June

Jehova o ile a hlohonolofatsa Bakreste ba mehleng ea baapostola ha ba ntse ba tloaelana le maemo a feto-fetohang. Hangata ba ne ba hlorisoa ’me ka linako tse ling ba ne ba hlorisoa ba sa lebella. Nahana ka se ileng sa etsahalla Barnabase le moapostola Pauluse ha ba ne ba etsa mosebetsi oa ho bolela Listra. Qalong batho ba ne ba ba amohela ’me ba ba mamela. Hamorao, bahanyetsi ba ile “ba hlohlelletsa batho” ’me ba bang ba bona ba ile ba tlepetsa Pauluse ka majoe ’me ba mo tlohela ba nahana hore o shoele. (Lik. 14:19) Empa Barnabase le Pauluse ba ile ba tsoela pele ba ntse ba bolela litaba tse monate libakeng tse ling. Ho ile ha etsahala’ng ka mor’a moo? Ba ile ba thusa “batho ba bangata hore e be barutuoa” ‘me ba ile ba matlafatsa Bakreste-’moho le bona ka seo ba ileng ba se bua le ho se etsa. (Lik. 14:​21, 22) Batho ba bangata ba ile ba khothatsoa ke ho bona Barnabase le Pauluse ba tsoela pele ho bolela litaba tse monate le hoja ba hlorisoa. Jehova o tla re hlohonolofatsa haeba re sa khaotse ho etsa mosebetsi oo a re fileng oona. w23.04 16-17 ¶13-14

Morena Davida o ile a kopana le lira tse ngata tse kotsi bophelong ba hae ’me hangata o ne a kopa Jehova hore a mo thuse. Davida o ne a kholisehile hore Jehova o utloa lithapelo tsa hae ebile oa li araba. Le uena u ka kholiseha joaloka eena. Bibele ea re tiisetsa hore Jehova a ka re fa bohlale le matla a ho mamella mathata. A ka sebelisa Bakreste-’moho le rona kapa batho ba sa mo sebeletseng ho re thusa. Le hoja Jehova a sa arabele lithapelo tsa rona ka tsela eo re e lebeletseng, rea tseba hore oa li araba. O re fa lintho tseo re li hlokang ka nako eo re li hlokang ka eona. Kahoo u lule u rapela Jehova u tšepile hore o tla u utloa. U kholisehe hore Jehova o tla u thusa hona joale le hore o tla “khotsofatsa lintho tsohle tse phelang” lefatšeng le lecha.—Pes. 145:16. w23.05 8 ¶4; 13 ¶17-18

Ho nahana ka melemo eo u tla e fumana ha u se u finyeletse seo u batlang ho se etsa ho tla u tsoela molemo. Uena u ka nahana ka melemo efe? Haeba u batla ho ntlafatsa tsela eo u balang Bibele ka eona kapa lithapelo tsa hao, nahana kamoo ho etsa seo ho tla u thusa hore u lule u le motsoalle oa Jehova. (Pes. 145:​18, 19) Haeba ho na le makhabane ao u batlang ho ba le ’ona, nahana kamoo a ka u thusang kateng hore u utloane le batho ba bang. (Bakol. 3:14) U ka ngola mabaka ao u nang le ’ona a ho batla ho finyella seo u batlang ho se etsa. Lula u sheba mabaka ao hape lula u e-na le batho ba u khothaletsang hore u finyelle lintho tseo u batlang ho li etsa. (Liprov. 13:20) Ho na le matsatsi ao kaofela ha rona re ikutloang re se na tabatabelo ea ho etsa lintho tseo re li rerileng. Na see se bolela hore re ke ke ra finyella lintho tseo re batlang ho li etsa? Che. Le rona re ka leka ho etsa ntho eo re e rerileng le hoja ka linako tse ling re ka utloa re sa batle ho e etsa. Ke ’nete hore u tla lokela ho sebetsa ka thata empa u tla thaba ha u se u finyeletse seo u neng u se rerile. w23.05 27-28 ¶5-8

Ha re tseba hore rea ikarabella ka liqeto tseo re li entseng, seo se ka etsa hore re bolele libe tsa rona, re lokise liphoso tseo re li entseng ’me re qobe ho li pheta. Ho etsa joalo ho ka re thusa hore re lule re le peisong ea bophelo. Amohela hore u ke ke oa fetola lintho tseo u li entseng nakong e fetileng. U se ke oa ikimetsa ka ho ipeha molato le ho beha batho ba bang molato kapa oa ipehela mabaka. Amohela liphoso tseo u li entseng ’me u leke ho etsa lintho ka tsela e nepahetseng hona joale. Haeba u ikutloa u le molato ka ntho e mpe eo u e entseng, rapela Jehova, u lumele hore u entse phoso ’me u mo kope hore a u tšoarele. (Pes. 25:11; 51:​3, 4) Kopa tšoarelo ho batho bao u ba utloisitseng bohloko ’me haeba ho hlokahala, bua le baholo u kope hore ba u thuse. (Jak. 5:​14, 15) Ithute liphosong tseo u li entseng ’me u leke hore u se ke oa li pheta. Haeba u etsa joalo u ka kholiseha hore Jehova o tla u hauhela a be a u thuse.—Pes. 103:​8-13. w23.08 28-29 ¶8-9

Jehojada o ile a thusa Morena Joase hore e be motho ea molemo. Kahoo, ha morena enoa a sa le monyenyane, o ne a batla ho thabisa Jehova. Empa ka mor’a hore Jehojada a shoe, Joase o ile a mamela likhosana tsa bakoenehi. (2 Likron. 24:​4, 17, 18) Jehova o ile a utloa bohloko haholo ’me “a ’na a romela baprofeta ho bona hore ba khutlele ho eena . . . empa ha baa ka ba mamela.” Ba ile ba boela ba hana ho mamela mora oa Jehojada e leng Zakaria eo e neng e le moprofeta oa Jehova le moprista hape e le motsoala oa Joase. Morena Joase o ile a ba a bolaea Zakaria. (2 Likron. 22:11; 24:​19-22) Joase ha aa ka a lula a hlompha Jehova. Jehova o ne a ile a re: “Ba ’nyatsang ba tla nyatsuoa.” (1 Sam. 2:30) Masole a fokolang ka palo a Siria a ile a hlola “masole a mangata” a Joase ’me a mo ‘lematsa haholo.’ (2 Likron. 24:​24, 25) Joase o ile a bolaoa ke bahlanka ba hae hobane a ile a bolaea Zakaria. w23.06 18-19 ¶16-17

Moapostola Pauluse o ne a ile a qeta nako a le Efese, a bolela a bile a ruta litaba tse monate. (Lik. 19:​1, 8-10; 20:​20, 21) O ne a rata bara babo haholo a bile a batla ho ba thusa hore ba lule ba tšepahalla Jehova. Batho ba Efese ba ne ba le bolumeling ba bohata ba bile ba lumela boselamose. Batho ba Efese ba ne ba itšoere hampe haholo ba bile ba sa soabele boitšoaro ba bona bo bobe. Hangata lipapaling tsa kalaneng le meketeng ea bolumeli ho ne ho buuoa puo e litšila. (Baef. 5:3) Batho ba bangata Efese ba ne “ba se na mekhoa ho hang,” e leng polelo eo ka Segerike e bolelang hore ba ne ba “khaotsa ho utloa bohloko.” (Baef. 4:​17-19) Pele ba ithuta ka melao ea Jehova ea se nepahetseng le se fosahetseng, letsoalo la bona le ne le sa ba tšoenye ha ba entse ntho e fosahetseng. Ke kahoo Pauluse a neng a ka re ka bona: “Likelello tsa bona li lefifing, ba suthetse hole le bophelo bo tsoang ho Molimo.” Leha ho le joalo, ba bang ba Baefese ha baa ka ba lula ba le lefifing. w24.03 20 ¶2, 4; 21 ¶5-6

Mosebetsi oa Gideone oa ho ba moahloli o ne o hloka hore a sebetse ka thata. Ha Gideone a ne a loantša Bamidiane bosiu, ba ile ba baleha eaba oa ba lelekisa ho tloha Khohlong ea Jezriele ho ea fihla Nokeng ea Jordane. (Baahl. 7:22) Na Gideone o ile a tlohela ho ba lelekisa ha a fihla Nokeng ea Jordane? Che, le hoja a ne a khathetse, eena le banna bao a neng a e-na le bona ba 300 ba ile ba tšela ’me ba tsoela pele ho ba lelekisa. Qetellong ba ile ba tšoara Bamidiane ’me ba ba hlola. (Baahl. 8:​4-12) Gideone o ne a kholisehile hore Jehova o tla mo fa matla ’me ha aa ka a soetseha. (Baahl. 6:​14, 34) Ho na le nako eo ka eona Gideone le banna bao a neng a e-na le bona ba neng ba lelekisa marena a mabeli a Bamidiane, ao ho ka etsahalang hore ebe a ne a baleha a palame likamele. (Baahl. 8:​12, 21) Leha ho le joalo, Molimo o ile a ba thusa hore ba a tšoare ’me ba a hlole. Baholo le bona ba ka tšepa Jehova eo ho seng “mohla a khathalang kapa hona ho tepella.” O tla ba fa matla ao ba a hlokang.—Esa. 40:​28, 29. w23.06 6 ¶14, 16

Re ka lula re tšepahala ho sa tsotellehe mathata a re hlahelang. Kahoo, tšepa Jehova. Nahana kamoo Barake a ileng a atleha kateng hobane a ile a tšepa tataiso ea Jehova. Le hoja ho ne ho se na thebe kapa lerumo naheng, Jehova o ile a mo laela hore a e’o loantša masole a Bakanana a neng a e-na le libetsa, a neng a etelloa pele ke Sisera. (Baahl. 5:8) Moprofeta Debora o ile a bolella Barake hore a theohe e le hore a e’o loantša Sisera le masole a hae a palameng likariki tsa ntoa tse 900. Barake o ile a mamela taelo eo le hoja a ne a tseba hore ho tla ba thata ho loantša masole ao a palameng likariki sebakeng seo se tlase. Ha masole a theoha Thabeng ea Tabore, Jehova o ile a etsa hore pula e ne haholo. Likariki tsa ntoa tsa Sisera li ile tsa tšoaroa ke seretse ’me Jehova o ile a etsa hore Barake a hlole. (Baahl. 4:​1-7, 10, 13-16) Ka ho tšoanang, Jehova o tla re thusa hore re hlole mathata haeba re mo tšepa ebile re tšepa le mokhatlo oa hae. w23.07 19 ¶17-18

Re hloka ho ba le mamello e le hore re fumane bophelo bo sa feleng. Re lokela ho ba le mamello joaloka bahlanka ba Molimo ba mehleng ea khale ’me re emele hore Molimo a phethahatse litšepiso tsa hae. (Baheb. 6:​11, 12) Bibele e bapisa boemo ba rona le ba motho ea lemang. (Jak. 5:​7, 8) Motho ea lemang o sebetsa ka thata ho lema le ho nosetsa lijalo tsa hae empa ha a tsebe hantle hore na li tla mela neng. Kahoo, o leta a sa fele pelo, a tšepile hore o tla kotula. Ka tsela e tšoanang, le rona re lula re phathahane ka mosebetsi oa Morena le hoja re sa “tsebe hore na Morena oa [rona] o tla ka letsatsi lefe.” (Mat. 24:42) Re leta ka mamello re kholisehile hore ka nako e nepahetseng Jehova o tla phethahatsa litšepiso tsa hae kaofela. Haeba re felloa ke mamello, re ka qetella re khathetse ke ho leta eaba re tlohela ho sebeletsa Jehova butle-butle. Re ka boetse ra lelekisa lintho tseo re nahanang hore li tla re khotsofatsa hona joale. Empa haeba re sa fele pelo, re ka mamella ho fihlela qetellong eaba rea pholoha.—Mik. 7:7. w23.08 22 ¶7

Ha re bapisa boprofeta bo ho Tšenolo le bo ho Daniele bo kang bo hlahang ho Daniele 2:​41-43, re ka re maoto a emela ’Muso oa Manyesemane le Maamerika e leng ’muso o matla ka ho fetisisa lefatšeng mehleng ena. Daniele o re “’muso oo o tla ba le likarolo tse matla le tse fokolang.” Ke hobane’ng ha o na le likarolo tse fokolang? Ke hobane batho ba tšoantšetsoang ke letsopa le bonolo ba sitisa ’muso ona hore o bonahatse matla a oona a kang tšepe. Re ithuta lintlha tsa bohlokoa tlhalosong ea setšoantšo se seholo seo Daniele a se boneng torong. Ntlha ea pele, re ka ithuta tsela eo ’Muso oa Lefatše oa Manyesemane le Maamerika o ileng oa bontša matla a oona kateng. Ka mohlala, ke oona o ka sehloohong o ileng oa hlola Ntoeng ea Pele le ea Bobeli ea Lefatše. Leha ho le joalo, ’muso ona oa Manyesemane le Maamerika haesale o ntse o fokola ’me o tla tsoela pele o fokola. O fokolisoa ke hobane batho ba busoang ke oona baa loantšana ebile ba loantša ’muso ona. Ntlha ea bobeli eo re ka ithutang eona ke hore ’Muso oa Lefatše oa Manyesemane le Maamerika e tla ba ’muso oa ho qetela o busang pele ’Muso oa Molimo o busa lefatšeng. w23.08 10-11 ¶12-13

Ka linako tse ling Davida o ne a ikutloa a imetsoe ke mathata le liteko tseo a neng a kopana le tsona. (Pes. 18:​4, 5) Empa lerato leo Jehova a mo ratang ka lona le tlhokomelo ea hae li ile tsa mo khatholla. Jehova o ile a isa motsoalle oa hae ea khathetseng “makhulong a tletseng joang” le “libakeng tse nang le metsi a mangata moo [a] tla phomola teng.” Ka lebaka leo, Davida o ile a boela a ba matla hape ’me a tsoela pele a sebeletsa Jehova a thabile. (Pes. 18:​28-32; 23:2) Ka tsela e tšoanang, mehleng ena “ha re e-s’o timele hobane Jehova o lerato” ha re kopana le liteko le mathata bophelong. (Lillo 3:22; Bakol. 1:11) Hangata bophelo ba Davida bo ne bo lula bo le kotsing a bile a e-na le lira tse ngata tse matla. Leha ho le joalo, lerato leo Jehova a mo ratang ka lona le ile la etsa hore a ikutloe a bolokehile a bile a sireletsehile. Davida o ne a utloa hore Jehova o na le eena maemong ’ohle ’me seo se ne se etsa hore a khaotse ho tšoenyeha. Ke kahoo a ileng a bina a re: “[Jehova] o ile a mpholosa linthong tsohle tseo ke li tšabang.” (Pes. 34:4) Le hoja ka linako tse ling Davida a ne a ikutloa a tšohile haholo, o ne a khona ho hlola tšabo eo hobane a tseba hore Jehova oa mo rata. w24.01 30 ¶15-17

Ithute liqetong tse fosahetseng tseo Joase a ileng a li etsa. Ka mor’a hore Moprista ea Phahameng Jehojada a shoe, metsoalle ea Joase e ile ea mo susumeletsa ho etsa lintho tse fosahetseng. (2 Likron. 24:​17, 18) O ile a mamela likhosana tsa Juda tse neng li sa sebeletse Jehova. U ka ’na oa lumela hore Joase o ne a lokela hore ebe o ile a qoba likhosana tseo hobane li ne li etsa lintho tse fosahetseng. Ho e-na le hoo, o ile a mamela likeletso tsa tsona tse booatla. Ho hobe le ho feta ke hore ha motsoala oa hae Zakaria a leka ho mo eletsa, Joase o ile a laela hore a bolaoe. (2 Likron. 24:​20, 21; Mat. 23:35) Eo e bile ketso e mpe le e booatla hakaakang! Joase o ile a qala a etsa lintho hantle empa ka masoabi o ile a fetoha mokoenehi le ’molai. Qetellong bahlanka ba hae ba ile ba mo bolaea. (2 Likron. 24:​22-25) Lintho li ka be li ile tsa mo tsamaela hantle hoja a ile a tsoela pele a mamela Jehova le batho ba mo ratang. w23.09 9 ¶6

Jesu o ne a tseba hore moapostola Petrose a ka khona ho lula a tšepahala. Ke kahoo Jesu a ileng a re ho eena: “U se ke oa tšoha.” Petrose o ile a khothatsoa ke ho hlokomela hore Jesu oa mo tšepa. Petrose le ngoan’abo Andrease ba ile ba qetella ba tlohetse khoebo ea bona ea ho tšoasa litlhapi ’me ea e-ba balateli ba Mesia e leng qeto e ileng ea etsa hore Jehova a ba hlohonolofatse haholo. (Mar. 1:​16-18) Petrose o ile a ba le monyetla oa ho bona lintho tse ngata tseo Jesu a ileng a li etsa kaha e ne e se e le molateli oa hae. O ile a bona ha a folisa batho, a leleka bademona le ha a ne a tsosa bafu. (Mat. 8:​14-17; Mar. 5:​37, 41, 42) Petrose o ile a boela a bona pono ea se neng se tla etsahala nakong e tlang ha Jesu e se e le Morena oa ’Muso oa Molimo. (Mar. 9:​1-8; 2 Pet. 1:​16-18) Petrose o ile a bona lintho tseo ho hang a neng a sa nahana hore o tla ke a li bone. E tlameha ebe Petrose o ile a thaba haholo hore ebe ha aa ka a lumella hore maikutlo ao a neng a e-na le ’ona ka liphoso tsa hae a etse hore a fetoe ke litlhohonolofatso tsena. w23.09 21 ¶4-5

Lengolong la hae la pele, moapostola Petrose o ile a re ha re ‘ratana haholo’ re ke ke ra tšoarelana ka makhetlo a ’maloa feela empa re tla lula re “itokiselitse ho tšoarela.” (1 Pet. 4:8) Mohlomong Petrose o ile a hopola tsela eo Jesu a ileng a mo ruta hore a tšoarele batho ba bang ka eona lilemo tse ’maloa pele ho moo. Ka nako eo, ho ka etsahala hore Petrose o ne a nahana hore o mosa ha a ne a re o ne a ka tšoarela ngoan’abo ka “makhetlo a supileng.” Leha ho le joalo, Jesu o ile a mo ruta hore a tšoarele ka “makhetlo a 77” ’me le rona re lokela ho etsa joalo. (Mat. 18:21) Taba ena e bolela hore re lokela ho lula re tšoarela batho ba bang. U se ke oa nyahama haeba u utloa ho le thata hore u mamele taelo ena. Bahlanka ba Jehova ha baa phethahala ’me ka linako tse ling ba thatafalloa ke ho tšoarela batho ba bang. Ntho ea bohlokoa hona joale ke hore u tšoarele batho ba bang le hore u etse khotso le bona. w23.09 29 ¶12

Ha Jonase a ntse a le ka mpeng ea tlhapi, o ne a kholisehile hore Jehova o tla mamela thapelo ea hae le hore Jehova o tla mo thusa. Hamorao Jehova o ile a khutlisetsa Jonase lebopong la leoatle eaba ka mor’a moo o se a le malala-a-laotsoe ho etsa mosebetsi oo Jehova a mo fileng oona. (Jon. 2:10–3:4) Ha u e-na le mathata, na u tšoenyeha haholo hoo u sitoang ho rapela Jehova? Kapa na u ee u utloe u khathetse hoo u sitoang le ho ithuta? Hopola hore Jehova o utloisisa boemo ba hao hantle. Kahoo, esita leha u etsa thapelo e khutšoanyane, u ka kholiseha hore o tla u fa ntho eo u e hlokang hantle. (Baef. 3:20) Haeba u utloa ho le thata ho bala le ho ithuta hobane u kula, u khathetse kapa u utloile bohloko, u ka leka ho mamela Bibele kapa lingoloa tse rekotiloeng. U ka boela oa thusoa ke ho mamela pina kapa oa shebella video e hlahang ho jw.org. Ha u rapela Jehova ebile u batla likarabo tsa lithapelo tsa hao ka Bibeleng le lingoloeng tse thehiloeng ho eona tseo a fanang ka tsona, u tla ba matla. w23.10 13 ¶6; 14 ¶9

Tabernakele le litempele tse ileng tsa hahoa Jerusalema li ne li tšoana ka hare. Li ne li e-na le likamore tse peli tse neng li arotsoe ke kharetene. Kamore e ’ngoe e ne e bitsoa “Sehalalelo” ’me e ’ngoe e bitsoa “Sehalalelisiso.” (Baheb. 9:​2-5; Ex. 26:​31-33) Ka har’a Sehalalelo ho ne ho e-na le seluloana sa lebone sa khauta, aletare eo ho neng ho chesetsoa libano ho eona le tafole ea bohobe ba pontšo. Ke “baprista ba tlotsitsoeng” feela ba neng ba lumeletsoe hore ba kene ka Sehalalelong e le hore ba etse mesebetsi ea bona e halalelang. (Num. 3:​3, 7, 10) Ka Sehalalelisisong ho ne ho e-na le areka ea selekane ea khauta e neng e bontša hore Jehova o teng sebakeng seo. (Ex. 25:​21, 22) Ke moprista ea phahameng feela ea neng a lumeletsoe hore a fete khareteneng ’me a kene ka Sehalalelisisong hanngoe ka selemo ka Letsatsi la Sehlabelo sa ho Tšoareloa Libe. (Lev. 16:​2, 17) O ne a kena sebakeng seo ka mali a liphoofolo e le hore a tšoareloe libe le hore sechaba sohle se tšoareloe libe. Ha nako e ntse e ea, Jehova o ile a sebelisa moea oa hae o halalelang ho hlalosa hore na lintho tse tabernakeleng li bolela’ng.—Baheb. 9:​6, 7. w23.10 27 ¶12

Lentsoe la Molimo le re laela ka makhetlo a mangata hore re ratane. (Joh. 15:12; Bar. 13:8; 1 Bathes. 4:9; 1 Pet. 1:22; 1 Joh. 4:11) Leha ho le joalo, lerato ke boikutlo bo ka pelong ’me ha ho na motho ea ka bonang se ka pelong ea rona. Joale re ka etsa’ng e le hore Bakreste-’moho le rona ba bone hore rea ba rata? Re ka bontša lerato leo ka mantsoe le ka liketso. Re ka bontša ka litsela tse ngata hore re rata Bakreste-’moho le rona. Tse ling tsa tsona ke tsena: “Le bolellane ’nete.” (Zak. 8:16) “Le boloke khotso lipakeng tsa lona.” (Mar. 9:50) “E-ba oa pele oa ho bontša hore u hlompha batho ba bang.” (Bar. 12:10) “Amohelanang.” (Bar. 15:7) “Le tsoele pele . . . ho tšoarelana.” (Bakol. 3:13) “Tsoelang pele ho thusana ha le e-na le mathata.” (Bagal. 6:2) “Le ’ne le tšelisane.” (1 Bathes. 4:18) “Le tsoele pele . . . ho matlafatsana.” (1 Bathes. 5:11) “Le rapellane.”—Jak. 5:16. w23.11 9 ¶7-8

Letsatsi le letsatsi re etsa liqeto tse hlokang hore re be le tumelo e matla. Ka mohlala, re lokela ho etsa liqeto mabapi le ho khetha metsoalle, boithabiso, thuto, molekane oa lenyalo, mosebetsi le ho ba le bana. Ho bohlokoa hore re ipotse: ‘Na liqeto tseo ke li etsang li bontša hore ke kholisehile hore lefatše lena le tla felisoa le hore haufinyane Molimo o tla etsa hore ho be le lefatše le lecha? Na liqeto tseo ke li etsang li tšoana le tsa batho ba sa lumeleng hore ba ka phela ka ho sa feleng?’ (Mat. 6:​19, 20; Luka 12:​16-21) Re tla etsa liqeto tse nepahetseng haeba re matlafatsa tumelo ea rona ea hore lefatše le lecha le haufi. Re boetse re na le mathata a hlokang hore re be le tumelo e matla. Re ka hlorisoa, ra kula kapa ra etsahalloa ke lintho tse ling tse ka re nyahamisang. Qalong, re ka ’na ra bona eka re tla khona ho mamella mathata ao re nang le ’ona. Empa mathata a kang ana a ka nka nako e telele. Kahoo, re hloka ho ba le tumelo e matla e le hore re mamelle le ho tsoela pele re sebeletsa Jehova re thabile.—1 Pet. 1:​6, 7. w23.04 27 ¶4-5

Jehova o batla hore re etse lintho tse lumellanang le lithapelo tsa rona. Ka mohlala, mor’abo rona a ka kopa hore Jehova a mo thuse hore a se ke a theohela ka letsatsi le itseng e le hore a ka khona ho ea kopanong. Jehova a ka araba thapelo ea hae joang? A ka ’na a fa mor’abo rona eo sebete e le hore a bue le mohiri oa hae. Leha ho le joalo, mor’abo rona o ntse a hloka ho bua le mohiri oa hae ’me a ka hloka ho bua le eena ka makhetlo a ’maloa. A ka boela a kopa hore a sebetse ka nako e ’ngoe kapa hore a se ke a patalloa letsatsi leo a sa theohelang ka lona. Jehova o batla hore re lule re mo bolella lintho tse re tšoenyang. Jesu o ile a bontša hore lintho tse ling tseo re li rapellang re ke ke ra li fumana hang-hang. (Luka 11:9) Kahoo, u se ke oa khaotsa ho rapela. Rapela ka tieo ’me u rapele ka makhetlo a mangata. (Luka 18:​1-7) Ha re etsa joalo, re bontša Jehova hore ntho eo re e rapellang ke ea bohlokoa ho rona. Hape re bontša hore re na le tumelo ea hore o tla re thusa. w23.11 22 ¶10-11

Jehova o ile a tšepisa motsoalle oa hae Abrahama hore lichaba tsohle tsa lefatše li tla hlohonolofatsoa ka lebaka la ngoana oa hae. (Gen. 15:5; 22:18) Abrahama o ne a kholisehile hore tšepiso eo ea Molimo e tla phethahala hobane o ne a e-na le tumelo e matla ho Molimo. Ho ntse ho le joalo, ha Abrahama a le lilemo li 100 le mosali oa hae a le lilemo li 90, ba ne ba ntse ba se na mora. (Gen. 21:​1-7) Leha ho le joalo, Bibele e re: “Abrahama o ne a e-na le tšepo le tumelo ea hore e tla ba ntate oa lichaba tse ngata” joalokaha ho ne ho boletsoe. (Bar. 4:18) Oa tseba hore ntho eo Abrahama a neng a e tšepisitsoe e ile ea phethahala. O ile a ba le mora ea bitsoang Isaka eo e leng khale a mo lebeletse. Ke hobane’ng ha Abrahama a ne a kholisehile hore Jehova o tla phethahatsa tšepiso ea hae? Kaha Abrahama e ne e le motsoalle oa Jehova, “o ne a kholisehile ka ho feletseng hore Molimo o tla phethahatsa tšepiso ea hae.” (Bar. 4:21) Jehova o ile a amohela Abrahama a ba a mo nka a lokile ka lebaka la tumelo ea hae.—Jak. 2:23. w23.12 8 ¶1-2

Mor’abo rona e mocha ea ka tšeptjoang ke ea phethang mosebetsi oohle oo a u fuoeng hantle. Nahana ka mohlala oo Jesu a re behetseng oona. E ne e le motho ea tsotellang a bile a e-na le boikarabelo. O ile a phetha mosebetsi oo Jehova a neng a mo file oona, le hoja ka linako tse ling ho ne ho le thata. O ne a rata batho, haholo-holo barutuoa ba hae hoo a ileng a fana ka bophelo ba hae bakeng sa bona. (Joh. 13:1) Etsisa Jesu ka hore le uena u sebetse ka thata ho phetha mosebetsi oo u o fuoeng. Haeba ha u tsebe ho etsa mosebetsi oo u o fuoeng, e-ba motho ea ikokobelitseng ka hore u kope thuso ho bara ba bo rona ba tsebang mosebetsi oo. U se ke oa khotsofalla feela ho etsa ho honyenyane. (Bar. 12:11) Ho e-na le hoo, phetha mosebetsi oo u o fuoeng “joalokaha eka u o etsetsa Jehova eseng batho.” (Bakol. 3:23) U ka ’na oa etsa liphoso hobane ha oa phethahala, kahoo ikokobetse ’me u amohele liphoso tsa hao.—Liprov. 11:2. w23.12 26 ¶8

Hoa thabisa ho kolobetsoa le ho ba karolo ea lelapa la Jehova. Ke tlotla e kholo ho ba le kamano e ntle le Jehova. Batho ba nang le eona ba ka lumellana le mopesaleme Davida ea ileng a re: “Ho thaba motho eo u [Jehova] mo khethang ebile u mo atametsa hore a lule mabaleng a hao.” (Pes. 65:4) Ha se batho bohle bao e ka bang metsoalle ea Jehova. O khetha batho ba bontšang hore ba batla ho ba metsoalle ea hae. (Jak. 4:8) Ha u inehela ho Jehova ’me u kolobetsoa, u ka kholiseha hore ka mor’a hore u kolobetsoe, o tla u ‘tšollela litlhohonolofatso ho fihlela u se u sa hloke letho.’ (Mal. 3:10; Jer. 17:8) Kolobetso ke qalo feela. U tla leka kahohle hore u phethe boitlamo boo u bo entseng le hore u lule u tšepahala leha u ka lekeha ho etsa ntho e fosahetseng kapa oa hlaheloa ke mathata. (Moek. 5:​4, 5) Kaha u morutuoa oa Jesu, u tla etsisa mohlala oa hae ’me u leke kahohle ho latela litaelo tsa hae.—Mat. 28:​19, 20; 1 Pet. 2:21. w24.03 8 ¶1-3

U ka etsa’ng haeba uena le molekane oa hao le sa thabele ho ba hammoho? Hopola mohlala oa mollo o besitsoeng. Ha u besa mollo ha o qale o se o le mongata. U lokela ho kenya patsi e le hore o lule o le mongata. Ka ho tšoanang, ho ka ba joang ha le ka qeta nako e itseng le le hammoho letsatsi le letsatsi? Etsang bonnete ba hore le etsa ntho eo le e thabelang le le babeli. (Jak. 3:18) Ha le etsa lintho tsena hanyane hanyane, le tla ratana le ho feta. Ke habohlokoa hore banyalani ba hlomphane. Tlhompho e tšoana le moea o etsang hore mollo o ’nè o tuke. Ha ho se na moea, mollo o ka tima. Ka ho tšoanang, ha banyalani ba sa hlomphane ba ka iphumana ba se ba sa ratane joaloka pele. Empa ha banyalani ba leka kahohle hore ba hlomphane seo se etsa hore lerato la bona le ’nè le tuke. Hopola hore ntho ea bohlokoa ha se hore na uena u nahana hore u hlompha molekane oa hao empa ke hore na eena o bona u mo hlompha. w23.05 22 ¶9; 24 ¶14-15

Ka Bibeleng ho na le bahlanka ba Molimo bao ka linako tse ling ba neng ba tšoha le ho thothometsoa ke lira tsa bona kapa mathata a mang. (Pes. 18:4; 55:​1, 5) Le rona re ka ’na ra hanyetsoa sekolong, mosebetsing, lapeng kapa ra hanyetsoa ke ’muso. Re ka ba ra tšoha hore re tla shoa hobane re kula. Linakong tse joalo, re ka utloa re sa tsebe hore na re lokela ho etsa’ng. Maemong aa Jehova o re thusa joang? Oa re tšelisa hape o kokobetsa bohloko ba rona. Kahoo, Itloaetse ho qeta nako le Jehova ka hore u mo rapele le ho bala Lentsoe la hae. (Pes. 77:​1, 12-14) Haeba u etsa joalo, etlare ha u e-na le mathata, motho oa pele eo u tla kopa thuso ho eena ke Ntate oa hao ea leholimong. Bolella Jehova lintho tse u tšosang le tseo u tšoenyehileng ka tsona. Mo mamele ka hore u bale Lentsoe la hae ’me u tla bona hore na o u tšelisa joang.—Pes. 119:28. w24.01 24-25 ¶14-16

Ke habohlokoa ho ba le tabatabelo ea ho finyella seo u se rerileng. Ha u e-na le tabatabelo ea ho finyella seo u se rerileng, u tla sebetsa ka thata hore u se finyelle. Haeba re e-na le tabatabelo ea ho etsa ntho eo re e rerileng, re tla khona ho e finyella. U ka etsa’ng e le hore u be le tabatabelo ea ho finyella lintho tseo u li rerileng? Kopa Jehova hore a u thuse ho ba le tabatabelo ea ho finyella lintho tseo u li rerileng. Jehova a ka sebelisa moea oa hae o halalelang ho u thusa hore u finyelle seo u batlang ho se etsa. Re ipehela lintho tseo re batlang ho li etsa hobane rea tseba hore ho molemo ho etsa joalo. Empa ka linako tse ling re ka utloa re se na tabatabelo ea ho etsa lintho tseo. Nahanisisa ka lintho tseo Jehova a u etselitseng tsona. (Pes. 143:5) Moapostola Pauluse o ile a nahanisisa ka mosa o moholo oo Jehova a ileng a mo bontša oona ’me seo se ile sa mo thusa hore a sebeletse Jehova kahohle kamoo a ka khonang kateng. (1 Bakor. 15:​9, 10; 1 Tim. 1:​12-14) Ka ho tšoanang, haeba u nahanisisa ka lintho tseo Jehova a u etselitseng tsona, u tla ba le tabatabelo ea ho finyella lintho tseo u batlang ho li etsa.—Pes. 116:12. w23.05 27 ¶3-5

Re thabisa Ntate oa rona ea leholimong ha re rorisa lebitso la hae. (Pes. 119:108) Na taba ee e bolela hore Molimo oa rona ea matla ’ohle o tšoana le rona baetsalibe ba batlang ho rorisoa hobane ba sa itšepe kapa hobane ba batla ho khothatsoa? Che. Ha re rorisa Ntate oa rona ea leholimong, re paka hore ntho eo Satane a e buileng ka rona ke leshano. Satane o re ha ho na motho ea tla sireletsa lebitso la Molimo ka botšepehi. Ho ea ka eena, kaofela ha rona ha re tšepahale. O re kaofela ha rona re ka lahla Molimo haeba re nahana hore ho ka re tsoela molemo. (Jobo 1:​9-11; 2:4) Empa Jobo o ile a tšepahala ’me a bontša hore Satane o leshano. Na le uena u tla etsisa Jobo? Kaofela ha rona re na le tlotla ea ho sireletsa lebitso la Ntate oa rona le ho mo thabisa ka ho mo sebeletsa ka botšepehi. (Liprov. 27:11) Kannete ke tlotla e kholo ho etsa joalo. w24.02 8-9 ¶3-5

Ka mor’a mehla ea Moshe le Joshua, Jehova o ile a khetha baahloli hore ba tataise batho ba hae. Ka mor’a moo ha ho se ho e-na le marena Iseraele, Jehova o ile a khetha baprofeta hore ba tataise batho ba hae. Marena a neng a tšepahala a ile a kopa keletso ho baprofeta. Ka mohlala, Morena Davida o ile a amohela khalemelo ea moprofeta Nathane ka boikokobetso. (2 Sam. 12:​7, 13; 1 Likron. 17:​3, 4) Morena Josafate o ile a mamela tataiso ea moprofeta Jahaziele ’me a khothaletsa batho ba Juda hore ba ‘tšepe baprofeta ba [Molimo].’ (2 Likron. 20:​14, 15) Ha Morena Ezekiase a ne a tšohile o ile a kopa thuso ea moprofeta Esaia. (Esa. 37:​1-6) Kamehla ha marena a ne a mamela tataiso ea Jehova, a ne a hlohonolofatsoa ebile sechaba se ne se sireletseha. (2 Likron. 20:​29, 30; 32:22) Kahoo, ho ne ho hlakile hore Jehova o ne a sebelisa baprofeta ho tataisa batho ba hae. w24.02 21 ¶8

Satane o batla hore re tloaelane le batho ba etsang hore ho be thata ho mamela melao ea Jehova. Re lokela ho ba hlokolosi haholo hobane ha re qete nako le batho ka seqo feela empa re boetse re qeta nako le bona mecheng ea puisano. Re lokela ho loantša boikutlo boo batho ba bangata lefatšeng lena ba nang le bona ba ho nahana hore boitšoaro bo bobe boa amoheleha. Rea tseba hore bo fosahetse. (Baef. 4:​19, 20) Leha ho le joalo, ke hantle hore re ipotse: ‘Na ke qeta nako ho sa hlokahale le basebetsi-’moho le ’na, bana bao ke kenang ka tlelaseng le bona kapa batho ba bang ba sa hlompheng melao ea Jehova e lokileng? Na ka sebete ke mamela melao ea Jehova le haeba batho ba bang ba ka re ha ke amohele batho ba bang le tsela eo ba phelang ka eona?’ Joalokaha 2 Timothea 2:​20-22 e bontša, re ka ’na ra tlameha ho ba hlokolosi ha re khetha metsoalle le ka phuthehong. Rea hopola hore ba bang ba ka ’na ba se ke ba re thusa ho lula re tšepahalla Jehova. w24.03 22-23 ¶11-12

Na u kile oa ipotsa hore na Jehova o joang? Le hoja Jehova a sa bonahale, Bibele e mo hlalosa ka litsela tse fapaneng. Jehova o bitsoa “letsatsi le thebe” le “mollo o felisang.” (Pes. 84:11; Baheb. 12:29) Ezekiele o ile a ba le pono eo ho eona Jehova a neng a tšoana le lejoe la safire, tšepe e khanyang le mookoli. (Ezek. 1:​26-28) Re ka ’na ra fumana ho le thata ho lumela hore Jehova oa re rata hobane ha re mo bone. Batho ba bang ba nahana hore Jehova a ke ke a ba rata le ka mohla ka lebaka la lintho tse bohloko tse ba etsahaletseng nakong e fetileng. Jehova oa utloisisa ha re ikutloa ka tsela eo ebile oa utloisisa hore na ke hobane’ng ha ho ka ba thata ho atamela haufi le eena. O re thusa ka hore a re hlalosetse ka Lentsoeng la hae hore na ke Molimo ea joang. Lentsoe le hlalosang Jehova hantle ke lerato. Bibele e re “Molimo ke lerato.” (1 Joh. 4:8) Le susumetsa ntho e ’ngoe le e ’ngoe eo a e etsang. Lerato leo Molimo a nang le lona le mofuthu ebile le matla hoo a le bontšang le batho ba sa mo rateng.—Mat. 5:​44, 45. w24.01 26 ¶1-3

Jehova o ile a khetha Moshe hore a ntše Baiseraele Egepeta ’me e le bopaki bo bontšang hore o ne a ba tataisa, motšehare o ne a ba etella pele ka leru le kang pilara ’me bosiu a ba etella pele ka mollo o kang pilara. (Ex. 13:21) Moshe o ne a latela pilara eo e neng e lebisa eena le Baiseraele Leoatleng le Lefubelu. Baiseraele ba ile ba tšoha hobane ba ne ba nahana hore Baegepeta ba tla ba bolaea. Empa o ne a sa etsa phoso. Jehova o ile a sebelisa Moshe hore a ise batho ba hae moo. (Ex. 14:2) Molimo o ile a ba pholosa ka mohlolo. (Ex. 14:​26-28) Lilemo tse 40 ka mor’a moo, Moshe o ile a lula a latela leru leo Molimo a neng a le sebelisa ho tataisa batho ba hae ha ba ne ba le lefeelleng. (Ex. 33:​7, 9, 10) Jehova o ne a sebelisa leru leo ho bua le Moshe ebe Moshe o bolella Baiseraele litaelo tse tsoang ho Jehova. Kahoo, Baiseraele ba ne ba e-na le bopaki ba hore Jehova o ba tataisa a sebelisa Moshe. w24.02 21 ¶4-5