Bohlokoa ba Ho Bina Borapeling ba ’Nete

NA U ka inahanela ka lefatše le hlokang ’mino? Ho se ho se mohla u tla utloa ho bina ho thabisang ha bana kapa lentsoe le monate la letšoanafike kapa bellbird? Ho se ho se mohla u tla utloa ho keketeha ho qabolang ha magpie kapa letšeho le makherehloa la kookaburra? Ho thabisang, hona ho ke ke ha etsahala le ka mohla. Empa monahano o joalo o phahamisa e ’ngoe ea limpho tse ngata tsa Molimo ho motho: mpho ea ’mino.

Jehova ke Molimo oa ’Mino

Ke hobane’ng ha ho bina ho re nyakallisa le ho re thabisa? Lebaka ke hore, Jehova ka boeena o thabisoa le ho khahloa ke lipina tsa thoriso tse tsoang ho libopuoa tsa hae. Na u ka inahanela ka ketsahalo eo ho eona mangeloi ’ohle a neng a bina ka nyakallo ka pōpo ea Jehova e hlollang ea lefatšeng? Kapa na u ka ipona u eme tlekelele! har’a balisa hoetla bosiung ba tsoalo ea botho ea Jesu, u tsota molumo oa lebotho le leholo la mangeloi ha le bina le re: “Khanya e be ho Molimo maholimong a holimo”?—Luka 2:13, 14; Jobo 38:7.

Tsela e ’ngoe eo ka eona Jehova a ipontšitseng e le Molimo oa ’mino ke ka ho etsa hore ho bina e be karolo ea borapeli ba ’nete Iseraeleng. Hamorao, Molimo oa boela oa senola tlamahano e haufi-ufi pakeng tsa ho bina le borapeli ba ’nete ponong ea Tšenolo e ileng ea neoa moapostola Johanne. Ponong e ’ngoe ea boprofeta sehlopha se seholo sa ’mino—sa ba 144 000 ka palo—se bina sefela se secha se monate pel’a terone ea Molimo.—Tšenolo 14:3.

Ho Bina Mehleng ea Pele ho Bokreste

Boholo ba Molimo le liketso tsa oona tse hlollang le tsona li ile tsa susumetsa bahlanka ba oona ba lefatšeng ho tlerola pina. Nahana ka liphello tse susumetsang tseo ho bina ho ileng ha li tlisa ho Baiseraele kapele kamorao ho hore ba lokolloe ka mohlolo bokhobeng Egepeta. Moshe le Baiseraele bahabo ba ile ba thetseha lipelo le maikutlo ha ba bina pina ea tlhōlo e bolelang ka seo Jehova a se entseng ho Faro le mabotho a hae.—Exoda 15:1-21.

Hamorao paleng ea Iseraele, letsatsi la bohlokoahali la fihla ha areka ea selekane e il’o beoa kahare ho tente ea eona eo e e hlometsoeng ka mokhoa o khethehileng tlas’a tataiso ea Morena Davida. E ile ea ba ketsahalo e kaakang paleng! Ha ea ba ’mino o ikhethang feela empa le tšebeliso e hapang maikutlo ea liletsa e ile ea eketsa monyaka oa letsatsi leo.—1 Likronike 16:4-36.

Lerato la Davida la ’mino le tsebo ea hae ea ho letsa harepa li ile tsa matlafatsa thahasello ea hae ea ho phahamisa ’mino le ho bina borapeling ba ’nete. Pesalemeng ea 33:1, 3, (NW) re utloa kōpo ea hae e tsoang botebong ba pelo hore barapeli ba Jehova ba binele Molimo ka lentsoe le phahamileng ba bina ka pelo eohle: “Tlerolang ka thabo, lōna ba lokileng, ka baka la Jehova . . . Etsang sohle seo le ka se khonang ho letsa likhole ’moho le mehoo ea thabo.”

Ho Bina Mehleng ea Bokreste

Mehleng ea pele ea Bokreste, ho bina ho ne ho boetse ho phetha karolo e khōlō borapeling ba ’nete. Jesu le baapostola ba hae ba ile ba bina ’moho kamorao ho sejo sa mantsiboea pejana ho lefu la Jesu. (Mareka 14:26) Ha ba le teronkong, Pauluse le Silase ba ile ba bina ka mantsoe a phahameng hore bohle ba utloe. (Liketso 16:25) Joaloka Davida moapostola Pauluse o ne a chesehela ho sebelisa ’mino. Ka makhetlo, o ile a khothalletsa balumeli ’moho le eena ho binela Jehova lifela tsa thoriso.—Ba-Efese 5:18, 19; Ba-Kolosse 3:16.

Borapeling ba kajeno ba Bokreste, ho bina ke tšobotsi e hlahelletseng. Ka 1905 buka Hymns of the Millennial Dawn e ile ea hatisoa. Leqephe le nang le sehlooho le hlalosa lipina tsa eona tse 333 e le “Pokello e Khethiloeng ea Lipesaleme le Lifela le Lipina tse Halalelang ho Thusa Batho ba Molimo ho Bina le ho Etsetsa Morena Lithoko Lipelong tsa bona.”

Eaba ka 1928 ho hlahisoa buka ea lipina e nchafalitsoeng e neng e e-na le lipina tse 337. E ne e bitsoa Songs of Praise to Jehovah, ’me selelekela sa eona se ne se re: “Lipina tsena li tla fumanoa li le tumellanong le linnete tsa Molimo tseo joale li lokelang ho utloisisoa.” Leha ho le joalo, ha lilemo li ntse li feta ’me leseli la ’nete le ntse le eketseha, ho ile ha hlaka hore tse ling tsa lipina tsena, li ne li susumelitsoe ke mohopolo o tsoang bolumeling ba bohata. Ho feta moo, ho ne ho hlokahala lipina tsa ’Muso tse khothalletsang ho boleloa ha litaba tse molemo, ha ho bolela pontšeng ho totobala haholoanyane.—Mattheu 24:14; Ba-Heberu 13:15.

Ka 1944, ho ile ha hlahisoa Kingdom Service Songbook, e e-na le lipina tse 62. Ka 1979, mashome a mabeli a lilemo hamorao, buka Binang ’me le Lulueletse ka Lipelong tsa lōna e ile ea lokolloa. Eona e ne e e-na le lipina tsa ’muso tse 119 tse neng li akarellelitse tšobotsi e ’ngoe le e ’ngoe ea bophelo ba Bokreste le borapeli, ho akarelletsa ho pakela ba bang le ho rorisa Jehova Molimo le Jesu Kreste.

Ho se ho batla ho fetile lilemo tse ling tse mashome a mabeli, tseo ka tsona leseli la ’nete le tsoetseng pele ho eketseha. (Liproverbia 4:18) Ho ile ha bonahala ho hlokahala buka e ’ngoe hape ea lipina. Kahoo ka 1984 ho ile ha lokolloa buka ea lipina e nang le sehlooho Sing Praises to Jehovah. E na le lipina tsa ’Muso tse 225, tse nang le mantsoe le lithoko tseo kaofela ha tsona li qapiloeng ka ho feletseng ke bahlanka ba Jehova ba tsoang likarolong tsohle tsa lefatše.

Sebelisa ’Mino oa Puso ea Molimo ka Botlalo

Setšoantšo se bontšitsoeng maqepheng a mabeli a qetellang a buka ena ea morao-rao ea lipina se re susumelletsa ho sebelisa ’mino oa puso ea Molimo ka botlalo libokeng tsa Bokreste. Libini tse koetlisitsoeng tsa tempele tse tšoantšitsoeng mono ka ho hlaka li phahamiselitse mantsoe a tsona le lipelo tsa tsona ka pina ho Molimo.—1 Likronike 25:7.

Le rōna re ka bina ka mokhoa o tšoanang libokeng tsa rōna tsa Bokreste, re ahlamisa melomo ea rōna ’me re bina ho tsoa lipelong tsa rōna. Leha ho le joalo, hase bohle ba rōna ba etsang joalo. Mohlomong boikhohomoso bo re etsa hore re lahleheloe ke thabo ea ho binela Jehova re sa hlajoe ke lihlong, ho sa tsotellehe hore na re na le mantsoe a joang. Kapa re ka ’na ra ameha haholo ka hore na ba emeng pel’a rōna ba tla ba le boikutlo bofe. Moshe o ne a e-na le bothata bo tšoanang—e seng ba ho bina empa ba ho bua. Karabelo eo Jehova a ileng a mo nea eona e ka ’na ea re thusa haeba re e-na le tšekamelo ea ho tšaba kapa ea ho ikutloa re e-na le lebaka la ho se kopanele ho bineng hobane re sa tsebe ho bina. Jehova o ile a botsa Moshe: “Ke mang ea etselitseng motho molomo? . . . Na hase ’na Jehova na?” (Exoda 4:11) Ka sebele, Jehova o tla re mamela ka thabo haeba re sebelisa matla leha e le afe ao a re neileng ’ona ho bina lithoriso tsa hae ka mantsoe a phahameng!

Hape, nahana kamoo Pauluse le Silase ba neng ba bina ka mantsoe a phahameng kateng ha ba le teronkong. Ho ne ho se ho hlajoa ke lihlong ha letho le hoja ba ne ba se na liletsa, esita le eona buka ea lipina feela eo ba ka binang ka eona. Nahana ka ketsahalo eo: “Empa bosiu bo boholo, Pauluse le Silase ba ne ba rapela, ba binela Molimo lifela; ’me ba koaletsoeng le bona ba ne ba ba mamela.” (Liketso 16:25) Na e ne e le kahobane Pauluse le Silase ba ne ba e-na le mantsoe a koetlisitsoeng a ho bina? E seng joalo. Ntho ea sehlooho eo ba neng ba amehile ka eona e ne e le ho bina ka mantsoe a phahameng ’me ba bina ho tsoa pelong! Ntho ea sehlooho eo re amehileng ka eona ha re bina lipina tsa thoriso ke efe?

Kaofela Re ka Ntlafatsa

Keletso ea Davida oa sebini ke e loketseng mona: “Etsang sohle seo le ka se khonang ho letsa likhole ’moho le mehoo ea thabo.” (Pesaleme ea 33:3, NW) Ke sona seo Jehova a se lebeletseng ho bahlanka bohle ba hae—e seng ho fetang hoo, kapa ho ka tlaase ho ‘sohle seo re ka se khonang.’ Haeba re etsa sona seo, re ka lebella hore Jehova a hlohonolofatse boiteko ba rōna, ho ka re thabisang—’me mohlomong ha ba ha re makatsa—re ka ’na ra ntlafatsa.a

Tse ling tsa litlhahiso tse sebetsang tse ka ’nang tsa thusa ho ntlafatsa ’mino oa rōna ke tsena: Leka ho mamela lipina tse ncha tsa ’Muso hangata, u sebelisa lik’hasete tse theipiloeng kapa lirekoto moo ho khonehang. Ho ba bang, ho bina lipina lapeng kapa lipokanong tse nyenyane le balumeli ’moho ho ipakile ho le molemo ho bile ho khatholla. Ke habohlokoa hore seletsa sa ’mino se sebelisoang libokeng tsa Bokreste se letsoe haholo ho lekana hore batho bohle ba binang ba utloe. Hona ho etsa hore ho be bonolo ho latela molumo oa pina le ho eketsa sebete ho batho ba binang. Motho ea phatlalatsang pina o lokela ho bolela sehlooho sa pina, mohlomong a be a bolele kamoo e leng e loketseng kateng, e seng nomoro feela.

Batsoali, na le khothalletsa bana ba lōna ho bina lipina tsa ’Muso ka cheseho le ho tsoa lipelong? Malapa a ileng a khothalletsa bana ba ’ona ba banyenyane ho bina ho tsoa lipelong, ’me ba bina ka kutloisiso, hangata a fumane ho bina joalo e le thuso e molemo ho lebisa khōlong ea moea.

Melemo e Mengata

Ho na le melemo e mengata ea ho bina ka lentsoe le phahameng le ho bina ho tsoa pelong. Ho kopanela ha rōna re le batho ka bomong borapeling ba pontšeng ho ba matla haholoanyane. Ba emeng pel’a rōna ba susumelletseha ho bina ka mantsoe a phahameng haholoanyane ha ba utloa re bina re sa hlajoe ke lihlong. Le phutheho kaofela e fumana molemo, hobane ho bina ka lentsoe le phahameng hoa tšoaetsanoa!

Ho feta moo, ’mino o matla o fana ka bopaki bo boholo ho ba bang teng libokeng ka lekhetlo la pele. Ba fetang haufi le Liholo tsa rōna tsa ’Muso, esitana le baahelani ba lulang haufi le tsona, ba khahloa ke ’mino oa rōna o motle, feela joalokaha ntle le pelaelo ho ne ho le joalo ka batšoaruoa ba ileng ba utloa Pauluse le Silase. Hona ho bile ha fella ka hore ba bang ba utloang ba batle ho hlahloba ’nete ka ho teba.

Habohlokoa ka ho fetisisa, ’mino oa rōna o ntlafalitsoeng o tla tlisa thoriso e kholoanyane ho Jehova, Moqapi oa ’mino le ho bina, e leng eena ea lokelang ho rorisoa ho feta bohle pineng.

[Mongolo o botlaaseng ba leqephe]