Liboka Tsa Tšebeletso Tsa December
TLHLOKOMELISO: Tšebeletso ea Rōna ea ’Muso e tla thathamisa kemiso ea Liboka tsa Tšebeletso bakeng sa beke ka ’ngoe ka December. Liphutheho li ka etsa liphetoho tse hlokahalang e le hore li bule sebaka sa ho ba teng Kopanong ea “Tsela ea Molimo ea Bophelo” le bakeng sa tlhahlobo ea metsotso e 30 ea lintlha tsa sehlooho tsa lenaneo Sebokeng sa Tšebeletso sa beke e latelang. Tlhahlobo ea letsatsi ka leng ea lenaneo la kopano e lokela ho abeloa esale pele barab’abo rōna ba bararo ba tšoanelehang ba tlang ho khona ho lebisa tlhokomelo lintlheng tse hlaheletseng. Tlhahlobo ena e lokiselitsoeng hantle e tla thusa phutheho hore e hopole lintlha tsa sehlooho hore motho ka mong a li sebelise le hore li sebelisoe tšimong. Litlhaloso le liphihlelo tsa bamameli li lokela hore li be khutšoanyane ’me li tobe taba.
Beke e Qalang ka la 7 December
15 mets: Litsebiso tsa phutheho. Litsebiso tse khethiloeng ho Tšebeletso ea Rōna ea ’Muso. Khothalletsa bohle ho kopanela tšebeletsong ea tšimo qalong ea khoeli. Ba tla beng ba le sieo kapa ba le kopanong bofelong ba khoeli ba lokela ho fana ka litlaleho tsa bona pele ba tsamaea. Hatisa bohlokoa ba hore bohle ba fane ka litlaleho tsa bona tsa December khoeling ena. Lokolisa litokisetso tse khethehileng tsa tšebeletso ea tšimo bakeng sa la 16 December. Ka mofuthu khothalletsa bohle ba tla beng ba le kopanong hore ba be ba lutse pele lenaneo le qala bakeng sa ’mino o rekotiloeng le ho lula litulong tsa bona bakeng sa lenaneo lohle. Ka bokhutšoanyane hlahloba kenyelletso ea Tšebeletso ea Rōna ea ’Muso ea October, 1998, serapeng sa 10 le sa 11.
15 mets: “Re Lokela ho Boela Khafetsa.” Lipotso le likarabo. Hlalosa Ezekiele 3:17-19 ka bokhutšoanyane, u totobatse boikarabelo ba rōna ba ho tsoela pele re fana ka molaetsa oa temoso.
15 mets: “Phutuho e Khethehileng ka Phetolelo ea Lefatše le Lecha.” Mor’abo rōna o tšohla sehlooho sena le bahoeletsi ba babeli kapa ba bararo ba nang le bokhoni. Akarelletsa le lintlha tse seng kae tse loketseng tse bukeng ea “Lengolo Lohle,” leqepheng la 327-31. Etsa pontšo ea kamoo nehelano ea December e ka ’nang ea tsamaisoa kateng.
Pina 176 le thapelo e koalang.
Beke e Qalang ka la 14 December
15 mets: Litsebiso tsa phutheho. Tlaleho ea lichelete. Fana ka litlhahiso tsa hore ho ka arabeloa ka bohlale joang litumeliso tsa matsatsi a phomolo a lefatše. Haeba phutheho ea lōna e e-na le likopi tsa buka ea Motho e Moholo ka ho Fetisisa kapa Mosuoe e Moholo setokong, bontša kamoo li ka sebelisoang hamolemo kateng tšebeletsong nakong ena ea matsatsi a phomolo a Keresemese. Bolela litokisetso tse khethehileng tsa tšebeletso ea tšimo bakeng sa la 25 December le la 1 January.
30 mets: “Haha Bophelo ba Hao Tšebeletsong ea Jehova.” Lipotso le likarabo. Buisana le lesoha le hlooho ea lelapa ba ’nileng ba atleha ho boloka kemiso ea kamehla, e tsitsitseng ea tšebeletso ea tšimo ea beke le beke. E-re ba bolele lintho tseo ka bomong ba lokelang ho li hlophisa e le hore ba khone ho etelletsa pele lithahasello tsa moea.
Pina 146 le thapelo e koalang.
Beke e Qalang ka la 21 December
10 mets: Litsebiso tsa phutheho. Haeba phutheho ea lōna e tla fetola linako tsa liboka bakeng sa selemo se secha, fana ka khothatso e mosa e phehellang bohle hore ba ’ne ba be teng kamehla phuthehong linakong tsa eona tse ncha. Hopotsa bahoeletsi ho tsebisa liithuti tsa Bibele le batho ba bang ba thahasellang ka liphetoho leha e le life. Khothalletsa bahoeletsi bohle ho boloka likopi tsa bona tsa botho tsa Tšebeletso ea Rōna ea ’Muso, haholo-holo likenyelletso. Ho ka etsahala hore ebe re tla bua ka tsona nakong e tlang.
15 mets: “Balebeli ba Etellang Pele—Mokhanni oa Thuto ea Molula-Qhooa.” Puo ka mokhanni oa Thuto ea Molula-Qhooa. O hlalosa boikarabelo ba hae le kamoo bohle ba teng ba ka thusang ho etsa hore thuto e be e phelang, e rutang le e hahang moeeng.—Bona buka ea Tšebeletso ea Rōna, leqepheng la 67.
20 mets: “Ba Khona ho Bona Hore re Fapane.” Lipotso le likarabo. Ka bokhutšoanyane hlahloba tšobotsi ka ’ngoe e re etsang hore re be ba fapaneng. Bontša kamoo boitsebiso bona bo ka sebelisoang ho lebisa ba thahasellang mokhatlong o hlophisitsoeng le ho ba bontša kamoo ’nete e hlahisang litšoaneleho tsa Bokreste kateng ho ba phelang ka eona.
Pina 119 le thapelo e koalang.
Beke e Qalang ka la 28 December
10 mets: Litsebiso tsa phutheho. Hopotsa bohle hore ba fane ka litlaleho tsa tšebeletso ea tšimo bakeng sa December. Hlahloba lingoliloeng tseo ho tla nehelanoa ka tsona ka January. Bontša buka ea Motho e Moholo ka ho Fetisisa le ea Moloko oa Batho o Batla Molimo hammoho le Phetolelo ea Lefatše le Lecha ea Mangolo a Segerike a Bakreste ’me u hlalose lintlha tse thahasellisang tse tla re thusa ha re lokisetsa linehelano. Akarelletsa le pontšo e le ’ngoe. Khothalletsa bahoeletsi ho inkela libuka tse seng kae tseo ba tla li tsamaisa mafelo-bekeng ana.
20 mets: Litlhoko tsa phutheho.
15 mets: “Rua Molemo Lenaneong la Sekolo sa Tšebeletso sa Puso ea Molimo ka 1999.” Puo ka molebeli oa Sekolo sa Tšebeletso sa Puso ea Molimo. E-re bahoeletsi ba bang ba bolele kamoo ba ruileng molemo kateng ka ho tsamaisana le “Kemiso e Tlatsetsang ea ’Malo oa Bibele” oa beke le beke. Khothalletsa bohle ho bala Lentsoe la Molimo letsatsi le letsatsi.
Pina 195 le thapelo e koalang.