Ho Nyarela ka Litabeng

Na ke Lebitso le “Khopisang”?

Koranta ea K’hatholike Comnuovi tempi, e itse, tlhahiso e lokelang ho amoheloa ke hore lebitso la Molimo ha lea lokeloa ho qapollisoa, bonyane le ka ngoloa e le JHWH, ’me le bitsoe e le “Morena.” Ena e bile karabelo ea kōpo e ileng ea hlahisoa ke “Mokhatlo oa Bakreste oa Bajode oa Botsoalle” oa Roma ’me e ile ea saenoa ke liithuti tsa bolumeli tse tummeng tsa K’hatholike le tsa Bojode. Kōpo e ne e le hore “lifeme tse hatisang le bangoli ba likoranta le limakasine” ba khaotse ho sebelisa lebitso “Jahweh” kahobane “le khopisa Bajode ba reng ha ho tsejoe qapolliso ea lebitso la Molimo.” Mokhatlo ona o re, kōpo ea ’ona e theiloe “moetlong oa boholo-holo oa Bajode” o “’nileng oa bolokoa o sa sitisoe” ho tla fihlela kajeno.

Empa na Bakreste ba lokela ho tataisoa ke meetlo ea Bajode? Na e tla ba ho loketseng ho bona hore ba behele lebitso la Molimo ka thoko ’me ba qobe ho le bitsa? Bibele e bontša hore Molimo o batla ha bohle ba tseba hore eena, “eo lebitso la hae e leng Jehova,” ke eena ea Phahameng Haholo. (Pesaleme ea 83:18; Ezekiele 38:23; Malakia 3:16) Jesu o re beetse mohlala tabeng ena. Ho e-na le hore a latele meetlo ea Bojode e neng e “fetotse molao oa Molimo lefeela,” o ile a ruta balateli ba hae ho rapela: “Lebitso la hao a le ke le khethehe.” (Mattheu 6:9; 15:6) ’Me lihoreng tse ’maloa feela pele ho lefu la hae la sehlabelo o ile a re thapelong: “[Barutuoa] ke ba tsebisitse lebitso la hao, ’me ke tla ’ne ke ba tsebise lona.”—Johanne 17:26.

Tšepiso ea Lenyalo: Na ke Tlamo?

Mofumahatsana oa Brazil hammoho le mohlankana oa hae ba ne ba sa tsoa qeta ho kenya phahlo ka tlung ea bona e ncha. Limemo tsa lenyalo li ne li ntšitsoe, ’me lintho tsohle li ne li bonahala li lokile bakeng sa lenyalo la bona, ho setse matsatsi a mararo feela. A nahana ka bophelo ba hae bo bocha, monyaluoa a tlohela mosebetsi. Ntle ho tsebiso monyali a roba tšepiso ea lenyalo. Ka baka la ho teneha le ho soetseha, monyaluoa ea tlohetsoeng a ea molaong. ’Muelli oa hae a bolela hore ‘tšepiso ea lenyalo ke tlamo ea pele, ’me haeba e robiloe ka mabaka a sa utloahaleng, molekane ea seng molato o lokeloa ho lefuoa bakeng sa litšenyehelo leha e le life.’ Lekhotla la molao le ile la lumela ’me la laela hore monna a nehe kharabe ea hae ‘chelete e beiloeng ke molao ho lefella litšenyehelo tsa lekhotla tsa ’muelli oa molao.’ Ha a bua ka qeto ena, ’muelli oa molao Nereu Mello, o ngotse sena koranteng ea São Paulo Jornal da Lapa: “Tšepiso ea lenyalo ke tlamo e tebileng haholo ’me ho e roba ha ho nkuoe hasesane molaong.”

Taba ena ea ho teba ha tšepiso ea lenyalo ha e ncha. Tlas’a Molao oa Moshe mosali ea neng a tšepisitsoe lenyalo ’me a entse bofebe o ne a fumana kotlo e tšoanang le ea mosali ea nyetsoeng oa sefebe. Kahoo o ne a tšoaroa ka tsela e fapaneng le ea mosali ea sa nyaloang ea entseng bofebe. (Deuteronoma 22:23, 24, 28, 29) Morao koo tšepiso ea lenyalo e ne e nkuoa e le tlamo—joaloka ha eka ba babeli ba se ba nyetse. (Mattheu 1:19) Kajeno Bakreste le bona ba tseba tšepiso ea lenyalo e le bohato bo tebileng. Ha ba e nke hasesane.—Bapisa Mattheu 5:37.

Ho Fetohela Mahlaleng a Kajeno

Kamor’a hore Martin Luther a khalemele taba ea ho rekisoa ha tokoloho libeng tse itseng (ho lokoloha mefuteng e itseng ea kotlo ea sebe), Kereke ea Roma e K’hatholike ea tlosa mokhoa ona molaong ka 1562. Empa letona la Vatican Pedro Albellan haufinyane o hatelletse hore thuto ea ho lumelloa ha tokoloho libeng tse itseng e sa lutse e le “e ke keng ea hanyetsoa le ho fetoloa.” Buka e nchafalitsoeng ea Roma e K’hatholike mabapi le ho lokolloa libeng tse itseng e bontša hore Vatican e kopantse tumelo ena ea khale le ea kajeno. Ho ea ka The Times ea London, hajoale babishopo ba ka “fana ka tumello e feletseng ea ho lokolloa libeng tse itseng ho batšepuoa ba bona ka seea-le-moea kapa ka thelevishene hararo ka selemo ha ba fana ka mahlohonolo lebitsong la Mopapa.” Leha ho le joalo, ho na le thibelo. “E lokela ho ba khaso e otlolohileng,” ho rialo Luigi De Magistris oa Lekhotla le Halalelang la Baapostola la Vatican, e leng ofisi e sebetsanang le ho lokolloa libeng tse itseng. “Ho boha ho phetoa ha lenaneo ha hoa lekana.”

Empa na ho lokolloa libeng tse itseng ke ha Mangolo, e bang hoa rekisoa kapa ho etsoa ke motho ka boeena kapa ka TV? Kaha Jesu ka linako tse ling o ne a tšoarela libe ka bolokolohi, ha a ka a bua letho ka ho lokoloha libeng tse itseng. Esita le baapostola ha ba ka ba etsa joalo. “Mali a Jesu Kreste, Mora oa [Molimo], a re hlatsoa libe tsohle,” ho ngotse moapostola. “Ha re ipolela libe tsa rōna, Molimo oa tšepeha, o lokile, hore o re tšoarele libe ’me o re tlose bokhopo bohle.” (1 Johanne 1:7, 9) Haeba libe tsohle li tšoareloa joalo, ke eng e tla sala hore e lefuoe ke kotlo kapa ho koaheloa ha libe tse itseng?—Johanne 3:36; Ba-Roma 5:10.