Lepheo la Leruarua le Bitsoang Humpback

LERUARUA le hōlileng la humpback le leholo ebile le boima ho feta teraka e tletseng thepa. Leha ho le joalo, phoofolo ena e khōlōhali e thinya kapele ka tsela e hlollang ha e qoela ka metsing. Leruarua lee le khona joang ho tsamaisa ’mele oa lona kapele hakaale? Ntho e ’ngoe e le thusang, ke mapheo a lona a makukuno.

Ak’u nahane: Maruarua a mangata le liphoofolo tse ling tsa metsing a na le mapheo a boreleli. Leha ho le joalo, leruarua lena lona le fapane. Le na le makukuno a maholo karolong e ka pele ea mapheo a lona. Ha le sesa, metsi a phalla holim’a makukuno a lona ebe a etsa maqhubu a mangata. Makukuno ana a etsa hore metsi a loebehlane. Ho loebehlana hona ho nolofalletsa leruarua ho nyoloha habonolo ka metsing le ho le lumella ho koba mapheo a lona haholo le sa eme. Ha le phukalalitse mapheo, makukuno ana a boetse a fokotsa boima ba metsi, ’me sena se thusa mapheo a lona a malelele ao le leng le le leng la ’ona le ka bang bolelele ba karolo ea boraro ea ’mele oa lona.

Bafuputsi ba leka ho kopitsa mokhoa ona oa leruarua e le hore ba ntlafatse masokoana a liketsoana, mahare a mechine e fehlang metsi, maloala a tsamaisoang ka moea le mahare a mechine e tsamaisang lihelikopthara.

U nahana’ng ka see? Na lepheo la leruarua la humpback le bile teng ka ho iphetola ha lintho? Kapa na le entsoe?