Na U Etsa Sohle Seo U ka se Khonang?

“KE TLA etsa sohle seo nka se khonang.” Ke hakae mantsoe aa a lateloang ke “empa” le letoto le lelelele la mabaka a ho hlōleha ho ikitlaetsa! Ho thoe’ng ka boinehelo ba rōna ho Jehova? Na re phethahatsa tšepiso ea rōna ea ho etsa sohle seo re ka se khonang?

Boinehelo bo bolela ‘ho inehela ka ho khethehileng tšebeletsong kapa borapeling ba Molimo kapa litšebeletsong tse halalelang.’ Jesu o ile a etsa ho hongata ho bontša hore na boinehelo ho Jehova bo akareletsa’ng ka ho re: “Haeba motho ofe kapa ofe a batla ho ntšala morao, a ke a itele ’me a jare thupa ea hae ea tlhokofatso ’me a ntatele a sa khaotse.” (Mattheu 16:24, NW) Motho ea itetseng le ho inehela ho Molimo o nka ho etsa thato ea Molimo e le pakane ea bohlokoa ka ho fetisisa bophelong ba hae.

Joaloka batho ba inehetseng, re lokela ho itlhahloba ho bona hore na re phelela boinehelo ba rōna. Petrose o bontšitse hore na ke hobane’ng ha re lokela ho itlhahlobisisa ha a khothatsa Bakreste ba tlotsitsoeng: “Etsang sohle seo le ka se khonang ho tiisa ho bitsoa le ho khethoa ha lōna; hobane ha le tsoela pele ho etsa lintho tsena ho hang le ke ke la hlōleha le ka mohla.” (2 Petrose 1:10, NW) E, haeba re etsa sohle seo re ka se khonang, re ke ke ra qetella re le ba hlōlehileng moeeng.

Ho Etsa Sohle Seo re ka se Khonang ho ka Ntlafatsoa

Ka kutloisiso e pharaletseng haholoanyane, bahlanka bohle ba inehetseng ba Molimo ba lebeletsoe ho etsa sohle seo ba ka se khonang, kapa sohle se matleng a bona, ho khahlisa Jehova. Leha ho le joalo, ho etsa sohle seo re ka se khonang ho etsa thato ea Molimo ho ka eketseha. Ho moshanyana ea lilemo li tharo, ho phetha mosebetsi o monyenyane e ka ba ho etsa sohle se matleng a hae ho thusa ’mè oa hae, empa ha a hōla, o tla khona ho etsa ho eketsehileng. Hoa tšoana le ka khōlo ea rōna ea moea—seo pele e neng e le sohle seo re ka se khonang se ke ke sa hlola se e-ba joalo. Re susumeletseha ho etsetsa Jehova ho eketsehileng.

Kananelo ea rōna e eketsehileng ho Jehova e re susumeletsa ho etsa ho eketsehileng. Kananelo bakeng sa seo a re etselitseng sona e matlafatsoa ka thuto ea botho ea Lentsoe la hae, Bibele. Ka mohlala, ha re hlahlobisisa ka hloko le ho nahanisisa kamoo Jehova a ileng a romela Mora oa hae ho nehela sephefumolohi sa hae ho lopolla moloko oa batho sebeng, re susumeletseha ho sebeletsa Moqapi oa tokisetso ea thekollo. (Johanne 3:16, 17; 1 Johanne 4:9-11) Ha re ntse re ‘latsoa haholoanyane ’me re bona hore Jehova o molemo,’ lipelo tsa rōna li susumeletseha ho mo sebeletsa haholoanyane.—Pesaleme ea 34:8.

Mosebeletsi oa nako e tletseng ea bitsoang Jetter o ile a hlokomela sena. E le ho batlisisa ka ho tebileng ho seo a neng a ithuta sona, o ile a behella kamore e nyenyane ka thōko ntlong ea hae bakeng sa morero oo. O ile a e hlophisa ka tsela eo a ka khonang ho tsepamisa mohopolo ha a etsa lipatlisiso. O na le li-Watch Tower Publications Index haesita le meqolo ea The Watchtower le Awake! haufinyane rakeng ea hae ea libuka. O re: “Ha ke etsa lipatlisiso ka boitsebiso bo thahasellisang, ke chesehela ho bo arolelana le ba bang.”

Leha ho le joalo, joalokaha ho ja lijo tsa theko e holimo ka nako e itseng ho sa lokolle motho tlhokahalong ea letsatsi le letsatsi ea ho ja lijo tsa ka mehla, patlisiso e le ’ngoe e tebileng ea Bibele ha e hlakole tlhokahalo ea letsatsi le letsatsi ea ho ja lijo tsa moea. Ruth o ananela tlhokahalo ena, hobane ho latela kamoo a hopolang ka teng, lelapa labo le ne le bala Bibele hammoho hoseng ho hong le ho hong le mantsiboea ka mor’a lijo. Hona joale, ha a se a le lilemo li 81, ’me a qetile lilemo tse fetang 60 tšebeletsong ea nako e tletseng, o ntse a bala Bibele ka mehla ha a tsoha ka 6:00 hoseng. Hang-hang ha a fumana limakasine tsa Molula-Qhooa le Tsoha!, Ruth o ipha nako ea ho li bala. O bala sehlooho se le seng bonyane ka makhetlo a mararo kapa a mane pele a ithuta sona phuthehong. O re: “U hloka ho ja Lentsoe la Molimo hore u lule u le matla tumelong.” Ho boetse ho mo thusitse ho tsoela pele tšebeletsong ea boromuoa ka lilemo tse ngata.

Ho Etsa Sohle Seo re ka se Khonang ho Thusa ba Bang

Ka thuto ea Lentsoe la Molimo e tebileng le ea ka mehla, cheseho ea rōna ea ho sebeletsa Molimo ea eketseha, ’me ho hong ka hare ho rōna ho re phehella ho etsa ho eketsehileng. (Bapisa le Jeremia 20:9.) Cheseho e joalo e ile ea susumeletsa Hirohisa ho phetha tšebeletso ea hae ka ho feletseng. (2 Timothea 4:5) O ne a lula lapeng la motsoali a le mong le baena ba hae ba bane. Ha e sa le mocha ea ka tlaase ho lilemo tse 20, Hirohisa o ne a phelisa lelapa labo ka ho tsoha ka hora ea boraro hoseng ho tsamaisa likoranta. O ne a batla ho etsa ho eketsehileng ho bolella ba bang ka Jehova, kahoo Hirohisa o ile a etsa kōpo ea ho kena tšebeletsong ea bopula-maliboho, kamoo tšebeletso ea nako e tletseng ea Lipaki tsa Jehova e bitsoang ka teng. A le mocha joalo, o ile a thabela ho thusa ba bang ho mo latela ho etsa sohle seo ba ka se khonang ho rorisa Jehova.

Ho etsa sohle se matleng a rōna ho thusa ba bang ho akareletsa ho ba hloahloa tšebeletsong ea rōna. Jesu o kile a khothatsa balateli ba hae: “Ha le tseba taba tseo, le lehlohonolo ha le li etsa.” (Johanne 13:17) Naomi ke mohlala o motle oa ho sebelisa litlhahiso tse fanoang ke mokhatlo o hlophisitsoeng oa Jehova tsa ho ntlafatsa tšebeletso ea rōna. O ne a na le bothata ba ho bua le batho bao a sa ba tloaelang ka ntlo le ntlo ’me hangata o ne a sa tsebe na a ka re’ng ha a fihla menyako. Baholo ba phutheho ba ile ba mo khothaletsa ho sebelisa litlhahiso tse fumanoang bukeng Ho Bea Mabaka ka Mangolo, karolong e reng “Likenyeletso Tse ka Sebelisoang Tšebeletsong ea Tšimo.”a O ile a tšoara ka hlooho likenyeletso tse hlahang tlas’a sehlooho “Lelapa/Bana” ’me a itlhakisa ho tsona ka makhetlo a mangata. Ka lebaka leo, o ile a khona ho buisana le mosali e mong ea lilemo li pakeng tsa bo-30. Le pele Naomi a ka etsa leeto la ho boela, mosali enoa o ile a tla Holong ea ’Muso. Ho ile ha etsoa tokisetso ea thuto ea Bibele. Mosali eo le monna oa hae e se e le Bakreste ba kolobelitsoeng, ’me ba thabela bophelo ba lelapa bo thabileng le bana ba bona.

Ho Etsa Sohle Seo re ka se Khonang ho Bontša Thahasello ea Botho

Re ka boela ra etsisa moapostola Pauluse, ea ileng a re: “Tsohle tseo ke li etsa ka baka la Evangeli, hore le ’na ke tle ke be le kabelo teng.”—1 Ba-Korinthe 9:22, 23.

Hatsumi o bonahatsa boikutlo bona. Ha Hatsumi a ntse a le tšebeletsong ea phatlalatsa, ka bonolo mosali e mong o ile a ’molella ka intercom hore o tšoarehile haholo hore a ka bua le eena. Lentsoe la mong’a ntlo le ne le le bonolo, kahoo Hatsumi o ne a tsoela pele ho mo etela. Mong’a ntlo o ile a arabela ka intercom feela, ho hang a sa tsoe ho ea kopana le Hatsumi. Sena se ile sa tsoela pele ka lilemo tse peli le halofo.

Ka letsatsi le leng Hatsumi o ile a fetola nako ea hae ea ho eta, a ea motšehare oa mantsiboea. Ha ho na motho ea ileng a arabela. Leha ho le joalo, ha a se a tsamaea lentsoe le tloaelehileng le tsoang ka morao ho eena le ile la ’motsa, “U mang?” Mosali eo e ne e le hona a fihlang. Ha a utloa lebitso la Hatsumi, o ile a arabela kapele, “Ke uena ea hlolang a nketela. Ke leboha haholo ka ho ntsotella ka linako tsohle.” Ka lebaka la hore mosali eo o ne a ile a khaotsa ho ithuta Bibele le Lipaki tsa Jehova sebakeng se seng, o ne a bile lihlong ho bulela Hatsumi monyako. Ba ile ba tsosolosa thuto ea Bibele, ’me mong’a ntlo o tsoela pele hantle haholo. Na re tsotella bao re kopanang le bona tšebeletsong ea ntlo le ntlo ka ho tšoanang?

Etsa Sohle Seo U ka se Khonang

Jehova o ananela boiteko ba rōna ba ho mo sebeletsa ka hohle kamoo re ka khonang. O tšoana le ntate eo mora oa hae a tlang ho eena ka limpho. Ho theosa le lilemo, mpho e ka ba e fapaneng ho itšetlehile ka lilemo le matla a mora. Joalokaha ntate a thabela ho amohela mpho efe kapa efe e tsoang pelong eo mora oa hae a mo fang eona, le Jehova o amohela tšebeletso efe kapa efe ea rōna e etsoang ka pelo eohle ho lumellana le khōlo ea rōna ea moea.

Ka ho hlakileng, ha ho hlokahale hore re bapise sohle seo re ka khonang ho se etsa le seo ba bang ba khonang ho se etsa. Joalokaha Pauluse a bolela, re tla ba le lebaka la ho thaba ka tsa rōna, “eseng ka ho ipapisa le motho e mong.” (Ba-Galata 6:4, NW) E se eka re ka tsoela pele ho utloa keletso ea moapostola Petrose: “Etsa sohle seo u ka se khonang hore u fumanoe ke eena qetellong u se na letheba le sekoli ’me u le khotsong.”—2 Petrose 3:14, NW.

[Mongolo o botlaaseng ba leqephe]

[Setšoantšo se leqepheng la 29]

Na u etsa sohle se matleng a hao ho sebelisa litlhahiso tsa tšebeletso ea tšimo?