Lipotso Tse Tsoang ho Babali
Ke hobane’ng ha barutuoa ba ile ba re, “Ke lengeloi la hae” ha ba utloa hore Petrose ea neng a tšoeroe o ne a le monyako?—Liketso 12:15.
E ka ’na eaba ka phoso barutuoa ba ile ba nahana hore moromuoa oa lengeloi le neng le emela Petrose o ne a le keiting. Ak’u nahane ka litemana tse potolohileng taba ena.
Petrose o ne a tšoeroe ke Heroda, ea neng a bolaile Jakobo. Kahoo ho ne ho e-na le lebaka le utloahalang la hore barutuoa ba lumele hore Petrose le eena o ne a tla bolaoa. Ha Petrose a ne a tšoeroe, o ne a tlanngoe ka liketane a lebetsoe ke lihlopha tse ’nè tse fapanyetsanang se seng le se seng e le sa masole a mane. Joale, bosiung bo bong, lengeloi le ile la mo lokolla ka mohlolo ’me la mo ntšetsa kantle ho chankana. Qetellong ha Petrose a elelloa hore na ho ne ho etsahetse eng, o ile a re: “Joale kea tseba hore Jehova o ile a romela lengeloi la hae ’me a ntopolla letsohong la Heroda.”—Liketso 12:1-11.
Hang-hang Petrose o ile a ea ntlong ea Maria, e leng ’mè oa Johanne Mareka, moo barutuoa ba sehlotšoana ba neng ba bokane teng. Ha a kokota monyako oa tsela ea heke, lekhabunyane le bitsoang Roda le ile la ea ho ea arabela. Ha le hlokomela lentsoe la Petrose, le ile la matha ho ea bolella ba bang le pele le mo bulela! Qalong, barutuoa ba ne ba sa lumele hore Petrose o ne a le keiting. Ho fapana le moo, ka phoso ba ile ba re: “Ke lengeloi la hae.”—Liketso 12:12-15.
Na barutuoa ba ne ba lumela hore Petrose o ne a se a bolailoe le hore moea oa hae o tsoileng nameng o ne o le keiting? Ho ke ke ha e-ba joalo, hobane balateli ba Jesu ba ne ba tseba ’nete ea Mangolo ka bafu—hore “ho hang ha ba tsebe letho.” (Moeklesia 9:5, 10) Kahoo, ebe barutuoa ba ne ba bolela’ng ha ba re: “Ke lengeloi la hae”?
Barutuoa ba Jesu ba ne ba tseba hore ho pholletsa le histori, mangeloi a ’nile a thusa batho ba Molimo ka ho toba. Ka mohlala, Jakobo o ile a bua ka “lengeloi le ’nileng la ntopolla tlokotsing eohle.” (Genese 48:16) Ha Jesu a ne a bua ka ngoana ea neng a e-na le bona, o ile a re ho barutuoa ba hae: “Iponeleng hore le se ke la nyelisa e mong oa ba banyenyane bana; etsoe kea le bolella hore mangeloi a bona leholimong kamehla a bona sefahleho sa Ntate ea leholimong.”—Matheu 18:10.
Ho thahasellisang ke hore Young’s Literal Translation of the Holy Bible e fetolela lentsoe agʹge·los (“lengeloi”) e le “moromuoa.” Ho bonahala eka Bajuda ba bang ba ne ba lumela hore mohlanka e mong le e mong oa Molimo o ne a e-na le lengeloi la hae—ha e le hantle, “lengeloi la mohlokomeli.” Ke ’nete hore pono ena ha e rutoe ka ho toba ka Lentsoeng la Molimo. Ho ntse ho le joalo, ho ka etsahala hore ebe ha barutuoa ba ne ba re, “Ke lengeloi la hae,” ba ne ba nahana hore moromuoa oa lengeloi ea neng a emela Petrose o ne a eme keiting.