Ho ba le Metsoalle le Malapa a Thabileng
Batho ba bangata ba thatafalloa ke ho ba le litšebelisano tse ntle le ba malapa a bona le metsoalle. U tl’o bona melao-motheo ea Bibele e ka u thusang hore u sebelisane hantle le batho ba bang.
U SE KE OA INAHANA BOUENA
MOLAO-MOTHEO: “Le sa hlokomele lithahasello tsa litaba tsa lona feela, empa hape le hlokomela lithahasello tsa ba bang.”—Bafilipi 2:4.
HO BOLELOA’NG? Re tla ba le metsoalle ea ’nete haeba re thusa batho ba bang ka pelo eohle re sa lebella hore ba re buseletse. Haeba u inahana bouena u ke ke oa ba le metsoalle ea ’nete. Mohlala, motho ea ikhohomosang a ka qetella a tsoile molekane oa hae tlaase. Hape ha ho na motho ea batlang ho ba motsoalle oa motho ea lulang a ikotla sefuba ka lintho tseo a li tsebang kapa tseo a nang le tsona. Buka ea The Road to Character e re: “Hangata batho ba ikhohomosang ba qetella ba e-na le mathata a mangata.”
U KA ETSA’NG?
Thusa ba bang. Metsoalle ea ’nete ea thusana ebile ea tšepana. Lipatlisiso li bontša hore ha ngata ha motho a sa thuse ba bang a ka ba le khatello ea maikutlo kapa a lula a ikhalala.
Utloela batho ba bang bohloko. U ka bontša hore u utloela batho bohloko ka ho ikenya lieteng tsa bona. Ho etsa joalo ho tla u thusa hore u se ke oa ba soma, oa bua mantsoe a hlabang kapa oa soasoa ka tsela e utloisang bohloko.
Ha u utloela batho ba bang bohloko u tla khona ho ba mamella. Hape ha u na ho ba khetholla ebile u tla ba le metsoalle e fapaneng e tsoang litsong tse sa tšoaneng.
Iphe nako ea batho ba bang. U tla tseba batho haholoanyane haeba feela u qeta nako e ngata u e-na le bona. E tla ba metsoalle ea hao ea ’nete haeba u qoqa le batho ka lintho tse ba amang, tseo ba li nkang li le bohlokoa. Hape u be tsebe-thoe-thoe ha ba bua. U bontše hore u feela u amehile ka bona. Lipatlisiso tse entsoeng morao tjena li bontša hore “ho qoqa ka lintho tse hahang hoa thabisa.”
KHETHA METSOALLE KA BOHLALE
MOLAO-MOTHEO: “Litloaelano tse mpe li senya mekhoa e metle.”—1 Bakorinthe 15:33.
HO BOLELOA’NG? Batho bao u qetang nako e ngata u na le bona ba ka u susumetsa hantle kapa hampe. Litsebi li bontša hore hangata liqeto tseo motho a li etsang li susumetsoa ke metsoalle. Mohlala, ha u tloaelane le batho ba tsubang kapa ba hlalaneng u ka ’na oa utloa eka le uena u se u batla ho tsuba kapa ho hlala molekane oa hao.
U KA ETSA’NG? Khetha metsoalle e nang le makhabane ao u a ratang le ao u batlang ho ba le ’ona. Mohlala, u ka khetha batho ba bohlale, ba hlomphang, ba fanang le ba ratang batho.
MELAO-MOTHEO E MENG
Shebella livideo tse buang ka Bibele tse ka thusang banyalani, bacha le bana hore ba thabe ho jw.org/st.
U SE KE OA HLABA BA BANG KA MANTSOE.
“Ho na le ea buang a sa nahane joalokaha eka ke ka ho hlaba ha sabole.”—LIPROVERBIA 12:18.
E-BA SEATLA SE BULEHILENG.
‘Ea fanang ka seatla se bulehileng o tla nona.’—LIPROVERBIA 11:25.
TŠOARA BATHO BA BANG KA TSELA EO U BATLANG HORE LE UENA BA U TŠOARE KA EONA.
“Lintho tsohle . . . tseo le batlang hore batho ba le etse tsona, le lona ka ho tšoanang le ba etse tsona.”—MATHEU 7:12.