Karolo 7
Molimo o Lopolla Baiseraele
Molimo o tlisetsa Egepeta likotlo, ’me Moshe o etella Baiseraele pele ho ba ntša naheng eo. Molimo o fa Baiseraele Molao ka Moshe
BAISERAELE ba ile ba lula Egepeta ka lilemo tse ngata, ba hafa ka nkatana ba bile ba ntse ba ngatafala. Leha ho le joalo, ho ile ha qala ho busa Faro e mocha. O ne a sa tsebe Josefa. ’Musi enoa ea sehlōhō o ne a tšaba hore Baiseraele ba se ba le bangata haholo, eaba o ba etsa makhoba ’me o laela hore ha ba beleha bana ba bashanyana, kaofela ha bona ba lahleloe Nōkeng ea Nile. Empa ’mè e mong o ile a tšoara thipa ka bohaleng eaba o sireletsa mora oa hae oa lesea, o mo pata ka basketeng o e beha har’a lehlaka. Morali oa Faro a fumana lesea lena eaba o le reha lebitso la Moshe, ’me a le hōlisetsa lelapeng la borena la Egepeta.
Ha Moshe a le lilemo li 40, o ile a kena khathatsong ha a sireletsa lekhoba la Moiseraele le otloang ke mookameli oa Moegepeta. Moshe o ile a balehela naheng e hōle. Ha a le lilemo li 80, Molimo o ile a re a khutlele Egepeta ho Faro ’me a mo bolelle hore a lokolle sechaba sa Hae.
Faro a hana hehehe. Ka lebaka leo Molimo a otla Egepeta ka likotlo tse leshome. Lekhetlo ka leng ha Moshe a ea ho Faro ho mo fa monyetla oa ho qoba kotlo e latelang, Faro o ile a satalatsa molala, a nyefola Moshe le Molimo oa hae, Jehova. Kotlo ea ho qetela, e leng ea leshome e ile ea bolaea matsibolo ’ohle naheng eo—ha sala matsibolo a malapa a ileng a mamela Jehova ’me a qaphaletsa mali likoseneng tsa menyako ea matlo a ’ona ka mali a konyana ea sehlabelo. Lengeloi la Molimo le timetsang le ile la feta matlo ao. Ka mor’a moo, Baiseraele ba ile ba ikhopotsa topollo ena e tsotehang moketeng oa selemo le selemo o bitsoang Paseka.
Kaha mora oa Faro oa letsibolo o ne a shoele, Faro o ile a laela Moshe le Baiseraele kaofela hore ba tsoe Egepeta. Hang-hang ba ile ba bokana ka bongata e le hore ba itokisetse ho tsoa Egepeta. Empa Faro o ile a ikoahlaea. A ba lelekisa ka bahlabani ba bangata le likoloi tsa ntoa. Ho ne ho bonahala eka Baiseraele ba qabeletsoe lebōpong la Leoatle le Lefubelu. Empa Jehova a arola Leoatle le Lefubelu, a etsa hore Baiseraele ba tsamaee moo ho omileng, lipakeng tsa metsi a entseng lekhalo! Ha Baegepeta ba itahlela ka mor’a bona, Jehova a etsa hore metsi a khutle ka sekhahla, eaba a khama Faro le lebotho la hae.
Hamorao ha Baiseraele ba hlomme liahelo pel’a Thaba ea Sinai, Jehova o ile a etsa selekane le bona. O ile a sebelisa Moshe hore e be mokena-lipakeng, ’me a fa Baiseraele melao e tla ba tataisa le ho ba sireletsa bophelong bohle ba bona. Hafeela Baiseraele ba ne ba ikokobelletsa puso ea hae, o ne a tla ba tšehetsa le ho etsa hore lichaba tse ling li hlohonolofatsoe ka lebaka la bona.
Leha ho le joalo, Baiseraele ba bangata ba ile ba soetsa Molimo ka lebaka la ho hloka tumelo ho eena. Ka lebaka leo, o ile a etsa hore ba lelere lefeelleng ka lilemo tse 40. Eaba Moshe o laela Joshua monna ea lokileng hore e be mohlahlami oa hae. Joale Baiseraele e ne e le malala-a-laotsoe hore ba kene naheng eo Molimo a neng a e tšepisitse Abrahama.
—E thehiloe ho Exoda; Levitike; Numere; Deuteronoma; Pesaleme ea 136:10-15; Liketso 7:17-36.
◼ Ho tlile joang hore Molimo a sebelise Moshe ho lopolla Baiseraele?
◼ Ke hobane’ng ha Baiseraele ba ne ba keteka Paseka?
◼ Molimo o ile a lokolla Baiseraele joang bokhobeng Egepeta?
[Lebokose le leqepheng la 10]
MOLAO O MOHOLO KA HO FETISISA
Ho ka etsahala hore Melao e Leshome, e hlahang ho Exoda 20:1-17, ke eona e tsebahalang ka ho fetisisa melaong e ka bang 600 e fuoeng Moshe. Leha ho le joalo, ha Jesu Kreste a ne a botsoa hore na melaong ea Molimo ke ofe o moholo ka ho fetisisa, o ile a khetha ona o reng: “U rate Jehova Molimo oa hao ka pelo ea hao eohle le ka moea oa hao oohle le ka kelello ea hao eohle le ka matla a hao ’ohle.”—Mareka 12:28-30; Deuteronoma 6:5.
[Chate e leqepheng la 10]
Genese
● Exoda
● Levitike
● Numere
● Deuteronoma
Joshua
Baahloli
Ruthe
1 Samuele
2 Samuele
1 Marena
2 Marena
1 Likronike
2 Likronike
Esdrase
Nehemia
Esthere
Jobo
Lipesaleme
Liproverbia
Moeklesia
Sefela sa Lifela
Esaia
Jeremia
Lillo Tsa Jeremia
Ezekiele
Daniele
Hosea
Joele
Amose
Obadia
Jonase
Mikea
Nahume
Habakuke
Sofonia
Hagai
Zakaria
Malakia
Matheu
Mareka
Luka
Johanne
Liketso
Baroma
1 Bakorinthe
2 Bakorinthe
Bagalata
Baefese
Bafilipi
Bakolose
1 Bathesalonika
2 Bathesalonika
1 Timothea