Baromuoa ba Eketsehileng Bakeng sa Kotulo ea Lefatše Lohle
SEPTEMBER ke khoeli ea kotulo ho balemi, empa mosebetsi oa kotulo o bohlokoa haholoanyane o ile oa hohela letšoele le leholo Holong ea Kopano ea Lipaki tsa Jehova e Jersey City, mose ho Nōka ea Hudson ha o tloha Motseng oa New York, ka September 8, 1991. Sehlopha sa bo91 sa Sekolo sa Bibele sa Watchtower sa Gileade se ne se abeloa mangolo. Litho tse ka bang 4 263 tsa lelapa la Bethele le baeti ba menngoeng ba ne ba le teng, le ba bang ba 1 151 ba neng ba hokelletsoe ka mehala ea thelefono le ntlo-khōlō e Brooklyn le mapolasing a Wallkill le Patterson.
Mopresidente oa Sekolo sa Gileade, Frederick W. Franz, ea ka bang lilemo li 98, o ile a bula lenaneo ka thapelo e amang maikutlo le e nang le tlhompho e tebileng. Albert D. Schroeder, setho sa Sehlopha se Busang le eo e kileng ea e-ba mongoli le morupeli oa sekolo seo, o ile a sebeletsa e le molula-setulo oa lenaneo la kabo ea mangolo. O ile a hopotsa bamameli ka Pesaleme ea 2:1, 2 le boprofeta bo bong bo bolelang esale pele ka nako ena ea ho sisinyeha le ho loebehlana ho teng har’a lichaba. Boemo bona ba pherekano bo entse hore ho bulehe masimo a mangata a macha bakeng sa mosebetsi oa kotulo.
Puo ea pele letsatsing leo e ile ea neheloa ke George M. Couch, eo e leng setho sa Komiti ea Bethele. Sehlooho sa hae se ne se re “Balang Mahlohonolo a Lōna.” O ile a hopotsa liithuti tsa Gileade hore ha ho mohla ho ka thoe’ng e se e le kapele haholo hore ho ka qalisoa mokhoa ona. O ile a bolela hore ka sebele liithuti ka botsona li ne li hlohonolofalitsoe empa hore mahlohonolo ao a ne a tlile feela ka mor’a mosebetsi o boima haholo. Ka ho tšoanang, Jakobo ea lilemo li 97 o ile a betana bosiu bohle le lengeloi—hona hohle e le hore a tle a fumane tlhohonolofatso. (Genese 32:24-32) Moena Couch o ile a khothalletsa liithuti hore li se ke tsa touta haholo ka mehopolo e sa nepahalang empa hore li fetohe tlhohonolofatso ho ba bang ka ho hlaolela khotso ea kelello ka thapelo le boikemisetso.
John E. Barr oa Sehlopha se Busang o ile a latela ka sehlooho “E-bang le Lerato Har’a Lōna.” Balateli ba Jesu ba ne ba ikemiselitse ho shoelana. O ile a botsa liithuti “Na le utloa lipelo tsa lōna li tlala mofuta ona oa lerato?” O ile a re, ‘ka ntle ho lerato lena, ha re letho. Ho bonolo joalo feela.’ (1 Ba-Korinthe 13:3) Moena Barr o ile a thathamisa litsela tse ling tse sebetsang tsa ho bontša lerato. O ile a khothalletsa liithuti ho tšoara baromuoa-’moho le tsona ka tlhompho, ka mehla ba batle tsela e bohlale ea ho bua. O ile a ba eletsa, ‘lebalang litaba tse sa reng letho’ a qotsa 1 Petrose 4:8. O ile a hlokomela hore esita le matsatsi a baromuoa a ho pheha e ne e le liketsahalo tseo ba neng ba ka bontša lerato ho tsona ka ho nka mosebetsi oo e le ho fetang feela mosebetsi oo motho a tlamehang ho o etsa. O ile a hopotsa liithuti: “Le ka mohla ha re khaotse ho kolota baena le bo-khaitseli ba rōna lerato.”—Ba-Roma 13:8.
“U Kholisehile Hakae?” e bile sehlooho se thahasellisang se ileng sa hōlisoa ke David A. Olson oa Komiti ea Lefapha la Tšebeletso. O ile a totobatsa libaka tse peli tseo re ka bontšang ho kholiseha ho tsona: ho Jehova le mokhatlo oa hae o hlophisitsoeng, oo re nang le mabaka a se nang palo a ho kholiseha ho ’ona (Liproverbia 14:6; Jeremia 17:8); le ho motho ka mong. Baromuoa ba na le lebaka la ho itšepa ka tekanyo e itseng, joaloka semelo sa bona e le basebeletsi le letlotlo leo Jehova le mokhatlo oa hae o hlophisitsoeng o ba fileng lona. Moapostola Pauluse o ile a bontša kholiseho e joalo ka mabaka a tšoanang. (1 Ba-Korinthe 16:13; Ba-Filippi 4:13) Leha ho le joalo, Moena Olson o ile a lemosa khahlanong le ho itšepa ho tlōlisa hoo lefatše le ho buellang, joalokaha ho bontšitsoe ke sengoli se tummeng seo ho tlalehoang hore se ile sa re: “Hangata ke qotsa mantsoe a ka. Ke letsoai moqoqong oa ka.” Leha ho le joalo, kholiseho e leka-lekaneng le boikokobetso e ka susumelletsa kholiseho ho ba bang. Ho bile joalo tabeng ea Pauluse.—Ba-Filippi 1:12-14.
Lyman A. Swingle oa Sehlopha se Busang o ile a latela ka ho khothatsa liithuti: “Lōna ba Abetsoeng Mangolo Gileade, E-eang Masimong a Lokelang ho Kotuloa!” O ile a bolela hore lena e ne e le letsatsi la kotulo bakeng sa Sekolo sa Gileade le bakeng sa boena ba lefatše ka bophara, joalokaha ba abetsoeng mangolo ba tla tsoa ’me ba kopane le ba ileng ba abeloa mangolo pele ba likete ba ntseng ba le mosebetsing oa boromuoa—ba bang e le ba lihlopha sa pele, sa bobeli, le sa boraro tsa lilemong tsa bo-1940! Moena Swingle o ile a bolela hore morao koo ho ne ho se ea neng a tseba hore mosebetsi oa boromuoa o ne o tla tsoela pele ka lilemo tse ling tse 50, kapa hore Bonazi, Bofascist, le lithibelo tse ling tsa ’muso mosebetsing oa boboleli li ne li tla fela. O ile a botsa: “Haeba re makatsoa ke seo Jehova a se entseng nakong e fetileng, re tla makala hakakang ka seo a tla se etsa nakong e tlang.” O ile a qetella ka pitso e susumetsang e eang ho liithuti: “E-eang tšimong!”
Joale barupeli ba babeli ba ka sehloohong Sekolong sa Gileade ba ile ba buoa le sehlopha sa bo91 ka lekhetlo la ho qetela. Jack D. Redford o ile a bua sehloohong “Fumanang Bohlale.” O ile a bolella liithuti hore, Sekolo sa Gileade se ruta tsebo le kutloisiso, empa li tlameha hore li fumane bohlale, e leng matla a ho sebelisa tsebo ea tsona ka tsela e nepahetseng. O ile a khothalletsa liithuti ho lahla tšōmo ea hore li ithutile ntho e ’ngoe le e ’ngoe Gileade. “Ke seo u ithutang sona ka mor’a sekolo seo e leng sa bohlokoa.” Har’a lintho tseo ho neng ho sa ntsane ho hlokahala hore ba ithute tsona ke: ho sebelisana ka khotso le batho, hore ba khone hore “ke soabile” ho molekane oa bona, ho baromuoa-’moho, le ho baena le bo-khaitseli ba sebaka seo ba tla sebeletsa ho sona; ba be seli hore ba se tšepe seo ba se bonang kapa ba se utloang ka lekhetlo la pele le ho hlokomela hore bothata bo bong le bo bong bo rarahane, bo hloka kutloisiso e tebileng ea maemo pele ba ka fana ka keletso e bohlale; le ho hlompha baena ba sebaka seo ba leng ho sona bakeng sa matla a ho tsoella tlas’a maemo a thata.—Liproverbia 15:28; 16:23; Jakobo 1:19.
Ulysses V. Glass, mongoli oa Sekolo sa Gileade, o ile a etsa Ba-Filippi 3:16 sehlooho sa puo ea hae. O ile a babatsa sehlopha seo ka khatelo-pele eo se e entseng ’me a se khothalletsa ho tsoela pele se ipapisitse le lengolo leo. O ile a hlokomela hore, le hoja liithuti li lokela ho tsoela pele li fumana tsebo e nepahetseng, le ka mohla li ne li ke ke tsa tseba ntho e ’ngoe le e ’ngoe. O ile a etsa papiso ntlheng ena ka oache. Mong’a eona a ka ’na a tseba hore na ke joang a ka etsang hore e tsamaee empa a sa tsebe hore na ha e le hantle e sebetsa joang. Ka ho tšoanang, baromuoa ha baa lokela ho khella fatše batho bao le hoja ba sa tšoane le bona ka tsebo e tebileng, ba tsebang ntho ea bohlokoa—e leng kamoo ho ka bontšoang tšabo ho Jehova. (Liproverbia 1:7) O ile a hopotsa sehlopha ka bohlokoa ba ho boloka ‘leihlo le bonolo.’ (Mattheu 6:22, NW) Leihlo la moea le ka sitisoa ho bona ho tšoana le leihlo la nama. Ka mohlala, ba bang ba na le pono e qotetsaneng—ba shebisisa haholo lintlha tse seng kae ’me ba hlōleha ho bona taba kaofela—ha ba bang, ho fapana le hoo, ba bona feela lintlha tseo e seng tsa bohlokoa ’me ka linako tsohle ba sa hlokomele lintlha tsa bohlokoa tseo ho hlokahalang hore ba sebetsane le tsona.
Puo ea ho qetela hoseng hoo e neng e na le sehlooho “Ho Khetholla le ho Sebelisana le Mokhatlo o Hlophisitsoeng oa Jehova,” e ile ea fanoa ke Theodore Jaracz oa Sehlopha se Busang. Moena Jaracz o ile a bolela hore le hoja ho e-na le mekhatlo e hlophisitsoeng e likete le mekhatlo e meng lefatšeng, ke o le mong feela ho eona eohle o sa tsoeng lefatšeng. Ke joang re ka khethollang mokhatlo o emelang Jehova? Lentsoe la Molimo le fana ka matšoao a khethollang. Bibele e bontša hore pōpo ea Molimo ea leholimo e hlophisitsoe ka mokhoa o phahameng. (Pesaleme ea 103:20, 21; Esaia 40:26) Mokhatlo o hlophisitsoeng oa Jehova oa lefatšeng o boetse o ka khetholloa ka ho hlophiseha ha ’ona esita le ka ho ikarola ha ’ona lefatšeng, ho khomarela haufi-ufi melao-motheong ea Bibele, boemo ba ’ona bo phahameng ba bohloeki ba boitšoaro, le lerato le teng har’a litho tsa ’ona. Moena Jaracz o ile a khothalletsa liithuti tsa Gileade ho thusa batho ba bangata kamoo ho ka khonehang ho khetholla ka Mangolo mokhatlo o hlophisitsoeng oa Jehova. Tabeng eo, o ile a etsa tsebiso e thahasellisang: Haufinyane palo ea liithuti tsa Sekolo sa Gileade e tla menahanngoa habeli, hore e be liithuti tse ka bang 50 sehlopheng sa bo93! Hape, lihlopha tsa Sekolo sa Gileade se Atolositsoeng se Jeremane li tla qalisa ka nako e tšoanang. Ho ile ha opuoa mahofi haholo le ka nako e telele!
E le tlhōrō ea hoseng, liithuti tse 24 kaofela tsa Gileade li ile tsa amohela mangolo a diploma. Haufinyane li tla kena tseleng ea tsona ho ea linaheng tse fapaneng tse 12 lefatšeng ka bophara. Sehlopha seo se ile sa fana ka qeto e amang pelo se leboha Sehlopha se Busang le lelapa la Bethele. Ka mor’a lijo tsa motšehare, Moena Charles J. Rice oa Komiti ea Mapolasi a Watchtower o ile a tšoara Thuto ea Molula-Qhooa e khutsufalitsoeng. Joale ba abetsoeng mangolo ba ile ba etsa lenaneo le tletseng bophelo, ba etsa pontšo ka tse ling tsa liphihlelo tseo ba bileng le tsona tšebeletsong ea tšimo nakong ea thupelo ea bona ea likhoeli tse hlano Wallkill, New York. Ka mor’a moo, bahoeletsi ba emetseng liphutheho tse ’maloa tsa sebaka seo ba ile ba etsa tšoantšiso e nang le sehlooho Bacha ba Hopolang ’Mōpi oa Bona Hona Joale.
Bakeng sa ho koala lenaneo, Moena George Gangas, setho se lilemo li 95 sa Sehlopha se Busang, o ile a etsa thapelo ho Jehova eo ka ho ikhethang e neng e tletse bophelo. Bamameli ba ile ba tsamaea ba hlolletsoe, ha ho pelaelo hore e mong le e mong oa bona o ne a susumellelitsoe ho ba le karolo e eketsehileng haholoanyane mosebetsing oa lefatše ka bophara oa kotulo.
[Lebokose le leqepheng la 22]
Lipalo-palo tse Amang Sehlopha
Lenane la linaha tse emetsoeng: 6
Lenane la linaha tseo li abetsoeng ho tsona: 12
Lenane la liithuti: 24
Lenane la banyalani: 12
Karolelano ea lilemo: 33,4
Karolelano ea lilemo ’neteng: 16,13
Karolelano ea lilemo tšebeletsong ea nako e tletseng: 11,3
[Setšoantšo se leqepheng la 23]
Sehlopha sa bo91 se Abeloang Mangolo sa Sekolo sa Bibele sa Gileade sa Watchtower
Lethathamong le ka tlaase mona, mela e baloa ho tloha ka pele ho ea ka morao ’me mabitso a thathamisitsoe ho tloha ka letsohong le letšehali ho ea ka ho le letona moleng o mong le o mong.
(1) McDowell, A.; Youngquist, L.; Skokan, B.; Wargnier, N.; Miller, Y.; Muñoz, M. (2) Bales, M.; Perez, D.; Attick, E.; Vainikainen, A.; Mostberg, K. (3) DePriest, D.; DePriest, T.; Perez, R.; Wargnier, J.; Muñoz, J.; Miller, J. (4) McDowell, S.; Bales, D.; Skokan, M.; Attick, C.; Youngquist, W.; Vainikainen, J.; Mostberg, S.