Lebaka Leo ka Lona ke sa Ketekeng “Halloween”

SELEMONG se fetileng, ha baahelani ba Michael ea lilemo li 14, oa Canada, ba ne ba lokisetsa Halloween—e leng mokete o tloaelehileng linaheng tse ling o tšoaroang selemo le selemo, o amanang le ho sebelisana le meea—eena o ne a nahanne ka ho hong. Moqoqong oa sekolo oo a ileng a o ngola, Michael o ile a re:

‘Hosasa ke letsatsi la Halloween. Ha ke sheba ka ntle ka fensetere, ke bona lijareteng tsa baahelani ba rōna kaofela mohloa o khabisitsoe ka majoe a mabitla le lithotsela ’me lifensetereng ho behiloe mabone a mekopu.a Batsoali ba lokisa liaparo tsa bana ba bona tsa ho ikhakanya; bana bona ba ntse ba nahana ka hore na ebe ba tla fumana lipompong tse kae hosasa.

‘Lelapa leso le fapane. Mohloa oa jareteng ea lapeng ha oa khabisoa, ’me ha hoa behoa mabone lifensetereng. Batho baa mpotsa hore na ke hobane’ng ha ke sa keteke Halloween. Ha e le hantle, Lipaki Tsa Jehova ha li e keteke ka lebaka la tšimoloho ea eona.b

‘Ntho e makatsang ke hore ke rata nako ea Halloween. U ka ’na ua ipotsa: “Hobane’ng?” Hobane e etsa hore ke nahane. E etsa hore ke nahane ka lebaka le etsang hore ke khethe ho se etse lintho tse itseng. Motho e mong le e mong o lokela ho ikarabella bakeng sa hore na tšimoloho ea ntho e itseng e tloaetsoeng ke ea bohlokoa kapa che. Ke nahana hore tšimoloho ke ea bohlokoa. Ka mohlala, batho ba bangata ba ne ba ka halefa haeba baahelani ba bona ba ne ba ka apara joaloka Manazi. Hobane’ng? Ka lebaka la tšimoloho ea junifomo ea Manazi le seo e se emelang—e leng motheo o khopisang batho ba bangata. Ke utloa motheo o emeloang ke diabolose, meea e mebe le baloi e le o khopisang, ’me ha ke batle ho ikamahanya le oona. Ke ntho e ntle ho nahana ka khetho eo re e etsang le hore na ke hobane’ng ha re e etsa, hammoho le ho etsa khetho motho a itšetlehile ka molao-motheo o itseng ho e-na le ho latela se etsoang ke bongata. Ke lona lebaka le etsang hore ke rate nako ena ea selemo. Ke motlotlo ho ba ea fapaneng hammoho le ho emela seo ke se lumelang.’

[Mongolo o botlaaseng ba leqephe]