Na Lipaki Tsa Jehova li Thusa Batho ka Liphallelo?

E, hangata Lipaki Tsa Jehova li thusa batho ha ho hlaha likoluoa. Re fana ka liphallelo ho Lipaki le batho bao eseng Lipaki tumellanong le taelo ea Bibele e ho Bagalata 6:10: “A re sebetseng se molemo ho bohle, empa haholo-holo ho ba amanang le rōna tumelong.” Re boetse re leka ho tšelisa batho ba hlasetsoeng ke koluoa le ho ba khothatsa ka Bibele, e leng seo ba se hlokang ka nako eo.—2 Bakorinthe 1:3, 4.

Mokhatlo

Ka mor’a koluoa, baholo ba liphutheho tse sebakeng se amehileng ba leka ho fumana litho tsa phutheho e le hore ba tsebe hore na li sireletsehile le hore na li hloka thuso ea mofuta ofe. Ka mor’a moo, ba tlalehela ofisi ea lekala ea Lipaki Tsa Jehova lipatlisiso tseo ba li entseng le liphallelo tseo ba faneng ka tsona.

Haeba liphutheho tsa sebakeng seo li sa khone ho fana ka liphallelo tse lekaneng, Sehlopha se Busang sa Lipaki Tsa Jehova se lokisetsa hore batho bao ba amehileng ba fumane lintho tseo ba li hlokang. Sena se tšoana le tsela eo Bakreste ba lekholong la pele la lilemo ba neng ba hlokomelana ka eona nakong ea tlala. (1 Bakorinthe 16:1-4) Ofisi ea lekala e sebakeng seo e khetha Likomiti Tsa Liphallelo e le hore li hlophise le ho tsamaisa mosebetsi oa ho aba liphallelo. Lipaki tse tsoang libakeng tse ling li tela nako le thepa ea tsona e le hore li thuse.—Liproverbia 17:17.

Ho thusa ka lichelete

Menehelo e romelloang liofising tsa makala tsa Lipaki Tsa Jehova e sebelisetsoa ho thusa batho ba hlahetsoeng ke likoluoa. (Liketso 11:27-30; 2 Bakorinthe 8:13-15) Kaha ho sebetsa baithaopi ba sa pataloeng, chelete eo e sebelisetsoa liphallelo eseng mosebetsi oa tsamaiso. Re etsa bonnete ba hore re sebelisa menehelo eohle hantle.—2 Bakorinthe 8:20.