Thuto ea 8

Lira Tsa Molimo ke Bo-mang?

Sera se seholo sa Molimo ke Satane Diabolose. Ke sebōpuoa sa moea se ileng sa fetohela Jehova. Satane o ntse a tsoela pele ho loantša Molimo le ho bakela batho khathatso e khōlō. Satane o khopo. O leshano ebile ke ’molai.—Johanne 8:44.

Libōpuoa tse ling tsa moea li ile tsa ikopanya le Satane ha a fetohela Molimo. Bibele e li bitsa bademona. Joaloka Satane, bademona ke lira tsa batho. Ba rata ho ntša batho kotsi. (Matheu 9:32, 33; 12:22) Jehova o tla timetsa Satane le bademona ba hae ka ho sa feleng. Ba saletsoe ke nako e khutšoanyane feela ea hore ba khathatse batho.—Tšenolo 12:12.

Haeba u batla ho ba motsoalle oa Molimo, ha ua lokela ho etsa seo Satane a batlang ha u se etsa. Satane le bademona ba hloile Jehova. Ke lira tsa Molimo, ’me ba batla ho u etsa sera sa Molimo. U lokela ho khetha eo u batlang ho mo khahlisa—Satane kapa Jehova. Haeba u batla bophelo bo sa feleng, u lokela ho khetha ho etsa thato ea Molimo. Satane o na le maqiti a mangata le litsela tse ngata tsa ho thetsa batho. Batho ba bangata ba thetsoa ke eena.—Tšenolo 12:9.