Karolo 22
Baapostola ba Bolela Litaba Tse Molemo ka Sebete
Phutheho ea Bakreste e hōla ka potlako le hoja ba hlorisoa
MATSATSI a leshome Jesu a nyolohetse leholimong, barutuoa ba hae ba ka bang 120 ba ne ba bokane ntlong e ’ngoe Jerusalema nakong ea Mokete oa Pentekonta oa Bajuda ka 33 C.E. Ka tšohanyetso lerata le joaloka la moea o fokang ka sekhahla la tlala ntlo. Ka mohlolo barutuoa ba qala ho bua lipuo tseo ba neng ba sa li tsebe. Ke hobane’ng ha ho ne ho etsahala mehlolo ee? Molimo o ne a file barutuoa moea o halalelang.
Ka ntle ho ne ho e-na le letšoele la baeti ba tlileng moketeng ba tsoang linaheng tse ngata. Ba ile ba makala ha ba utloa barutuoa ba Jesu ba bua lipuo tsa bona ka maleme a paqameng. Ha Petrose a ba hlalosetsa se etsahetseng o ile a bua ka boprofeta ba Joele bo reng Molimo o tla ‘tšolla’ moea oa hae, o neng o tla etsa hore ba o fumanang ba be le matla a ho etsa mehlolo. (Joele 2:28, 29) Pontšo ena e hlakileng ea moea o halalelang e ile ea totobatsa hore ho bile le phetoho ea bohlokoa, e leng hore Molimo o ne a se a sa amohele sechaba sa Iseraele empa a se a amohela phutheho ea Bakreste. Joale ba neng ba batla ho sebeletsa Molimo ka tsela eo a e amohelang, e ne e lokela ho ba balateli ba Kreste.
Ka eona nako eo ho ile ha tsoha khanyetso, ’me lira tsa kenya barutuoa teronkong. Empa bosiu lengeloi la Jehova la bula menyako ea teronko ’me la bolella barutuoa hore ba tsoele pele ho bolela litaba tse molemo. Sena ke sona seo ba ileng ba se etsa esale ka meso. Ba ile ba kena ka tempeleng eaba ba qala ho bolela litaba tse molemo tse mabapi le Jesu. Batho ba bolumeli ba neng ba ba hanyetsa ba halefa ’me ba ba laela hore ba khaotse ho bolela litaba tse molemo. Eaba baapostola ba araba ka sebete ba re: “Re tla mamela Molimo e le ’musi ho e-na le batho.”—Liketso 5:28, 29.
Mahloriso a ile a ipha matla. Bajuda ba bang ba ile ba qosa morutuoa ea bitsoang Setefane ka hore o nyefotse ’me ba mo tlepetsa ka majoe ho fihlela a e-shoa. Mohlankana ea bitsoang Saule oa Tarsase o ne a shebeletse, ’me a lumellana le polao eo. Ka mor’a moo o ile a ea Damaseka ho ea tšoara bohle ba neng ba latela Kreste. Ha Saule a ntse a tsamaea, leseli le tsoang leholimong la halima ho mo potoloha, eaba lentsoe le re: “Saule, Saule, u ntlhorisetsa’ng?” Saule o ne a foufalitsoe ke leseli leo, eaba oa botsa o re: “U mang?” ’Me lentsoe la re: “Ke ’na Jesu.”—Liketso 9:3-5.
Ka mor’a matsatsi a mararo, Jesu a romela morutuoa ea bitsoang Ananiase hore a e’o thusa Saule hore a boele a bone. Saule o ile a kolobetsoa ’me ka sebete a qala ho ruta ka Jesu. O ile a bitsoa moapostola Pauluse ’me ea e-ba setho se mafolofolo sa phutheho ea Bakreste.
Barutuoa ba Jesu ba ne ba ntse ba bolella Bajuda le Basamaria feela litaba tse molemo tsa ’Muso oa Molimo. Joale lengeloi la tla ho molaoli oa lebotho la Roma ea tšabang Molimo, ea bitsoang Korneliase la mo bolella hore a romeletse hore ho bitsoe moapostola Petrose. Petrose o ile a tsamaea le ba bang ho ea bolella Korneliase le ba ntlo ea hae litaba tse molemo. Ha a ntse a bua, moea o halalelang o ile oa theohela holim’a balumeli bao ba Balichaba, eaba moapostola enoa o laela hore ba kolobetsoe ka lebitso la Jesu. Joale batho ba lichaba tsohle ba ne ba e-na le monyetla oa ho fumana bophelo bo sa feleng. Phutheho e ne e le malala-a-laotsoe hore e bolele litaba tse molemo libakeng tsohle.
—E thehiloe ho Liketso 1:1–11:21.
◼ Ho ile ha etsahala’ng nakong ea Mokete oa Pentekonta?
◼ Lira li ile tsa etsa’ng ha barutuoa ba Jesu ba bolela litaba tse molemo?
◼ Ke ketsahalo efe e ileng ea bontša hore batho ba lichaba tsohle ba na le monyetla oa ho fumana bophelo bo sa feleng?
[Chate e leqepheng la 25]
Genese
Exoda
Levitike
Numere
Deuteronoma
Joshua
Baahloli
Ruthe
1 Samuele
2 Samuele
1 Marena
2 Marena
1 Likronike
2 Likronike
Esdrase
Nehemia
Esthere
Jobo
Lipesaleme
Liproverbia
Moeklesia
Sefela sa Lifela
Esaia
Jeremia
Lillo Tsa Jeremia
Ezekiele
Daniele
Hosea
Joele
Amose
Obadia
Jonase
Mikea
Nahume
Habakuke
Sofonia
Hagai
Zakaria
Malakia
Matheu
Mareka
Luka
Johanne
Liketso ●
Baroma
1 Bakorinthe
2 Bakorinthe
Bagalata
Baefese
Bafilipi
Bakolose
1 Bathesalonika
2 Bathesalonika
1 Timothea
2 Timothea
Tite
Filemone
Baheberu
Jakobo
1 Petrose
2 Petrose
1 Johanne
2 Johanne
3 Johanne
Juda
Tšenolo