Kamoo ho Holofala ho Fetotseng Bophelo ba ka Kateng
JOALOKAHA HO BOLETSE STANLEY OMBEVA
Ka 1982, ke ile ka chaisoa ke koloi e neng e le lebelong. Ke ile ka fumana phekolo ’me ka mor’a nakoana ka khutlela mesebetsing ea ka e tloaelehileng, ho sa tsotellehe mahlaba ao ke neng ke e-ba le ’ona ka linako tse ling ka lebaka la lefufuru la lesapo la mokokotlo le neng le tsoile malulong pakeng tsa molala le sefuba. Leha ho le joalo, lilemo tse 15 hamorao, ke ile ka tobana le teko e matla ka ho fetisisa ea tumelo bophelong ba ka.
PELE ho moo, le nakoana ka mor’a kotsi eo, ke ne ke le mafolofolo ka tekanyo e itseng. Ke ne ke e-na le kemiso e ntle ea ho ikoetlisa e akarelletsang ho matha lik’hilomithara tse 10 ho ea ho tse 13 mafelong a beke, ke bapala squash le ho etsa mesebetsi e boima. Ke ne ke thusa kahong ea Liholo Tsa ’Muso Tsa Lipaki Tsa Jehova hammoho le Holong e khōlō ea Kopano Nairobi, Kenya, moo re lulang teng.
Joale ka 1997 ke ne ke se ke e-ba le mahlaba ka sefubeng kamehla ’me a ’na a tota. Ha lingaka li ntlhahloba li ile tsa fumana hore lesapo la mokokotlo le ne le tsoile malulong ’me le ne le hatella mothapo oa mokokotlo. Ho ne ho bonahala sesosa e ntse e le kotsi ela eo ke buileng ka eona qalong.
Pele ke fokolloa ke bophelo, ke ne ke sebetsa ke le morekisi. Mosebetsi oo o ne o e-na le inshorense bakeng sa bophelo bo botle ba lelapa. Ho ne ho bonahala litsela tsa ka li bulehile tabeng tsa lichelete. Empa mahareng a selemo sa 1998, ke ile ka ba shohlo ho tloha sefubeng ho ea maotong. Butle-butle bophelo ba ka bo ile ba fokola.
Nakoana ka mor’a moo, ke ile ka lahleheloa ke mosebetsi, ho akarelletsa le melemo eohle ea oona. Ka nako eo, barali ba rōna ba babeli, Sylvia le Wilhelmina ba ne ba le lilemo li 13 le 10. Ha ke se ke lahlehetsoe ke mosebetsi, re ile ra tlameha ho itšetleha ka seo mosali oa ka, Joyce, a neng a tla le sona ha khoeli e felile. Kaha maemo a rōna a ne a fetohile, re ile ra fetola tsela eo re phelang ka eona ka ho fokotsa lintho tse sa hlokahaleng. Re ne re khona ho phela.
Maikutlo a ho Nyahama
Ho bua ’nete, ha boemo ba ka bo ntlhakela hantle, ke ile ka nyahama, ka ba moithati le ho teneha feela. Ka linako tse ling ke ne ke e-ba bohale le ho ikutloa ke tlalellane, ’me le ntho e nyenyane ke ne ke e fetola ntho e khōlō. Ke ne ke le mothating oa ho tepella maikutlo. E mong le e mong ka lapeng o ile a sithabela. Mosali oa ka le bana ba ne ba tobane le boemo bo ikhethang boo ba neng ba se na phihlelo ea bona.
Ka nako eo, ke ne ke emela tsela eo ke ikutloang ka eona. Ke ile ka nona ka potlako. Ke ne ke e-na le mathata a tebileng a ho ea ntloaneng le ho laola ho ntša metsi. Hangata ke ne ke soaba haholo. Ke ne ke tloaetse ho khochella k’honeng ka mahlo a tletseng likeleli. Ho ne ho e-ba le linako tseo ke neng ke e-ba bohale bo qabolang. Ke ne ke tseba hore ha kea lokela ho itšoara joalo.
Joaloka moholo phuthehong ea Bokreste ea Lipaki Tsa Jehova, hangata ke ne ke ee ke fane ka keletso ka makhetlo ho Bakreste-’moho le ’na hore le ka mohla ba se behe Jehova molato ka bohloko leha e le bofe bo ba hlahelang. Empa ke ile ka iphumana ke ipotsa—le hona e seng hanngoe—‘Ke hobane’ng ha Jehova a lumeletse hore ke hlaheloe ke ntho e tjee?’ Le hoja ke ’nile ka sebelisa mangolo a kang la 1 Bakorinthe 10:13 ho matlafatsa le ho khothatsa ba bang, ke ne ke utloa boemo ba ka e le boo ke sitoang ho bo mamella!
Phephetso ea ho Fumana Phekolo
Ho fumana phekolo e ntle ea meriana e ile ea e-ba phephetso. Ka letsatsi le le leng ke ne ke e-ea ho physiotherapist, chiropractor le acupuncturist. Haeba bohloko bo ne bo fela, e ne e e-ba ka nakoana feela. Ke ile ka ea lingakeng tse ’maloa, ho akarelletsa ngaka ea masapo le ea methapo ea kutlo. Kaofela li ile tsa lumellana ka ntho e le ’ngoe: Ho ne ho hlokahala hore ke buuoe ho kokobetsa bohloko le ho ntša lefufuru leo la lesapo la mokokotlo. Ka lebaka la tumelo ea ka e thehiloeng Bibeleng, ke ile ka hlalosetsa lingaka tsena ka ho hlaka hore li se ke tsa ntšela mali tlas’a boemo leha e le bofe.—Liketso 15:28, 29.
Ngaka ea pele e ile ea re e tla mpuoa ka mokokotlong. Ke ile ka hlalosetsoa hore ho buuoa hoo ho ka ba kotsi haholo. Leha ho le joalo, ngaka ena e ile ea sitoa ho ntiisetsa hore e ke ke ea sebelisa mali. Ha kea ka ka hlola ke e-ea ho eona.
Ea bobeli e ile ea re e tla mpuoa lesapo la mokokotlo e phunyelletsa le molaleng. Seo se ne se utloahala se tšosa. Le hoja e ne e se na bothata ha ke hana ho tšeloa mali, e ne e batla hore ke buuoe ka potlako ’me ea mpha boitsebiso bo itseng. Le eona ke ile ka e tlohela.
Leha ho le joalo, ke ile ka khona ho fumana ngaka e nang le tšebelisano-’moho ka thuso ea Lipaki Tsa Jehova tse sebeletsang Komiting ea Bohokahanyi le Lipetlele e sebakeng sa heso. Mokhoa oa ho buuoa oo ngaka ena ea boraro e ileng ea o buella o ne o tšoana le oa ngaka ea bobeli; o ne o ama ho buuoa lesapo la mokokotlo ho phunyelletsoa le molaleng. E ile ea hlalosa hore likotsi li ne li tla ba nyenyane.
Ke ile ka bontšoa ka ho hlaka hore na ho buuoa ho ne ho tla etsoa joang ’me sena se ile sa ntšosa. Se ileng sa ntšosa le ho feta ke ho tseba hore ke ne ke tl’o buuoa haufi le litho tse hlokang ho tšoaroa ka hloko tse kang pelo le matšoafo. Na ke ne ke tla tsoa ke phela? Ho hlakile hore menahano e nyahamisang joalo ha ea ka ea tlosa tšabo ea ka.
Ka la 25 November, 1998, ke ile ka buuoa ka katleho ka lihora tse ’nè sepetleleng sa Nairobi. Ho buuoa hoo ho ile ha akarelletsa ho ntšoa ha karolo e itseng ea lesapo la qholo. Lesapo leo le ile la bōptjoa ka tsela e ’ngoe ’me la behoa sebakeng se hlokahalang ka ho kenngoa lekapakapa le likurufu. Sena se ile sa thusa. Empa ha sea ka sa felisa mathata a ka kaofela. Ke utloa bohloko ha ke tsamaea. Ke ntse ke e-shoa bohatsu bo sa feleng.
Boikutlo bo Nepahetseng
Joalokaha ke boletse pejana, ke ne ke qeta nako e ngata ke tšoenyehile ebile ke nahana ka tsela e nyahamisang ka boemo ba ka bo sa thabiseng. Ho makatsang ke hore basebetsi ba bangata ba bongaka ba ne ba mpabatsa ka ho khoba matšoafo le hore ke lula ke e-na le tšepo. Ke hobane’ng ha ba ne ba ikutloa joalo? Ba ne ba bona hore le hoja ke ne ke opeloa haholo, ke ne ke ntse ke bua le bona ka tumelo ea ka ho Molimo.
Le hoja ka linako tse ling ke ne ke halefa le ho utloisoa bohloko ke boemo ba ka, ke ne ke ntse ke itšetlehile ka Jehova. Kamehla o ne a ntšehetsa ho sohle se ntlhahelang—’me o ne a ntšehetsa haholo hoo ka linako tse ling ke neng ke itšoabela. Ke ile ka etsa qeto e tiileng ea ho bala le ho thuisa ka mangolo ao ke tsebang hore aa ntšelisa boemong ba ka. A mang a ’ona ke ana:
Tšenolo 21:4: “[Molimo] o tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng.” Ho nahana ka tšepiso ena ea Bibele ea lefatše le lecha moo meokho le bohloko li tla beng li felile ka ho sa feleng, ho ile ha ntšelisa haholo.
Baheberu 6:10: “Molimo hase ea sa lokang hoo a ka lebalang mosebetsi oa lōna le lerato leo le ileng la le bontša bakeng sa lebitso la hae.” Le hoja ke ne ke se ke holofetse, ke ne ke tseba hore Jehova o nka boiteko ba ka ba ho mo sebeletsa e le ba bohlokoa.
Jakobo 1:13: “Ha a le tlas’a teko, ho se ke ha e-ba le ea reng: ‘Ke ntse ke lekoa ke Molimo.’ Etsoe Molimo a ke ke a lekoa ka lintho tse mpe kapa hona hore o leka leha e le mang ka tsona.” Ee ke ’nete hakaakang! Le hoja Jehova a ne a lumeletse hore ke utloe bohloko, ho hang e ne e se eena ea mpaketseng bona.
Bafilipi 4:6, 7: “Le se ke la tšoenyeha ka letho, empa nthong e ’ngoe le e ’ngoe ka thapelo le thapeli hammoho le liteboho likōpo tsa lōna tse matla li ke li tsebisoe Molimo; ’me khotso ea Molimo e fetang monahano oohle e tla lebela lipelo tsa lōna le matla a lōna a kelello ka Kreste Jesu.” Thapelo e ile ea nthusa hore ke be le khotso ea kelello, ea nthusa hore ke sebetsane le boemo ba ka ka tsela e molemo.
Ke ’nile ka sebelisa mangolo ana ho khothatsa ba bang ba leng mahlomoleng—’me a ile a fela a ba thusa! Leha ho le joalo, ke ile ka hlokomela hore ka nako eo ke ne ke sa utloisise ka ho feletseng bohlokoa ba ’ona. Ho kula hona ke hona ho nthusitseng hore ke utloisise boikokobetso le ho ithuta ho itšetleha ka ho feletseng ka Jehova.
Thuso e ’Ngoe e Matlafatsang
Ba bangata ba bua ka mokhatlo oa bara ba motho ba Bakreste e le tšiea le setšehetso linakong tsa mathata. Leha ho le joalo, ho bonolo hakaakang ho khella fatše bara le barali babo rōna ba Bakreste! Ke ’nete hore ba ka ’na ba haelloa ho seo ba ka se etsang ho re thusa, empa kamehla ba ikemiselitse ho re thusa. Sena e bile ’nete tabeng ea ka. Kamehla u ne u tla fumana ba le teng pel’a bethe ea ka sepetlele, ka linako tse ling e le hoseng haholo. Ba bile ba ithaopela ho kenya letsoho ho lefelleng litšenyehelo tsa phekolo ea ka. Ke ananela haholo bohle ba ileng ba angoa ke bothata ba ka ’me ba tla ho tla nthusa.
Phuthehong ea heso, Lipaki lia tseba hore ke se ke haelloa haholo ho seo nka se etsang. Hona joale ke sebeletsa ke le molebeli ea okamelang ’me ke sebetsa le sehlopha se ntšehetsang haholo sa baholo ba Bakreste. Ha ho mohla nkileng ka tlōloa ke khoeli ke sa ee tšimong. Nakong eo boemo ba ka bo neng bo hlobaetsa ka ho fetisisa, ke ile ka thusa batho ba babeli hore ba inehele ho Jehova. E mong oa bona hona joale o sebeletsa e le mohlanka ea sebeletsang phuthehong ea Nairobi ea Lipaki Tsa Jehova.
Ke ntse ke haelloa ke mantsoe a ho leboha mosali oa ka ea ’nileng a ntšehetsa mahlomoleng ’ohle a ka. O ile a mamella bohale ba ka, ho feto-fetoha maikutlong ha ka, ho se nahanele le ho ferekana ha ka. Neng le neng ha ke ne ke lla ’me ke opeloa, o ne a nkhothatsa le ho ntšelisa. Ke sa ntse ke makatsoa ke matla ao a bileng le ’ona le ho khona ho amohela boemo ha a tobane le mahlomola. O ipakile e le “motsoalle oa ’nete . . . ka linako tsohle.”—Liproverbia 17:17.
Barali ba rōna ba ithutile ho sebetsana le boemo ba ka. Ba etsa seo ba ka se khonang ho nthusa. Ba utloisisa litlhoko tsa ka ’me ba potlakela ho nthusa ha ho hlokahala, ’me ba etsa bonnete ba hore baa ntlhokomela ha ’m’a bona a le sieo. Sylvia e ’nile ea e-ba “lere leo ke ikokotlelang ka lona,” a nthusa hore ke tsama-tsamaee lapeng neng le neng ha ke ikutloa ke fokola.
Ho thoe’ng ka ngoana oa ho fela, Mina? Ke hopola ka nako e ’ngoe ha ke ne ke sitoa ho tsoha ka mor’a ho oa ka tlung. Ke ne ke setse le eena feela. O ile a ntša matlanyana ’ohle ao a nang le ’ona, a mphahamisa ’me butle a ntataisa ho nkisa kamoreng ea ka. Le joale o ntse a sa tsebe hore na o ile a khona joang. Nke ke ka lebaka ketso eo e bontšitseng sebete.
Ho sebetsana ka katleho le ho holofala ke ntoa e thata ka ho fetisisa eo nkileng ka e loana bophelong. Le joale ke sa loana. Ha ho ntho e kileng ea leka bophelo le tumelo ea ka joaloka ena. Ke ithutile ho hongata ka boikokobetso, ho nahanela le ho ba le kutloelo-bohloko. Ho tšepa Jehova ka ho feletseng ho nthusitse hore ke mamelle bothata bona ka katleho.
Ke ithutile bonnete ba mantsoe ana a moapostola Pauluse: “Re na le letlotlo lena lijaneng tsa letsopa, e le hore matla a fetang se tloaelehileng e ka ba a Molimo eseng a tsoang ho rōna.” (2 Bakorinthe 4:7) Ke fumana khothatso e khōlō tšepisong ea Molimo ea “maholimo a macha le lefatše le lecha” tse tlang. (2 Petrose 3:13) Ke rapela Jehova hore a ntšehetse ha ke ntse ke emetse lefatše leo le lecha, etsoe ke sa ntse ke fokola ’me ke sitoa ho finyella ho hongata ka matla a ka.
[Litšoantšo tse leqepheng la 28]
Ho sebetsa le lelapa la ka tšebeletsong ea Bokreste ho nthusitse hore ke mamelle