Lefatše le Lecha le Hlokang Bohloko

“Tse fetileng ha li sa tla hlola li hopoloa, li ke ke tsa khutlela mehopolong. Empa le tla ba le thabo le nyakallo e sa feleng ka seo ke eang ho se bōpa.”—Esaia 65:17, 18.

MANTSOE ao a boprofeta a ile a bululeloa ke Molimo lilemong tse 2 700 tse fetileng. A hlalosa hakhutšoaane seo bophelo bo tlang ho ba sona lefatšeng nakong e tlang. Neng? Ka morˈa hore Molimo o felise tsamaiso ea joale ea lintho. Boprofeta bo bongata ba Bibele bo hlakisa hantle hore ke morero oa Molimo ho felisa tsamaiso ea joale ea lintho haufinyane le hore e nkeloe sebaka ke lefatše le lecha le hlokang bohloko leha e le bofe.

Bophelo e tla ba bo fapaneng hakaakang lefatšeng leo le lecha ha bo bapisoa le bophelo bo fetileng ho theosa le histori ea motho! Lentsoe la Molimo la boprofeta le re bolella hore le tla hloka lintoa ka ho felletseng, tlōlo ea molao, bofutsana, le ho hloka toka. Ho kula le lefu li tla fela ka ho sa feleng. Ho ke ke ha hlola ho e-ba le mebuso e arohileng litsekana, malumeli, kapa litsamaiso tsa moruo tse ipakileng li fokola. Meokho ea thabo e tla nka sebaka sa meokho ea masoabi hobane bokhopo le ho utloa bohloko li tla be li felile ka ho sa feleng.

Li Tšoantšelitsoe Boprofeteng ba Bibele

Hlokomela kamoo maemo a joalo a ileng a tšoantšetsoa boprofeteng bona ba Bibele:

Ha ho sa na Ntoa: “O felisitse lintoa le ho isa pheletsong ea lefatše.” (Pesaleme ea 46:9) “Sechaba se seng ha se sa tla hlola se futuhela sechaba se seng ka lerumo, ha ba sa hlola ba ithuta ho loana.”—Esaia 2:4.

Toka Bakeng sa Bohle: “Ke tla etsa hore toka e be khoele ea ho lekanya ˈme ho loka ebe kofuto ea ho batalatsa.”—Esaia 28:17, NW.

Tokoloho Tšabong: “Ba tla lula e mong le e mong ka tlasˈa feiga ea hae le ka tlasˈa morara oa hae, ho se ea ba tšosang.” (Mikea 4:4) “Ba tla iketla naheng ea bona.”—Ezekiele 34:27.

Tlala e Felisitsoe: “Nala ea mabele e tla ba teng lefatšeng holimˈa lithaba, liqoapi tsa oona li hoase joalo ka merokoli.” (Pesaleme ea 72: 16) “Sefate se naheng se tla beha litholoana tsa sona, lefatše le behe sa lona.”—Ezekiele 34:27.

Ha ho sa na Botsofali Kapa ho Kula: “Nama ea hae ha e nchafale ho feta bocheng; ha a khutlele matsatsing a bocha ba hae bo sehlahlo.” (Jobo 33:25, NW) “Ha ho moahi ea tla re: ˈKea kula.ˈ”—Esaia 33:24, NW.

Lefu, Masoabi, le Bohloko li Felile ka ho sa Feleng: “Molimo o tla hlakola meokho eohle mahlong a bona; lefu ha le sa tla hlola le e-ba teng; ˈme ha ho sa tla ba masoabi, leha e le ho bokolla, kapa bohloko; hobane tsa pele li fetile.”—Tšenolo21:4.

Ha ba sa Angoa ke Lintho tsa Nakong e Fetileng

Lefatše la Molimo le lecha le tlang le tla khotsofatsa hoo baahi ba lefatše ba tlang ho thabela bophelo ntle ho tšitiso, esita le tšitiso ea mehopolo e bosula ea nakong e fetileng. Mehopolo e mengata e hahang le mesebetsi eo e tlang ho ba ea bophelo ba letsatsi le leng le le leng nakong eo e ncha butle-butle e tla hlakola mehopolo e mebe ea nakong e fetileng. Tšepiso ea Molimo ke ena: “Tse fetileng ha li sa tla hlola

11 hopoloa, li ke ke tsa khutlela mehopolong.” Batho ba tla ˈthaba ka ho sa felengˈ ho seo Molimo o tla se etsa lefatšeng ka bophara. “Lefatše kaofela le phomotse, le na le khotso, ho hlajoa lipina tsa nyakallo.”—Esaia 65:17, 18; 14:7.

Kajeno “tebello e ntseng e khutlisetsoa morao e kulisa pelo” joalokaha Bibele e bolela. Empa boemo boo bo tla fetoloa lefatšeng le lecha. Nakong eo, “ntho e lakatsehang (e tla ba] sefate sa bophelo ha e phethahala.” (Liproverbia 13:12, NW) Lipelo li ke ke tsa hlola li imetsoa ke bohloko kapa litebello tse sa phethahaleng. Ho ena le hoo, li tla tlala khotsofalo le thabo ka lebaka la lintho tse ngata tse hlollang tseo Molimo o tla fana ka tsona bakeng sa lelapa la motho.

Bobusi bo Fapaneng

Ho e-na le ho ba le puso e sa khotsofatseng e itokollotseng ho Molimo, lefatše le lecha le tla ba le bobusi bo fapaneng ka ho felletseng. Batho ba tla amohuoa matla a puso. Ba ke ke ba hlola ba lumelloa ho busa ka ntle ho Molimo.

Boprofeta ba Bibele boa bolela: “Empa mehleng ea marena ao marena a busang hona joale], Molimo oa leholimo o tla hloma ˈmuso o ke keng oa senyeha ka ho sa eeng kae, ˈme borena ba oona bo ke ke ba fetela ho sechaba se seng [ho ke ke ha hlola ho e-ba le puso ea motho]; o tla robaka o felise mebuso eo kaofela, empa oona o tla ba teng ka ho sa feleng.”—Daniele 2:44.

Jesu o rutile balateli ba hae ho rapella puso e ncha ea lefatše ha a re: “Ho tle ˈmuso oa hao; thato ea hao e etsoe lefatšeng, joalokaha e etsoa leholimong.”—Mattheu 6:10.

Eo e tla be e le puso e ncha ea batho—puso ea Molimo ea ˈMuso oa hae matsohong a Kreste. Lefatšeng, bahlanka ba Molimo ba tšepahalang ba tla tsamaisa litaba tsa batho ho latela tataiso ea Molimo. (Esaia 32:1) Moapostola Petrose o buile ka tokisetso ena e ncha joaloka “maholimo a macha le lefatše le lecha moo ho loka ho ikahetseng teng.” (2 Petrose 3:13) Puso ea ˈMuso oo ke sehlooho sa thuto ea Bibele.

ˈHo Holloa ha Pōpoˈ

Bobusi bona bo bocha bo tla boela bo laole matla a lefatše a tlhaho ka ho felletseng. ˈLiketso tsa tlhahoˈ tse kang ho sisinyeha ha lefatše, lifefo, likhohola, kapa komello li ke ke tsa hlola li baka mahlomola. Jesu ka boeena o ile a bontša matla a hae ha a ne a laola matla ana. Ka mohlala, ka lekhetlo le leng, ha seketsoana seo Jesu le barutuoa ba hae ba neng ba se palame se ne se batla se phethoha harˈa sefefo, o ile a khutsisa sefefo le leoatle. Barutuoa ba hae ba hlolletsoeng ba ile ba tsota: “Enoa ke ea joang, ha a utluoa le ke meea le leoatle?”—Mattheu 8:23-27.

Kahoo, lefatše hammoho le pōpo e ho lona ea batho, li tla fumana tokoloho e ke keng ea lekanngoa. “Tšepo e ntse e le teng ea hore le tsona tse bōpiloeng li tla holloa bohlankeng ba tšenyeho, li tle li be tokollong ea khanya ea bana ba Molimo. Hobane rea tseba hore tse bōpiloeng tsohle li ntse li feheloa, li bile li tsietsing hammoho, ho fihlela joale.”—Ba-Roma 8:21, 22.

Na re ka kholiseha hore haufinyane puso ea motho e tla fela le hore puso e ncha ea Molimo e tla laola litaba tsohle tsa batho lefatšeng? Re ka kholiseha hobane Morena oa Bokahohle o tiisitse ka lentsoe la hae: “Morero oa ka o tla tiea, ke tla phetha thato ea ka kaofela. . . . Ke boletse ˈme ke tla etsa; ke rerile ˈme ke tla phetha.”—Esaia 46:10, 11.

“Nako e Kethiloeng”

Seo se tla phethahala joang? Se tla etsahala neng? Lentsoe la Molimo lea bolela: “Bakeng sa ntho e ˈngoe le e ˈngoe ho na le nako e khethiloeng.” (Moeklesia 3:1, NW) Sena se kopanyelletsa nako e khethiloeng ea hore Molimo o re ˈho lekane!ˈ le ho felisa bokhopo le ho utloa bohloko. Daniele o buile ka “nako e khethiloeng ea bofelo.” (Daniele 8:19, NW) Jesu o boetse o buile ka “nako e khethiloeng.”—Mareka 13:32, 33, NW.

E, Molimo o behile nako bakeng sa ho kenella litaba tsa batho le ho tlosa phuputso e bohloko ea puso ea motho ka ntle ho oona. “Molimo foa ˈnetej o tla ahlolela ea lokileng le e mobe, etsoe merero eohle le mesebetsi eohle e beetsoe nako ea eona.” (Moeklesia 3:17) Bopaki ba ho phethahala ha boprofeta ba Bibele bo bontša hore nako eo Molimo o lumelletseng bohloko ka eona e atametse ho fela. Ha nako eo e lekanyelitsoeng e fela, o tla thumakanya tsamaiso ea puso ea batho e sa khotsofatseng eo ka lilemo tse likete e ˈnileng ea tlisetsa lelapa la motho bohloko bo boholo hore e se hlole e e-ba teng.—Mattheu 24:3-14; 2 Timothea 3: 1-5, 13; Tšenolo 19:11-21.

Ha Molimo o liha likahlolo tsa oona, hlokomela se tlang ho etsahala ho ba ikokobelletsang puso ea oona, ho fapana le ba sa ikokobelletseng eona: “Ho se ho se hokae, ˈme molotsana o tla ba sieo; . . . empa ba bonolo ba tla rua lefatše, ba iketle khotsong e kholo.” “Lesika la ba babe le tla felisoa. Ba lokileng ba tla ja lefa la lefatše, ˈme ba tla hlola ho lona ka ho sa feleng.” “Lemoha ea lokileng, u talime motho oa toka; hobane motho oa khotso o tla bona litloholo, empa ba bolotsana ba tla timela.”—Pesaleme ea 37:10, 11, 28, 29, 37, 38; bona hape le Liproverbia 2:21, 22; Mattheu 5:5.

Empa ho thoeˈng ka batho ba limillione tse likete ba seng ba shoele? Ba tla rua molemo joang lefatšeng le lecha? Ka tsoho, e leng ho tsosetsoa mona lefatšeng. Ba tla tsosoa mabitleng ˈme ba fuoe monyetla oa ho thabela bophelo ka ho sa feleng. Lentsoe la Molimo lea tiisa: “Tsoho ea bafu e tla ba teng, ea ba lokileng le ea ba sa lokang.” (Liketso 24:15) Jesu o ile a bontša sena ka ho tsosa batho ba shoeleng ba kang Lazaro le morˈa mohlolohali oa Naine.—Johanne 11:38-44; Luka7:11-16.

“Moputso”

Ke ho thabisang hakaakang ho tseba hore morero oa Molimo ke ho felisa ho utloa bohloko le ho tlisa lefatše le lecha la ho loka! Akˈu nahane ka ho phela lilemo tse limillione—ha e le hantle, ka ho sa feleng—ka bophelo bo phethahetseng le thabo harˈa maemo a paradeise, moo bokhopo le ho utloa bohloko e tlang ho ba lintho tsa nako e fetileng ka ho sa feleng!

Na u ke ke ua lumela hore “moputso” ona oa Molimo ho batho—ka nako eohle e se nang bofelo—o feta hōle nakoana ea lilemo tse likete tseo Molimo o ileng oa lumella ho utloa bo-hloko ka tsona? Na ha o fete hōle lilemo tse 70 kapa tse 80 tsa ho utloa bohloko—kapa ho ka tlaase ho feta moo—tseo mohlomong ka bomong re ileng ra li mamella bophelong ba rōna?

Pono ea Nako e Telele

Ponong ea hae ea lintho ea nako e telele, ˈMōpi o ne a tseba hore pele ho hlokahala ho lokisa litaba tsa bohlokoa tsa puso ea hae e lokileng e le Morena oa Bokahohle le tokelo ea hae ea ho busa. Ebile ho ne ho hlokahala ho lokisa taba ea tšebeliso ea tokoloho ea ho ba le khetho e lokileng le e sa lokang. Ho ne ho boetse ho hlokahala ho bontša hore pōpo ea hae e phethahetse ka hore batho ba ikokobelletsang melao ea hae e lokileng ka botšepehi ba ka tšepahala ho eena tlasˈa tlhoriso le liteko tsa babusi ba lefatše, ˈme mohlala o ikhethang oa sena ke Mora oa hae, Jesu, ha a sa le lefatšeng.

Ha Molimo o se o lokisitse litseko tsena tsohle, o ke ke oa hlola o lumella bokhopo le ho utloa bohloko ho boela li e-ba teng bakeng sa ho senya bokahohle bo nang le khotso. “Tlokotsi e ke ke ea hlaha habeli.”—Nahume 1:9.

Ho pholletsa le nako eohle e se nang bofelo e tlang, Molimo o ka sebelisa se etsahetseng lilemong tsena tse sekete tse fetileng joaloka qeto e finyelletsoeng ˈlekhotleng le phahameng.ˈ Se etsahetseng pele ho eona se ka sebelisoa nakong efe kapa efe e tlang, kae kapa kae bokahohleng haeba ho ka boela ha phahama lipotso tse ling ka puso ea Molimo kapa tšebeliso e loketseng ea boikhethelo.

U Tla Khetha Eng?

Kajeno re na le khetho. Re ka sebelisa boikhethelo ba rōna ka tsela e le ˈngoe ho tse peli: Re ka khetha ho hlokomoloha merero ea Molimo, re khotsofalle puso ea batho e sa phethahalang, re timetsoe le eona, kapa re ka sebelisa tokoloho ea rōna ea ho ba le khetho ho ithuta ka seo merero ea Molimo e leng sona le seo ho hlokahalang hore re se etse ka eona bakeng sa ho o khahlisa joaloka bafo ba ˈMuso oa oona ba inehetseng.

Thapelong Jesu o itse ho Molimo: “ˈMe bophelo bo sa feleng ke hore ba u tsebe, uena Molimo o ˈnotši oa ˈnete, le Jesu Kreste eo u mo romileng.” (Johanne 17:3) Kahoo haeba re batla ho phela lefatšeng le lecha, ho hloka-hala hore re etse boiteko ba ho ithuta ˈnete ka Molimo, merero ea oona, le melao ea oona. Hlokomela kamoo Bibele e bolelang ka teng: “Jehova o na le lōna mohla lōna le nang le eena. Ha le ka ˈna la ˈmatla, o tla ˈne a fuma-noe ke lōna, ˈme ha le ka mo furalla, o tla le furalla le eena.”—2 Likronike 15:2.

Lefatše lena la khale le ntse le felloa ke nako; lefatše le lecha lea tla: “ˈMe lefatše lea feta, le eona takatso ea lona; empa ea etsang thato ea Molimo, o hlola ka ho sa fe-leng.” (1 Johanne 2:17) U tla khetha lefe—lefatše la khale le felang kapa lefatše le lecha le tlang?

Lentsoe la Molimo lea bolela: “Ke beile pelˈa hao bophelo le lefu, lehlohonolo le thohako. Ikhethele bophelo u tle u phele, uena le litloholo tsa hao; u tle u rate Jehova, Molimo oa hao, u utloe lentsoe la hae, ˈme u mo khomarele; hobane ke eena bophelo ba hao, le bolelele ba matsatsi a hao.”—Deuteronoma 30: 19, 20.

Na ke takatso ea hao ho thabela mahlohonolo ao Molimo o a boloketseng ba lumellanyang thato ea oona le ea bona? Bahatisi ba makasine ona kapa Lipaki tsa Jehova kae kapa kae lefatšeng li tla thabela ho u thusa mahala hore u ithute ka ho eketsehileng ka sena.

[Ntlha e Qolotsoeng e leqepheng la 12]

Bafu ba tla ba le monyetla oa ho phela lefatšeng le lecha la Molimo ka ho tsosoa mabitleng