Kamoo ’Nete e Mphetotseng Bonokoaneng ho ea Bokresteng
KE HOLETSE torotsoaneng ea Maine. Ho bonahala ka mehla ke ne ke ameha mofuteng o itseng oa botlokotsebe bo bonyenyane. Ha ntate a mphumana ke etsa botlokotsebe, ke ne ke shapuoa. Ka linako tse ling ke ne ke ikutloa ke le bolutu, haholo-holo ka mor’a lefu la ntate—o shoele ka letsatsi la ka la tsoalo la bo11.
Ha ke lula toropong, ke ile ka ameha botlokotsebeng bo boholo, lintho tse tebileng tse kang ho utsoa mabenkeleng hammoho le ho thua le ho kena mehahong. Ke ne ke thuha lebenkele le rekisang thepa ea kaho e le feela ho bona ha nka ho etsa. Ke ne ke sa nke lintho tse ngata. Ke ne ke li nka feela bakeng sa monyaka. Hajoale ha ke sheba morao, ke nahana haholo ka hona kaha ho bakiloe ke ho shebella TV haholo—ho bonahala hore ke ne ke rata lifilimi tse mabifi.
Litlōlo tsa ka tsa molao tsa ’na tsa mpefala. Ha ke ntse ke tsoela pele ka liketso tsena, ke ile ka ba sebete haholo. Eaba ke ea tšoaroa. Ke ne ke le lilemo li 15 kapa 16, ha ke tšoaroa ke “reka” lebenkeleng le leholo ka hora ea bobeli hoseng—nako eo ho sa rekoeng ka eona. Kaha ke ne ke le mocha, ke ile ka beoa leihlo ka likhoeli tse tšeletseng. Ha kea ka ithuta letho phihlelong ena; liketso tsa ka tse fokolang tsa bosholu li ’nile tsa tsoela pele.
Ha ke le lilemo li 21, e ne e se e se liketso tse fokolang tsa bosholu. Bosiu bo bong mosebetsi oa ka oa bonokoane oa fella ka polao. Ka mor’a ho utsoetsa lebenkele le rekisang thepa ea kaho le lijo tsa liphoofolo, ke ile ka laela lintho tseo ke li utsoitseng loring e ’ngoe ea bona, ’me ka e khanna ho tsoa. Ha ke tsoa ka heke, ke ne ke nahana ka ntho e khōlō eo ke e entseng. Lebenkele leo le ’nile la utsoetsoa ka makhetlo a mangata, ’me mong’a lona o ne a le sirelelitse ka thata. Ho ne ho se motho ea ka hlolang a le thua. Empa ke ile ka le thua! Ka sebele ke ne ke le ’mampoli!
Empa ha hoa ka ha nka nako e telele. Lori ea robeha, kahoo ka e tlohela ka ea batla sepalangoang se seng. Monna e mong ntlong a mpona ke ntse ke nyolosa ke theosa ’me a ntšosa ka hore o tla bitsa mapolesa. Ke ne ke sa batle hoo, kaha ke ne ke sa tsoa utsoa lebenkeleng. Ka tšoha, ka ntša sethunya, ’me ka mo thunya. Ha fella ka hore a shoe ’me ’na ka baleha.
Ka qala ho fufuleloa haholo. Ke ne ke tšohile. Ke ne ke shoele bohatsu. Pele ka lebisa koloi Augusta, ka kenya koloi eo ke e utsoitseng lengopeng, ’me ka qala ho tšela borogo. Ka sheba metsi a tlaase. Ka nahana: ‘Ke itihele?’ Monahano oa ho ipolaea oa tla kelellong makhetlo a mangata matsatsing a latelang, empa ha kea ka etsa joalo. Kahoo, ka tsoela pele ho baleha ka lilemo tse peli.
Qetellong ke ile ka palama bese ho leba Boston. Nakong ena mapolesa a ne a khaolitse ho mpatla, empa ke ne ke ntse ke tšohile. Beseng, batho ba ne ba kena ka liaparo tsa bona tsa mosebetsi, ’me ke ne ke tšoha. Nakong ena ke ne ke lahlile sethunya. Hoba ke bolaee monna eloa, ke ne ke se ke sa se batle. Ha ke fihla Boston, motšehare ke ne ke lelera hohle ’me bosiu ke ne ke robala thotobolong kapa moo ho ahuoang. Chelete eo ke neng ke e-na le eona kapele ka e sebelisa ho reka lijo. Ka inehela ho utsoa mabenkeleng hanngoe kapa habeli, empa ke ne ke se ke sa rate. Boikutlo bane bo sebete,thabo eane, phephetso eane ea ho utsoa le ho baleha ke sa tšoaroe—kaofela li fetile.
Ke ile ka fumana mosebetsi, ka fumana kamore e tlaase ka tefello, ka sebelisa lebitso lesele, ’me ke ne ke tsitsipana nako le nako ha ke bona lepolesa. Haeba ke bona le leng le e-tla, ke ne ke nka tsela e ’ngoe. Ka mehla ke ne ke le hlokolosi haholo, esita le ho tšela seterata habohlasoa feela hoba ke ne tšaba ho tšoaroa. Ke ne ke se ke phela joalo, lesholu le neng le batla ho ithabisa ka ho utsoa, joale le fetohile moleleri ea molato.
Ke ne ke e-na le bukana ea maele, ’me ka linako tse ling ke ne ke e bala. Joale ka hopola buka ea Liproverbia Bibeleng. Ka nka Bibele ’me ka qala ho e bala. Ha ke tsebe lebaka la sena. Re ne re se balumeli lapeng. Ha ke ne ke le lilemo li 13, ’mè o ile a ea libokeng tse ’maloa Holong ea ’Muso ea Lipaki tsa Jehova. Ke ne ke sa batle letho le amanang le seo ’me le eena a khaotsa.
Esita le hona joale, ha ke bala litemana tse ling ka Bibeleng, ke ne ke sa nahane ka bolumeli. Empa ke ne ke khathala ke ho baleha, ke ne ke lula ke tšohile ka linako tsohle, ke nahana hore mapolesa ke malala-a-laotsoe hore a ntšoare. Botebong ba pelo ea ka ke ne ke batla ho hong, le hoja ke ne ke sa tsebe hore na ke eng.
Ke ne ke bala lintho tse neng li tsosa thahasello ea ka. Ke ne ke batla ho li utloisisa. Ke ne ke ipotsa lintho tse ngata, ’me ke ne ke sa tsebe moo nka fumanang likarabo. Kaha ’mè o ne a ile a ea Holong ea Lipaki tsa Jehova, ka rera ho ea teng. Ke ne ke tšaba. Ke ne ke sa tsebe hore na ke tla amoheloa joang, empa leha ho le joalo ka ea. Kamohelo ebile e mofuthu. Ba bangata ba nkamohela; Paki e ’ngoe e ile ea qalisa thuto ea Bibele le ’na.
Likhoeling tse latelang, letsoalo la ka le ile la tsosolosoa. Ha ke ntse ke ithuta haholoanyane, ka nahana haholoanyane, ‘nke ke ka tsoela pele ka tsela ena. Ke tlameha ho etsa ho hong. Ke lokela ho tlohela thuto ea Bibele kapa ho itlhahisa sepoleseng.’ Kapele ka hlokomela hore ke ne nke ke ka khaotsa thuto ea ka ea Bibele, empa khetho e ’ngoe e ne e tšosa. Ke ne ke sa e batle. Ke ne ke sa batle ho ea teronkong.
E ne e le qeto e boima ka ho fetisisa eo ke neng ke tlameha ho e etsa, empa ka e etsa. Ha ke le lilemo li 24, ke ile ka ea ho e mong oa baholo ka phuthehong, Willard Stargell. Ke ile ka ’molella hore ke bolaile motho le hore ke il’o itlhahisa sepoleseng.
O ile a botsa: “U tiisitse ka seo u batlang ho se etsa?”
“Ke tiisitse.”
“Ke tla thusa kamoo nka khonang. Na u ka rata hore ke ee le uena sepoleseng?”
O ile a nkhopotsa, “Mafelo-bekeng ana ho na le kopano ea potoloho ea Lipaki tsa Jehova, re ka ea ho eona pele, ’me ebe re ea mapoleseng ka ’Mantaha hoseng.”
Ka amohela tlhahiso eo. Ke ne ke batla ho ba teng kopanong, empa hape ke ne ke tšaba taba ea ho ea mapoleseng. Ke ile ka thaba ha taba ena e khutlisetsoa morao. Kahoo ka ea le eena kopanong ’me ka e thabela, ’Mantaha hoseng re ile ra ea mapoleseng, ’me ka itlhahisa.
Mapolesa a ne a sa lumele. Hase batho ba bangata ba itlhahisang—e seng ka ho bolaea! Ba ile ba iteanya le mapolesa a Bangor Maine, ho fumana bopaki bo tiisang hore ho fela ho le joalo. Letsatsi le halofo hamorao ke ile ka koalloa teronkong ea ’muso Bangor. Letsatsi le latelang Paki ea moo ea nketela. Nakong ea nyeoe, Stargell a tla Maine ho tla ba paki ea ka. Mona ke ile ka lumela bosholu le ho bolaea; ’me sehlooho se neng se phatlalatsa qeto ea kahlolo se boletse hore “Ke ne ke khutsitse ha Moahloli a Nkahlōlela Bophelo Teronkong.” Khoeli hamorao ke ne ke le teronkong ea ’muso ea Maine, ke sebeletsa lilemo tse 15. Le hona mona Lipaki li ile tsa nketela.
Batšoaruoa ba bang ba ile ba nkamohela ka tsela e fapaneng. Ba ile ba ntšoma ka hore ‘ke bile sethoto haholo ka ho itlhahisa,’ haholo-holo kaha mapolesa a ne a tetse ho mpatla. Ha ba utloa hore ke ho entse ka baka la ho ithuta Bibele, ba ntšoma hampe, ba mpitsa ‘nku har’a liphiri.’ Ke ne ke hlokofatsoa ka mantsoe, e seng ’meleng. Boholo ba nako, ke ne ke ikarola sehlopheng sena.
’Nete e ile ea ntšireletsa. Hamorao ba hlokomela hore ‘motho enoa ke e mong oa Lipaki tsa Jehova. Ha a nke lehlakore. Ha a na ho nka karolo litsekisanong tsena.’ Hape, ba ile ba tseba hore ba ke ke ba nthekisetsa lithethefatsi kapa hore ke ba utsoetse ntho e itseng. Bahlokomeli ba teronko ba hlokomela hore nke ke ka tlōla molao. Hoo ho ile ha boloka tlaleho ea ka e le ntle ’me ha ’neha tokoloho e khōloanyane.
Ka nako e ’ngoe, ke ile ka tlohelisoa ho phehella ’nete ea Bibele. E ne e se boikemisetso ba ka ho khaotsa. E bile ho hlōleha ho ela hloko Ba-Heberu 2:1, moo re lemosoang hore re se ke ra “suthela hole.” Leha ho le joalo, ke ne ke suthetse hōle. Esita le teronkong, lintho tse bonahalang li ka u tšoasa! Ho ile ha buleha monyetla moo ke neng ke etsa lintho tsa matsoho le ho li bontša teronkong. Baeti ba ne ba reka lintho tsena, ’me boholo ba chelete bo ne bo ea ho batšoaruoa ba li entseng. Kahoo ka tšoaseha ho etseng chelete, ’me thuto ea ka ea botho ea fokola.
Eaba ke qala ho inahana: ‘Ke hobane’ng ha u ile ua itlhahisa mapoleseng? Ke hobane’ng ha u ile ua khutla ’me ua ea teronkong? ’Me hona joale u tlohela lithuto tsa hao tsa Bibele? Seo ke ho hloka kelello! U ka be u sa itlhahisa mapoleseng.’ Karolo ea bothata ba ka e ne e le ho lumela hore na ka sebele Jehova o ntšoaretse ka ho bolaea motho eane. E mong oa balebeli e ne le e Paki, ’me a bona hore sena se ntepelelitse maikutlong. Kahoo a mpolella lintho tse ling tseo a li entseng ha a ne a sebetsa Vietnam pele e e-ba Paki.
A botsa: “Ke eng se u etsang ea khethehileng hakana? Nahana ka bophelo ba baahi ba bangata boo ke ikarabellang ka bona. Ha lebotho la rōna le ne le hlasela metse ea Vietnam, re ile ra rinya batho ba bangata, ba bangata e ne e le basali le bana ba se nang molato. U nahana hore seo hase nkhathatse hona joale? Ha ke ho lebale! Empa ke ikutloa hore Jehova Molimo oa mehauhelo e sa feleng, o ntšoaretse. Seo u se entseng ke linyane ha se bapisoa le seo ke se entseng. O bolaile motho a le mong; ha ke hopole hore ke bolaile ba bakae!”
Ke ne ke hlile ke hloka ho utloa mantsoe ao. Ho ile ha nketsa hore ke nahane, ke nahanisise ka ho hauhela le ho tšoarela ha Jehova ba bakileng ka ’nete. Kahoo qetellong ke ile ka khaotsa mosebetsi oa ka oa matsoho ’me ka khutlela kemisong ea ka ea thuto ea Bibele. Ha kea ka khaotsa hape ho tloha nakong eo.
Qetellong, ke ile ka tsamaisetsoa thuto ea beke le beke ea Bibele, ’me hang ka khoeli ke ne ke lumelloa ho tsamaea le Lipaki ho ea likopanong. Ka nako e ’ngoe, batšoaruoa ba ’maloa ba ne ba ithuta Bibele. Re ne re tšeptjoa haholo ’me re lumelloa menyetla e eketsehileng. Balebeli ba ne ba tseba hore ha baa lokela ho re bea leihlo haholo. Nakong e ’ngoe re ne re lumelloa ho tsamaea liphaposi tsohle tsa teronko re aba lipampitšana, hammoho le limemo tsa li-slide tse tla bontšoa ke Lipaki tsa Jehova. Ba fetang 20 ba bile teng.
Jehova, lijo tsa moea tse tlang ka mokhatlo oa hae o hlophisitsoeng, le thuso e lerato ea baena ba tšepahalang li nthusitse ho tsoela pele. Ha ke ntse ke le teronkong ke ile ka amohela likarete le mangolo a mangata a khothatsang a tsoang ho Lipaki, ’me sena e bile setlhare sa moea se ileng sa susumetsa moea oa ka. Tsena tsohle tsa etsa hore ke kolobetsoe ka ho qoelisoa metsing ka 1983 ho bontša boinehelo ba ka ba ho etsa thato ea Jehova—ka mor’a hore ke koalloe ka lilemo tse supileng teronkong ea ’muso e sirelelitsoeng ka thata Maine.
Lilemo tse peli hamorao, ka mor’a lilemo tse robong ke le teronkong, ke ile ka isoa teronkong e haufi. Selemo le khoeli tse tšeletseng hamorao, ke ile ka ea sebetsa kantle Bangor. Mona batšoaruoa ba sebetsa ka ntle ’me ba khutle hape mantsiboea. Likhoeli tse tšeletseng hamorao ka hlaha pel’a lekhotla ho mamela nyeoe ea ho lokolloa ha ka tlas’a maemo a itseng. Ha ho le ea mong oa balebeli kapa batšoaruoa ea neng a hopotse hore ke tla atleha ho lokolloa. Ba re: “Ha ho motho ea atlehang ka lekhetlo la pele. Ha ho motho!”
Empa ke moo. Ke ’nete, ke ba seng bakae ba ileng ba atleha ka lekhetlo la pele. Hangata motho ea koalletsoeng o ne a ee a bue mashano a leke ho etsa khang le lefapha le lokollang, empa ba tseba mashano ao. Ba hlokomela leqheka la bona. Ke ile ka ea ka pel’a bona ’me ka re, ‘Ke kamoo ke leng kateng, ’me sena ke seo ke se entseng, ’me joale ke fetohile, ’me ke ikemiselitseng ho se etsa ka hore le ka hore.’ Ke ile ka ba bolella ka ho ithuta Bibele, le liphetoho tseo e li entseng, le ka ho ba e mong oa Lipaki tsa Jehova. Ba ne ba bona liphetoho tseo.
Ke nahana hore taba ea hore ke ile ka itlhahise mapoleseng, litlaleho tsa boitšoaro ba ka le mosebetsi oa ka li ne li le ntle, le hore melao-motheo ea Bibele eo ke ithutileng eona e ne e bonahala boitšoarong ba ka—tsena tsohle li ile tsa mpuella hantle. Ho feta moo ke ile ka rapela Jehova ’me ka itšetleha ka eena. Ke nahana hore o ile a kenya letsoho tabeng ena, ’me ke tšepa hore ha ke fetelletse litaba. Leha ho le joalo, lekhotla la lumella hore ke lokolloe. Ka Tlhakola 1987, ka mor’a lilemo tse 12 teronkong, ke ile ka lokolloa.
Ka la 30 ’Mesa, 1988, ke ile ka nyala e mong oa Lipaki tsa Jehova. O ne a ena le bana ba bararo bao a ba fumaneng lenyalong le fetileng. Joaloka lelapa, re na le thuto ea rōna ea beke le beke ea Bibele. Re ea libokeng tsohle Holong ea ’Muso. Re bolela litaba tse molemo tsa ’Muso oa Molimo ka ntlo le ntlo. Re etsa maeto a ho boela ho ba thahasellang ’me re khanna lithuto tsa mahae tsa Bibele le ba lakatsang. Ka mor’a ho bolela ho lekanyelitsoeng teronkong ka lilemo tsa ngata le ka ho se be teng libokeng, ke ho hlollang hakaakang ho kopanela “ka bolokolohi bo boholo” litšebeletsong tsa Bokreste tsa Lipaki tsa Jehova!—Liketso 28:31, NW.
Sena sohle se ile sa khoneha ka lebaka la tsebo e nepahetseng ea Lentsoe la Molimo le nthusitseng ho hlobola motho oa khale oa bonokoane ’me ka apara botho bo bocha ba Bokreste bo entsoeng ka setšoantšo sa Jehova Molimo.—Ba-Kolosse 3:9, 10.
Ka sebele, ‘Lentsoe la Molimo le bile bohale le ho ba matla’ ho ’na hore ke ikarole linthong tsa nako e fetileng le ho nkhutlisa hore ke be setho se utloang molao sa sechaba le ’moleli oa litaba tse molemo tsa ’Muso oa Molimo. (Ba-Heberu 4:12) Thoriso eohle e-ea ho Jehova, “Ntat’a mehauhelo, Molimo oa matšeliso ’ohle.”—2 Ba-Korinthe 1:3.—Lebitso ha lea fanoa ho ea ka kōpo.
[Ntlha e Qolotsoeng e leqepheng la 19]
Bosiu bo bong mosebetsi oa ka oa bonokoane oa fella ka polao
[Ntlha e Qolotsoeng e leqepheng la 20]
Ke lokela ho khaotsa ho ithuta Bibele kapa ke itlhahise mapoleseng
[Ntlha e Qolotsoeng e leqepheng la 21]
Mapolesa a ne a sa lumele. Hase batho ba bangata ba itlhahisang—e seng ka ho bolaea!
[Ntlha e Qolotsoeng e leqepheng la 22]
Re ile ra lumelloa ho tsamaea liphaposi tsohle tsa teronko re aba lipampitšana tsa Bibele