng, haeba re khaotsa ho loantša lira tsa rona, e leng Satane le lefatše la hae le khopo hammoho le ho se phethahale ha rona, li ka re hlola. U se ke oa lumella Satane hore a u nyahamise! (1 Pet. 5:9) E le hore re atlehe, ha rea lokela ho lebala sepheo sa rona sa ho loana. Ba batlang hore Molimo a ba amohele le ho ba hlohonolofatsa, ba lokela ho lula ba hopola mantsoe ana a ho Baheberu 11:6, a reng: “Ea atamelang Molimo o lokela ho lumela hore o teng le hore e ba moputsi oa ba mo batlang ka tieo.” Leetsi la Segerike le fetoletsoeng e le ‘ho batla ka tieo’ le fana ka maikutlo a ho ikitlaetsa kapa ho leka ka matla.—Lik. 15:17. w16.09 2:4, 5

Lentsoe la Molimo le re fa tataiso e ka re thusang hore re etse liqeto tse bohlale tse tlotlisang Molimo. Empa batho ha ba tšoane. Re khetha liaparo tse sa tšoaneng kaha le maemo a rona a lichelete ha a tšoane. Leha ho le joalo, re lokela ho apara ka tsela e makhethe, e hlomphehang le e amohelehang sebakeng seo re lulang ho sona. Ke ’nete hore ka linako tse ling ha ho bonolo ho etsa qeto e bontšang kahlolo e molemo, hobane u nahanne ka lintlha tsohle tse amehang. Mabenkele a mangata a rekisa liaparo tsa feshene, kahoo ho hlokahala hore u iphe nako ’me u etse boiteko e le hore u fumane liaparo tse hlomphehang, tse sa u penyeng. Balumeli-’moho le uena ba tla hlokomela le ho ananela boiteko boo u bo entseng ba ho fumana liaparo tse hlomphehang. Le uena u tla thaba ha u lemoha hore seo se tlotlisa Jehova, Ntate oa rōna ea lerato. w16.09 3:15, 16

Bana ba na le mohopolo o chatsi. Kahoo batsoali, lekang ho sebelisa lipapiso ha le ba ruta. Lipapiso tse loketseng li ka thusa ho kholisa ngoana hore Bibele e nepahetse. Ka mohlala, nahana ka temana ea kajeno. U ka bontša ngoana joang hore temana ee e bululetsoe? U ka mo bolella lintlha tse pakang seo. Empa u ka boela oa mo thusa hore a sebelise kelello ea hae. Mo hopotse hore Jobo o phetse nako e telele pele ho e-ba le libonela-hole le lifofa-sebakeng. U ka ’na oa re a bontše hore na ke hobane’ng ha batho ba bang ba ka ’na ba thatafalloa ho lumela hore ntho e kholo joaloka lefatše, e lutse holim’a lefeela. A ka ’na a nka bolo kapa lejoe ho bontša hore ntho leha e le efe e boima e batla ho tšehetsoa. Sena se ka ’na sa kholisa ngoana hore Jehova o tlalehile lintho tse nepahetseng ka Bibeleng, nako e telele pele batho ba li sibolla.—Neh. 9:6. w16.09 5:9, 12

Tumelo ha se feela taba ea ho utloisisa morero oa Molimo. Ke matla a susumetsang motho hore a etse lintho tse tumellanong le thato ea Molimo. Ho ba le tumelo ho Molimo ho susumetsa motho hore a bolelle ba bang litaba tse molemo. Tšepo ea rona ea ho phela ka ho sa feleng lefatšeng le lecha la Molimo e itšetlehile ka hore re be le tumelo ’me re e boloke e le matla. Tumelo ea rona e lokela ho lula e le matla feela joalokaha semela se hloka metsi e le hore se hole. Ho fapana le semela sa maiketsetso, semela sa sebele se lula se fetoha. Sea shoa haeba se sa fumane metsi a lekaneng, empa sea hola ha se hlokometsoe hantle. Haeba semela se sa fumane metsi a lekaneng, qetellong se tla shoa. Hoa tšoana le ka tumelo ea rona. E tla fela haeba re sa e matlafatse. (Luka 22:32; Baheb. 3:12) Empa haeba re lula re matlafatsa tumelo ea rona, e tla lula e tiile ebile e “hōla” ’me re tla ‘phela hantle tumelong.’—2 Bathes. 1:3; Tite 2:2. w16.10 4:4, 5

Ha Daniele le metsoalle ea hae ba le botlamuoeng, Bababylona ba ile ba leka ho ba susumetsa hore ba latele meetlo ea bona ka ho ba ruta “puo ea Bakalde.” Ho phaella moo, molaoli oa lekhotla ea neng a ba rupela o ile a ba reha mabitso a Sebabylona. (Dan. 1:3-7) Daniele o ile a rehoa lebitso la Beltsatsare le akarelletsang la molimotsana ea ka sehloohong oa Bababylona, e leng Bel. Ho ka etsahala hore Morena Nebukadnezare o ne a batla hore Daniele a nke hore Molimo oa hae, Jehova, o ka tlaase ho molimotsana eo oa Bababylona. (Dan. 4:8) Le hoja ho ne ho itsoe Daniele a ka ja limenyemenye tsa morena, o ile a “etsa qeto ka pelong ea hae” hore a ke ke “a itšilafatsa.” (Dan. 1:8) Kaha o ile a tsoela pele a ithuta “libuka” tse halalelang ka puo ea hae, o ile a lula a e-na le kamano e ntle le Molimo ha a le naheng e ’ngoe. (Dan. 9:2) Ke kahoo le ka mor’a lilemo tse 70 a le Babylona, a neng a ntse a bitsoa ka lebitso la hae la Seheberu.—Dan. 5:13. w16.10 2:7, 8

Jesu o khethile “lekhoba le tšepahalang” hore ebe oona feela mocha o fanang ka lijo tsa moea. (Mat. 24:45-47) Ho tloha ka 1919, Jesu Kreste ea tlotlisitsoeng o ’nile a sebelisa lekhoba leo ho thusa balateli ba hae hore ba utloisise Lentsoe la Molimo le hore ba latele litaelo tsa lona. Ha re mamela litaelo tse ka Bibeleng, re etsa hore phutheho e hloeke, e be le khotso le bonngoe. E mong le e mong oa rona o lokela ho ipotsa: ‘Na ke latela mocha oo Jesu a o sebelisang kajeno? Lentsoe la Jehova le re hlalosetsa karolo e leholimong ea mokhatlo oa hae. Ka mohlala, moprofeta Ezekiele o ile a bontšoa pono, eo ho eona karolo e leholimong ea mokhatlo oa Molimo, e neng e tšoantšetsoa ke koloi ea leholimo. (Ezek. 1:4-28) Kaha haufinyane Kreste le mangeloi a tšepahalang ba tl’o felisa lefatše lena le khopo, koloi ea Jehova e tsamaea ka lebelo e le hore ho tlosoe qoso bobusing ba hae ’me lebitso la hae le halaletsoe! w16.11 3:9, 10

Re bokana hammoho ho ithuta le ho khothatsana, feela joaloka balateli ba Jesu ba lekholong la pele la lilemo. (1 Bakor. 14:31) Esita le batho bao e leng khale ba sebeletsa Molimo ba hloka ho khothatsoa. Nahana ka Joshua. O ne a qetile lilemo tse ngata a sebeletsa Molimo ka botšepehi. Empa Molimo o ile a re ho Moshe: “U laele Joshua u mo khothatse ’me u mo matlafatse, hobane ke eena ea tla tšela ka pel’a sechaba sena ’me ke eena ea tla etsa hore se rue naha eo u tla e bona.” (Deut. 3:27, 28) Joshua o ne a le mothating oa ho jara boikarabelo bo matla ba ho etella pele Baiseraele ho ea hapa Naha e Tšepisitsoeng. O ne a tla tobana le maemo a thata, a be a hloloe ntoeng, mohlomong ka lekhetlo le le leng. (Josh. 7:1-9) Ke kahoo a neng a hloka ho khothatsoa le ho matlafatsoa. Ka hona a re khothatseng baholo, ho akarelletsa le balebeli ba potoloho, kaha ba sebetsa ka thata ho hlokomela mohlape oa Molimo.—1 Bathes. 5:12, 13. w16.11 1:12, 13

Liithuti Tsa Bibele li ne li nka hore ha hoa lekana ho bolella ba leloko, metsoalle le litho tsa kereke hore na li ikutloa joang ka bolumeli ba bohata. Batho bohle ba ne ba lokela ho tseba hore Babylona e Moholo ke seotsoa. Kahoo, ho tloha ka December 1917 ho fihlela mathoasong a 1918, Liithuti Tsa Bibele li ile tsa aba likopi tse 10 000 000 tsa pampitšana e reng “Ho oa ha Babylona,” e neng e nyatsa Bokreste ba bohata ka matla. Joalokaha u ka inahanela, seo se ile sa halefisa baruti haholo, empa ha sea ka sa nyahamisa Liithuti Tsa Bibele. Li ne li ikemiselitse ho “mamela Molimo e le ’musi ho e-na le batho.” (Lik. 5:29) See se bontša’ng? Se bontša hore Bakreste ba ne ba itokolotse botlamuoeng ba Babylona e Moholo nakong ea ntoa, ’me ba ikemiselitse ho thusa ba bang hore le bona ba tsoe botlamuoeng. w16.11 5:2, 4

Batho ba bang ba ka ’na ba nahana hore ho bapisoa Bakreste le bao eseng Bakreste. Leha ho le joalo, Pauluse o ne a ngolla batho “ba leng Roma e le baratuoa ba Molimo, ba bitselitsoeng ho ba bahalaleli.” (Bar. 1:7) Kahoo, Pauluse o ne a bapisa Bakreste ba tsamaeang tumellanong le nama le Bakreste ba tsamaeang tumellanong le moea. O ne a nka ho phela “tumellanong le nama” e le ho phela ka “litakatso tsa boetsalibe” tse neng li sebetsa lithong kapa ’meleng ea bona. (Bar. 7:5) Joale ha Pauluse a ne a bua ka ‘ba behang likelello tsa bona linthong tsa nama,’ o ne a bua ka batho ba laoloang kapa ba ikemiselitseng ho khotsofatsa litakatso tsa bona tsa boetsalibe. Ba latela litakatso tsa bona tse mpe tsa ho kopanela liphate kapa litakatso leha e le life tse ling. w16.12 2:5, 7

Ka linako tse ling, motho a ka tšoenngoa ke liphoso tseo a ileng a li etsa nakong e fetileng. Ka linako tse ling Morena Davida o ne a nyahamisoa ke liphoso tsa hae. O ile a re: “Ke lumaetse ka lebaka la ho bobola ha pelo ea ka.” (Pes. 38:3, 4, 8, 18) Davida o ile a etsa’ng boemong boo? O ne a tšepa hore Jehova o mosa ebile oa tšoarela. (Pes. 32:2, 3, 5) Ka linako tse ling, u ka tšoenngoa ke lintho tse etsahalang hona joale. Mohlala, ha Davida a ngola Pesaleme ea 55, o ne a khathatsehile ka bophelo ba hae. (Pes. 55:2-5) Empa o ne a sa lumelle hore ho khathatseha ha hae ho etse hore a se ke a hlola a tšepa Jehova. Davida o ne a lula a rapela ka mathata a hae empa o ne a boetse a tseba hore o lokela ho etsa ho hong e le hore a sebetsane ka katleho le lintho tse mo tšoenyang. (2 Sam. 15:30-34) U ka ithuta ho itseng ho Davida. Ho e-na le hore u nyahamisoe ke ho tšoenyeha, leka ho sebetsana le mathata a hao ’me u siee litaba matsohong a Jehova. w16.12 3:14, 15

Davida o ile a amohela khalemelo ea Jehova e tsoang ho moprofeta Nathane. O ile a bolella Jehova libe tsa hae ka thapelo, a mo kopa ka tieo hore a mo hauhele. (Pes. 51:1-17) Davida o ile a ithuta liphosong tsa hae ho e-na le ho itlohella hore a jeoe ke letsoalo le molato bophelo bohle ba hae. Ka sebele, ha aa ka a pheta libe tseo tse tebileng. Hamorao o ile a shoa a tšepahala ’me o ntse a lutse mohopolong oa Jehova. (Baheb. 11:32-34) Re ka ithuta’ng mohlaleng oa Davida? Haeba re oela sebeng se tebileng re lokela ho baka e le kannete ’me re kope Jehova hore a re tšoarele. Re lokela ho bolela libe tsa rona ho eena. (1 Joh. 1:9) Re boetse re tlameha ho ea ho baholo e le hore ba re fe thuso e loketseng. (Jak. 5:14-16) Ha re amohela litokisetso tsa Jehova, re bontša hore rea lumela hore o tla re folisa a be a re tšoarele. Ka mor’a moo, re tla be re etsa hantle ha re ithuta liphosong tsa rona ebe re tsoela pele re sebeletsa Jehova, re e-na le tšepo ka bokamoso.—Baheb. 12:12, 13. w17.01 1:13, 14

“Ho iketelletsa pele” ho bolela’ng? Ha motho a potlakela ho etsa ntho eo a sa lumelloang ho e etsa, o iketelletsa pele. Kaha ha rea phethahala, kaofela ha rona re iketelletsa pele ka linako tse ling. Empa joalokaha re bone mohlaleng oa Morena Saule, haeba re tloaela ho iketelletsa pele, Molimo a ke ke a re amohela. Pesaleme ea 119:21 e re Jehova o ‘khalemela ka matla ba iketelletsang pele.’ Ke hobane’ng ha a ba khalemela? Ho iketelletsa pele ha ho tšoane le ho etsa ntho ka phoso. Motho ea iketelletsang pele, o hloleha ho fa Jehova tlhompho e mo tšoanelang joaloka ’Musi. Ho feta moo, haeba re etsa lintho tseo re sa lumelloang ho li etsa, re tla qabana le batho ba bang. (Liprov. 13:10) Hape, haeba ho totobala hore re entse lintho ka ho iketelletsa pele, seo se ka re soabisa sa ba sa re theola seriti. (Luka 14:8, 9) Ha ho mohla ho iketelletsa pele ho fellang hantle. Empa joalokaha Mangolo a bontša, ho ikokobetsa ho fella hantle ka linako tsohle. w17.01 3:4, 5

Kaha Adama le Eva ba ne ba se ba sa phethahala, ba ne ba ke ke ba hlola ba bontša makhabane a Jehova ka tsela e phethahetseng. Adama ha aa lahleheloa ke bokamoso bo botle feela empa o ile a boela a fetisetsa ho se phethahale, sebe le lefu ho bana ba hae. (Bar. 5:12) O ile a etsa hore litloholo tsa hae li se ke tsa e-ba le monyetla oa ho phela ka ho sa feleng. Ho feta moo, Adama le Eva ba ne ba ke ke ba hlola ba e-ba le bana ba phethahetseng ’me le bana ba bona ba ne ba ke ke ba e-ba le bana ba phethahetseng. Ka mor’a hore Satane Diabolose a khelose Adama le Eva, o ile a tsoela pele ho khelosa batho ho fihlela mehleng ena. (Joh. 8:44) Leha ho le joalo, Molimo o ile a tsoela pele a rata batho. Ho sa tsotellehe bofetoheli ba Adama le Eva, Jehova o batla hore batho ba be le kamano e ntle le eena. Ha a lakatse hore leha e le mang a shoe. (2 Pet. 3:9) Le hoja melao ea Molimo e sa ka ea fetoha, hang feela ka mor’a bofetoheli boo, o ile a etsa litokisetso tsa hore batho ba boele ba be le kamano e ntle le eena.—Joh. 3:16. w17.02 1:12-14

Ho bontša kananelo tšebeletsong ea rona ho Jehova, ho re thusa ho sheba lintho tse ntle tseo batho ba bang ba li etsang. Ho e-na le ho rata ho bonoa ke batho kapa ho bolella batho ba bang seo ba lokelang ho se etsa, re lokela ho ikokobetsa ka hore re ba kope likeletso re be re ba mamele. Re tla thaba le ba bang ha ba fuoa litokelo. Re leboha Jehova ha re bona a hlohonolofatsa “mokhatlo oohle oa barab’abo [rona] lefatšeng.” (1 Pet. 5:9) Hape re tla khona ho sheba lintho ka tsela eo Molimo a li shebang ka eona. Ha re bala Bibele kamehla, re rapela ebile re sebelisa seo re ithutileng sona, re tla matlafatsa matsoalo a rona. (1 Tim. 1:5) Re lokela ho beha lithahasello tsa ba bang pele ho tsa rona. Haeba re etsa lintho tsena, Jehova o tšepisa hore o tla ‘qetella koetliso ea rona’ ’me a re thuse hore re hlaolele boinyenyefatso.—1 Pet. 5:10. w17.01 4:17, 18

Re boetse re lokela ho hlompha Bakreste-’moho le rona, haholo-holo ba re etellang pele. Re hlompha bara bana babo rona ho sa tsotellehe boemo ba bona ba lichelete, hore na ba tsoa naheng efe, ba rutehile hakae kapa ba tumme hakae. Bibele e re ke “limpho [tseo e leng] banna,” ’me ke bona bao Molimo a ba khethileng hore ba hlokomele litlhoko tsa batho ba hae. (Baef. 4:8) Ba akarelletsa baholo, balebeli ba potoloho, litho tsa Komiti ea Lekala le tsa Sehlopha se Busang. Bakreste ba mehleng ea baapostola ba ne ba hlompha ba etellang pele ’me le rona re etsa se tšoanang. Ha re rapele bara bao babo rona ebile ha re ba bona ha re itšoare joalokaha eka re bona mangeloi. Leha ho le joalo, rea ba hlompha ka lebaka la mosebetsi oa bona o boima le boikokobetso boo ba bo bontšang.—2 Bakor. 1:24; Tšen. 19:10. w17.03 1:13

Heroda Agripa I, e ile ea e-ba morena oa Judea ’me o ne a fapane le Jesu. Sebokeng se seng se khethehileng Heroda o ile a apara “liaparo tsa borena.” Letšoele le ile la hoeletsa la re: “Ke lentsoe la molimo, eseng la motho!” Heroda o ile a nka thoriso eo e le ea hae. Empa “hang-hang lengeloi la Jehova la mo otla, hobane ha aa ka a tlotlisa Molimo; a jeoa ke libōkō ’me a shoa.” (Lik. 12:21-23) Ho ne ho bonahala hantle hore Heroda o ne a sa khethoa ke Jehova hore e be moeta-pele. Jesu eena ka lehlakoreng le leng, ho ne hlakile hore o khethiloe ke Molimo ’me o ile a tsoela-pele ho tlotlisa Jehova, e leng Moeta-pele ea ka Sehloohong. Jesu o ne a sa khetheloa ho ba moeta-pele ka lilemo tse ’maloa feela. Ka mor’a tsoho ea hae o ile a re: “Ke filoe matla ’ohle leholimong le lefatšeng . . . ’Me, bonang! ke na le lōna ka matsatsi ’ohle ho fihlela qetellong ea tsamaiso ea lintho.”—Mat. 28:18-20. w17.02 3:20, 21