“Bibele ea Monoana o le Mong”

KAHA o shoele litho ka mor’a ho hlaseloa ke ho kula, Joseph Schereschewsky o ne a ka ngola ka ho thaepa ka monoana o le mong. Empa o ile a finyella sepheo sa hae—ho fetolela Bibele Sechaeneng, e leng e ’ngoe ea lipuo tse thata ka ho fetisisa hore e ka tsejoa hantle ke motho eo e seng puo ea hae.

Schereschewsky e le Mojuda ka tsoalo, o ile a etsa lipatlisiso ka Bokreste ’me a bo amohela e se e le motho e moholo. Qetellong e ile ea e-ba moromuoa Chaena. Sebakeng seo, o ile a nka karolo mesebetsing e mengata ea phetolelo, ho tloha khale koana ka 1866 le ho tsoela pele ho fihlela lilemong tse qalang tsa lekholong la bo20 la lilemo. Ka lebaka la semelo sa hae sa Bojuda, Schereschewsky o ne a tloaelane haholoanyane le Seheberu ho feta litsebi tsa habo. Kahoo, o ne a tšepetsoe ho fetolela Mangolo a Seheberu kaofela. Ho ella qetellong ea mosebetsi oa hae oa nako e telele, o ile a boela a etsa phetolelo eohle ea Bibele ea Sechaena e nang le litšupiso.

E le mofetoleli oa Bibele, Joseph Schereschewsky e ne e le ’muelli ea mafolofolo oa liphetolelo tsa puo e tloaelehileng. Empa mosebetsi oa hae o ne o se bonolo. The Book of a Thousand Tongues e re tlatsetso ea hae Bibeleng ea Sechaena ea ikhetha, “hobane e ne e pharaletse haholo ’me e ile ea phethoa khahlanong le litšitiso tse ngata haholo.”

Ka mor’a hore matsoho a Schereschewsky a shoe, o ile a ’na a tsoela pele ka mosebetsi oa hae. Ho thaepa ho ne ho hloka boiteko bo boholo, kaha o ne a se a sa khone ho sebelisa matsoho a hae ka tsela e tloaelehileng. Ka lebaka leo o ile a re phetolelo ena ke Bibele ea hae ea monoana o le mong. Hore a e hatise ho sa tsotellehe kholofalo ea hae, Schereschewsky o ile a tiisetsa ka lilemo tse 25. Ka ho se tele, o ile a kopanela ho etseng hore Lentsoe la Molimo le utloisisehe ka Sechaena—puo e buuoang ke batho ba bangata ho feta puo leha e le efe.

[Setšoantšo se leqepheng la 11]

Both images: Courtesy of American Bible Society Archives