Na Mali a Hlahlobetsoeng HIV a Sireletsehile?

KA MONGOLI OA TSOHA! NIGERIA

◼ Ho ile ha botsoa potso ena Nigeria ha ho ne ho fumanoa hore lesea la ngoananyana le ne le tšoaelitsoe kokoana-hloko ea HIV ha le ne le tšeloa mali sepetleleng se seng sa tse hlaheletseng Nigeria.

Ho ea ka mookameli oa tsa bongaka sepetleleng seo, hang ka mor’a hore Eniola a hlahe, ho ile ha fumanoa hore o tšoeroe ke boloetse ba nyooko bo bitsoang jaundice. Lingaka li ile tsa re mali a hae a lokela ho ntšoa ’meleng ’me a tšeloe a mang eaba ntate oa hae o fana ka mali. Empa mali a hae le a ntate oa hae e ne e se a sehlopha se le seng, ka hona o ile a tšeloa a tsoang bankeng ea mali ea sepetlele. Nakoana ka mor’a moo, lesea leo le ile la fumanoa le e-na le kokoana-hloko ea HIV, le hoja batsoali ka bobeli ba se na tšoaetso. Ho ea ka ba sepetlele, “mali a neng a tšetsoe leseeng leo a ne a ile a hlahlojoa ’me ha fumanoa hore ha a na kokoana-hloko ea HIV nakong eo a neng a fuoa lesea.”

Joale ho tlile joang hore lesea leo le be le tšoaetso? ’Muso oa Nigeria o ile oa fuputsa taba ena ’me oa etsa qeto ea hore e ka ’na eaba ngoana o fumane tšoaetso ha a ne a tšeloa mali. Koranta ea Nigerian Tribune e ile ea qotsa setsebi sa likokoana-hloko, ha se re: “Nakong eo mofani a neng a fana ka mali, o ne a le boemong boo tšoaetso ea HIV e e-song ho bonahale maling.”

Le hoja sena se sa etsahale kamehla, se totobatsa taba ea hore tšelo ea mali e kotsi. Litsi tsa Taolo le Thibelo ea Mafu, United States, li hlalosa nako eo tšoaetso ea HIV e e-song ho bonahale maling tjena: “Ho ka nka nako e itseng pele tsamaiso ea ’mele ea ho itšireletsa mafung e hlahisa masole a ’mele a lekaneng ho bontša hore ho na le kokoana-hloko nakong eo ho etsoang litlhahlobo, ’me batho baa fapana. Ka tloaelo ho thoe nako ena ke eo tšoaetso e e-song ho bonahale maling. Batho ba bangata ba nka libeke tse peli ho isa ho tse robeli hore ba be le masole a ’mele a ka bontšang hore ho na le kokoana-hloko (ka karolelano ba nka matsatsi a 25). Leha ho le joalo, batho ba bang ba ka ’na ba nka nako e teletsana ho feta eo pele ba hlahisa masole a ’mele a ka bontšang hore ba na le kokoana-hloko. . . . Maemong a sa tloaelehang haholo, motho a ka ba a nka likhoeli tse tšeletseng.”

Kahoo, taba ea hore mali a ile a hlahlojoa ho bona hore ha a na HIV ha e bolele hore a sireletsehile. Mokhatlo oa AIDS oa San Francisco oa lemosa: “Le hoja kokoana-hloko ea HIV e ka ’na ea se ke ea fumanoa ha ho etsoa litlhahlobo nakong eo tšoaetso ea HIV e e-song ho bonahale maling, e ka fetela ho motho e mong nakong eona eo. Ha e le hantle, batho ba tšoaetsa ba bang haholo nakong ena (e leng nakoana ka mor’a hore ba fumane tšoaetso ea HIV).”

Ke khale Lipaki Tsa Jehova li latela tataiso ea Bibele ea hore li “ile . . . mali.” (Liketso 15:29) Tšireletso eo li e fumanang e hatisa bohlokoa ba ho mamela litaelo tsa Molimo. Ho ithuta ka ho eketsehileng ka mekhoa e meng e ka sebelisoang ho e-na le ho tšela motho mali, ka kōpo bona bukana ea Mali a ka Boloka Bophelo ba Hao Joang?a

[Mongolo o botlaaseng ba leqephe]