Joshua e ba Moeta-pele

MOSHE o batla ho kena Kanana le Baiseraele. Kahoo oa kōpa o re: ‘Jehova, ntumelle hore ke tšele Nōka ea Jordane ’me ke bone naha e ntle.’ Empa Jehova o re: ‘Ho lekane! U se hlole u bua joalo!’ Na u tseba lebaka leo Jehova a neng a bua joalo ka lona?

Ke ka lebaka la se etsahetseng ha Moshe a otla lefika. Hopola hore eena le Arone ha baa ka ba hlompha Jehova. Ha baa ka ba bolella batho hore ke Jehova ea neng a ntšitse metsi lefikeng. Ka lebaka leo, Jehova o ile a re ba ke ke ba kena Kanana.

Kahoo likhoelinyana ka mor’a hore Arone a shoe, Jehova o re ho Moshe: ‘Nka Joshua, u mo hlahise ka pel’a moprista Eleazare le sechaba. ’Me ka pel’a bona bohle, u ba bolelle hore Joshua ke moeta-pele e mocha.’ Moshe o etsa kamoo Jehova a bolelang kateng, joalokaha u bona setšoantšong mona.

Joale Jehova o re ho Joshua: ‘U be matla, u se ke ua tšaba. U tla kenya Baiseraele naheng ea Kanana eo ke ba tšepisitseng eona, ’me ke tla ba le uena.’

Hamorao Jehova o re Moshe a hloelle tlhōrōng ea Thaba ea Nebo naheng ea Moabe. Ha a le moo, Moshe o khona ho bona ka mose ho Nōka ea Jordane ’me o bona naha e ntle ea Kanana. Jehova o re: ‘Ke eona naha eo ke tšepisitseng ho e neha bana ba Abrahama, Isaka le Jakobo. Ke u lumeletse ho e bona, empa nke ke ka u lumella ho kena ho eona.’

Moshe o shoella hona moo tlhōrōng ea Thaba ea Nebo. O ne a le lilemo li 120. O ne a ntse a le matla, le mahlo a hae a ntse a bona hantle. Batho ba utloile bohloko haholo ’me baa lla hobane Moshe o shoele. Empa ba thabile hore ebe Joshua ke moeta-pele oa bona e mocha.