NA BATHO BA TLA SENYA LEFATŠE KA HO FELETSENG?
METSI A HLOEKILENG
HA HO letho le neng le ka khona ho phela lefatšeng ha ho ne ho se na metsi, haholo-holo metsi a hloekileng. Ha e le hantle karolo e kholo ea lintho tse phelang e entsoe ka metsi. Metsi a tsoang matamong, linokeng, mekhoabong le metsi a chekiloeng fatše a nooa ke batho le liphoofolo ebile batho ba nosetsa lijalo ka ’ona.
Metsi a Ntse a Silafala
Karolo e kholo ea lefatše e tletse metsi. Leha ho le joalo, World Meteorological Organization e re: “Metsi a hloekileng le a ka nooang ke a manyenyane haholo, ke liphesente tse 0.5 feela.” Le hoja ho utloahala eka metsi ana a manyenyane, a ka khona ho thusa lintho tsohle tse phelang lefatšeng. Bothata ke hore boholo ba ona a ntse a silafala ebile ho ntse ho e-ba thata hore a fumanehe hobane lintho tse phelang tse hlokang metsi a hloekileng, lia eketseha hape batho ba ntse ba tsoela-pele ho senya lefatše. Sena se etsa hore metsi a hloekileng a sokolehe le ho feta. Litsebi li hakanya hore ka mor’a lilemo tse 30, batho ba ka bang libilione tse hlano ba tla sokola metsi a hloekileng.
Lefatše le Etselitsoe ho Lula le le Teng
Lefatše le etselitsoe ho lula le e-na le metsi. Lintho tse kang mobu, liphoofolo tse phelang ka metsing le khanya ea letsatsi li sebelisana ’moho ho hloekisa metsi. Nahana ka mehlala e latelang:
Mobu o ka hloekisa metsi. Libakeng tse mokhoabo, ho na le limela tse tlosang lintho tse kotsi metsing, tse kang nitrogen le phosphorus tse sa hlokahaleng hammoho le chefu e bolaeang likokoanyana lijalong.
Bo-rasaense ba ithutile hore na metsi a itlhoekisa joang. Ba hlokometse hore ha litšila li kopana le metsi a phallang, ho na le likokoana tse jang litšila tseo.
Ho na le liphoofolo tse nang le li-shell [likhetla] tse fumanehang metsing a hloekileng tse bitsoang li-clam le li-mussel. Liphoofolo tsena li ka khona ho tlosa lik’hemik’hale tse kotsi metsing ho feta mechine e entsoeng ke batho.
Potoloho ea metsi e thusa hore a lule a le teng lefatšeng. Haeba ho ne ho se na potoloho ena ea metsi le lintho tse ling tse thusang hore metsi a lule a le teng, a ne a tla fela.
Ho Etsoa’ng Hore ho Lule ho E-na le Metsi a Hloekileng?
Haeba re lokisa likoloi hore li se ke tsa qhala oli, re bile re lahla lintho tse kotsi ka tsela e nepahetseng, sena se tla thusa hore ho lule ho e-na le metsi a hloekileng
Litsebi li re khothaletsa ho sebelisa metsi hantle. Li khothaletsa hore likoloi li lokisoe hore li se ke tsa qhala oli le hore meriana e se ke ea lahleloa ka matloaneng kapa ha qhalloa lintho tse chefo ka metsing a tsamaisoang ka liphaephe hore metsi a lule a hloekile.
Lienjiniere li fumane mekhoa e mecha ea ho tlosa letsoai metsing a leoatle. Morero oa bona ke ho etsa hore ho be le metsi a mangata a hloekileng.
Leha ho le joalo, lintho tsena ha lia lekana. Ho tlosa letsoai metsing a leoatle ha ho rarolle bothata ka ho feletseng hobane ho hloka chelete le motlakase o mongata. Mokhatlo oa Machaba a Kopaneng ha o bua ka ho boloka metsi a hloekileng tlalehong e ’ngoe e ileng ea etsoa ka 2021, o ile oa re: “Lefatšeng ho hlokahala boiteko bo eketsehileng ho feta bo ntseng bo etsoa hona joale ho boloka metsi.”
Bibele e Fana ka Tšepo Efe?
“Molimo . . . o hulela marotholi a metsi holimo ebe marotholi ao a fetoha maru. Ka mor’a moo, pula ea na. E nesetsoa batho.”—Jobo 36:26-28.
Molimo o entse hore ho be le potoloho ea metsi e le hore a se ke a fela lefatšeng.—Moeklesia 1:7.
Nahana ka sena: Haeba ’Mopi o entse lefatše le e-na le bokhoni ba ho boloka metsi a hloekile, na ha se ho utloahalang ho lumela hore o na le matla ebile o ikemiselitse ho lokisa mathata a bakiloeng ke batho? Sheba sehlooho se reng: “Molimo o Tšepisa Hore Lefatše le Tla Lula le le Teng” leqepheng la 15.