Thuto ea 10
Tsela ea ho Fumana Bolumeli ba ’Nete
Haeba u batla ho ba motsoalle oa Molimo, u lokela ho sebelisa bolumeli boo Molimo a bo amohelang. Jesu o itse “barapeli ba ’nete” ba ne ba tla rapela Molimo ba iphaphathile le “’nete.” (Johanne 4:23, 24) Ho na le tsela e le ’ngoe feela e nepahetseng ea ho rapela Molimo. (Baefese 4:4-6) Bolumeli ba ’nete bo isa bophelong bo sa feleng, bolumeli ba bohata bo isa timelong.—Matheu 7:13, 14.
U ka lemoha bolumeli ba ’nete ka ho shebella batho ba bo sebelisang. Kaha Jehova o molemo, bao e leng barapeli ba hae ba ’nete e lokela ho ba batho ba molemo. Feela joalokaha sefate se setle sa lilamunu se beha lilamunu tse ntle, bolumeli ba ’nete le bona bo hlahisa batho ba molemo.—Matheu 7:15-20.
Metsoalle ea Jehova e hlompha Bibele ka botebo. Ea tseba hore Bibele e tsoa ho Molimo. E lumella seo e se buang hore se tsamaise bophelo ba eona, se rarolle mathata a eona le ho e thusa ho ithuta ka Molimo. (2 Timothea 3:16) E leka ho sebelisa seo e se rutang.
Metsoalle ea Jehova e bontša hore ea ratana. Jesu o bontšitse hore o rata batho ka ho ba ruta ka Molimo le ka ho phekola ba neng ba kula. Ba sebelisang bolumeli ba ’nete le bona ba bontša ba bang hore baa ba rata. Joaloka Jesu, ha ba khese mafutsana kapa batho ba merabe esele. Jesu o itse batho ba ne ba tla tseba barutuoa ba hae ka lerato leo ba le bontšanang.—Johanne 13:35.
Metsoalle ea Molimo e hlompha lebitso la Molimo, Jehova. Haeba motho a ne a ka hana ho sebelisa lebitso la hao, na motho eo e ne e tla ba motsoalle oa hao e moholo? Le hanyenyane! Ha re e-na le motsoalle, re sebelisa lebitso la hae ’me re mo bua hantle ho batho ba bang. Kahoo, ba lakatsang ho ba metsoalle ea Molimo ba lokela ho sebelisa lebitso la hae le ho bua ka eena ho batho ba bang. Jehova o batla hore re etse seo.—Matheu 6:9; Baroma 10:13, 14.
Joaloka Jesu, metsoalle ea Molimo e ruta batho ka ’Muso oa Molimo. ’Muso oa Molimo ke puso ea leholimo e tla etsa lefatše lena paradeise. Metsoalle ea Molimo e abela ba bang litaba tsena tse molemo tsa ’Muso oa Molimo.—Matheu 24:14.
Lipaki tsa Jehova li leka ho ba metsoalle ea Molimo. Li hlompha Bibele ’me lia ratana. Li boetse li sebelisa lebitso la Molimo ebile lia le hlompha ’me li ruta ba bang ka ’Muso oa Molimo. Lefatšeng kajeno, Lipaki tsa Jehova li sebelisa bolumeli ba ’nete.