Mokhoa oa ho Etsa Lipatlisiso
MORENA SOLOMONE o ile a “nahanisisa le ho hlahlobisisa, e le hore a ka hlophisa maele a mangata ka tatellano.” Hobane’ng? Hobane o ne a thahasella ho ngola “mantsoe a nepahetseng a ’nete.” (Moek. 12:9, 10) Luka ‘o ile a sala lintho tsohle morao ho tloha qalong ka ho nepahala’ e le hore a ka pheta ka tatellano e hlophisehileng liketsahalo tsa bophelo ba Kreste. (Luka 1:3) Bahlanka bana ba Molimo ka bobeli ba ne ba etsa lipatlisiso.
Patlisiso ke eng? Ke ho phenyekolla ka hloko boitsebiso bo mabapi le taba e itseng. Ho akarelletsa ho bala ’me ho hloka hore ho sebelisoe melao-motheo ea ho ithuta. Hape ho ka ’na ha akarelletsa ho buisana le batho ka lipotso.
Ke maemo afe a hlokang ho etsa lipatlisiso? Mehlala e ’maloa ke ena. Thuto ea hao ea boinotšing kapa ’malo oa Bibele o ka ’na oa hlahisa lipotso tsa bohlokoa ho uena. Motho eo u mo pakelang a ka ’na a botsa potso eo u ka lakatsang ho fumana boitsebiso bo tobileng ka eona hore u tsebe ho mo araba. Mohlomong u abetsoe ho fana ka puo.
Nahana ka kabelo eo ea ho fana ka puo. Boitsebiso boo u kōpiloeng ho bo akaretsa bo ka ’na ba bonahala e le bo tloaelehileng feela. U ka etsa joang hore bo sebetse sebakeng sa heno? Bo hōlise ka ho etsa lipatlisiso. Ha ntlha e neng e ka bonahala e sa re letho e tšehelitsoe ke lipalo-palo tse itseng kapa mohlala o itseng o tšoanelang boitsebiso ba hao le o amang bophelo ba bamameli ba hao, e fetoha e rutang, esita le e susumetsang. E ka ’na eaba boitsebiso bo hatisitsoeng boo u sebetsang ka bona bo lokiselitsoe babali lefatšeng lohle, empa u lokela ho bo hōlisa, le ho bo etsetsa lipapiso le ho etsa hore lintlha li sebetse phuthehong e le ’ngoe kapa ho motho a le mong. U lokela ho qala hokae?
Pele u potlakela ho batla boitsebiso, nahana ka bamameli ba hao. Ke eng seo ba seng ba se tseba? Ba batla ho tseba eng? Joale tseba pakane ea hao. Na ke ho hlalosa? ho kholisa? ho hanyetsa? kapa ho susumetsa? Ho hlalosa ho hloka hore u fane ka boitsebiso bo eketsehileng bakeng sa ho hlakisa taba. Le hoja ho ka etsahala hore ebe lintlha tsa motheo lia utloahala, ho ka ’na ha hlokahala hore u qaqise hore na se boletsoeng se ka etsoa neng kapa joang. Ho kholisa ho hloka hore u fane ka mabaka a bontšang hore na ke hobane’ng ha ntho e le joalo, ho akarelletsa le ho fana ka bopaki. Ho hanyetsa ho hloka hore u tsebe hantle mahlakore ka bobeli a taba hammoho le ho hlahlobisisa bopaki bo sebelisitsoeng. Ho hlakile hore ha re batle ho fana ka mabaka a matla feela empa re batla le litsela tsa ho hlahisa linnete tseo ka mokhoa o bonolo. Ho susumetsa ho akarelletsa ho finyella pelo. Ho bolela ho hlohlelletsa bamameli ba hao le ho hōlisa takatso ea bona ea ho sebelisa seo ho ntseng ho buisanoa ka sona. Mehlala ea sebele ea ba nkileng bohato bo joalo, ho sa tsotellehe mathata, e ka thusa ho finyella pelo.
Na u se u loketse ho qala? Che. Nahana ka hore na u hloka boitsebiso bo bokae. Nako e ka ’na ea e-ba ntlha ea bohlokoa. Haeba u il’o nehelana ka boitsebiso boo ho ba bang, u tla ba le nako e kae ea ho etsa hoo? Metsotso e mehlano? Metsotso e 45? Na ke nako e sa fetoheng, joaloka sebokeng sa phutheho, kapa na ea feto-fetoha, joaloka thutong ea Bibele kapa leetong la bolisa?
Qetellong, u na le lithulusi life tsa ho etsa lipatlisiso? Ho phaella ho tseo u nang le tsona lapeng, na ho na le tse ling laebraring ea Holo ea lōna ea ’Muso? Na barab’abo rōna bao e seng e le lilemo ba sebeletsa Jehova ba ka u lumella hore u sebelise lithulusi tsa bona tsa ho etsa lipatlisiso? Na sebakeng sa heno ho na le laebrari ea sechaba e nang le libuka tseo u ka li sebelisang haeba ho hlokahala?
Ho Sebelisa Thulusi ea Rōna e ka Sehloohong ea ho Etsa Lipatlisiso—Bibele
Haeba mosebetsi oa hao oa ho etsa lipatlisiso o akarelletsa ho fumana tlhaloso ea lengolo le itseng, qala ka Bibele ka boeona.
Hlahloba Litemana Tse Potolohileng Taba. Ipotse: ‘Temana ee e ne e lebisitsoe ho bo-mang? Litemana tse potolohileng taba eo li bontša’ng ka maemo a lebisitseng polelong eo kapa ka boikutlo ba batho ba amehang?’ Hangata boitsebiso bo joalo bo ka re thusa ho utloisisa temana ’me bo ka phelisa puo eo u ka ’nang ua sebelisa boitsebiso boo ho eona.
Ka mohlala, hangata ho qotsoa Baheberu 4:12 ho bontša matla a Lentsoe la Molimo a ho ama lipelo le ho susumetsa bophelo ba batho. Litemana tse potolohileng taba eo li eketsa kutloisiso ea rōna mabapi le bonnete ba seo. Li bua ka lintho tse ileng tsa etsahalla Baiseraele lilemong tse 40 lefeelleng pele ba kena naheng eo Jehova a neng a e tšepisitse Abrahama. (Baheb. 3:7–4:13) “Lentsoe la Molimo,” e leng tšepiso ea hae ea ho ba kenya phomolong tumellanong le selekane seo a se entseng le Abrahama, le ne le sa shoa; le ne le phela ’me le le haufi le ho phethahala. Baiseraele ba ne ba e-na le mabaka ’ohle a ho le lumela. Leha ho le joalo, ha Jehova a ne a ba tataisa ho tloha Egepeta ho ea Thabeng ea Sinai le ho ea Naheng e Tšepisitsoeng, ka makhetlo ba ile ba bontša ho hloka tumelo. Ka hona, karabelo ea bona mabapi le kamoo Molimo a neng a phethahalitse lentsoe la hae kateng, e ile ea senola se neng se le ka lipelong tsa bona. Ka ho tšoanang le mehleng ea rōna, lentsoe la Molimo la tšepiso le senola se ka lipelong tsa batho.
Hlahloba Litšupiso Tse Amanang. Libibele tse ling li na le litšupiso tse amanang. Na ea hao e na le tsona? Haeba e na le tsona, li ka u thusa. Bona mohlala oa sena ho Phetolelo ea Lefatše le Lecha ea Mangolo a Halalelang. Petrose oa Pele 3:6 e bua ka Sara e le mohlala oo basali ba Bakreste ba lokelang ho o etsisa. Tšupiso e amanang le eona ke Genese 18:12 e tšehetsang taba eo ka ho bolela hore Sara o ile a bitsa Abrahama morena “ka pelong.” Ka hona, boikokobetso ba hae bo ne bo tsoa pelong. Ho phaella lithusong tse joalo tse fanang ka kutloisiso, litšupiso tse amanang li ka u lebisa litemaneng tse bontšang ho phethahala ha boprofeta ba Bibele kapa mohlala oa selekane sa Molao. Leha ho le joalo, u hopole hore litšupiso tse ling tse amanang ha lia etsetsoa ho fana ka litlhaloso tse joalo. Li ka ’na tsa bua feela ka likhopolo tse tšoanang kapa ka boitsebiso ba histori ea bophelo ba batho kapa ba libaka.
Etsa Lipatlisiso ka K’honk’hodense ea Bibele. K’honk’hodense ea Bibele ke index ea mantsoe a latellanang ka litlhaku tsa alfabeta a sebelisitsoeng ka Bibeleng. E ka u thusa ho fumana mangolo a amanang le taba eo u etsang lipatlisiso ka eona. Ha u ntse u a hlahloba, u tla ithuta lintlha tse ling tse molemo. U tla bona bopaki ba “mohlala” oa ’nete e boletsoeng ka Lentsoeng la Molimo. (2 Tim. 1:13) Phetolelo ea Lefatše le Lecha e fupere lethathamo la motheo la “Tlhahlamano ea Mantsoe a Bibele.” Comprehensive Concordance e pharaletse haholo ho e feta. Haeba e le teng ka puo ea hao, e tla u lebisa litemaneng tsohle tse nang le lentsoe ka leng la sehlooho le leng ka Bibeleng.
Ho Ithuta ho Sebelisa Lithulusi Tse Ling Tsa ho Etsa Lipatlisiso
Lebokose le leqepheng la 33 le thathamisa lithulusi tse ling tse ’maloa tsa ho etsa lipatlisiso tse lokiselitsoeng ke “lekhoba le tšepahalang le le masene.” (Mat. 24:45-47) Bongata ba tsona bo na le lethathamo la tse ka hare ’me tse ngata li na le index karolong e ka morao, e etselitsoeng ho u thusa ho qoolla boitsebiso bo tobileng ba bohlokoa. Bofelong ba selemo ka seng, ho hatisoa li-index tsa lihlooho ho Molula-Qhooa le ho Tsoha! tse tsoang pokellong ea lihlooho tsa selemo seo.
Ho tloaelana le mofuta oa boitsebiso o fanoang likhatisong tsena tsa ho ithuta Bibele ho ka potlakisa mokhoa oa ho etsa lipatlisiso. Ka mohlala, ha re re u batla ho tseba ka boprofeta, thuto ea motheo, boitšoaro ba Bokreste kapa tšebeliso ea melao-motheo ea Bibele. Ho ka etsahala hore Molula-Qhooa o be le seo u se batlang. Tsoha! e bua ka liketsahalo tsa hona joale, mathata a mehla ea kajeno, bolumeli, saense le batho ba linaha tse sa tšoaneng. Litlhaloso mabapi le tlaleho ka ’ngoe ea Likosepele ka tatellano ea liketsahalo li hlaha ho Motho e Moholo ka ho Fetisisa ea Kileng a Phela. Puisano ea temana ka temana ea libuka tsa Bibele kaofela e fumanoa libukeng tse kang Tšenolo—Tlhōrō ea Eona e Hlollang ka Botle e Haufi!, Ela Hloko Boprofeta ba Daniele!, le meqolo e ’meli ea Boprofeta ba Esaia—Leseli Molokong Oohle oa Batho. Bukeng ea Ho Bea Mabaka ka Mangolo, u tla fumana likarabo tse khotsofatsang lipotsong tsa Bibele tse makholo-kholo tseo batho ba tloaetseng ho li botsa tšebeletsong ea tšimo. Hore u be le kutloisiso e hlakileng ka malumeli a mang, lithuto tsa ’ona le limelo tsa ’ona tsa histori, sheba buka ea Moloko oa Batho o Batla Molimo. Tlaleho e feletseng ea histori ea mehla ea kajeno ea Lipaki tsa Jehova e fuperoe ke buka ea Lipaki tsa Jehova—Baboleli ba ’Muso oa Molimo. Bakeng sa tlaleho ea se etsahalang hona joale boboleling ba lefatše lohle ba litaba tse molemo, hlahloba Buka ea Selemo ea Lipaki Tsa Jehova ea morao-rao. Insight on the Scriptures ke encyclopedia ea Bibele le atlelase. Ena ke thuso e ntle haholo haeba u batla boitsebiso mabapi le batho, libaka, lintho, lipuo, kapa liketsahalo tsa histori tse amanang le Bibele.
“Watch Tower Publications Index.” Index ena, e hatisoang ka lipuo tse fetang 20, e tla u lebisa boitsebisong bo leng likhatisong tsa rōna tse sa tšoaneng. E arotsoe hore e be le index ea lihlooho le index ea mangolo. Bakeng sa ho sebelisa index ea lihlooho, batla lentsoe le emelang taba eo u batlang ho e batlisisa. Bakeng sa ho sebelisa index ea mangolo, batla lengolo leo u batlang ho le utloisisa hamolemonyana lethathamong la mangolo. Haeba ho na le boitsebiso bo ileng ba hatisoa ka taba eo kapa ka lengolo leo ka puo ea hao lilemong tse akaretsoang ke Index eo, u tla fumana lethathamo la litšupiso tseo u ka li shebang. Sebelisa thuso e maqepheng a pele a Index ho utloisisa likhutsufatso tsa mabitso a likhatiso tse bontšitsoeng. (Ka mohlala, ka thuso eo u tla hlokomela hore w99 3/1 15 e bolela Molula-Qhooa oa 1999, tokollo ea March 1, leqepheng la 15. Ha u bona tšupiso e e-na le “SU,” seo se bolela hore khatiso eo ea fumaneha ka Sesotho.) Lihlooho tse khōlō, tse kang “Field Ministry Experiences” le “Life Stories of Jehovah’s Witnesses” li ka thusa ha u lokisetsa linehelano tse susumetsang bakeng sa phutheho.
Kaha ho etsa lipatlisiso ho ka hapa tlhokomelo ea hao haholo, e-ba seli hore mohopolo oa hao o se ke oa faposoa. Lula u lebisitse tlhokomelo ea hao pakaneng ea hao ea ho batla boitsebiso bo hlokahalang bakeng sa mosebetsi oo u o etsang. Haeba Index e u lebisa mohloling o itseng, phetla (ma)leqepheng le bontšitsoeng, ebe u sebelisa lihloohoana le mela ea pele ea lirapa hore e u tataise ho fihla boitsebisong bo lumellanang le seo u se hlokang. Haeba u batla tlhaloso bakeng sa temana e itseng ea Bibele, fumana tšupiso ea eona pele leqepheng leo u supisitsoeng ho lona. Ebe u hlahloba litlhaloso tse potolohileng taba eo.
“Watchtower Library” e ho CD-ROM. Haeba u sebelisa k’homphieutha, u ka rua molemo ka ho sebelisa Watchtower Library e ho CD-ROM, e nang le pokello e khōlō ea likhatiso tsa rōna. Lenaneo leo ho leng bonolo ho le sebelisa la ho batla boitsebiso le u thusa ho batla lentsoe, kapa mantsoe a sa tšoaneng, kapa lengolo likhatisong leha e le life tse ho Watchtower Library. Esita leha thulusi ena ea ho etsa lipatlisiso e le sieo ka puo ea hao, u ka rua molemo ho eona ka puo ea machaba e sebelisoang haholo eo u e tloaetseng.
Likhatiso Tse Ling Tsa Puso ea Molimo
Lengolong la hae la bobeli le bululetsoeng le eang ho Timothea, Pauluse o ile a kōpa mohlankana eo hore a mo tlisetse “meqolo, haholo-holo matlalo a ho ngolla,” Roma. (2 Tim. 4:13) Pauluse o ne a ananela lingoliloeng tse itseng ’me o ile a li boloka. Le uena u ka etsa joalo. Na u boloka likopi tsa hao tsa Molula-Qhooa, Tsoha! le Tšebeletso ea Rōna ea ’Muso esita leha li se li baliloe libokeng tsa phutheho? Haeba u etsa joalo, li tla fumaneha hore u li sebelise joaloka lithulusi tsa ho etsa lipatlisiso, hammoho le likhatiso tse ling tsa Bokreste tseo u nang le tsona. Liphutheho tse ngata li na le pokello ea likhatiso tsa puso ea Molimo ka laebraring e Holong ea ’Muso. Tsena li molemong oa phutheho kaofela, hore e li sebelise ha e le Holong ea ’Muso.
E-ba le Faele ea Lintho Tsa Botho
Falimehela lintho tse thahasellisang tseo u ka li sebelisang ha u bua le ha u ruta. Ha u fumana koranta kapa makasine e tlalehang litaba tsa morao-rao, lipalo-palo tse itseng, kapa mohlala oo u ka o sebelisang tšebeletsong ea hao ea tšimo, e sehe kapa u etse kopi ea boitsebiso boo. Akarelletsa le deiti, sehlooho sa makasine eo, mohlomong le lebitso la mongoli kapa mohatisi oa eona. Ha u le libokeng tsa phutheho, ngola lintlha tseo u ka behang mabaka ka tsona le lipapiso tse ka u thusang ho hlalosetsa ba bang ’nete. Na u kile ua nahana ka papiso e monate empa u sa ka ua fumana monyetla oa ho e sebelisa hang-hang? E ngole, ’me u e boloke faeleng. Ha u se u bile Sekolong sa Tšebeletso sa Puso ea Molimo ka nako e itseng, u tla be u se u ile ua lokisetsa linehelano tse ngata. Ho e-na le ho lahla maqephe ao u ngotseng lintlha tsa lipuo tsa hao ho ’ona, a boloke. Patlisiso eo u e entseng e ka u thusa hamorao.
Bua le Batho
Hopola hore batho ke mohloli oa bohlokoa oa boitsebiso. Ha Luka a ne a bokella boitsebiso bakeng sa tlaleho ea hae ea Kosepele, ho hlakile hore o ile a fumana boitsebiso bo bongata ka ho buisana le lipaki tse boneng ka mahlo. (Luka 1:1-4) Mohlomong Mokreste-’moho a ka u hlakisetsa taba eo u neng u ntse u leka ho e batlisisa. Ho ea ka Baefese 4:8, 11-16, Kreste o sebelisa “limpho tseo e leng banna” ho re thusa ho hōla “tsebong e nepahetseng ea Mora oa Molimo.” Ho buisana le ba nang le phihlelo ea ho sebeletsa Molimo ho ka hlahisa likhopolo tse thusang. Hape ho buisana le batho ho ka senola seo ba se nahanang ’me sena se ka u thusa ho lokisetsa boitsebiso bo sebetsang e le kannete.
Hlahlobisisa Liphello Tsa Mosebetsi oa Hao
Ka mor’a hore koro e kotuloe, lithollo li lokela ho ntšuoa ka har’a ’mōkō. Ho joalo le ka liphello tsa lipatlisiso tsa hao. Pele li ka lokela ho sebelisoa, u lokela ho arola lintho tsa bohlokoa ho tse sa hlokahaleng.
Haeba u il’o sebelisa boitsebiso boo puong, ipotse: ‘Na ntlha eo ke rerang ho e sebelisa e hlile e tlatsetsa ho hong ho molemo nehelanong ea ka ea taba eo? Kapa, esita le hoja e le boitsebiso bo thahasellisang, na bo tlosa tlhokomelo tabeng eo ke neng ke lokela hore ebe ke bua ka eona?’ Haeba u nahana ho sebelisa liketsahalo tsa hona joale kapa boitsebiso bo hlahang likarolong tse feto-fetohang tsa saense kapa tsa bongaka, tiisa hore boitsebiso boo bo nakong. Hape, u hopole hore e ka ’na eaba lintlha tse ling tse likhatisong tsa rōna tsa khale li nchafalitsoe, kahoo bua ka boitsebiso ba morao-rao bo hatisitsoeng tabeng eo.
Ho hlokahala hore u be hlokolosi haholo ha u khetha ho bokella boitsebiso bo tsoang mehloling ea lefatše. Le ka mohla u se ke ua lebala hore Lentsoe la Molimo ke ’nete. (Joh. 17:17) Jesu o phetha karolo ea bohlokoa phethahatsong ea morero oa Molimo. Ka hona, Bakolose 2:3 e re: “Ho eena ho patiloe ka hloko matlotlo ’ohle a bohlale le a tsebo.” Hlahlobisisa liphello tsa lipatlisiso tsa hao u e-na le pono eo. Mabapi le patlisiso ea lefatše, ipotse: ‘Na boitsebiso boo bo fetelletsa litaba, ke khopolo-taba, kapa bo shebela lintho haufi? Na bo ngotsoe ka sepheo sa boithati kapa sa khoebo? Na mehloli e meng e amohelehang e lumellana le bona? Ka holim’a tsohle, na bo lumellana le ’nete ea Bibele?’
Liproverbia 2:1-5 e re khothalletsa ho tsoela pele re batla tsebo, kutloisiso le temoho ‘joaloka silevera, le joaloka matlotlo a patiloeng.’ Seo se bolela boikitlaetso bo matla le meputso e mengata. Ho etsa lipatlisiso ho hloka boiteko, empa ho tla u thusa ho fumana menahano ea Molimo litabeng, ho lokisa mehopolo e fosahetseng le ho etsa hore u tsitse kutloisisong ea hao ea ’nete. Hape ho tla etsa hore linehelano tsa hao e be tse matla le tse tletseng bophelo, ho etse hore u thabele ho fana ka tsona ’me ba bang ba thabele ho li utloa.
[Lebokose le leqepheng la 33]
KE LITHULUSI LIFE HO TSEE TSEO U NANG LE TSONA?
• Phetolelo ea Lefatše le Lecha ea Mangolo a Halalelang
• Comprehensive Concordance
• Molula-Qhooa le Tsoha!
• Ho Bea Mabaka ka Mangolo
• Lipaki tsa Jehova—Baboleli ba ’Muso oa Molimo
• Insight on the Scriptures
• Watch Tower Publications Index
• Watchtower Library e ho CD-ROM