Lipotso tse Tsoang ho Babali
◼ Liproverbia 27:23, (NW) e fana ka keletso efe ea motheo ho balisa ba moea hammoho le ho Bakreste ka kakaretso?
Temana e baleha tjena: “U tlameha ho tsebisisa ponahalo ea mohlape oa hao. Beha pelo ea hao mohlapeng oa hao.” (Liproverbia 27:23, NW) Temana ena hangata e ’nile ea sebelisoa ho khothalletsa balisa ba moea ho bontša thahasello le ho tloaelana le boemo le mathata a Bakreste ka har’a phutheho. Khothatso e joalo e nepahetse, kaha Bibele e tšoantša baholo le balisa ’me e tšoantša phutheho le mohlape oa linku. (Liketso 20:28, 29; 1 Petrose 5:2-4) Leha ho le joalo, le hoja molao-motheo ona o kaholimo o nepahetse, temana ena ha e bue haholo-holo ka baholo ba moea.
Buka ea Liproverbia e na le litemana tse ngata tse emeng li le ling joaloka lipoleloana tsa keletso, empa Liproverbia 27:23, (NW) ke karolo ea sehlopha sa litemana: “U tlameha ho tsebisisa ponahalo ea mohlape oa hao. Beha pelo ea hao mohlapeng oa hao; hobane letlotlo le ke ke la hlola ka ho sa feleng, le moqhaka e ke ke ea e-ba oa meloko kaofela. Joang bo botala bo shoele, ’me joang bo bocha bo hlahile, le limela tsa lithaba li se li bokelletsoe. Lipheleu tse nyenyane ke tsa liaparo tsa hao, ’me lipotsanyane ke moputso oa tšimo. ’Me ho na le lebese la lipoli le lekaneng bakeng sa lijo tsa hao, bakeng sa lijo tsa lelapa la hao, le mokhoa oa bophelo oa makhabunyane a hao.”—Liproverbia 27:23-27, NW.
Temana ena e bululetsoeng e thoholetsa ho ba le mokhoa oa bophelo bo mahlaha-hlaha, bo khothetseng, bo itekanetseng, le ho lumela ha rōna hore re itšetlehile ka Jehova. E etsa sena ka ho totobatsa bophelo ba bolisa ba molisa oa Iseraele, mohlomong bo fapanang hōle le bophelo bo majaba-jaba bo theiloeng mererong ea khoebo le maruong a fumanoang kapele.
“Letlotlo” kapa leruo le fumanoang ka merero e potlakileng ea khoebo le fellang ka botumo (“moqhaka”), li ka fela habonolo, joalokaha ba bangata ba tla tiisa sena. Ke kahoo ho nang le ho hongata ho ka buuoang ka bophelo bo itekanetseng, bo kang bo neng bo lateloa ke balisa ba boholo-holo ha ba hlokomela liphoofolo tse ruiloeng. Tsela e joalo ea bophelo e ne e sa itekanela ka kutloisiso ea ho ba e sa hlokomeleng. Molisa o ne a lokela hore a behe tlhokomelo mohlapeng oa hae, a tiisehe hore linku li sireletsehile. (Pesaleme ea 23:4) Haeba, nakong eo a li fang tlhokomelo, a fumana nku e kulang kapa e tsoileng kotsi, o ne a ka ’na a e tlotsa ka oli e thobang. (Pesaleme ea 23:5; Ezekiele 34:4; Zakaria 11:16) Mabakeng a mangata molisa ea khothetseng ea behang pelo ea hae mohlapeng oa hae o ne a tla bona boiteko ba hae bo hlahisa litholoana—mohlape oa hae o ntseng o eketseha butle-butle.
Molisa ea sebetsang ka thata ea leng hlokolosi o ne a e-na le mohloli o tšepahalang oa thuso—Jehova. Joang joalo? Molimo o fana ka linako tsa selemo le lipotoloho tseo maemong a tloaelehileng li hlahisang joang bo bongata bo ka fepang mohlape. (Pesaleme ea 145:16) Nakong eo linako tsa selemo li fetohang, ha joang bo botala bo fela libakeng tse tlaase, bo ka ’na ba ba bongata libakeng tse phahameng, moo molisa ea hlokomelang a ka isang liphoofolo tsa hae teng.
Liproverbia 27:26, 27, (NW) e bolela phello e ’ngoe ea mosebetsi o joalo—lijo le liaparo. Tlhaloso ena hase ea lijo tsa limenye-menye tsa mofuta o khethehileng ka ho fetisisa, ebile ha e fane ka lebaka la hore a sebetse ka thata a lebelletse ho fumana liaparo tsa moseho oa morao-rao, kapa lesela la boemo bo phahameng. Empa haeba a ne a ikemiselitse ho etsa boiteko, molisa hammoho le lelapa la hae ba ne ba ka fumana lebese mohlapeng (le chisi), hammoho le boea ba ho loha liaparo tse tšoarellang nako e telele.
Kahoo keletso e reng: “U tlameha ho tsebisisa ponahalo ea mohlape oa hao” hase ea balebeli ba moea feela, ke ea Bakreste bohle. E hatisa bohlokoa ba hore re khotsofale ka lijo le liaparo tseo re li fumanang ka mosebetsi oa ka mehla, oo re o khothalletseng, re tšepile hore Molimo o ke ke oa re lahla. (Pesaleme ea 37:25; 2 Ba-Thessalonika 3:8, 12; Ba-Heberu 13:5) Ha re bapisa Liproverbia 27:23-27, (NW) le keletso e ho Luka 12:15-21 le Timothea 6:6-11, re bona kamoo keletso ea Molimo e ’nileng ea lula e ntse e tšoana ka teng tabeng ena. Kahoo motho ka mong oa rōna a ka bala Liproverbia 27:23-27, (NW) hape, re ntse re ipotsa, ‘Na ke nka sena ka ho teba le ho se sebelisa bophelong ba ka ba letsatsi le leng le le leng?’
[Tlhaloso ea Moo Setšoantšo se Nkiloeng Teng e leqepheng la 30]
Pictorial Archive (Near Eastern History) Est.