Ho Khaola—Na ke Tokisetso e Lerato?
“OA HALALELA, oa halalela, oa halalela, Morena Molimo, Ea matla ’ohle.” (Tšenolo 4:8) Tumellanong le tlhaloso eo, Jehova ke Mohloli oa litekanyetso tse halalelang. Tsena li boletsoe ka ‘Mangolong a halalelang,’ ’me Bakreste ba tlameha ho latela litataiso tsena. Ka sebele, ba tlameha ho qoba ntho leha e le efe e litšila mahlong a Jehova.—2 Timothea 3:15; Esaia 52:11.
Ka ho hlakileng Bibele e-ea laela: “Empa joalo ka ha ea le bitsitseng a halalela, le lōna le halalele metsamaong ea lona eohle; kamoo ho ngoliloeng kateng, ho thoe: Halalelang, hobane kea halalela.” (1 Petrose 1:15, 16) Ho tloha ha phutheho ea Bokreste e ba teng makholo a 19 a lilemo a fetileng, Bakreste ba ’nete ba ’nile ba loana ka thata ho e sireletsa litšileng tsa moea le tsa boitšoaro.—Juda 3.
Lebaka Leo Tšireletso e Hlokahalang
Bahlanka bohle ba Molimo ba talimane le phephetso ea ho ipoloka ba hloekile boitšoarong le moeeng. Ho finyella seo, lira tse tharo tse matla li tlameha ho haneloa—Satane, lefatše la hae le litšekamelo tsa nama ea rōna ea boetsalibe. (Ba-Roma 5:12; 2 Ba-Korinthe 2:11; 1 Johanne 5:19) Lefatše la Satane le tla u leka hore u itšoare hampe, le tla u phephetsa hore u amohele litsela tsa lona, ’me le tla u fa leruo la lintho tse bonahalang, botumo, boemo, bophahamo le matla. Empa ba ikemiselitseng ho hahamalla borapeli ba ’nete ba hanela lintho tseo Satane a fanang ka tsona ’me ba sala ‘lefatšeng ba se na le lethebanyana.’ Hobane’ng? Hobane ba batla ho lula tlas’a tšireletso le tlhokomelo e lerato ea mokhatlo o hlophisitsoeng o hloekileng oa Jehova.—Jakobo 1:27; 1 Johanne 2:15-17.
Jehova o fane ka thuso ho setho leha e le sefe sa phutheho ea Bokreste se fetohang lehlatsipa la liteko tsa Satane ka lebaka la bofokoli ba botho. Ho khethiloe baholo ba tšoanelehang moeeng ho sireletsa phutheho ’me ka lerato ba thuse ba fosang ho bakela libe tsa bona le ho etsa liphetoho tse hlokahalang hore ba hlaphoheloe. Mokreste leha e le ofe ea kenellang phosong o lokeloa ke ho thusoa ka mamello hore a bake ’me a fetole litsela tsa hae.—Ba-Galata 6:1, 2; Jakobo 5:13-16.
Kamoo ho Khaola e Leng ho Bontša Lerato
Bahlanka ba kolobelitsoeng ba Jehova bao ka boomo ba latelang tsela e khopo ’me ba hana ho fetoha ba tlameha ho talingoa e le ba sa bakeng ’me kahoo ba sa tšoanelehe bakeng sa botsoalle ba Bokreste. (Bapisa le 1 Johanne 2:19.) Batho ba joalo ba ke ke ba lumelloa ho tsoela pele ba le ka har’a phutheho ea Bokreste ’me kahoo ba e silafatse. Ba tlameha ho lelekoa.
Taba ea hore ho loketse ho leleka ba etsang liketso tse khopo e ka bonoa ka ho hlakileng boemong bo latelang: Ka lebaka la keketseho ea litlhaselo le litlōlo tsa molao tse mabifi khahlanong le liithuti, likolo tse ling li amohetse leano “le hlokang hore liithuti tse sebelisang kapa tse sokelang ho sebelisa libetsa li tebelloe ruri,” kamoo ho tlalehang The Globe and Mail, koranta ea Toronto, Canada. Ho lelekoa ho etsoa ho sireletsa liithuti tse batlang ho rua molemo lenaneong la thuto ntle le ho hatelloa ka liketso tse mabifi.
Ke hobane’ng ha e le ho bontša lerato ho leleka mofosi ea sa bakeng ka phuthehong? Ho etsa joalo ke pontšo ea lerato ho Jehova le litsela tsa hae. (Pesaleme ea 97:10) Ketso ena e bontša lerato ho ba hahamallang tsela ea ho loka hobane e tlosa ea ka bang le tšusumetso e mpe har’a bona. E boetse e sireletsa bohloeki ba phutheho. (1 Ba-Korinthe 5:1-13) Haeba boitšoaro bo bobe bo tebileng kapa litšila tsa moea li lumelloa ho ba teng ka phuthehong, e ne e tla silafala ’me e ne e ke ke ea tšoaneleha bakeng sa ho nehelana ka tšebeletso e halalelang ho Jehova, ea halalelang. Ho feta moo, ho lelekoa ha mofosi ho ka ’na ha mo thusa ho bona ho teba ha tsela ea hae ea boitaolo, a e bakele, ’me a etse liphetoho tse hlokahalang e le hore a ka amoheloa hape ka phuthehong.
Phello ho ba Bang
Ha setho sa phutheho se etsa sebe se tebileng, joalo ka bofebe, hase thabise pelo ea Jehova. (Liproverbia 27:11) Mokreste leha e le ofe ea inehelang boitšoarong bo bobe ba botona le botšehali ka sebele ha a nahane joalokaha Josefa a ile a etsa ha mosali oa Potifaro a ne a leka ho mo etsa hore a be le likamano tsa botona le botšehali le eena. Karabelo ea Josefa e bile ho re: “Nka etsa joang bobe bo boholo hakalo, ka siteloa Molimo na?” (Genese 39:6-12) Josefa o ile a hlompha litekanyetso tse halalelang tsa Jehova ’me a baleha boemong bo lekang. Ka lehlakoreng le leng, ho bonahala mofebi a haelloa ke lerato le lekaneng ho Molimo la hore a ithibe hore a se ke a khotsofatsa litakatso tsa hae tsa nama.—Ba-Galata 5:19-21.
Motho ea kolobelitsoeng ea tlōlang melao ea Molimo ha a bontše ho ameha ka tšenyo le bohloko boo a tla bo bakela beng ka eena ba lumetseng. Ba bang ba imeloa ke phello ea sena maikutlong. Kamor’a ho fumana hore mora oa hae o ile a kenella boitšoarong bo bobe, mosali e mong oa Mokreste o ile a belaela: “Ke ba ’maloa feela haeba ba le teng, baena le bo-khaitseli ba bonahalang ba utloisisa kamoo re utloileng bohloko le ho ferekana kateng. . . . Re aparetsoe ke masoabi.” Lebitso le letle la lelapa lohle le ka ’na la belaelloa. Ho tepella maikutlong le boikutlo ba ho ba molato li ka ’na tsa tlela litho tse tšepahalang tsa lelapa. Kahoo tsela e khopo ea mofosi e tlisetsa lelapa masisa-pelo.
Thuso e Lerato Bakeng sa Litho Tsa Lelapa
Litho tse tšepahalang tsa lelapa la Bokreste tsa habo motho ea lelekiloeng li hloka ho hopola hore ho khaola ho lerato ’me hape hoa sireletsa. Ho etsoa boiteko bohle bo ka khonehang ho thusa mofosi. Empa haeba a ipaka e le ea sa utloeng Molimo ’me ka manganga a sa bake, phutheho e hloka ho sireletsoa ’me ha e na boikhethelo ha ese ho nka bohato joalokaha Lentsoe la Molimo le laela: “Tlosang e mobe har’a lōna.” (1 Ba-Korinthe 5:13) Joalokaha Paki e ’ngoe e boletse, “ho khaola ke taba ea botšepehi ho Jehova.”
Ha setho sa lelapa se khaoloa, beng ka sona ba Bakreste ba utloa bohloko. Ka hona, baholo ba khethiloeng ba lokela ho etsa sohle se matleng a bona ho ba khatholla moeeng. (1 Ba-Thessalonika 5:14) Baholo ba ka ba rapella le ho rapela le bona. Hangata ho ka etsahala hore ba etele Bakreste bana ba tšepahalang ho buisana le bona ka lintlha tsa Mangolo tse hahang. Balisa ba mohlape ba lokela ho sebelisa monyetla o mong le o mong ho matlafatsa bana ba ratoang moeeng pele le kamorao ho liboka tsa Bokreste. Khothatso e eketsehileng e ka fanoa ka ho kopanela le bona tšebeletsong ea tšimo. (Ba-Roma 1:11, 12) Balisa ba moea ho hlokahala ba bontše bahlanka bana ba tšepahalang ba Jehova lerato le tlhokomelo tse ba loketseng.—1 Ba-Thessalonika 2:7, 8.
Tsela ea boetsalibe ea motho hase lebaka la hore ho hlokomolohuoe leha e le bafe ba lelapa leo ba ntseng ba lutse ba tšepahala ho Jehova. Morena Saule ea khopo oa Iseraele o ile a lahloa ke Molimo, empa Davida ha aa ka a lumella hore sena se kena-kenane le lerato la hae ho mora oa Saule, Jonathane. Ha e le hantle, tlamahano pakeng tsa Davida le Jonathane e ile ea e-ba matla haholo. (1 Samuele 15:22, 23; 18:1-3; 20:41) Kahoo bohle ka phuthehong e lokela ho ba ba tšehetsang le ba lerato ho Bakreste bao beng ka bona ba sitetsoeng Jehova.
E ne e tla ba ho hloka lerato ho hokaakang ho hlokomoloha kapa ho se be mosa ho ba tšepahalang joalo! Litho tsa lelapa tse tšepahalang li hloka khothatso ka ho khethehileng. Li ka ’na tsa ikutloa li le bolutu ’me li fumane boemo ba tsona bo le thata haholo. Mohlomong u ka arolelana le bona ntlha e ’ngoe ea bohlokoa ea moea kapa phihlelo e hahang ka thelefono. Haeba motho ea lelekiloeng a arabela thelefono, e re feela u kōpa ho bua le mong ka eena oa Mokreste. Mohlomong u ka memela litho tse tšepahalang tsa lelapa le joalo ’mōkeng oa boithabiso kapa lijong lapeng la hao. Haeba u kopana le bona ha u ile mabenkeleng, u ka ’na ua sebelisa monyetla oo bakeng sa botsoalle bo hahang. Hopola, Bakreste ba tšepahalang bao mong ka bona a khaotsoeng e ntse e le karolo ea mokhatlo o hlophisitsoeng o hloekileng oa Jehova. Ho ka ba bonolo ho bona ho itšehla thajana le ho nyahama. Kahoo, e-ba hlokolosi ho ba bontša mosa le lerato. Tsoela pele ho etsa se molemo ‘haholo ho ba ntlo ea tumelo.’—Ba-Galata 6:10.
Ananela Tokisetso ea Jehova
Re ka leboha hakaakang hore ebe Jehova Molimo o bontša kameho e mosa ho e mong le e mong ea ka lelapeng la lefatše ka bophara la barapeli ba hae. Ka mokhatlo oa hae o hlophisitsoeng, ka lerato o entse tokisetso ea ho re thusa ho tsamaea pel’a hae ka tsela e lokileng. Esita le haeba setho sa lelapa se etsa sebe ka boomo ’me se tlameha ho lelekoa ka phuthehong, ho ntse ho e-na le tsela ea ho khutla haeba se baka e le ka ’nete. Sena se bontšoa ke mohlala o latelang:
Baholo ba ile ba leka ho thusa motho eo re tla mo bitsa Anna, empa a retelehela ho tsubeng, ho noeng le lithethefatsing. Ha aa ka a bontša pako ’me ha aa ka a lula ka phuthehong. Leha ho le joalo, nakoana hamorao, Anna a qala ho hloloheloa botsoalle bo lerato ba phutheho e hloekileng ea Jehova ’me a mo rapela hore a mo thuse. O-oa lumela hore ha aa ka a ananela ka ho feletseng tlhokomelo eo baholo ba nang le eona ho ba khelohang. Anna o ile a qala ho ba teng libokeng hape, ’me sena sa lebisa pakong. Kamor’a moo, a amoheloa hape ka phuthehong e lerato le e sireletsehileng. Anna o boetse o tšehetsa litekanyetso tsa Jehova tse phahameng tsa boitšoaro. O leboha haholo lerato leo baholo ba le bontšitseng ’me o-oa hlalosa: “Ha le tsebe thuso eo likhatiso tsa Bokreste li bileng le eona ho ’na. Ka sebele Jehova o hlokomela litlhoko tsa rōna hantle.”
E, Molimo o fane ka tsela ea ho khutla ho bao ba lelekiloeng ka phuthehong empa hamorao ba baka. Re bone hore esita le ho khaola ka bohona ke tokisetso e lerato. Empa ke habohlokoa hakaakang ho qoba phihlelo ee e bohloko ka ho itšoarella kamehla litseleng tse lokileng tsa Molimo oa rōna ea halalelang! E se eka re ka bontša teboho kamehla bakeng sa tokelo ea ho rorisa Jehova re le karolo ea mokhatlo oa hae o hlophisitsoeng o hloekileng, o lerato le o sireletsang.
[Setšoantšo se leqepheng la 26]
Na u bontša lerato ho ba tšepahalang bao beng ka bona ba lelekiloeng ka phuthehong?