July

Jesu o ile a etsisa Ntate oa hae tseleng eo a nahanang le ho ikutloa ka eona, linthong tseo a ileng a li bua le ho li etsa ho akareletsa le mehlolo eo a ileng a e etsa. (Joh. 14:9) Re ka ithuta’ng mehlolong ea Jesu? Jesu le Ntate oa hae ba re rata haholo. Ha Jesu a le lefatšeng o ile a bontša hore o rata batho haholo ka hore a sebelise matla a hae ho thusa batho ba nang le mathata. Ka letsatsi le leng banna ba babeli ba sa boneng ba ile ba mo kopa hore a ba thuse. (Mat. 20:​30-34) Hlokomela hore Jesu o ile “a ba hauhela” eaba oa ba folisa. Lentsoe la Segerike le fetoletsoeng e le “a ba hauhela” le akareletsa boikutlo bo matla ba ho ba le kutloelo-bohloko e tsoang botebong ba pelo. Jesu o ile a boela a fepa batho ba lapileng le ho folisa molepera ka lebaka la boikutlo boo bo matla ba ho ba le kutloelo-bohloko bo susumetsoang ke lerato. (Mat. 15:32; Mar. 1:41) Re ka kholiseha hore Jehova Molimo ea mohau le Mora oa hae ba re rata haholo ebile ba utloa bohloko ha re hlaheloa ke mathata. (Luka 1:78; 1 Pet. 5:7) Kannete e tlameha ebe ba potlaketse ho felisa mathata ’ohle ao re nang le ’ona. w23.04 3 ¶4-5

Re lokela ho leka kahohle ho qoba ho mamela kapa ho bala lintho tse ka susumetsang maikutlo a fosahetseng a atileng lefatšeng lena la Satane. Re tlatse likelello tsa rona ka lintho tse lokileng ka ho bala le ho ithuta Bibele. Ho ba teng libokeng le tšimong le hona ho tla re thusa ho sireletsa tsela ea rona ea ho nahana. Hape Jehova o tšepisa hore a ke ke a lumella hore re hlaheloe ke liteko tseo re ke keng ra khona ho li mamella. (1 Bakor. 10:​12, 13) Kaofela ha rona re hloka ho lula re rapela ho feta leha e le neng pele e le hore re lule re tšepahalla Jehova matsatsing ana a thata a bofelo. Jehova o batla hore re ‘mo bolelle lintho tsohle tse ka lipelong tsa rona.’ (Pes. 62:8) Rorisa Jehova u be u mo lebohe bakeng sa lintho tsohle tseo a li etsang. Mo kope hore a u thuse hore u be sebete ha u le tšimong. Mo kope hore a u thuse ho sebetsana le mathata ao u nang le ’ona le hore u hlole liteko leha e le life tseo u tobaneng le tsona. U se ke oa lumella ntho leha e le efe kapa motho leha e le ofe ho u thibela ho rapela Jehova ka linako tsohle. w23.05 7 ¶17-18

Ke hobane’ng ha re ea libokeng? Lebaka la bohlokoa ke ho rorisa Jehova. (Pes. 26:12; 111:1) Lebaka le leng ke hobane re batla ho khothatsana matsatsing ana a thata. (1 Bathes. 5:11) Kahoo, ha re arabela libokeng re rorisa Jehova ebile rea khothatsana. Empa ho na le lintho tse ka etsang hore ho be thata hore re arabele. Re ka tšoha ha re lokela ho arabela kapa re ka batla ho arabela hangata empa ka linako tse ling re be re sa khethoe. Re ka thusoa ke’ng? Moapostola Pauluse o ile a re re lokela ho ‘khothatsana.’ Ha re hopola hore ba bang ba khothatsoa ke likarabo tsa rona tse bonolo le tse khutšoanyane, seo se tla etsa hore re se ke ra tšoha haholo ha re arabela. Haeba re sa khethoe hangata, re lokela ho thabela ho bona ha ba bang ba fumana monyetla oa ho arabela.—1 Pet. 3:8. w23.04 20 ¶1-3

Morena o ile a phatlalatsa hore Bajuda ba neng ba hapuoe ke Babilona ’me ba phetse teng lilemo tse ka bang 70 ba ne ba ka khutlela naheng ea habo bona Iseraele. (Esdr. 1:​2-4) Ke Jehova feela ea neng a ka etsa hore sena se etsahale. Babilona e ne e sa lokolle batho bao e ba hapileng. (Esa. 14:​4, 17) Empa Babilona e ne e se e oele ’me ’musi e mocha o ne a itse Bajuda ba ka tsamaea. Mojuda e mong le e mong, haholo-holo lihlooho tsa malapa, li ne li lokela ho etsa qeto ea hore na li tloha Babilona kapa li lula teng. E tlameha ebe ho ne ho le thata ho etsa qeto eo. Batho ba bangata ba ne ba se ba holile haholo bakeng sa ho nka leeto leo le lelelele. Hape bongata ba Bajuda bo ne bo phetse Babilona bophelo bohle ba bona kaha ke hona moo bo hlahetseng teng. Ba ne ba sa nke Iseraele e le ha habo bona empa ba ne ba nka e le moo baholo-holo ba bona ba kileng ba phela teng. Ho bonahala eka Bajuda ba bang ba ne ba ruile. Kahoo, ho ne ho ka ba thata ho bona hore ba siee matlo a bona a majabajaba le likhoebo tsa bona hore ba e’o lula sebakeng seo ba sa se tsebeng. w23.05 14 ¶1-2

Lentsoe la Molimo le re khothaletsa hore re lule re loanela ho ba le mamello, qenehelo le lerato. Luka 21:19 e re: “Ha le ka mamella le tla pholoha.” Bakolose 3:12 e re: “E-bang le qenehelo.” 1 Bathesalonika 4:​9, 10 eona e re: “Molimo ke eena ea le rutang hore le ratane. . . . Leha ho le joalo, rea le kopa bana beso hore le tsoele pele ho rata bana ba bo lona le ho feta.” Litemana tsena kaofela li ne li ngoletsoe Bakreste ba neng ba se ba ntse ba bontšitse hore ba na le mamello, qenehelo le lerato. Leha ho le joalo, ba ne ba lokela ho lula ba loanela ho ba le makhabane ao. Le rona re lokela ho etsa joalo. E le hore u khone ho etsa joalo, hlahloba hore na Bakreste ba mehleng ea baapostola ba ile ba bontša joang hore ba na le makhabane ao. Ka mor’a moo, u tla bona hore na u ka ba etsisa joang ’me oa bontša hore u itokiselitse mahlomola a maholo. Etlare ha mahlomola a maholo a qala, u tla ikemisetsa ho lula u mameletse hobane u tla be u ile oa ithuta ho mamella. w23.07 3 ¶4, 8

Ebang re batlotsuoa kapa karolo ea “linku tse ling,” re lokela ho lula re tsamaea ‘Tseleng ea Khalalelo.’ Ho etsa joalo ho tla re thusa ho lula re rapela Jehova hona joale le ka moso ha ’Muso oa hae o se o re tliselitse lintho tse molemo lefatšeng. (Joh. 10:16) Ho tloha ka 1919, batho ba limilione ba ile ba tsoa Babilona e Moholo e leng ’muso oa lefatše oa bolumeli ba bohata eaba ba tsamaea tseleng ena ea tšoantšetso. Jehova o ile a etsa bonnete ba hore o tlosa litšitiso tse neng li le tseleng ea Bajuda ba tsoang Babilona. (Esa. 57:14) Na o ile a etsa se tšoanang ka “Tsela ea Khalalelo” mehleng ee? Lilemo tse makholo pele ho 1919, Jehova o ile a sebelisa banna ba mo hlomphang ho etsa hore batho ba khone ho tsoa Babilona e Moholo. (Bapisa le Esaia 40:3.) Ba ile ba etsa mosebetsi o neng o hlokahala e le hore hamorao batho ba lipelo li ntle ba tsoe bolumeling ba bohata ’me ba rapele Jehova le batho ba hae. w23.05 15-16 ¶8-9

Jehova o batla hore re thabele ho mo sebeletsa. (2 Bakor. 9:7) Empa na re lokela ho etsa lintho tseo re batlang ho li etsetsa Jehova le haeba re sa batle ho li etsa? Nahana ka seo moapostola Pauluse a ileng a se etsa. O ile a re: “Ke tšoara ’mele oa ka ka thata ebile ke o tšoara joaloka lekhoba.” (1 Bakor. 9:​25-27) Pauluse o ne a iqobella ho etsa lintho tse nepahetseng le hoja a ne a se na tabatabelo ea ho li etsa. Jehova o ne a thabela lintho tseo Pauluse a neng a mo etsetsa tsona ’me o ile a mo hlohonolofatsa. (2 Tim. 4:​7, 8) Jehova oa thaba ha re etsa lintho tseo re li rerileng le hoja re se na tabatabelo ea ho li etsa. Oa tseba hore re etsa lintho tseo re li rerileng hobane re mo rata le hoja ka linako tse ling re sa thabele ho li etsa ’me seo sea mo thabisa. Jehova o tla re hlohonolofatsa ha re etsa lintho tseo re li rerileng joalokaha a ile a hlohonolofatsa Pauluse. (Pes. 126:5) Kahoo, ha re bona tsela eo Jehova a re hlohonolofatsang ka eona, re ka ba le tabatabelo ea ho etsa lintho tseo re li rerileng. w23.05 29 ¶9-10

Moapostola Pauluse o ile a bapisa batho ba ke keng ba pholoha letsatsi la Jehova le batho ba robetseng kaha ha ba tsebe lintho tse etsahalang ebile ha ba hlokomele hore nako e ntse e tsamaea. Kahoo, ha ba bone ha ho etsahala lintho tsa bohlokoa ebile ha ho na letho leo ba le etsang ha li etsahala. Batho ba bangata mehleng ena le bona ba robetse ka tsela ea tšoantšetso. (Bar. 11:8) Ha ba lumele bopaki bo bontšang hore re phela “mehleng ea bofelo” le hore haufinyane mahlomola a maholo a tla qala. (2 Pet. 3:​3, 4) Leha ho le joalo, ke habohlokoa hore re lule re falimehile letsatsi le letsatsi. (1 Bathes. 5:6) Kahoo, re lokela ho hlaphoheloa kelellong. Hobane’ng? Seo se tla re thusa hore re se ke ra kenella lipolotiking le ho batla ho rarolla mathata a sechaba. Ha letsatsi la Jehova le ntse le atamela, ho tla ba thata le ho feta hore re se ke ra kenella linthong tsena. Kahoo, ha rea lokela ho tšoenyeha ka hore na re tla etsa’ng ha re e-ba boemong boo. Moea oa Molimo o tla re thusa hore re be le likelello tse hlaphohetsoeng le hore re etse liqeto tse nepahetseng.—Luka 12:​11, 12. w23.06 10 ¶6-7

Ke’ng e tlang ka hloohong ea hao ha u utloa lebitso Samsone? Mohlomong u nahana ka monna ea neng a e-na le matla a sa tloaelehang. Teng ke ’nete o ne a le matla empa o ile a etsa qeto e fosahetseng e ileng ea mo tlisetsa litla-morao tse bohloko. Ho ntse ho le joalo, Jehova o ile a ameha haholo ka taba ea hore Samsone o ile a tšepahala ’me o kenyelelitse pale ea hae ka Bibeleng e le hore e re tsoele molemo. Jehova o ile a sebelisa Samsone ho etsa lintho tse kholo e le hore a thuse sechaba sa hae sa Iseraele. Lilemo tse makholo ka mor’a hore Samsone a shoe, Jehova o ile a susumeletsa moapostola Pauluse hore a kenyeletse lebitso la Samsone lethathamong la batho ba neng ba e-na le tumelo ka tsela e khethehileng. (Baheb. 11:​32-34) Mohlala oa Samsone o ka re khothatsa. O ile a tšepa Jehova leha ho ne ho le boima. Mohlala oa hae o ka re khothatsa ebile re ka ithuta lintho tse ling ho ona. w23.09 2 ¶1-2

Ntho e ka re thusang ho mamella ke ho itloaetsa ho phetlela Jehova sefuba, re mo bolelle lintho tse re tšoenyang. (1 Bathes. 5:17) Mohlomong uena ha u na mathata a boima haholo hona joale. Leha ho le joalo, na u kopa thuso ho Jehova neng kapa neng ha u koatile, u ferekane kapa u imetsoe? Haeba u itloaetsa esale hona joale ho kopa Jehova hore a u thuse ka mathata a manyenyane a u hlahelang, u tla nolofalloa ho etsa joalo nakong e tlang ha u lokela ho sebetsana le mathata a boima. U tla kholiseha hore o tseba hantle hore na nako le tsela e nepahetseng ea ho u thusa ke efe. (Pes. 27:​1, 3) Haeba re mamella mathata a re hlahelang hona joale, re ka atleha ho mamella mahlomola a maholo. (Bar. 5:3) Ke hobane’ng ha re cho joalo? Bana ba bo rona ba bangata ba hlokometse hore ho mamella bothata bo itseng ho ba thusitse hore ba khone ho mamella bo latelang. Ho mamella ho ile ha matlafatsa tumelo eo ba nang le eona ea hore Jehova o ikemiselitse ho ba thusa. Tumelo eo e ile ea ba thusa hore ba mamelle mathata a latelang.—Jak. 1:​2-4. w23.07 3 ¶7-8

Jehova o fetoha le maemo hobane a ikokobelitse ebile a le mohau. Ka mohlala, o ile a bontša hore o ikokobelitse ha a ne a tl’o felisa batho ba khopo ba Sodoma. Jehova o ile a roma mangeloi hore a e’o bolella monna ea lokileng Lota hore a balehele lithabeng. Lota o ne a tšaba ho ea moo. Kahoo, o ile a kopa Jehova hore a lumelle eena le lelapa la hae hore ba balehele Zooare e leng motse o monyenyane o neng o lokela ho timetsoa. Jehova a ka be a ile a phehella Lota hore a latele litaelo tsa hae feela joalokaha a mo file tsona. Ho e-na le hoo, o ile a mamela kopo eo ea Lota le hoja e ne e bolela hore ha a sa tla felisa Zooare. (Gen. 19:​18-22) Lilemo tse ngata hamorao, Jehova o ile a bontša baahi ba Ninive mohau. O ile a romela moprofeta Jonase hore a e’o bolella batho ba khopo ba Ninive hore ba tl’o felisoa hammoho le motse oa bona. Empa ha batho ba Ninive ba tlohela liketso tsa bona tse khopo, Jehova o ile a ba utloela bohloko eaba ha a felise motse.—Jon. 3:​1, 10; 4:​10, 11. w23.07 21 ¶5

Re ka ithuta’ng paleng ea Joase? O ne a tšoana le sefate se nang le metso e sa tebang se tšehelitsoeng ka palo. Ha motho ea neng a mo tšehelitse e leng Jehojada a shoa, Joase o ile a qala ho mamela bakoenehi ba ileng ba etsa hore a se ke a tšepahalla Jehova. Mohlala ona oa bontša hore ha rea lokela ho mamela Molimo hobane feela litho tsa lelapa kapa Bakreste-’moho le rona ba re behela mohlala o motle. E le hore re lule re le metsoalle ea Jehova, re lokela ho mo rata le ho mo hlompha haholoanyane ka hore letsatsi le letsatsi re ithute Bibele, re nahanisise ka eona re be re rapele. (Jer. 17:​7, 8; Bakol. 2:​6, 7) Lintho tseo Jehova a hlokang hore re li etse ha li ngata haholo. Li akarelitsoe hantle lengolong la Moeklesia 12:13 le reng: “Hlompha Molimo oa ’nete ’me u mamele litaelo tsa hae etsoe ke eona ntho eo motho a lokelang ho e etsa.” Ha re hlompha Molimo, re tla khona ho lula re mo tšepahalla ho sa tsotellehe hore na ho tla etsahala’ng ka moso. Ha ho letho le tla senya setsoalle sa rona le Jehova. w23.06 19 ¶17-19

Kholiseho eo Molimo a re fang eona e qala ka mantsoe ana: “Ea lutseng teroneng a re.” (Tšen. 21:5a) Mantsoe ana ke a bohlokoa haholo hobane ke a mang a mantsoe ao Jehova a ileng a a bua ha a ne a bua liponong ka makhetlo a mararo bukeng ea Tšenolo. Ha se lengeloi kapa Jesu ea faneng ka kholiseho ena empa ke Jehova. Taba ena ke bopaki ba hore re ka tšepa mantsoe ao a a buileng ka mor’a moo. Hobane’ng? Hobane Jehova a ‘ke ke a bua leshano.’ (Tite 1:2) Kahoo, mantsoe ao re a balang ho Tšenolo 21:​5, 6 a tla fela a phethahale. A re bueng ka lentsoe “bona.” Lentsoe la Segerike le fetoletsoeng e le “bona” le sebelisitsoe ka makhetlo a mangata bukeng ea Tšenolo. Molimo o ile a re’ng ka mor’a moo? O ile a re: “Ke etsa hore lintho tsohle li be ncha.” Temaneng ena Jehova o bua ka lintho tseo a tl’o li etsa nakong e tlang empa kaha oa tseba hore o tl’o phethahatsa tšepiso ea hae, o bua joalokaha eka o se a ntse a etsa liphetoho tsena.—Esa. 46:10. w23.11 3-4 ¶7-8

Moapostola Petrose o ile a etsa liphoso. Nahana ka liketsahalo tse latelang. Ha Jesu a ne a hlalosa hore o tl’o hlorisoa a be a shoe ho phethahatsa boprofeta bo ka Bibeleng, Petrose o ile a mo khalemela. (Mar. 8:​31-33) Petrose le baapostola ba bang ba ne ba lula ba ngangisana ka hore na ke mang e moholo har’a bona. (Mar. 9:​33, 34) Bosiung ba ho qetela pele Jesu a bolaoa, Petrose o ile a hlasela monna e mong a ba a mo khaola tsebe. (Joh. 18:10) Bosiung bona boo, o ile a tšoha ’me a latola hore o tseba motsoalle oa hae Jesu ka makhetlo a mararo. (Mar. 14:​66-72) Ntho eo e ile ea etsa hore Petrose a lle habohloko. Jesu ha aa ka a lahla moapostola enoa oa hae ea neng a nyahame. Ka mor’a hore Jesu a tsosoe bafung, o ile a fa Petrose monyetla oa hore a bontše hore o ntse a mo rata. Jesu o ile a mo fa mosebetsi oa hore a hlokomele linku tsa hae. (Joh. 21:​15-17) Petrose o ile a amohela mosebetsi oo. Petrose o ile a ba har’a batho ba pele ba ileng ba tlotsoa ka moea o halalelang ha a ne a le Jerusalema ka letsatsi la Pentekonta. w23.09 22 ¶6-7

Moapostola Petrose o ile a re ho baholo: “Le lise mohlape oo Molimo a le fileng oona.” (1 Pet. 5:​1-4) Haeba u moholo, rea tseba hore u rata Bakreste-’moho le uena ’me u batla ho ba hlokomela. Leha ho le joalo, ka linako tse ling u ka ’na oa utloa eka u phathahane haholo kapa u khathetse haholo ’me u ke ke oa khona ho phetha mosebetsi ona. U ka etsa’ng haeba u ikutloa joalo? Bolella Jehova hore na u ikutloa joang. Petrose o ile a re: “Haeba motho . . . a thusa batho ba bang, a itšetlehe ka matla a Molimo.” (1 Pet. 4:11) Bakreste-’moho le uena ba hlaheloa ke mathata a ke keng a fela hona joale empa hopola hore “molisa ea ka sehloohong” Jesu Kreste, a ka ba thusa ho feta mang kapa mang. A ka ba thusa hona joale ebile a ka ba thusa le lefatšeng le lecha. Molimo o batla hore baholo ba rate Bakreste-’moho le bona, ba ba hlokomele le hore ba behele “mohlape mohlala.” w23.09 29-30 ¶13-14

Re lokela ho qoba ho nahana joaloka batho ba sa mameleng melao ea Jehova. Haeba re nahana joaloka batho ba sa mameleng melao ea Jehova, re ka qetella re sa hlomphe Jehova ebile re sa mamele melao ea hae. (1 Bakor. 3:19) Hangata “bohlale ba batho ba lefatše lena” bo etsa hore batho ba se ke ba mamela Molimo. Bakreste ba bang ba phutheho ea Pergame le ea Thiatire ba ile ba susumetsoa ke batho ba neng ba rapela melimo ea litšoantšo le ba neng ba etsa boitšoaro bo bobe bo amanang le thobalano ba neng ba lula libakeng tseo. Jesu o ile a khalemela Bakreste ba liphutheho tseo tse peli hobane ba ne ba lumella batho hore ba etse boitšoaro bo bobe bo amanang le thobalano. (Tšen. 2:​14, 20) Le kajeno batho ba ka re susumetsa hore re lumele ho etsa lintho tse fosahetseng. Ba malapa a rona le batho bao re tloaelaneng le bona ba ka etsa hore re nahane hore re itšoere ka thata le ho re khothaletsa ho tlola melao ea Jehova. Ka mohlala, ba ka re ha ho bohlokoa ho lula u itšoere hantle le hore melao ea Molimo e buang ka boitšoaro e feletsoe ke nako. Ka linako tse ling re ka ’na ra nahana hore litaelo tseo Jehova a re fang tsona ha lia hlaka. Re ka ba ra batla ho “fetela ka nģ’ane ho lintho tse ngotsoeng.”—1 Bakor. 4:6. w23.07 16 ¶10-11

Maria o ne a hloka ho matlafatsoa. O ne a tl’o ima empa a e-s’o nyaloe. O ne a sa tsebe hore na ke ntho e joang ho holisa ngoana empa o ne a tlameha ho hlokomela ngoana eo hamorao e neng e tla ba Mesia. Hape kaha o ne a e-s’o ka a etsa thobalano, ebe o ne a tla qala kae ha a bolella Josefa, monna ea neng a tl’o mo nyala hore o imme? (Luka 1:​26-33) Maria o ile a etsa’ng e le hore a fumane matla? O ile a batla thuso ho batho ba bang. Ka mohlala, o ile a kopa Gabariele hore a mo fe litaba tse eketsehileng mabapi le boikarabelo bona. (Luka 1:34) Ka mor’a moo, o ile a nka leeto le lelelele ho ea “motseng oa Juda e leng sebaka se lithaba,” a etela Elizabetha eo a amanang le eena. Elizabetha o ile a babatsa Maria a ba a susumetsoa ke moea oa Jehova hore a mo bolelle boprofeta bo khothatsang ka mora oa Maria ea e-s’o hlahe. (Luka 1:​39-45) Maria o ile a re Jehova “o entse lintho tse kholo ka letsoho la hae le matla.” (Luka 1:​46-51) Jehova o ile a matlafatsa Maria a sebelisa Gabariele le Elizabetha. w23.10 14-15 ¶10-12

Ke barutuoa ba ’maloa feela ba Kreste ba tlotsitsoeng ka moea o halalelang ’me ba na le setsoalle se ikhethang le Jehova. Batlotsuoa bana ba 144 000 e tl’o ba baprista leholimong le Jesu. (Tšen. 14:1) Karolo ea Sehalalelo e neng e le tabernakeleng e tšoantšetsa hore batlotsuoa ba khethiloe hore e be bana ba Molimo ha ba ntse ba le lefatšeng. (Bar. 8:​15-17) Karolo ea Sehalalelisiso e neng e le tabernakeleng e emela leholimo e leng moo Jehova a lulang teng. “Kharetene” e neng e arola Sehalalelo le Sehalalelisiso e emela ’mele oa Jesu oa nama, o neng o etsa hore a se ke a khona ho kena leholimong e le Moprista ea Phahameng ka ho fetisisa oa tempele ea tšoantšetso. Ha Jesu a fana ka ’mele oa hae oa nama e le sehlabelo bakeng sa ho lopolla batho, o ile a bulela Bakreste bohle ba batlotsuoa monyetla oa ho phela leholimong. Le bona ba lokela ho siea ’mele ea bona ea nama e le hore ba ka fumana moputso oa bona oa ho phela leholimong.—Baheb. 10:​19, 20; 1 Bakor. 15:50. w23.10 28 ¶13

Gideone o ile a lula a khobile matšoafo ha Baefraime ba ne ba mo tšoaea liphoso. (Baahl. 8:​1-3) Ha aa ka a ba halefela. O ile a bontša hore o ikokobelitse ka hore a mamele taba eo ba neng ba tšoenyehile ka eona le ho bua le bona ka mosa ’me seo se ile sa etsa hore ba theole moea. Baholo ba ka etsisa mohlala oa Gideone ka hore ba mamele ka hloko le ho arabela ka mosa ha ba tšoauoa liphoso. (Jak. 3:13) Ha ba etsa joalo, ba tla etsa hore ho be le khotso ka phuthehong. Ha Gideone a hlola Bamidiane, batho ba ile ba mo rorisa empa eena o ile a rorisa Jehova. (Baahl. 8:​22, 23) Baholo ba ka etsisa Gideone joang? Ba lokela ho rorisa Jehova ka lintho tseo ba khonang ho li etsa. (1 Bakor. 4:​6, 7) Ka mohlala, ha moholo a rorisoa ka lebaka la bokhoni ba hae ba ho ruta, a ka bontša hore Lentsoe la Molimo ke lona le re rutang le hore mokhatlo oa Jehova oa re koetlisa. Baholo ba ka nahana ka hore na tsela eo ba rutang ka eona e rorisa Jehova kapa e khahlisa batho. w23.06 4 ¶7-8

Haeba lithapelo tsa rona li sa arajoe ka tsela eo re neng re e batla, re ka ’na ra ipotsa ‘Na ke rapella ntho e nepahetseng?’ Hangata re nahana hore rea tseba hore na ke’ng e re loketseng. Empa lintho tseo re li kopang li ka ’na tsa se ke tsa re tsoela molemo ha nako e ntse e ea. Haeba ho na le bothata boo re bo rapellang, ho ka ’na ha e-ba le tsela e molemo ea ho rarolla bothata boo ho feta eo re neng re e batla. Hape e ka ’na eaba lintho tse ling tseo re li kopang ha li lumellane le thato ea Jehova. (1 Joh. 5:14) Ka mohlala, nahana ka batsoali ba ileng ba kopa Jehova hore a ba thuse hore ngoana oa bona a lule a mo sebeletsa. Ho ne ho bonahala eka ba kopa ntho e nepahetseng. Leha ho le joalo, Jehova a ke ke a re qobella hore re mo sebeletse. O batla hore kaofela ha rona ho akareletsa le bana, re ikhethele ho mo sebeletsa. (Deut. 10:​12, 13; 30:​19, 20) Kahoo, batsoali ba ka kopa Jehova hore a ba thuse hore ba rute ngoana oa bona hore a rate Jehova le hore e be motsoalle oa hae.—Liprov. 22:6; Baef. 6:4. w23.11 21 ¶5; 23 ¶12

Ke hobane’ng ha ho tšelisa batho ba bang e le tsela ea bohlokoa ea ho bontša hore rea ba rata? Buka e ’ngoe e buang ka Bibele e re ha Pauluse a ne a bua ka ho “tšelisana,” o ne a bua ka “ho ema lehlakoreng la motho ho mo khothatsa ha a e-na le mathata a boima.” Kahoo, ha re tšelisa ngoan’abo rona ea nang le mathata, re mo thusa hore a ’ne a tsoele pele ho sebeletsa Jehova ka botšepehi. Kamehla ha re tšelisa bana ba bo rona, rea ba bontša hore rea ba rata. (2 Bakor. 7:​6, 7, 13) Ho ba le kutloelo-bohloko le ho tšelisa ke li-ea-thoteng li bapile. Ka tsela efe? Motho ea nang le kutloelo-bohloko o susumeletseha ho tšelisa ba bang le ho ba imolla. Kahoo, ho ba le kutloelo-bohloko ho re thusa hore re tšelise batho ba bang. Hlokomela hore na Pauluse o re’ng ha a hlalosa kamoo kutloelo-bohloko e susumeletsang Jehova ho tšelisa batho. Pauluse o re Jehova “ke Ntate ea mohau le ea bonolo haholo ebile o tšelisa batho maemong ’ohle.”—2 Bakor. 1:3. w23.11 9-10 ¶8-10

Balateli bohle ba Kreste ba ka lebella ho hlaheloa ke mathata. Nahana ka mohlala oa moapostola Pauluse. O ile a re ho Bakreste ba Thesalonika: “Ha re ne re e-na le lona, re ne re tloaetse ho le bolella hore re tla hlaheloa ke mathata ’me joalokaha le tseba, ke mona ho etsahetse.” (1 Bathes. 3:4) Hape o ile a re ho Bakorinthe: “Bana beso, re batla hore le tsebe ka mathata a ileng a re hlahela. . . . Re ne re bile re sa kholiseha hore na re tla phela kapa che.” (2 Bakor. 1:8; 11:​23-27) Bakreste ba mehleng ena le bona ba ka lebella ho hlaheloa ke mathata. (2 Tim. 3:12) U ka tšoaroa hampe ke metsoalle le ba lelapa ha u lumela ho Jesu u bile u le molateli oa hae. Na mohiri oa hao kapa basebetsi-’moho ba kile ba u hlorisa hobane u ikemiselitse ho etsa lintho tsohle ka botšepehi? (Baheb. 13:18) Na u kile oa hlorisoa ke ’muso hobane u bolella batho ka tšepo eo u nang le eona? Ho sa tsotellehe hore na re kopana le mathata a mofuta ofe, Pauluse o re re thabe. w23.12 10-11 ¶9-10

Jakobo o ile a mamella mathata a mangata. Bara ba Jakobo ba babeli e leng Simeone le Levi ba ile ba tlotlolla lelapa labo bona ’me ba etsa hore lebitso la Jehova le rohakoe. Mosali oa Jakobo e leng Ragele o ile a hlokahala ha a ne a beleha ngoana oa bobeli. Hape Jakobo o ile a tlameha ho ea Egepeta a se a tsofetse ka lebaka la tlala e kholo e neng e le teng. (Gen. 35:​16-19; 37:28; 45:​9-11, 28) Jakobo o ile a lula a tšepile Jehova le hore litšepiso tsa Hae li tla phethahala ho sa tsotellehe mathata ao a neng a e-na le ’ona. Jehova o ile a bontša Jakobo hore o ntse a e-na le eena. Ka mohlala, Jehova o ile a fa Jakobo lintho tse ngata. Nahana feela hore na Jakobo o ile a leboha Jehova hakae ha a ne a kopana le mora oa hae Josefa eo a neng a nahana hore ke khale a hlokahetse. Kaha Jakobo e ne e le motsoalle oa Jehova, o ile a khona ho mamella mathata. (Gen. 30:43; 32:​9, 10; 46:​28-30) Ha re lula re le metsoalle ea Jehova, le rona re ka khona ho mamella mathata ao re sa a lebellang. w23.04 15 ¶6-7

Pesalemeng ea 23, Davida o bina pina e bontšang kamoo a kholisehileng kateng hore Jehova oa mo rata le hore o tla mo hlokomela. O bitsa Jehova Molisa oa hae ’me o hlalosa kamoo eena le Jehova e leng metsoalle e haufi kateng. Davida o ne a ikutloa a sireletsehile ha Jehova a mo tataisa ’me o ne a itšetleha ka eena ka ho feletseng. O ne a tseba hore lerato la Jehova le tla mo sala morao ka matsatsi ’ohle a bophelo ba hae. Ke hobane’ng ha a ne a kholisehile hakaale? Davida o ne a utloa a hlokomelehile hantle hobane Jehova o ne a lula a mo fa lintho tsohle tseo a li hlokang. Davida o ne a boetse a tseba hore Jehova ke motsoalle oa hae le hore o thabisa Jehova. Ke kahoo a neng a kholisehile hore ho sa tsotellehe hore na o tla hlaheloa ke eng nakong e tlang, Jehova o tla lula a mo hlokomela ka lintho tsohle tseo a li hlokang. Kaha Davida o ne a tseba hore Jehova oa mo rata le hore o tla mo hlokomela, o ne a sa tšoenyeha empa o ne a lula a thabile a bile a khotsofetse.—Pes. 16:11. w24.01 29 ¶12-13

Ho tloha ka Ntoa ea Bobeli ea Lefatše, batho ba Jehova linaheng tse ngata ba ntse ba thabela ho ba le khotso le bolokolohi ba hore ba ’ne ba tsoele pele ba etsa mosebetsi oa boboleli. Ha e le hantle, mosebetsi oa ho bolela litaba tse monate o atlehile haholo. Mehleng ena bara ba bo rona ba Sehlopha se Busang ba ntse ba tsoela pele ho batla tataiso ho Kreste. Ba batla hore litaelo tseo ba li fang bara ba bo rona li bontše hore li tsoa ho Jehova. Hape ba sebelisa balebeli ba potoloho le baholo hore ba fane ka tataiso liphuthehong. Baholo ba khethiloeng ba ka “letsohong le letona” la Kreste. (Tšen. 2:1) Ke ’nete hore baholo ba etsa liphoso. Moshe, Joshua le baapostola le bona ba ne ba etsa liphoso ka linako tse ling. (Num. 20:12; Josh. 9:​14, 15; Bar. 3:23) Leha ho le joalo, Kreste o ntse a tataisa mohlanka ea tšepahalang le baholo ba khethiloeng ’me o tla tsoela pele ho ba tataisa Kahoo, re na le mabaka a hore re ka tšepa tataiso eo a fanang ka eona a sebelisa bara bana ba bo rona ba khethiloeng hore ba re etelle pele. w24.02 23-24 ¶13-14

Mehleng ena re ka thabisa Jehova ka ho bua ka eena ka tsela e bontšang hore re na le kananelo ebile rea mo rata. Sepheo sa rona se ka sehloohong ha re le tšimong ke hore re thuse batho hore ba atamele ho Jehova le hore ba ikutloe ka tsela eo re ikutloang ka eona ka Ntate oa rona ea lerato. (Jak. 4:8) Rea thaba ha re bontša batho seo Bibele e se buang ka Jehova le ka makhabane a hae a kang lerato, toka, bohlale, matla le a mang. Tsela e ’ngoe eo ka eona re rorisang le ho thabisa Jehova ke ka ho etsa sohle seo re se khonang ho mo etsisa. Ha re etsa joalo, re fapana le batho ba lefatše lena le khopo. Taba ena e ka ’na ea etsa hore batho ba bang ba hlokomele hore re fapane le batho ba bang ’me ba ipotsa hore na hobane’ng. (Mat. 5:​14-16) Ha re sebelisana le bona bophelong ba letsatsi le letsatsi, re ka fumana monyetla oa ho ba hlalosetsa hore na ke hobane’ng ha re fapane. Qetellong batho ba lipelo li ntle ba ka atamela ho Molimo oa rona. Ha re rorisa Jehova ka litsela tsena, re mo thabisa haholo.—1 Tim. 2:​3, 4. w24.02 10 ¶7

E le hore u be monna oa Mokreste ea nang le tumelo e matla, u lokela ho ithuta lintho tse tla u thusa bophelong. Lintho tsena li tla u thusa hore u amohele boikarabelo ka phuthehong, u fumane mosebetsi u be u tšoarelle ho oona e le hore u ka itlhokomela kapa oa hlokomela lelapa la hao, le hore u utloane le batho. Ka mohlala, ithute ho bala le ho ngola hantle. Bibele e re monna ea thabileng le ea atlehileng bophelong ke ea balang Lentsoe la Molimo letsatsi le letsatsi a bile a nahanisisa ka lona. (Pes. 1:​1-3) Haeba a bala Bibele letsatsi le letsatsi, sena se tla mo thusa hore a nahane ka tsela eo Jehova a nahanang ka eona, e leng se tla mo thusa hore a nahane hantle le ho sebelisa seo a ithutileng sona ka Mangolong. (Liprov. 1:​3, 4) Bara le barali ba bo rona ba hloka thuso ea banna ba khonang ho ruta le ho fana ka keletso e tsoang ka Bibeleng. Haeba u khona ho bala le ho ngola hantle, u tla khona ho fana ka lipuo le likarabo tse matlafatsang tumelo. U tla boela u khone ho ngola lintlha tsa bohlokoa tse tla u thusa hore u matlafatse tumelo ea hao u be u khothatse batho ba bang. w23.12 26-27 ¶9-11

Ha u ikutloa u tšohile, nahana ka lintho tseo Jehova a tla li etsa nakong e tlang ha Satane a se a felisitsoe. Pontšo e ileng ea fanoa kopanong ea setereke ea 2014 e ile ea bontša ntate a buisana le lelapa la hae ka hore na 2 Timothea 3:1-5 e ka re’ng haeba e ne e ka hlalosa hore na bophelo bo ne bo tla ba joang Paradeiseng, o ile a re: “Lefatšeng le lecha bophelo bo tla ba monate. Batho ba tla rata batho ba bang, ba rate ’nete, ba ikokobetse, ba rorise Molimo, ba mamele batsoali, ba be le teboho, ba tšepahale, ba rate ba malapa a bona, ba lumellane le batho ba bang ka ntho efe kapa efe, ba lule ba bua batho ba bang hantle, ba ithibe, ba be bonolo, ba rate lintho tse ntle, ba se ke ba fetohela batho ba bang, ba se ke ba e-ba manganga, ba se ke ba ikakasa, ba rate Molimo ho e-na le ho rata menate, ba phele ka tsela e bontšang hore ba rata Molimo. Batho ba joalo u ba khomarele.” Na u na le ho qoqa le lelapa la hao kapa balumeli-’moho ka hore na bophelo bo tla ba joang lefatšeng le lecha? w24.01 6 ¶13-14

Hoa khothatsa ho tseba hore Jehova o amohela batho ba hae e le sehlopha. Bibele e re: “Jehova o rata batho ba hae.” (Pes. 149:4) Leha ho le joalo, ka linako tse ling batho ba bang ba ka nyahama hoo ba ka ipotsang potso ena: ‘Na Jehova oa nkamohela?’ Bahlanka ba bangata ba Jehova ba tšepahalang ba neng ba phela mehleng ea ha ho ne ho ngoloa Bibele, ka linako tse ling ba ne ba utloa ho le thata ho lumela hore Jehova oa ba amohela. (1 Sam. 1:​6-10; Jobo 29:​2, 4; Pes. 51:11) Bibele e bontša ka ho hlaka hore batho ba sa phethahalang ba ka khahlisa Jehova. Joang? Re lokela ho bontša tumelo ho Jesu Kreste ’me re kolobetsoe. (Joh. 3:16) Ha re etsa joalo, re tla be re bontša batho ba bang hore re baketse libe tsa rona le hore re tšepisitse Molimo ho etsa thato ea hae. (Lik. 2:38; 3:19) Jehova oa thaba ha re nka mehato ena e le hore re be le kamano e ntle le eena. Jehova o tla re amohela a be a re nke re le metsoalle ea hae e haufi haeba re leka kahohle hore re phelele tšepiso eo re mo etselitseng eona ea ho mo sebeletsa.—Pes. 25:14. w24.03 26 ¶1-2

Re ka etsisa mohlala oa barutuoa ka hore re tsoele pele ho bua le batho ka molaetsa oa Bibele leha ’muso o thibela mosebetsi oa rona. Re ka kholiseha hore Jehova o tla re thusa ho phetha tšebeletso ea rona. Kahoo, rapella sebete le bohlale. Kopa Jehova hore a u thuse ho sebetsana le mathata. Bongata ba rona re sebetsana le ho kula ’meleng kapa maikutlong, ho hlokahalloa ke moratuoa, ho sebetsana le maemo a boima ka lapeng, ho hlorisoa le mathata a mang a mangata. Lintho tse kang mafu a seoa le lintoa li entse hore ho be thata le ho feta ho sebetsana le mathata ana. Phetlela Jehova sefuba sa hao. Mo joetse ka boemo boo u sebetsanang le bona joalokaha u ne u tla bolella motsoalle oa hao ea haufi-ufi. U kholisehe hore Jehova “o tla u thusa.” (Pes. 37:​3, 5) Ho lula re rapela ho tla re thusa ho ‘mamella ha re e-na le mathata.’ (Bar. 12:12) Jehova o tseba mathata ao barapeli ba hae ba nang le ’ona ebile “o utloa sello sa bona ha ba kopa thuso.”—Pes. 145:​18, 19. w23.05 5-6 ¶12-15

Ha re hloka ho etsa liqeto tsa bohlokoa, re lokela ho utloisisa “hore na thato ea Jehova ke efe” ’me re etse lintho tumellanong le eona. (Baef. 5:17) Ha re batla melao-motheo e amanang le boemo ba rona, ho tšoana le ha re batla tsela eo Molimo a nahanang ka eona ka boemo ba rona. Kahoo, ha re e sebelisa, re tla khona ho etsa liqeto tse nepahetseng. “Ea khopo,” e leng sera sa rona Satane a ka rata ho re phathahanya ka lintho tsa lefatše lena hoo re ka hlokang nako ea ho sebeletsa Molimo. (1 Joh. 5:19) Ho ka ba bonolo hore Mokreste a amehe ka chelete, thuto kapa mosebetsi ho e-na le hore a amehe ka litsela tse ngata tseo a ka sebeletsang Jehova ka tsona. Ha seo se ka etsahala, ho tla be ho hlakile hore o nahana joaloka batho ba lefatše lena ba sa sebeletseng Jehova. ’Nete ke hore ha se hore lintho tsena li fosahetse empa ha lia lokela ho tla pele bophelong ba rona. w24.03 24 ¶16-17