Na U Arabela Leratong la Kreste?
1 Ha a nahana ka tsela ea bophelo ea Monghali oa hae, moapostola Johanne o ile a ngola: ‘Jesu, kaha a ratile ba hae ba neng ba le lefatšeng, o ile a ba rata ho isa bofelong.’ (Joh. 13:1) Nakong ena ea Sehopotso, menahano ea rōna e retelehela pontšong e khōlōhali ea lerato la Kreste. Re ka arabela leratong leo ka ho bonahatsa tumelo thekollong, ka ho kopanela ka cheseho mosebetsing oa ho bolela ’me, joaloka Jesu, ka ho mamella “ho fihlela qetellong.”—Mat. 24:13; 28:19, 20; Joh. 3:16.
2 Ho Arabela Leratong la Kreste: Jesu o ne a le mafolofolo haholo bekeng ea ho qetela ea bophelo ba hae lefatšeng. (Mat. 21:23; 23:1; 24:3) Joaloka baetsisi ba Kreste, le rōna re susumetsoa ke lerato hore re ‘ikitlaetse’ tšebeletsong ea Jehova. (Luka 13:24) Na u ka sebelisa monyetla oa litokisetso tsa tšebeletso e eketsehileng ea ho paka ka April ka ho eketsa nako eo u e qetang tšebeletsong?
3 Selemong sena Sejo sa Morena sa Shoalane se ka Laboraro mantsiboea, ka la 19 April. Ke ba bakae ba tla ba teng ketsahalong ee ea bohlokoa? Seo se itšetlehile haholo-holo ka rōna. Na u se u entse lethathamo la bao u rerang ho ba mema—lithuto tsa hao tsa Bibele le ba bang ba thahasellang, beng ka uena, bao u tloaelaneng le bona khoebong le bao u kenang sekolo le bona? Na u se u iteantse le bona ’me u ba memme ka mofuthu? Na u tla ba hopotsa matsatsi a seng makae pele ho Sehopotso? Na ba hloka thuso ea hao ho ea fihla moo? Baholo ba boetse ba mema leha e le bafe ba seng ba sa kopanele kamehla tšebeletsong. Taba ea hore Sehopotso se tla tšoaroa bosiung ba har’a beke, eseng ka mafelo-beke, ha e bolele hore ha ho bohlokoa hakaalo hore bohle ba be teng.
4 Tloo U Itokisitse: Ke habohlokoa hore re be ba itokisitseng le ba nang le pono e nepahetseng ea kelello ha re e-ba teng Sehopotsong. Pauluse o ile a khothalletsa balumeli-’moho le eena hore ba lule ba hopotse ho teba ha ketsahalo ena. (1 Bakor. 11:20-26) U ka ’na ua bala khaolo ea 13 ho ea ho ea 17 ea Kospele ea Johanne 13-17 thutong ea hao ea Bibele ea lelapa ’me u etse hore setho se seng le se seng sa lelapa se phete hore na sehlabelo sa Jesu se bolela eng ho sona. Hape u se ke ua lebala ho bala Bibele letsatsi le letsatsi bekeng eo ea Sehopotso!
5 Lerato la rōna ho Kreste lea teba, ’me le fetela ka nģ’ane ho la 19 April. Re ikemiselitse ho mo bontša lerato la rōna ka ho sa feleng! Mokete oa Sehopotso selemong sena o tla re thusa ho matlafatsa boikemisetso boo.