Pono ea Bibele

Na Batho ha ba E-shoa e ba Mangeloi?

NGOANANYANA e mong ea bitsoang Argyro o ile a hlokahala ha a le lilemo li supileng feela. Ba saretsoe haholo, batsoali ba hae ba ile ba mo sheba ha a robetse ka lekeseng, a apere liaparo tse tšoeu. Moo a lekang ho ba tšelisa, moruti o ile a ba bolella: “Molimo o ne a batla lengeloi le leng, ’me O nkile Argyro e monyenyane hore a il’o ba le eena. Hona joale moea oa hae o teroneng ea Ea ’Matla ’Ohle.”

Batho ba bangata ba lumela hore mangeloi ke meea ea batho ba shoeleng, le hoja e le malumeli a ’maloa feela a hlileng a lumellanang le khopolo eo. Mecha ea phatlalatso e tumisitse khopolo ena libaesekopong le mananeong a thelevishene ka ho hlahisa batho ba seng ba shoele bao ka mor’a ho thusa le ho sireletsa batho ba ntseng ba phela, e bang mangeloi.

Na ka sebele u ka lebella hore batho bao u ba ratang e be mangeloi ha ba e-shoa? Bibele e ruta’ng tabeng ee? Ho araba lipotso tseo, a re qaleng ka ho hlahloba hore na Mangolo a Halalelang a re’ng ka sebōpeho sa mangeloi le boemo boo bafu ba hlileng ba leng ho bona.

Mangeloi—Libōpuoa Tse Ikhethang

Mangeloi ke bahlanka ba Molimo ba sa bonahaleng, ba matla ba lulang sebakeng sa moea. Boteng ba ’ona ha boa itšetleha ka batho. Mangeloi ke libōpuoa tsa moea tse bōpiloeng ke Molimo. Bibele e re: “[Mangeloi a ke a] rorise lebitso la Jehova; etsoe o ile a laela, ’me [a] bōptjoa.”—Pesaleme ea 148:2, 5.

Bibele e senola hore libōpuoa tse limilione tse ngata tse tšepahalang tsa moea, ho kopanyelletsa le lirafime le likerubime, li sebetsa ka boikokobetso mesebetsi e khethehileng ho ea ka maemo a tsona le likabelo tsa tsona. (Pesaleme ea 103:20, 21; Esaia 6:1-7; Daniele 7:9, 10) Na batho ba ile ba tlameha ho shoa e le hore Molimo a hlahise mangeloi ao? Ha e le hantle, eo ke ntho e ke keng ea etsahala. Hobane’ng?

Bibele e bontša hore mangeloi a bōpiloe nako e telele pele batho ba bōptjoa. Ha Jehova a ne a bōpa lefatše leo hamorao batho ba neng ba tla phela ho lona, mangeloi—ao ka puo ea thothokiso a bitsoang linaleli tsa hoseng—a ile a ‘hoeletsa ka thabo hammoho ’me a qala ho hlaba litlatse.’ (Jobo 38:4-7) Ka hona, a bile teng lilemo-lemo pele motho a ka ba teng lefatšeng.

Ho feta moo, mangeloi a fapane haholo le batho tseleng eo a bōpiloeng ka eona le likarolong tseo a li phethang morerong oa Jehova.a Molimo o bōpile motho a le “ka tlaasana ho mangeloi,” ka hona, ke ka nepo libōpuoa tseo tsa moea li nkoang e le tse phahametseng batho, kaha li nahana ka tsela e phahameng haholo ebile li matla haholo. (Baheberu 2:7) Maholimo ke “sebaka sa . . . bolulo se loketseng” sa mangeloi. (Juda 6) Ha e le batho, morero oa tšimolohong oa Molimo e ne e le hore motho a phele ka ho sa feleng lefatšeng. (Genese 1:28; 2:17; Pesaleme ea 37:29) Hoja banyalani ba pele ba ile ba mamela Molimo, ba ka be ba sa ka ba shoa. Ka hona, ho tloha tšimolohong haesale batho le mangeloi ba reretsoe ho phetha likarolo tse sa tšoaneng morerong oa Molimo.

Ho Etsahala’ng ha Motho a E-shoa?

Lipotso tse ling tsa bohlokoa tseo re lokelang ho li hlahloba ke tse reng: Ho etsahala’ng ha batho ba e-shoa? Na ba tsoela pele ba phela ka sebōpeho se seng, mohlomong e se e le mangeloi sebakeng sa moea? Bibele e na le karabo ena e bonolo le e hlakileng: “Ba phelang baa tseba hore ba tla shoa; empa ha e le ba shoeleng, ho hang ha ba tsebe letho.” (Moeklesia 9:5) Ka hona, lefung, batho ba khaotsa ho phela. Bafu ha ba tsebe letho, ha ba utloe letho ebile ha ba hlaheloe ke letho.

Na ho na le tšepo bakeng sa bafu? E teng! Bibele e bontša hore tšepo ea batho ba bangata ba shoeleng ke hore ba tla tsosoa bafung. Bongata ba batho ba shoeleng ba tla tsosetsoa bophelong paradeiseng lefatšeng.—Luka 23:43; Johanne 5:28.

Batho ba ’maloa ba na le tšepo ea ho tsosetsoa ho ea phela leholimong. Palo ea bona ea fokola—kaofela ba 144 000. Leha ho le joalo, bana ba 144 000 ba fapane hōle le libōpuoa tseo ka tloaelo li bitsoang mangeloi. Ka mohlala, ba 144 000 ba busa e le marena a sa shoeng le baprista hammoho le Kreste. Ba na le matla a ho ba baahloli. (1 Bakorinthe 6:3; Tšenolo 20:6) Na ke bana ba hlokahetseng? Che. Ke balateli ba Kreste ba ileng ba lekoa ka ho feletseng!—Luka 22:28, 29.

Nahana hape ka phapang e teng pakeng tsa batho ba shoeleng le mangeloi a phelang. Ha bafu ‘ba sa tsebe letho,’ mangeloi ’ona a tseba se etsahalang, a na le maikutlo le matla a ho iketsetsa liqeto. A na le bolokolohi ba ho ikhethela. (Genese 6:2, 4; Pesaleme ea 146:4; 2 Petrose 2:4) Bafu ba hlalosoa ‘ba se na matla,’ athe mangeloi “a matla ka bonatla.” (Esaia 26:14; Pesaleme ea 103:20) ’Me le hoja batho, e leng litloholo tsa Adama, ba shoa ka lebaka la sebe le ho se phethahale, mangeloi a tšabang Molimo ’ona a phethahetse, a boemong bo amohelehang ho Jehova.—Matheu 18:10.

Khopolo ea hore mangeloi ke meea ea bafu e ka ’na ea buuoa mananeong a iqapetsoeng a thelevishene kapa libaesekopong, empa Mangolo ha a e tšehetse ho hang. ’Nete ea Bibele e boletsoeng ka holimo e re thusa hore re qobe ho ba le maikutlo a fosahetseng ka se tla etsahala ka baratuoa ba rōna ha ba e-shoa. Hape Bibele e re tiisetsa hore mangeloi a tšepahalang—a bōpiloeng e le bahlanka ba matla ba Molimo—a phahametse batho ’me ke malala-a-laotsoe ho etsa thato ea Molimo kamehla. Hoa thabisa hore ke thato ea Molimo hore a sebelise mangeloi ho lebela le ho thusa batho bao ka tieo ba hlomphang Jehova ’me ba batla ho mo sebeletsa.—Pesaleme ea 34:7.

[Mongolo o botlaaseng ba leqephe]

NA U KILE UA IPOTSA?

◼ Baratuoa ba hao ba hlokahetseng na hona joale ke mangeloi a sebeletsang Molimo leholimong?—Moeklesia 9:5, 10.

◼ Na bana ba shoa hobane Molimo a batla ho pota-potoa ke mangeloi a eketsehileng?—Jobo 34:10.

◼ Na bafu ba ka khutla ho tla sireletsa ba phelang?—Esaia 26:14.

[Ntlha e Qolotsoeng e leqepheng la 29]

“[Mangeloi a ke a] rorise lebitso la Jehova; etsoe o ile a laela, ’me [a] bōptjoa.”—Pesaleme ea 148:2, 5.