Khaolong ea 16

Na Tsela eo ke Sareloang ka Eona e Tloaelehile?

Le hoja khaolong ena ho buuoa ka ho khetheha ka taba ea ho shoeloa ke motsoali, melao-motheo e tšohliloeng mona ea sebetsa le ha motho a shoetsoe ke setho se seng sa lelapa kapa motsoalle ea haufi.

“Ha ’Mè a hlokahala, ke ile ka ikutloa ke lahlehetsoe ’me ke sithabetse. Ke eena ea neng a momahantse lelapa leso.”—Karyn.

HO HLOKAHALLOA ke motsoali ke e ’ngoe ea lintho tse bohloko ka ho fetisisa bophelong. Ka mor’a moo, u ka ’na ua tlameha ho loantšana le maikutlo a fapaneng ao u qalang ho ba le ’ona. Brian ea neng a le lilemo li 13 ha ntate oa hae a bolaoa ke lefu la pelo, o re: “Bosiung boo Ntate a hlokahetseng ka bona, sohle seo re ileng ra se etsa ke ho lla le ho hakana feela.” Natalie ea neng a le lilemo li leshome ha ntate oa hae a bolaoa ke lefu la kankere, o re: “Ke ne ke sa tsebe hore na ke etse’ng. Kahoo ke ile ka ema hlooho. Ka ikutloa ke rebehile.”

Lefu le ama batho ka litsela tse sa tšoaneng. Ha e le hantle, Bibele e re “e mong le e mong” o na le “lefu la hae le bohloko ba hae.” (2 Likronike 6:29) Ka lebaka leo, ak’u nahane ho se hokae kamoo lefu la motsoali oa hao le u ammeng kateng. Ka tlaase mona, hlalosa (1) kamoo u ileng ua ikutloa kateng ha u ne u qala ho tseba hore motsoali oa hao o hlokahetse le (2) kamoo u ikutloang kateng hona joale.a

1 ․․․․․

2 ․․․․․

Mohlomong likarabo tsa hao li bontša hore tsela eo u ikutloang ka eona e batla e khutlela setloaeling. Boo ke boikutlo ba tlhaho. Hoo ha ho bolele hore u se u lebetse motsoali oa hao. Ka lehlakoreng le leng, e ka ’na eaba u ntse u ikutloa u saretsoe kapa u bile u saretsoe le ho feta. Mohlomong bohloko boo u bo utloang bo tšoana le maqhubu a leoatle le khutsitseng ao ka tšohanyetso a befang ebe “a khahlellana lebōpong.” Boikutlo boo le bona ke ba tlhaho—esita le haeba ho se ho fetile lilemo motsoali oa hao a hlokahetse. Potso ke hore na, U ka sebetsana le boemo boo joang—ho sa tsotellehe hore na u utloile bohloko hakae?

U se ke ua thiba likhapha! Ho lla ho kokobetsa ho sareloa. Leha ho le joalo, u ka ’na ua ikutloa joaloka Alicia. O ne a le lilemo li 19 ha ’mè oa hae a hlokahala. Alicia o re: “Ke ne ke nahana hore ha ke bontša hore ke hlomohile haholo, ba bang ba tla bona eka ke fokolloa ke tumelo.” Empa hopola: Jesu Kreste e ne e le motho ea phethahetseng a bile a e-na le tumelo e matla ho Molimo. Leha ho le joalo, o ile “a ntša meokho” ha Lazaro, motsoalle oa hae ea ratehang a ne a hlokahetse. (Johanne 11:35) Kahoo u se ke ua tšaba ho lla. Seo ha se bolele hore u fokolloa ke tumelo! Alicia o re: “Qetellong ke ile ka lla haholo. Ke ne ke lla letsatsi le chabang le le likelang.”b

Bua ka se etsang hore u ikutloe u le molato. Karyn ea neng a le lilemo li 13 ha ’mè oa hae a hlokahala, o re: “Kamehla bosiu pele ke robala, ke ne ke ea ka kamoreng ea ’Mè ho ea mo aka. Bosiung bo bong ha kea ka ka mo aka. Hoseng ka le hlahlamang, ’Mè o ne a hlokahetse. Le hoja e le ho sa utloahaleng, ke ikutloa ke le molato ka hore ebe ha kea ka ka mo bona bosiung boo—le ka lintho tse ngata tse ileng tsa etsahala hoseng ka le hlahlamang. Ntate o ne a tsamaile ka mosebetsi ’me a itse ’na le ausi oa ka re sale re hlokometse ’Mè. Empa re ile ra lieha ho tsoha. Ha ke kena ka kamoreng ea hae o ne a se a sa heme. Ke ile ka utloa bohloko haholo, kaha o ne a ntse a phela hantle ha Ntate a tsamaea!”

Joaloka Karyn, mohlomong u ikutloa u le molato ka lebaka la lintho tseo u sa kang ua li etsa. U ka ’na ua boela ua ikutloisa bohloko ka ho ’na u re “hoja ebe.” ‘Hoja ebe ke ile ka phehella Ntate hore a ee ngakeng.’ ‘Hoja ebe ke ile ka e’o hloela ’Mè pejana.’ Haeba ho nahana ka lintho tse kang tsena ho u tšoenya, hopola: Ke ntho ea tlhaho hore u ikutloe u le molato ka lintho tseo u lakatsang eka u ka be u li entse ka tsela e fapaneng. ’Nete ke hore u ka be u li entse ka tsela e fapaneng haeba u ne u tsebile se tla etsahala. Empa u ne u sa tsebe. Ka hona, ha ua lokela ho ikutloa u le molato. Hase molato oa hao hore ebe motsoali oa hao o hlokahetse!c

Hlalosa tsela eo u ikutloang ka eona. Liproverbia 12:25 e re: “Mantsoe a mosa a tla u hlasimolla.” (Today’s English Version) Ha u bipetsa maikutlo u ka ’na ua thatafalloa ho tobana le boemo bona bo bohloko. Ka lehlakoreng le leng, ho hlalosetsa motho e mong tsela eo u ikutloang ka eona ho tla u bulela monyetla oa hore a u khothatse ka “mantsoe a mosa” nakong eo u saretsoeng.

Bua le Molimo. U ka ’na ua ikutloa u imolohile ka mor’a hore u ‘tšollele pelo ea hao’ ho Jehova Molimo ka thapelo. (Pesaleme ea 62:8) Thapelo hase feela tsela ea ho kokobetsa bohloko. Ha u rapela, u ipiletsa ho “Molimo oa matšeliso ’ohle, ea re tšelisang matšoenyehong ’ohle a rōna.” (2 Bakorinthe 1:3, 4) Tsela e ’ngoe eo Molimo a re tšelisang ka eona ke ka Lentsoe la hae, e leng Bibele. (Baroma 15:4) U ka thathamisa mangolo a u tšelisang ka ho khetheha.d

Ho sareloa ho nka nako. Empa Bibele e fana ka matšeliso, kaha e re tiisetsa hore lefatšeng le lecha leo Molimo a tšepisang ho le tlisa, “lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng.” (Tšenolo 21:3, 4) Le uena u ka ’na ua fumana hore ho thuisa ka litšepiso tse joalo ho ka ’na ha u thusa hore u tobane le bohloko ba ho shoeloa ke motsoali.

[Mongolo o botlaaseng ba leqephe]

LENGOLO LA SEHLOOHO

“[Molimo] o tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.”—Tšenolo 21:4.

KELETSO

Ngola kamoo u ikutloang kateng. Ho ngola seo u se nahanang ka motsoali oa hao ea hlokahetseng ho ka u thusa haholo hore u sebetsane le ho sareloa.

NA U NE U TSEBA . . . ?

Ho lla ha ho bontše hore motho oa fokola. Esita le banna ba neng ba le matla ba kang Abrahama, Josefa, Davida le Jesu ba ile ba lla ha ba ne ba utloile bohloko.—Genese 23:2; 50:1; 2 Samuele 1:11, 12; 18:33; Johanne 11:35.

SEO KE RERANG HO SE ETSA!

Ha ke sithabetse ka lebaka la ho sareloa, ke tla ․․․․․

Lintlha tseo ke tla rata ho li botsa motsoali oa ka ea setseng tabeng ena ke ․․․․․

U NAHANA’NG KA SEE?

● Ke hobane’ng ha ho le molemo ho nahana ka lintho tse u thabisang tseo u li hopolang ka motsoali oa hao ea hlokahetseng?

● Ke hobane’ng ha ho ngola seo u se nahanang ho ka u thusa hore u sebetsane le ho sareloa?

[Ntlha e Qolotsoeng e leqepheng la 112]

“Ke ile ka bipetsa maikutlo a ka. Haeba ke ne ke a ntšitse, nka be ke ile ka thuseha. Seo se ka be se nthusitse ho amohela se etsahetseng.”—David

[Lebokose/Setšoantšo se leqepheng la 113]

CHANTELLE O RE:

“Ntate o ne a qetile lilemo tse ka bang hlano a kula, ’me boemo ba hae bo ne bo ntse bo mpefala. Ke ne ke le lilemo li 16, ha a ipolaea. Ka mor’a moo, ’na le khaitseli’a ka,’Mè o ile a re tsebisa ntho e ’ngoe le e ’ngoe e neng e etsahala. O ile a ba a re lumella hore re mo thuse ho etsa liqeto mabapi le lepato. Seo se ile sa re nolofalletsa lintho. Ke nahana hore bana ha ba rate ho pateloa lintho tse etsahalang—haholo litaba tsa bohlokoa joaloka tseo. Ha nako e ntse e feta, ke ile ka khona ho bua ka bolokolohi ka lefu la Ntate. Neng le neng ha ke batla ho lla, ke ne ke ea sebakeng se itseng kapa ho motsoalle ea itseng ebe kea lla. Keletso ea ka ke hore: Ha u batla ho bua ka taba ena, buisana le ba lelapa le metsoalle. Etsa ntho leha e le efe e tla u thusa ha u saretsoe.”

[Lebokose/Setšoantšo se leqepheng la 113]

LEAH O RE:

“Ha ke le lilemo li 19, ’Mè o ile a otloa ke setorouku se matla ’me a hlokahala lilemo tse tharo hamorao. Ka mor’a lefu la hae, ke ne ke nka hore ke tlameha ho itiisa. Ntate o ne a tla utloa bohloko haholo haeba ke ne nka sithabetsoa ke seo. Ha ke ntse ke hōla, ’Mè o ne a ntlhokomela ha ke kula kapa ke sa thaba. Ke sa hopola kamoo a neng a ntšoara kateng ha a ne a batla ho utloa hore na ke na le feberu kapa che. Hangata, ke utloa bohloko ha ke hopola hore ha a sa le eo. Ke atisa ho bipetsa maikutlo a ka ’me seo se kotsi. Kahoo ka linako tse ling ke sheba linepe tsa hae e le hore ke lle. Ho buisana le metsoalle le hona hoa thusa. Bibele e tšepisa hore bafu ba tla tsosetsoa lefatšeng la paradeise. (Johanne 5:28, 29) Ha ke nahana ka tšepo eo ke nang le eona ea ho boela ke bona ’Mè—le ha ke nahana ka seo ke lokelang ho se etsa e le hore ke be teng moo—bohloko ba ho sareloa boa kokobela.”

[Lebokose/Setšoantšo se leqepheng la 114]

BETHANY O RE:

“Ke lakatsa eka nka be ke hopola ha ke ne ke re ho Ntate, ‘Kea u rata.’ Ke lumela hore nkile ka mo bolella, ke mpa feela ke sa hopole ’me nka rata ho hopola ke mo bolella seo. Ke ne ke le lilemo li hlano feela ha a hlokahala. Ntate o ile a otloa ke setorouku a robetse ’me a potlakisetsoa sepetlele. Hoseng ka le hlahlamang ha ke tsoha, ke ile ka bolelloa hore o hlokahetse. Ka mor’a moo, ke ne ke thatafalloa ho bua ka eena, empa hamorao ke ile ka thabela ho utloa lintho tse phetoang ka eena kaha li ile tsa nthusa hore ke mo tsebe haholoanyane. Keletso ea ka ho mocha leha e le ofe ea shoetsoeng ke motsoali ke hore u thabele nako eo u e qetileng u e-na le motsoali oa hao ’me u ngole lintho tseo u li hopolang e le hore u tle u se ke ua li lebala. Ebe u etsa sohle se matleng a hao ho haha tumelo ea hao e le hore u tle u be teng ha motsoali oa hao a tsosoa bafung lefatšeng le lecha la Molimo.”

[Lebokose le leqepheng la 116]

Lintlha Tseo U li Ngotseng

Ngola Seo U se Nahanang

Ngola lintho tse ling tse thabisang tseo u li hopolang ka motsoali oa hao. ․․․․․

Ngola lintho tseo u lakatsang eka u ka be u mo boleletse tsona ha a ntse a phela. ․․․․․

Nka hore u na le ngoan’eno e monyenyane ea itjarisang molato ka lefu la motsoali oa lōna. Ngola seo u neng u ka se bua ha u mo tšelisa. (Sena se ka u thusa hore u loantše boikutlo ba ho ipeha molato.) ․․․․․

Thathamisa lintho tse seng kae tseo u lakatsang ho li tseba ka motsoali oa hao ea hlokahetseng, ebe u kōpa ea setseng hore le tšohle e ’ngoe ea tsona. ․․․․․

Bala Liketso 24:15. Tšepo e boletsoeng temaneng ee e u thusa joang hore u mamelle bohloko ba ho shoeloa ke motsoali? ․․․․․

[Setšoantšo se leqepheng la 115]

Bohloko bo tlisoang ke lefu bo ka tšoana le maqhubu a khahlellanang lebōpong ka tšohanyetso