Pono ea Bibele

Na Molimo o Tšoarela Libe Tse Tebileng?

MOHAU ke e ’ngoe ea litšobotsi tse ka sehloohong tsa Molimo. (Pesaleme ea 86:15) O mohau hakae? Mopesaleme o ile a ngola, a re: “Haeba u ne u talima liphoso, Jah, Jehova, ke mang ea neng a ka ema? Etsoe ho na le tšoarelo ea ’nete ho uena, e le hore u ka tšajoa.” (Pesaleme ea 130:3, 4) Litemana tse ling li re: “Joalokaha bochaba-tsatsi bo le hōle le bophirima-tsatsi, ka ho tšoanang o suthiselitse litlōlo tsa rōna hōle le rōna. Joalokaha ntate a bontša mohau ho bara ba hae, Jehova o bontšitse mohau ho ba mo tšabang. Etsoe o tseba sebōpeho sa rōna hantle, oa hopola hore re lerōle.”—Pesaleme ea 103:12-14.

Ho hlakile hore Jehova o tšoarela ka ho feletseng le ka bolokolohi, ’me o nahanela mefokolo ea rōna le ho se phethahale ha rōna—oa tseba hore re “lerōle.” Nahana ka mehlala e meng e ka Bibeleng e senolang hore na mohau oa Molimo o moholo hakae.

Moapostola Petrose o ile a latola Kreste ka makhetlo a mararo. (Mareka 14:66-72) Moapostola Pauluse le eena o ile a hlorisa balateli ba Kreste pele e e-ba molumeli. Pauluse o ile a tšehetsa taba ea hore ba bang ba bona ba bolaoe. O ile a ba a lumela hore e mong oa bona a bolaoe. (Liketso 8:1, 3; 9:1, 2, 11; 26:10, 11; Bagalata 1:13) Litho tse ling tsa phutheho ea Korinthe e ne e le matahoa, bahanyapetsi le masholu pele e e-ba Bakreste. (1 Bakorinthe 6:9-11) Empa kaofela ha bona Molimo o ile a ba amohela. Ke hobane’ng ha Molimo a ile a ba tšoarela?

Mehato e Meraro e Hlokahalang Pele Molimo a ka Hauhela Motho

Pauluse o ile a ngola, a re: “Ke ile ka bontšoa mohau, hobane ke ne ke hloka tsebo ’me ke etsa ka ho hloka tumelo.” (1 Timothea 1:13) Mantsoe a hae a tobileng a re bontša mohato oa pele oo motho a lokelang ho o nka e le hore Molimo a mo tšoarele—e leng oa ho ithuta tsebo e nepahetseng ea Jehova le melao ea hae e boletsoeng ka Bibeleng. (2 Timothea 3:16, 17) Ha e le hantle, re ke ke ra khahlisa ’Mōpi oa rōna haeba re sa mo tsebe hantle. Ha Jesu a rapela Ntate oa hae, o ile a re: “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete, le ka eo u mo romileng, Jesu Kreste.”—Johanne 17:3.

Ha batho ba lipelo li tšepahalang ba fumana tsebo eo, ba ikoahlaela liphoso tseo ba li entseng nakong e fetileng ’me ba susumelletseha ho bontša pako ea sebele. Ona ke mohato oa bobeli oo motho a lokelang ho o nka e le hore Molimo a ka mo tšoarela. Liketso 3:19 e re: “Ka hona, bakang, ’me le sokolohe e le hore libe tsa lōna li hlakoloe.”

Temana ena e boetse e bontša mohato oa boraro—e leng oa ho sokoloha. Ho sokoloha ho bolela ho furalla tsela ea khale eo motho a neng a phela ka eona le maikutlo ao a neng a e-na le ’ona ’me a etse lintho ho ea ka melao ea Molimo le tsela eo a talimang lintho ka eona. (Liketso 26:20) Ka mantsoe a mang, motho o bontša ka tsela eo a seng a phela ka eona hore o tiile ha a re ho Molimo, “Ke bakile.”

Ho na le Libe Tseo Molimo a sa li Tšoareleng

Ho na le batho bao Molimo a sa tšoareleng libe tsa bona. Pauluse o ile a ngola, a re: “Haeba re tloaela ho etsa sebe ka boomo ka mor’a hore re amohele tsebo e nepahetseng ea ’nete, ha ho sa na sehlabelo leha e le sefe se setseng bakeng sa libe, empa ho na le tebello e itseng e tšabehang ea kahlolo.” (Baheberu 10:26, 27) Mantsoe a reng ho “tloaela ho etsa sebe ka boomo” a fana ka maikutlo a bokhopo bo metseng ka metso, pelo e khopo.

Judase Iskariota o ile a ba le pelo e joalo. Jesu o ile a re: “Ho ka be ho bile molemo hoja motho eo a ne a sa tsoaloa.” (Matheu 26:24, 25) Hape o ile a re ka baeta-pele ba bang ba bolumeli ba mehleng ea hae: “Le tsoa ho ntat’a lōna Diabolose . . . Ha a bua leshano, o bua ho ea ka tšekamelo ea hae, hobane o leshano ’me ke ntate oa leshano.” (Johanne 8:44) Batho bao ba ne ba itsetsepetse bokhopong ho tšoana le Satane. Ha baa ka ba bakela seo ba se entseng, empa ba ile ba satalatsa melala le ho feta litseleng tsa bona tse khopo.a Ke ’nete hore esita le Bakreste ba ’nete ka linako tse ling ba etsa libe tse tebileng, ka lebaka la ho se phethahale le ho ba le mefokolo. Empa liphoso tseo ba li etsang ha li bontše hore ke batho ba khopo pelong.—Bagalata 6:1.

O Ile a Bontša Mohau ho Isa Lefung

Jehova ha a hlokomele sebe feela empa o bona le tsela eo moetsalibe a ikutloang ka eona. (Esaia 1:16-19) Ak’u nahane ho se hokae ka banna ba babeli ba linokoane ba neng ba khokhothetsoe thupeng haufi le Jesu. Kamoo ho bonahalang kateng, ka bobeli ba ne ba entse liketso tse tebileng tsa tlōlo ea molao, kaha e mong oa bona o ile a lumela a re: “Re amohela ka botlalo se re tšoanelang bakeng sa lintho tseo re ileng ra li etsa; empa monna enoa [Jesu] ha aa ka a etsa letho le tsoileng tseleng.” Mantsoe a builoeng ke monna eo a bontša hore o ne a tseba ho itseng ka Jesu. E ka ’na eaba tsebo eo e ile ea mo thusa hore a fetole boikutlo ba hae. Sena se bontšoa ke mantsoe a latelang ao a ileng a a bua, khetlong lena a kōpa Jesu ka tieo, a re: “U nkhopole ha u kena ’musong oa hao.” Kreste o ile a mo arabela joang ha a etsa boipiletso boo bo matla? O ile a re: “Kannete kea u bolella kajeno, U tla ba le ’na Paradeiseng.”—Luka 23:41-43.

Ak’u nahane ka seo: Mantsoe a ho qetela a Jesu e le motho oa nama a kenyelletsa pontšo ea mohau ho motho ea neng a lumetse hore o tšoaneloa ke kahlolo ea lefu. Ruri seo ke se khothatsang! Ka hona, re ka kholiseha hore Jesu Kreste le Jehova, Ntate oa hae, ba tla qenehela bohle ba bontšang pako ea sebele, ho sa tsotelehe lintho tseo ba li entseng nakong e fetileng.—Baroma 4:7.

[Mongolo o botlaaseng ba leqephe]

NA U KILE UA IPOTSA?

◼ U ka hlalosa mohau oa Molimo joang?—Pesaleme ea 103:12-14; 130:3, 4.

◼ Motho o lokela ho nka mehato efe e le hore Molimo a ka mo hauhela?—Johanne 17:3; Liketso 3:19.

◼ Jesu o ile a tšepisa senokoane se neng se khokhothetsoe thupeng eng?—Luka 23:43.

[Setšoantšo se leqepheng la 10]

Jesu o ile a bontša hore libe tse tebileng li ka tšoareloa