Babali ba Batla ho Tseba . . . 

Na Bohle ba na le Monyetla o Tšoanang oa ho Tseba Molimo?

▪ Ha Jesu a ne a botsoa hore na molao o moholo ka ho fetisisa ke ofe, o ile a re: “U rate Jehova Molimo oa hao ka pelo ea hao eohle le ka moea oa hao oohle le ka kelello ea hao eohle.” (Matheu 22:37) Leha ho le joalo, pele batho ba ka rata Molimo ba lokela ho mo tseba ka tsela e nepahetseng. (Johanne 17:3) Na bohle ba tla ba le monyetla o tšoanang oa ho mo tseba?

Mohloli o ka sehloohong oa ho tseba Molimo ke Bibele. (2 Timothea 3:16) Batho ba bangata ba phela libakeng tseo Bibele e fumanehang habonolo. E ka ’na eaba bona batho bao ba mengoa ka makhetlo-khetlo hore na ba ka rata ho ithuta Bibele e le hore ba tsebe Molimo ka tsela e nepahetseng. (Matheu 28:19) Ba bang ba hōlisoa ke batsoali ba Bakreste ba lerato, bao letsatsi le letsatsi ba ba fang monyetla oa ho ithuta ka Molimo.—Deuteronoma 6:6, 7; Baefese 6:4.

Leha ho le joalo, ba bang bona ba phela maemong ao ho seng bonolo ho ithuta ka Molimo. Ba bang ba hōletse malapeng ao ho ’ona ho neng ho rena tlhekefetso ’me batsoali ba sa bontše bana lerato la tlhaho. (2 Timothea 3:1-5) Ho ka ba thata hore ba hōletseng maemong a joalo ba nke Molimo e le Ntate oa bona ea lerato ea leholimong. Ba bangata ha baa ba le monyetla oa ho kena sekolo e leng ntho e etsang hore ba se ke ba khona ho bala Bibele. Ha ba bang bona likelello tsa bona li ile tsa foufatsoa ke lithuto tsa bohata tsa bolumeli, kapa ba phela malapeng, libakeng kapa linaheng tseo ho tsona Bibele e sa batloeng. (2 Bakorinthe 4:4) Na maemo a batho bao a etsa hore ba se ke ba ba le monyetla oa ho ithuta ka Molimo le hore ba mo rate?

Jesu o ile a lumela hore mathata ao batho ba kopanang le ’ona a tla etsa hore ho be thata hore ba rate Molimo ba be ba mo mamele. (Matheu 19:23, 24) Leha ho le joalo, Jesu o ile a hopotsa barutuoa ba hae hore le hoja ho ka bonahala eka mathata a mang ke ao batho ba ke keng ba a hlōla, “lintho tsohle lia khoneha ho Molimo.”—Matheu 19:25, 26.

Nahana ka lintlha tse latelang: Jehova Molimo o ile a etsa bonnete ba hore Lentsoe la hae Bibele, e ba eona buka e ajoang ka ho fetisisa lefatšeng ka bophara. Bibele e ile ea bolela esale pele hore litaba tse molemo tse mabapi le Molimo le morero oa hae ka lefatše li tla boleloa “lefatšeng lohle leo ho ahiloeng ho lona.” (Matheu 24:14) Mehleng ena, Lipaki Tsa Jehova li bolela litaba tseo tse molemo linaheng tse fetang 230 ebile li hatisa lingoliloeng tse thehiloeng Bibeleng ka lipuo tse ka bang 500. Le ba se nang monyetla oa ho bala Bibele ba ntse ba ka ithuta ho hongata ka Molimo ka hore ba hlokomele lintho tseo a li bōpileng.—Baroma 1:20.

Ho feta moo, Lentsoe la Molimo le re: “Jehova o phenya lipelo tsohle, ’me o lemoha tšekamelo e ’ngoe le e ’ngoe ea menahano. Haeba u mo batla, o tla etsa hore u mo fumane.” (1 Likronike 28:9) Ka hona, le hoja Jehova a sa tšepise hore motho e mong le e mong o tla fumana monyetla o tšoanang hantle le oa ba bang, o etsa bonnete ba hore bohle ba tšepahalang ba fuoa monyetla. O tla be a etse bonnete ba hore ba sa kang ba fumana monyetla oa ho ithuta ka eena ba o fumana ha ba tsosoa bafung e le hore ba phele lefatšeng le lecha la ho loka.—Liketso 24:15.