Lengolo le Bontšang Kananelo
LIKHOELING tse seng kae tse fetileng makasine oa Awake! o ile oa fumana lengolo le tsoang ho seithuti se secha lilemong leo ho lona se buileng litaba tse latelang:
“Likoranta tsa lōna li na le boitsebiso bo bongata ka ho fetisisa, li baleha habonolo le ho utloisiseha, li nakong, ’me ke likoranta tse khothatsang ka ho fetisisa tseo nkileng ka li bala. Li phatlalatsa ’nete ea Lentsoe la Molimo ka tsela e hlokolosi. Li sebetsana le liketsahalo tsa morao-rao ka kutloisiso le tšepo bakeng sa bokamoso.
“Mantsoe a sebelisitsoeng a bonolo ka ho lekaneng hore motho e mocha lilemong a ka li bala, li bonolo haholo ho feta limakasine tse ling, li-encyclopedia, le libuka tsa boitsebiso. ’Me li nakong. Ke hangata ke eeng ke ipotse ka ho hong, ebe karabo e hlaha tokollong e latelang.
“Ke le seithuti sekolong se phahameng, ke tlameha ho etsa liphuputso tse ngata bakeng sa litlaleho le mesebetsi e sa tšoaneng ea sekolo, e leng tse hlokang libuka tse ngata tsa boitsebiso. Ke maemong ana moo limakasine tsa lōna li ileng tsa ipaka ho ba tse thusang. Ke thabela ho le bolella hore boitsebiso boo ke bo sebelisang bakeng sa mesebetsi e mengata ea sekolo eo ke e etsang bo tsoa limakasineng tsena. Hangata ho etsahala hore ha ke batla sehlooho bakeng sa mosebetsi oa sekolo o itseng, ebe se hlaha makasineng ona. Kapa nakong eo ke ithutang ho hong sekolong, ho ba le sehlooho se buang ka taba eona eo se nthusang hore ke e utloisise.
“Ka mohlala, ke ne ke batla sehlooho sa mosebetsi oa sekolo oa thuto ea saense bakeng sa Tlhōlisano ea Saense eo re neng re lokela ho e kenela. O ne o lokela ho akarelletsa litšoantšo tse manehoang pontšeng, tlaleho, le setšoantšo se sebeletsang joaloka mohlala. Kahoo ke ile ka etsa qeto ea ho bua ka taba eo batho ba bangata ba ipotsang ka eona matsatsing ana: ho chesa ha sepaka-paka. Awake! ea September 8, 1989 e ile ea bua ka eona. Ke ile ka sebelisa setšoantšo se leqepheng la eona la bobeli ho fumana khopolo mabapi le kamoo nka etsang setšoantšo sa pele se il’o manehoa pontšeng ka teng, ’me ka sebelisa setšoantšo se leqepheng 7 bakeng sa setšoantšo se seng. Setšoantšo sa boraro se ne se bontša mefuta e sa tšoaneng ea moea e lutseng ka ho latellana sepaka-pakeng. Ke ile ka boela ka sebelisa boitsebiso bo lihloohong tsena tlalehong ea ka. E mong le e mong o ile a rata mosebetsi oa ka oa sekolo le tsela eo ke ileng ka o hlahisa ka eona, ’me o ile oa ratoa haholo-holo ke tichere ea ka ea thuto ea lintho tse phelang. E ile ka fumana boemo ba A, ’me ke ile ka fumana mpho ea boemo ba pele lefapheng la ka la Thuto ea Likamano Pakeng tsa Lintho tse Phelang le Paballo ea Lintho tsa Tlhaho.
“Joale, ka March, ke ne ke lokela ho fumana sehlooho bakeng sa kabelo ea mosebetsi oa sekolo mabapi le Thuso ea Pele. Ho Awake ea March 22, 1990, ke ile ka bona sehlooho se buang ka letšoeea le phekolo ea lona. Ke ile ka ikhethela ho sebelisa setšoantšo se leqepheng la 17 bakeng sa setšoantšo se manehoang pontšeng le boitsebiso bakeng sa tlaleho. Ke ile ka boela ka fumana lintlha tse phahameng ka ho fetisisa mosebetsing ona.
“Ka klaseng ea rōna ea Histori ea Amerika, re ile ra ithuta ka tsoelo-pele ea lichaba tsa boholo-holo, tse kang Maya, Aztec, le Inca, ’me u tla makala ha ke u bolella hore ha ke fihla hae mantsiboeeng a mang, Awake! ea May 8, 1990, e ne e nkemetse lebokosong la poso. Ke ile ka e ntša ka pampiring e e phuthetseng e le hore ke e hlahlobe ’me ka fumana sehlooho leqepheng la 13, se buang ka tsoelo-pele ea Maya. Ke ile ka thaba haholo. Ke ile ka bala sehlooho sena hang-hang ’me ka fa tichere ea ka ea histori kopi ea sona.
“Kea le leboha ka boitsebiso bona bohle bo nakong, boo ka sebele bo etsang hore ho etsa mosebetsi ona oa sekolo e be phihlelo e rutang le e thabisang ho e-na le ho ba moroalo. Ka sebele, limakasine tsena li tšoana le majoe a bohlokoa. Ha ke batle ho arohana le tsona le ka mohla. Li thusa e le kannete, haholo-holo bakeng sa ba bacha joaloka ’na, bao ho leng bonolo haholo hore ba ka khelosoa. Ka ho bala limakasine tsena, ho akarelletsa le lihlooho tsa ‘Bacha Baa Botsa’ re matlafallelitsoe ho suthisa lintho tsena tse khelosang le ho tsepamisa mahlo a rōna moputsong oa bophelo bo sa feleng. Ke le leboha haholo ha le ile la sebetsa ka thata ho re lokisetsa limakasine tsena e le hore re li utloisise le hore re li thabele.”—Le nehetsoe.