Tlosang Batho Lefifing le ba Lebise Leseling
1 Lefatše le aparetsoe ke lefifi la moea. (Esa. 60:2) Ho tloha ha batho ba oela sebeng, Satane, “molimo oa lefatše lena,” o ’nile a boloka batho ba le lefifing la moea, ’me hona ho ’nile ha fella ka ho hlepha boitšoarong.—2 Ba-Kor. 4:4.
2 Kaha ’nete e se e re behile leseling, na re utloela batho ba bang bohloko joaloka Jesu? (Matt. 9:36) Haeba ho joalo, re tla utloisisa bohlokoa ba thōmo eo a ileng a e fa moapostola Pauluse ea ho ‘tutubolla mahlo a batho le ho ba tlosa lefifing le ho ba lebisa leseling le ho ba tlosa matleng a Satane ho ba isa ho Molimo.’—Lik. 26:16-18.
BEHA LIKELELLO LE LIPELO LESELING
3 Kaha Satane o foufatsa likelello ebile o thethefatsa lipelo tsa batho bao a ba hlaselang, re ka etsa eng ho ba thusa? Ho hlokahala hore re finyelle likelello le lipelo tsa bona ka Lentsoe la Molimo. Pauluse o ile a rapella hore mahlo a lipelo tsa Baefese a behoe leseling. (Ba-Ef. 1:17, 18) Ha ho letho le matla ho feta Lentsoe la Molimo mabapi le ho finyella pelo. (Ba-Heb. 4:12) Ho tseba sena ho lokela ho re susumelletsa ho hlaolela ho ba le tsebo ea ho sebelisa Bibele ha re buisana le ba bang.
4 Likarabelo tsa hao lipotsong tse latelang li ka u thusa hore u atlehe haholoanyane tšebeletsong. Na u lokisetsa hantle bakeng sa tšebeletso ea tšimo? Na u ba le mananeo a ho ikoetlisa e le hore u itloaetse likenyelletso tsa puisano tse hapang thahasello ea beng ba matlo? Na u tiisa hore u ithuta Sehlooho sa Puisano sa morao-rao le ho leka ho se sebelisa? Na u leka ka matla ho beha mabaka ka Mangolo ka tsela e susumetsang malapeng a batho?—Lik. 17:2.
MOLULA-QHOOA O KA THUSA
5 Molula-Qhooa o ’nile oa thusa batho ba limillione ho tloha lefifing le ho leba leseling. O re bontša kamoo re ka sebelisang melao-motheo ea Bibele ea boitšoaro, ho utloisisa boprofeta ba eona bakeng sa mehla ea rōna, le ho khetholla bolumeli ba ’nete ho ba bohata e le hore re ka tsamaea ka tsela eo Jehova a e amohelang.
6 ’Nete ea Bibele joalokaha e buelloa ke Molula-Qhooa e ’nile ea ba le liphello life? Batho ba mefuta eohle ba ntse ba thusoa hore ba bolokoe ke tsebo e nepahetseng ea Molimo le Mora oa oona. (Joh. 17:3; 1 Tim. 2:4) ’Mali e mong o ngotse: ‘Ke ananela Molula-Qhooa haholo hakaakang! Lihlooho tsa oona li lokela ho thusa bohle ho bona ka ho hlaka mehla le linako tseo re phelang ho tsona. Ke le leboha haholo ka phuputso e khōlō, ho ithuta, le mosebetsi oo le o etsang ho lokisetsa Molula-Qhooa, oo ka sebele e leng lijo tsa moea.’
SEBELISA TEMOHO
7 Khoeling ena ea bobeli ea phutuho ea peeletso ea Molula-Qhooa, ho hlokahala hore re batle menyetla ea ho tlosa batho lefifing le ho ba lebisa leseling. Ho buisana ka Bibele le batho bao re ba etelang ka ntlo le ntlo ho re thusa ho etsa sena. Ha re fumana batho ba bontšang thahasello ea sebele molaetseng oa ’Muso, re ka ba bontša molemo oa ho bala Molula-Qhooa ka mehla. Haeba mong’a ntlo a tloaelane le makasine ona ’me a o ananela, mohlomong u ka ’motsa hore na a ka rata ho etsa peeletso ea oona. Haeba peeletso ea selemo e sa amoheloe, buella peeletso ea likhoeli tse tšeletseng. Tsoela pele u etela batho bohle ba entseng lipeeletso ka morero oa ho qalisa thuto ea lehae ea Bibele e behang litholoana.
8 Ha re ntse re e-ea ka ntlo le ntlo, re kopanela bopaking ba seterateng, kapa re fana ka bopaki bo sa reroang ho batho bao re sebetsang le bona, bao re kenang sekolo le bona, beng ka rōna, re kopanela ho phatlalatseng ’nete e ka lokollang batho. (Joh. 8:32) Molula-Qhooa ke kofuto e khethehileng e ka ba thusang ho fumana tokoloho le ho finyella tšepo ea bophelo bo sa feleng, o ka ba tlosa lefifing le ho ba lebisa leseling.