“Ba Tla Utloa Joang?”
1 Jesu o ile a bua tjena ka matla: “Litaba tse molemo li lokela ho boleloa lichabeng tsohle pele.” (Mar. 13:10) Ho sa tsotellehe boiteko boo re bo etsang ka khothalo, ho sa ntse ho e-na le batho ba limilione tse makholo ba e-song ho pakeloe. Mebuso e meng e thibela mosebetsi oa rōna. Linaha tse ngata li na le baahi ba bangata ba eketsehang ka potlako. Kahoo, “ba tla utloa joang?”—Bar. 10:14.
2 Tšepa Jehova: Re lokela ho hopola hore Jehova o tseba boemo ba lipelo tsa batho bohle. Ho sa tsotellehe hore na boemo ba motho ke bofe, haeba a batla ’nete e mabapi le Molimo ka pelo eohle, o tla e fumana.—1 Likron. 28:9.
3 Abrahama o ne a tšoenyehile ka baahi ba Sodoma le Gomora. Empa Molimo o ile a mo tiisetsa hore Sodoma e ke ke ea timetsoa esita le haeba e e-na le batho ba lokileng ba leshome feela. (Gen. 18:20, 23, 25, 32) Ha ho mohla Jehova a kileng a timetsa ba lokileng hammoho le ba khopo, joalokaha ho bonahetse tabeng ea ho lopolloa ha Lota le barali ba hae.—2 Pet. 2:6-9.
4 Ho na le nako eo ka eona Elia a ileng a nahana hore ke eena a le mong ea sebeletsang Molimo oa ’nete. Leha ho le joalo, Jehova o ile a mo tiisetsa hore ho hang o ne a se mong le hore mosebetsi oo a o qalileng o tla phethoa. (1 Mar. 19:14-18) Ho thoe’ng ka boemo ba mehleng ea rōna?
5 Lula U Phathahane Tšebeletsong ea Molimo: Ha re tsebe hore na ho sa ntse ho setse mosebetsi o mokae oa ho paka. Jehova o ikarabella mosebetsing oa hae ’me o sebelisa mangeloi a hae ho o laola. (Tšen. 14:6, 7) Ke eena ea lokelang ho etsa qeto ea hore na lichaba tsohle li lokela ho pakeloa ho isa hokae. Haeba Jehova a rata, a ka etsa bonnete ba hore molaetsa oa ’Muso o hasoa ka litsela tseo re ke keng ra li nahana hona joale e le hore batho ba bang ba bangata ba “utloe lentsoe la litaba tse molemo ’me ba lumele.” (Lik. 15:7) Seo Jehova a se etsang se tla lumellana ka ho feletseng le seo a leng sona—Molimo ea lerato, ea bohlale le ea lokileng.
6 Re na le tokelo ea ho etsa thato ea Jehova, ea ho etsa se molemohali hore e mong le e mong a utloe litaba tse molemo.—1 Bakor. 9:16.