Litaba Tsa Puso ea Molimo

Afrika Boroa: Menehelo e etsoang ka seatla se bulehileng e nolofallelitse liphutheho tse 15 hore li fumane likalimo tsa lichelete bakeng sa ho haha Liholo tsa tsona tsa ’Muso ho tloha ka October 1990. Re lakatsa ho sebelisa monyetla ona ho leboha motho e mong le e mong le phutheho e ’ngoe le e ’ngoe bakeng sa ho etsa monehelo ka botšepehi ho Letlōle la Mokhatlo la Liholo tsa ’Muso. Ka kōpo le ’ne le tsoele pele ho bontša moea ona o motle.

Boiteko ba ho potlakisa kaho ea Holo ea ’Muso bo boetse ba hlohonolofatsoa. Liphutheho tse peli tsa Soweto, ea Diepkloof East le Central, li ile tsa thaba ha karolo e khōlō ea morero oa tsona oa Holo ea ’Muso e phethoa matsatsing a ho qetela a manè a May. Basebetsi ba Kaho ea Holo ea ’Muso ba tataisoa ke Komiti ea Kaho ea Lebatooa ba ile ba sebetsa ka thata ho thusa liphutheho tsena. Na le uena u ka rata ho ithaopa? Kōpa “Kingdom Hall Construction Worker Questionnaire” ho molebeli oa lōna ea okamelang.

Phutheho ea Lindize e karolong e ka leboea ea KwaZulu e ile ea ananela moea o motle o ileng oa bontšoa ke lihlopha tsa Basebetsi ba Kaho ea Holo ea ’Muso ba tsoang likarolong tse fapa-fapaneng tsa Natala, ba ileng ba ba thusa hore ba qete Holo ea bona ea ’Muso ka mafelo-beke a tšeletseng. Holo ea bona e ile ea neheloa ka July.

Phutheho ea Eastleigh e East Rand, Phutheho ea Wilberforce e haufi le Vereeniging, le Phutheho ea Midrand e ka leboea ho Johannesburg, le tsona li ile tsa nehela liholo tsa tsona tse ncha ka July.

Rwanda: Litaba tse monate! Ho ngolisoa ha Jehovah’s Witnesses Association naheng ea Rwanda ho ile ha amoheloa ka April 13, 1992. Ho bile le tlhōrō e ncha ea bahoeletsi ba 1502 ka March.