Lokisetsa Liboka Tsa Phutheho le ho li Thabela
1 Joaloka mokhatlo oa baena, ka bohlale re bokana hammoho kamehla bakeng sa liboka tsa rōna tsa beke le beke. (1 Tim. 4:15, 16) Ke joang re ka thabelang liboka le ho rua molemo o moholo ka ho fetisisa ho tsona?
2 Kamehla ho lokela ho behelloe nako ka thōko bakeng sa ho lokisetsa liboka. Ba bang ba ka khona ho qeta nako e eketsehileng ba lokisetsa ho feta ba bang. Leha ho le joalo, ho sa tsotellehe hore na re maphatha-phathe hakae, ho bohlale ho fumana nako e itseng ea ho lokisetsa liboka. Ho lokisetsa hammoho le le lelapa ke habohlokoa ka ho khethehileng.—Ba-Ef. 5:15, 16.
3 Bakeng sa Sekolo sa Tšebeletso sa Puso ea Molimo: Leka ka tieo ho tsamaisana le kemiso ea ’malo oa Bibele oa beke le beke. (Josh. 1:8) Hlahloba boitsebiso bo tla akaretsoa, ’me u tle le lingoliloeng tse hlokahalang e le hore u ka tsamaisana le libui. Nahana ka litsela tseo u ka sebelisang boitsebiso bona ka tsona tšebeletsong ea hao.
4 Bakeng sa Seboka sa Tšebeletso: Hlahloba lenaneo le lokolisitsoeng ho Tšebeletso ea Rōna ea ’Muso. Bala lihlooho tse tla tšohloa. Haeba ho tla buisanoa ka boitsebiso bo tsoang sehloohong sa Molula-Qhooa kapa khatisong e ’ngoe, le bona bo hlahlobe le ho bo bala. Haeba linehelano tsa tšebeletso ea tšimo e tla ba lipontšo, li hlahlobe esale pele e le hore u ka ba malala-a-laotsoe ho li sebelisa boboleling ba hao.
5 Bakeng sa Thuto ea Molula-Qhooa: Bala sehlooho esale pele, hlokomela likarabo tsa lipotso. Ho bala mangolo a bontšitsoeng ho tla u thusa ho ba le kutloisiso e molemo haholoanyane. Ho nahanisisa kamoo boitsebiso bo lumellanang le seo u seng u se tseba ho tla eketsa tsebo ea hao. Ikemisetse ho kopanela nakong ea thuto ka ho lokisetsa litlhaloso tse khutšoaane bonyane serapeng se le seng kapa tse peli. Ena ke tsela ea bohlokoa ea ho bonahatsa “polelo ea phatlalatsa ea tšepo ea rōna.”—Ba-Heb. 10:23, NW.
6 Bakeng sa Thuto ea Buka ea Phutheho: Pele, hlahloba boitsebiso; nahana ka sehlooho sa khaolo le lihloohoana. Joale, ha u ntse u bala, hlokomela lintlha tsa sehlooho. Hlahloba litemana tsa Bibele tse tšehetsang. Leka ho araba lipotso ka mantsoe a hao. Ha u se u lokiselitse thuto, e hlahlobe ka monahanong oa hao. Leka ho hopola lintlha tsa sehlooho le kamoo ho behiloeng mabaka.—2 Tim. 2:15.
7 Thabela Liboka: Bakeng sa ho thabela liboka ka botlalo, ke habohlokoa ho fihla ka nako hore u kopanele thapelong e bulang, e kōpang moea oa Jehova. U boetse u rua molemo lipineng tsa ’Muso tse khathollang. Haeba u se na bana ba banyenyane kapa lebaka le leng le itseng le etsang hore u lule karolong e ka morao ea holo, mohlomong u tla fumana hore haeba u lulella pele, ho tla ba le litšitiso tse seng kae ’me u tla rua molemo o moholo lenaneong. Batsoali ba nang le bana ba banyenyane bao mohlomong ba lokelang ho ba ntšetsa kantle nakong ea liboka ba ka fokotsa tšitiso ka ho lulella ka thōko ebile e le karolong e ka morao.
8 Ikitlaetse ka matla ho phetla mangolo a baloang. Sena se tla u thusa ho hopola seo u se utloang. Ho buisana le lelapa la hao le metsoalle ka seo u ithutang sona ho tla hatisa boitsebiso kelellong ea hao. Ho sebelisa litlhahiso tsena ho tla etsa hore liboka e be tse nang le moelelo haholoanyane le tse thabisang, ’me ka sebele li tla re ‘susumeletsa leratong le mesebetsing e molemo.’—Ba-Heb. 10:24, 25, NW.