Bacha Baa Botsa . . .

Ho Bapalla Matleng a Phahametseng Tlhaho—Ho na le Kotsi Efe?

NA KA sebele bacha ba thahasella matla a phahametseng tlhaho? Sehlopha sa bafuputsi se ile sa leka ho fumana karabo ea potso eo ka ho etsa lipatlisiso barutoaneng ba likolo tse bohareng le tse phahameng tse 115. Lipatlisiso tseo li ile tsa senola lipalo-palo tsena: Palo e fetang halofo ea baithuti (karolo ea 54 lekholong) e hlalositse hore e thahasella matla a phahametseng tlhaho le lintho tse sa tloaelehang, athe kotara ea liithuti (karolo ea 26 lekholong) e boletse hore e “thahasella” matla a phahametseng tlhaho “haholo.”

Bafuputsi ba Univesithi ea Alaska Anchorage baa ngola: “Lipale tsa likoranta le limakasine tse mabapi le ho eketseha ho sekhahla ha liketso tse amanang le matla a phahametseng tlhaho . . . li atile haholo lilemong tsa morao tjena.” Litsebi li re ha ho na bopaki bo lekaneng bo supang ho ngatafala ha Bosatane har’a bacha. Leha ho le joalo, ha ho pelaelo hore bacha ba bangata ba thahasella Bosatane le matla a phahametseng tlhaho, le hoja thahasello eo e le ntho feela e tloaelehileng.

Bacha ba bang ba ka ’na ba botsa ba re: ‘Ho na le kotsi efe ho bapalla matleng a phahametseng tlhaho?’ Ho araba potso eo, a re ke re hlahlobeng tse ling tsa litsela tseo bacha ba itšunya-tšunyang matleng a phahametseng tlhaho ka tsona.

Leraba la Matla a Phahametseng Tlhaho

Sehlooho se tsoang ho U.S.News & World Report se bolela hore “kajeno bana le bacha ba khona ho bona litšoantšo tse makatsang le ho bala boitsebiso—boo hangata bo ferekanyang—boo lilemong tse 20 tse fetileng bo neng bo ke ke ba nahanoa le ho nahanoa.” Bohelehele bo etsa hore bacha ba bangata ba bale libuka le limakasine, ba shebelle livideo kapa ba batle boitsebiso bo mabapi le matla a phahametseng tlhaho mecheng ea khokahano ea k’homphieutha ea Internet.

Ho ea ka BBC News Online, ho boleloa hore mananeo a tloaelehileng a TV a bontšang boloi le lithotsela tse noang mali a batho “a khothalletsa bana ho thahasella boloi.” Ka ho tšoanang, ’mino oa rock o morethetho o boima le oona o khothalletsa pefo kapa o na le lihlooho tse amanang le bodemona. Mongoli oa likoranta Tom Harpur o ile a ngola koranteng ea Toronto ea The Sunday Star, a re: “Ke lokela ho fana ka keletso e matla kamoo ho ka khonehang mabapi le se etsahalang [’minong]. . . . Ha ho mohla nkileng ka bona ntho leha e le efe e litšila hakana. Lipina tsena li bua haholo ka khalefo e tlōtseng, ho phahamela ba bang, bademona, tšollo ea mali, litlhapa, pefo ea mofuta o mong le o mong, ho akarelletsa le peto, ho intša kotsi, polao le ho ipolaea. Li bua ka lefu le tšenyo, boprofeta ba timetso, ho latola lintho tsohle tse molemo le ho amohela lintho tsohle tse mpe ka ho feteletseng le bobe.”

Na ho mamela ’mino o joalo ho hlile ho tlatsetsa boitšoarong bo senyang? Ho bonahala eka ho ile ha e-ba joalo tabeng e ’ngoe—ea mocha e mong ea lilemo li 14 oa United States ea ileng a hlaba ’mè oa hae ka thipa a ba a shoa ’me le eena a ipolaea. Maboteng a kamore ea hae ho ne ho tletse litšoantšo tse khōlō tsa libini tsa ’mino oa rock o morethetho o boima. Ka mor’a moo, ntat’ae o ile a kōpa ka tieo a re: “Bolellang batsoali hore ba ele hloko ’mino oo bana ba bona ba o mamelang.” O ile a bolela hore beke pele mora oa hae a bolaea ’m’ae, o ne a bina pina “e buang ka mali le ho bolaea ’mè oa hao” khafetsa.

Hape ho na le lipapali tseo motho a ka khonang ho itšoantša ho tsona, ho tse ling tsa tsona ba bapalang ba khona ho bapala karolo ea linohe le batšoantšisi ba bang ba nang le matla a phahametseng tlhaho. Tse ngata tsa lipapali tsena li bontša pefo ea bodemona.a

Ho sa tsotellehe seo, mokhatlo oa lipatlisiso oa Mediascope oa tlaleha: “Liphuputso li bontša hore ho mamela ’mino oa rock o morethetho o boima e ka ’na ea e-ba letšoao le ka sehloohong la ho itšehla thajana, ho lemalla tahi kapa lithethefatsi, ho ba le mafu a kelello, ho batla ho ipolaea . . . kapa boitšoaro bo behang bophelo kotsing lilemong tsa bocha, empa ’mino hase oona feela sesosa sa boitšoaro bo kang bona. Ho nkoa hore bacha ba seng ba ntse ba loana le mathata ao ba ka hoheloa ke ’mino oa rock o morethetho o boima, hobane mantsoe a oona a tsamaisana le kamoo ba ikutloang kateng.”

Hase bafuputsi bohle ba ka lumelang hore ho kotsi ho mamela ’mino oa bosatane. Empa na hase ’nete hore ho shebella livideo, ho mamela ’mino, kapa ho bapala lipapali tse khothalletsang pefo kapa ho ipolaea ke chefo? Leha ho le joalo, ho Bakreste, ho bapalla matleng a phahametseng tlhaho ho na le kotsi e khōlō le ho feta.

Pono ea Molimo ka Matla a Phahametseng Tlhaho

Ho 1 Bakorinthe 10:20, moapostola Pauluse o ile a lemosa Bakreste a re: “Ha ke batle hore le be le karolo le bademona.” Ha e le hantle bademona ke bo-mang, hona ke hobane’ng ha ho le kotsi hakaale ho ba le karolo le bona? Ka bokhutšoanyane, bademona ke mangeloi a mehleng a ileng a khetha ho latela Satane Diabolose. Lentsoe Satane le bolela “Mohanyetsi” ’me Diabolose e bolela “Moetselletsi.” Ho ea ka Bibele, lengeloi lena leo e neng e le mora oa Molimo le ile la iketsa mohanyetsi le moetselletsi ka ho khetha ho fetohela Molimo. Ha ’mela o ntse o puta, le ile la hohela mangeloi a mang hore a ipope ngatana-’ngoe ho ikopanyeng le lona tseleng ea lona ea bofetoheli. Mangeloi ana a khopo a entseng selekane a ile a tsejoa ka hore ke bademona.—Genese 3:1-15; 6:1-4; Juda 6.

Jesu o ile a bitsa Satane “’musi oa lefatše lena.” (Johanne 12:31) Satane le bademona ba hae ba “halefile haholo” ka lebaka la timetso ea bona e ntseng e atamela. (Tšenolo 12:9-12) Ha ho makatse hore ebe ba ileng ba sebelisana le bademona ba fumane hore ba sehlōhō. Mosali e mong oa Suriname ea hōletseng lelapeng le neng le e-na le litšebelisano le meea o ile a bona kamoo bademona ba “thabelang ho hlokofatsa liphofu tsa bona tse sa ikemisetsang ho sebelisana le bona kateng.”b Kahoo ho sebelisana le libōpuoa tsena tsa moea ka tsela leha e le efe ho kotsi haholo!

Ka lebaka lena, Molimo o ile a laela batho ba hae ba boholo-holo, Baiseraele, hore ba qobe mefuta eohle ea ho sebelisa matla a phahametseng a tlhaho. Deuteronoma 18:10-12 ea lemosa: “E mong le e mong ea etsang lintho tsena ke ntho e manyala ho Jehova.” Ka ho tšoanang Bakreste ba ile ba lemosoa hore “ba sebelisanang le meea” Molimo o tla ba timetsa. (Tšenolo 21:8) Ebile Molimo o nyatsa ho bapalla matleng a phahametseng tlhaho. Bibele e laela hore “le khaotse ho ama ntho e sa hloekang.”—2 Bakorinthe 6:17.

Ho Itokolla Mekhoeng ea ho Sebelisana le Matla a Phahametseng Tlhaho

Na u entse phoso ea ho bapalla matleng a phahametseng tlhaho? Ha ho le joalo, ak’u nahane ka se ileng sa etsahala motseng oa lekholo la pele la lilemo oa Efese. Batho ba bangata ba sebakeng seo ba ne “ba sebelisa tsebo ea boselamose.” Empa ba bang ba ile ba susumetsoa ke mesebetsi e matla eo moapostola Pauluse a neng a e etsa ka thuso ea moea o halalelang. Phello ea e-ba efe? “Ba bangata ba neng ba sebelisa tsebo ea boselamose ba bokella libuka tsa bona ’me ba li chesa ka pel’a bohle. Ba kopanya theko ea tsona ’me ba fumana li ka rekoa ka likotoana tsa silevera tse likete tse mashome a mahlano. Kahoo ka tsela e matla lentsoe la Jehova la ’na la hōla le ho hlōla.”—Liketso 19:11-20.

See se re bolella’ng? Hore haeba motho a batla ho pholoha litleneng tsa bademona, o lokela ho lahla lintho tsohle tsa bolumeli tse amanang le borapeli ba bosatane! Lintho tsena li akarelletsa libuka tsohle, limakasine, litšoantšo, libuka tsa metlae, livideo, lithatho (lintho tse roaloang bakeng sa “tšireletso”), le boitsebiso bo amanang le bodemona bo nkoang ho Internet. (Deuteronoma 7:25, 26) Lahla lintho leha e le life tsa bolumeli tse ka sebelisoang bakeng sa ho laola, tse kang libolo tsa kristale kapa liboto tsa Ouija. Hape, lahla ’mino kapa livideo tse nang le lihlooho tsa bosatane.

Ho hlokahala sebete le boikemisetso ho nka mehato e matla joaloka ena. Empa melemo e ka ba e meholo. Mosali e mong oa Mokreste ea bitsoang Jeanc o ile a reka papali ea k’homphieutha eo qalong e neng e bonahala e se na kotsi. Ha a ntse a tsoela pele a fihla mehatong e fapaneng ea papali eo, o ile a lemoha hore likarolo tse ling tsa eona li amana le tšebelisano le meea. Kapele ka mor’a moo o ile a qala ho phofa hampe! Jean o re: “Ke ile ka tsoha har’a mp’a bosiu ’me ka senya li-CD tsa papali eo.” Phello e bile efe? “Ha kea ka ka hlola ke e-ba le bothata ho tloha ka nako eo.”

Haeba u bontša boikemisetso ba ’nete ba ho fetoha, u tla atleha. Ak’u nahane ka boikemisetso boo Jesu a ileng a bo bontša ha Diabolose a leka ho mo hohela hore a mo rapele. “Jesu a re ho eena: ‘Tloha, Satane! Etsoe ho ngoliloe, “Ke Jehova Molimo oa hao eo u tla mo rapela, ’me ke eena feela eo u tla mo etsetsa tšebeletso e halalelang.”’ Joale Diabolose a mo tlohela.”—Matheu 4:8-11.

U se Loantše Bademona U le Mong

Moapostola Pauluse o re hopotsa hore Bakreste bohle ba “loana . . . le makhotla a moea a khopo a leng libakeng tsa leholimo.” (Baefese 6:12) Empa u se ke ua leka ho loantša Satane le bademona ba hae u le mong. Batla thuso ho batsoali ba hao ba tšabang Molimo le ho baholo phuthehong ea heno ea Bokreste. E ka ’na ea e-ba ntho e hlabisang lihlong ho bolela hore u bile le kamano le bademona, empa ho ka fella ka hore u amohele tšehetso e hlokahalang e le kannete.—Jakobo 5:14, 15.

Hape, hopola hore Bibele e re: “Le hanyetse Diabolose, ’me o tla le balehela. Atamelang ho Molimo, ’me o tla atamela ho lōna.” (Jakobo 4:7, 8) E, u na le tšehetso ea Jehova Molimo! O tla u thusa hore u lokolohe lerabeng la matla a phahametseng tlhaho.

[Mongolo o botlaaseng ba leqephe]

[Setšoantšo se leqepheng la 20]

Lahla lintho tsohle tse amanang le borapeli ba bosatane

[Setšoantšo se leqepheng la 20]

Itebele mecheng ea khokahano ea k’homphieutha e buellang tšebelisano le meea