Ho Etela Moo ho Etsoang Maoto le Matsoho a Maiketsetso

Ho Etela Moo ho Etsoang Maoto le Matsoho a Maiketsetso

KA MONGOLI OA TSOHA! NEW ZEALAND

KE NE ke e-na le mabaka a mabeli a ho etela Setsi sa Litho Tsa Maiketsetso se Wellington, New Zealand. La pele, leoto la ka la maiketsetso le ne le hloka ho lokisoa. La bobeli, ke ne ke batla ho bontšoa setsi sena le ho hlalosetsoa ka ho eketsehileng ka mehato e amehang ha ho etsoa litho tsa maiketsetso.

Setsebi sa litho tsa maiketsetso se ile sa lumela hore ke bontšoe sebaka sena. Sena se ile sa ntsoela molemo haholo, sa eketsa kananelo ea ka ka boiteko bo tsoileng matsoho le boitelo ba ba amehang ho etseng litho tsena tsa maiketsetso.

Leoto la Maiketsetso le Etsoa Joang?

Boholo ba bakuli ba etelang setsi sena ke ba hlokang leoto la maiketsetso. Mohato oa pele ha ho etsoa leoto ke ho etsa foromo ea kutu e folileng. Foromo ena e sebelisoa ho foroma kutu e tšoanang hantle le ea mokuli. Joale kutu ena e sebelisoa ho bōpa leoto la maiketsetso leo kutu ea mokuli e tla khohletsoa ho lona. E se e le hona ha ho qaliloe mosebetsi oa ho bōpa leoto le feletseng le tla sebetsa bakeng sa le khaohileng. Mokhoa o mocha o atlehang haholoanyane ke oa ho sebelisa lenaneo la k’homphieutha bakeng sa ho metha kutu. Joale mochine o betla kutu e tšoanang hantle le ea motho ea hlokang leoto.

Ka mor’a ho bontšoa mekhoa e tsoetseng pele ea botsebi bo sebelisoang setsing sena, ke ile ka bontšoa tse ling tsa lintho tse sebelisoang ho etsa litho tsena tsa maiketsetso, tse tsoang linaheng tse ling. E ’ngoe e ileng ea ntšiea ke hloletsoe ke lengole le tenyetsehang habonolo le kenngoang leotong la polasetiki le ka bōptjoang ka ho futhumatsoa ebe le fuoa sebōpeho se nepahetseng hantle bakeng ka mokuli ea le hlokang. Ho na le lik’hathaluku tse bontšang ka ho pharaletseng litšoantšo tsa lisebelisoa tse joalo tse fumanehang mehloling e sa tšoaneng lefatšeng ka bophara.

Mehatong e qetellang ea ho bōpa leoto, ho etsoa litokiso mona le mane ho etsa bonnete ba hore moomo, lengole, letlalo le karolo ea leoto kaofela li boemong bo nepahetseng e le hore motho a ka tseba ho tsamaea ka tsela e batlang e tšoana le ea tlhaho. Qetellong ho lokisoa se tla koahela leoto lena. Sena se etsetsoa hore ho koaheloe “masapo” a leoto lena la maiketsetso. Joale le fuoa ’mala o batlang o tšoana hantle le oa letlalo la mong’a leoto.

Ka mor’a hore mokuli a ikutloe a se a tloae-tloaetse leoto lena, ho lokisetsoa hore a tl’o bonana le ngaka e etelang Setsi sena sa Litho Tsa Maiketsetso e sebetsanang ka ho khetheha le masapo, manonyeletso le mesifa. Joale ho etsoa tlhahlobo ea ho qetela ho etsa bonnete ba hore leoto lena le lecha le sebelisoa hantle ho tsoela mokuli molemo.

Bakuli ba Bana le ba Baatlelete

Ha ke ntse ke bontšoa sebaka sena, thahasello ea ka e ile ea e-ba ngoananeng e mong ea sa leng monyenyane. O ne a se na bothata ba ho re bontša kutu ea leoto la hae le leoto la hae la maiketsetso. Hamorao ke ile ka mo shebella ha a ntse a tlōla-tlōla, ho bonahala ho se letho le mo tšoenyang.

Ke ile ka thahasella haholo tlhaloso ea setsebi ka bana ba lahleheloang ke litho tse itseng. Se ile sa mpontša seatla se senyenyane ’me sa hlalosa hore mefuta e kang ena e khoesoa maseeng esita le a likhoeli tse tšeletseng. Hobane’ng? Sena se koetlisa lesea bakeng sa ho sebelisa letsoho le seatla sa maiketsetso hamorao. Ha koetliso ena e sa etsoe, o ile a bolela hore ngoana o hōla a tloaetse ho sebelisa letsoho le le leng, ’me a ka thatafalloa ho sebelisa matsoho a mabeli hamorao bophelong.

Ke ile ka bolelloa hore haufinyane tjena k’hamphani e ’ngoe ea Europe e ile ea romela k’hontheinara ea litho tse sa tšoaneng tsa maiketsetso bakeng sa baatlelete hore ba li sebelise nakong ea Lipapali Tsa Tlhōlisano Tsa Baatlelete ba Holofetseng Sydney, Australia. Litho tsena li ile tsa fuoa libapali mahala, ’me litsebi tsa litho tsena tsa maiketsetso, ho akarelletsa le tse tsoang New Zealand, li ne li le teng ho thusa libapali nakong ea lipapali.

Tse ling tsa litho tsena li ne li entsoe ka ho khetheha bakeng sa baatlelete. Ke ile ka bontšoa se seng. E ne e le leoto le nang le leqaqailana le entsoeng ka thepa e khethehileng le sebetsang hantle joaloka ho tenyetseha ha tlhaho ha leoto.

Tsoelo-pele ea Morao Tjena

Ebe bokamoso bo fuparetse litsebi tsee tsa litho tsa maiketsetso eng? Setsebi sa litho tsena tsa maiketsetso se ile sa mpolella ka leoto le leng la maiketsetso le laoloang ke k’homphieutha leo hona joale ho nang le motho a le mong New Zealand ea le sebelisang. Ho boleloa hore ho haheletsoe lintho tse laolang tšebetso ea lona ha le hatelloa. Sena se etsa hore le sebetse ka tsela e tšoanang le eo leoto la tlhaho le sebetsang ka eona.

Linaheng tse ling, lingaka tse nang le phihlelo tse etsang opereishene tse sebetsanang le masapo, mesifa le manonyeletso li leka mokhoa oa ho hokella setho sa maiketsetso lesapong. Tšepe e khethehileng, e kenngoang kutung ka mor’a hore leoto kapa letsoho le khaoloe, e ba eona eo ho tla hokelloa setho sa maiketsetso ho eona. E fokotsa mosebetsi oa ho etsa liforomo le foreimi ea leoto la maiketsetso.

Ho ntse ho etsoa lipatlisiso tsa ho hahella lintho tsa elektronike methapo-kutlong, e le hore motho a ka laola litho tsa maiketsetso ka monahano feela. United States le linaheng tse ling, ho rokelletsoe liatla tse ’maloa tseo e seng tsa maiketsetso, empa mohato ona o baka khang kaha o hloka hore mokuli a noe meriana bophelo bohle ba hae e etsang hore seatla sena se se ke sa mo hana.

Lefapheng le etsang matsoho a maiketsetso, ho se ho sebelisoa tsoelo-pele ea elektronike. E khona ho bala tšebetso ea methapo-kutlo e mesifeng ea kutu ea letsoho, eo hangata e ntseng e sebetsa. Joale ho matlafatsoa tšebetso ea methapo-kutlo ena ho laola lintho tsa elektronike tse letsohong la maiketsetso. Theknoloji ea morao-rao bakeng sa sephaka sa maiketsetso e sebelisa k’homphieutha ho etsa hore mong’a letsoho la maiketsetso a khone ho le sebelisa kamoo a ratang kateng.

Ke hloletsoe ke tsoelo-pele ena ea theknoloji e sebelisoang lithong tsa maiketsetso, ke ile ka botsa setsebi sena hore na se ka bapisa tšebetso ea eona joang le litho tsa tlhaho. Se ile sa lumela se sa khanane hore litho tsa tlhaho li ipetsa pele. Sena se ile sa etsa hore ke nahane ka mantsoe a mopesaleme eo ha a rapela ’Mōpi oa hae, a ileng a re: “Ke tla u roka hobane ka tsela e tšosang ke entsoe ka mokhoa o hlollang.”—Pesaleme ea 139:14.

[Setšoantšo se Qanollang/Litšoantšo tse leqepheng la 23]

(Ha u batla ho bona boitsebiso bo hlophisitsoeng hantle, sheba sengoliloeng)

[Litšoantšo]

Seatla se nang le thepa ea elektronike e balang methapo-kutlo e mesifeng ea kutu ho laola hore na se sebetsa ka potlako hakae le hore na se ka tšoara ka matla hakae

[Tlhaloso ea Moo Setšoantšo se Nkiloeng Teng]

Hands: © Otto Bock HealthCare

[Litšoantšo]

Ka har’a lengole lena le tsoetseng pele ho tsa theknoloji, ho hokeletsoe thepa ea elektronike e etsang hore lengole lena le tenyetsehe ka tsela ea tlhaho ea motho ea le kentseng

[Tlhaloso ea Moo Setšoantšo se Nkiloeng Teng]

Knee: Photo courtesy of Ossur

[Setšoantšo]

Sampole ena ea leoto e bontša hore na le koaheloa ka eng le hore na leqaqailana le entsoe joang

[Tlhaloso ea Moo Setšoantšo se Nkiloeng Teng]

[Setšoantšo se leqepheng la 21]

Ho lokisa leoto la maiketsetso

[Setšoantšo se leqepheng la 22]

Ho khoesa mokuli leoto la maiketsetso

[Setšoantšo se leqepheng la 23]

Seatla se senyenyane sa maiketsetso se sebelisoang ho koetlisa masea a khaohileng liatla

[Setšoantšo se leqepheng la 23]

Semathi sa leoto la maiketsetso le entsoeng ka “carbon fiber” se ile sa hlōla lebelong la limithara tse 100 ka metsotsoana e 10,97 ka 2004 Tlhōlisanong ea Lipapali Tsa Baatlelete ba Holofetseng

[Tlhaloso ea Moo Setšoantšo se Nkiloeng Teng]

Photo courtesy of Ossur/Photographer: David Biene

[Tlhaloso ea Moo Setšoantšo se Nkiloeng Teng e leqepheng la 21]