Baboleli ba Molaetsa oa ’Muso oa Molimo

JEHOVA o ile a romela Mora oa hae Jesu Kreste hore a re behele mohlala o motle. (1 Pet. 2:​21) Ha motho e e-ba molateli oa Jesu, e ba mosebeletsi oa Molimo ea bolelang litaba tse molemo. Jesu o ile a bontša hore sena se ne se tla khatholla motho eo ha a re: “Tloong ho ’na, lona bohle ba sehlang le ba imetsoeng, ’me ke tla le khatholla. Jarang joko ea ka ’me le ithute ho ’na, kaha ke na le maikutlo a bonolo ’me ke ikokobelitse pelong, ’me le tla fumanela meea ea lona khatholoho.” (Mat. 11:​28, 29) Tšepiso ena e phethahetse ho bohle ba amohetseng memo eo.

² Kaha Jesu ke Mosebeletsi e Moholo oa Molimo, o ile a mema batho ba itseng hore ba tle ’me e be balateli ba hae. (Mat. 9:9; Joh. 1:​43) O ile a ba koetlisa boboleling ’me a ba romela hore ba etse mosebetsi o tšoanang le oo a neng a o etsa. (Mat. 10:1–11:1; 20:​28; Luka 4:​43) Hamorao o ile a romela ba bang ba 70 ho bolela litaba tse thabisang tse mabapi le ’Muso oa Molimo. (Luka 10:​1, 8-11) Ha Jesu a romela barutuoa ba hae, o ile a re ho bona: “Ea le mamelang le ’na oa ’mamela. Ea le hlokomolohang le ’na oa ntlhokomoloha. Ho feta moo, ea ntlhokomolohang o hlokomoloha le ea nthomileng.” (Luka 10:​16) Ka tsela ena, Jesu o ile a hlakisa hore barutuoa ba hae ba ne ba filoe boikarabelo ba bohlokoahali. Ba ne ba lokela ho emela Jesu le Molimo ea Phahameng ka ho Fetisisa! Le mehleng ena sena se phethahala ho bohle ba amohelang memo ea Jesu ea hore ‘ba tle ’me e be balateli ba [hae].’ (Luka 18:​22; 2 Bakor. 2:​17) Molimo o roma bohle ba amohelang memo ena hore ba bolele litaba tsa ’Muso oa hae le hore ba etse barutuoa.​—Mat. 24:​14; 28:​19, 20.

³ Ka lebaka leo, kaha re amohetse memo ea Jesu ea hore re mo latele, re hlohonolofalitsoe ka ‘ho tseba’ Jehova Molimo le Jesu Kreste. (Joh. 17:3) Re rutiloe litsela tsa Jehova. Ka thuso ea hae re fetotse tsela eo re nahanang ka eona le eo re itšoarang ka eona e le hore e lumellane le melao ea Jehova. (Bar. 12:​1, 2; Baef. 4:​22-24; Bakol. 3:​9, 10) Kananelo ea rona e tlohang botebong ba pelo e re susumelelitse hore re inehele ho Jehova ’me re kolobetsoe metsing. Ha re kolobetsoa, re ba bahlanka ba hae.

⁴ Ka linako tsohle u hopole hore re lokela ho sebeletsa Molimo ka botšepehi ’me re hloke molato. (Pes. 24:​3, 4; Esa. 52:​11; 2 Bakor. 6:​14–7:1) Ho lumela ho Jesu Kreste ho re thusitse hore re be le letsoalo le hloekileng. (Baheb. 10:​19-23, 35, 36; Tšen. 7:​9, 10, 14) Moapostola Pauluse o ile a eletsa Bakreste hore ba etse lintho tsohle bakeng sa thoriso ea Molimo, e le hore ba se ke ba khopisa ba bang. Moapostola Petrose eena o ile a bontša hore ke habohlokoa hore re itšoare hantle e le hore re ka hapa ba sa lumelang. (1 Bakor. 10:​31, 33; 1 Pet. 3:1) U ka thusa ba bang joang hore ba tšoanelehe hore e be baboleli ba litaba tse molemo?

BAHOELETSI BA BACHA

⁵ Li sa tloha feela, itloaetse ho khothalletsa motho eo u ithutang le eena hore a bue le ba bang ka seo a ithutang sona ka Bibeleng. Le hoja a sa ee tšimong, a ka buisana le beng ka eena, metsoalle, bao a sebetsang le bona le ba bang. Ena ke tsela e molemo ea ho ruta ba bacha hore e be balateli ba Jesu Kreste ba bolelang litaba tsa ’Muso oa Molimo. (Mat. 9:9; Luka 6:​40) Ha tsebo ea seithuti seo e ntse e eketseha ’me se khona ho ruta ba bang, ha ho pelaelo hore se tla lakatsa ho sebetsa hammoho le phutheho tšimong.

HO FINYELLA SE HLOKAHALANG

⁶ Pele u mema motho hore a tsamaee le uena tšebeletsong ea tšimo u lokela ho etsa bonnete ba hore oa tšoaneleha. Ha motho a tsamaea le rona tšimong, o bontša hore ke paki ea Jehova. Kahoo o lokela hore a be a se a phela tumellanong le melao ea Jehova ’me a tšoaneleha hore e be mohoeletsi ea sa kolobetsoang.

⁷ Ho ka etsahala hore ha u ntse u ithuta le motho ’me le buisana ka melao-motheo ea Bibele, u tla ba le leseli le itseng ka maemo a hae. U ka ’na ua hlokomela hore o phela ho latela seo a ithutileng sona ka Bibeleng. Empa ho na le lintho tse ling tse amang bophelo ba seithuti tseo baholo ba tla batla ho buisana le lona ka tsona.

⁸ Mohokahanyi oa sehlopha sa baholo o tla lokisetsa hore baholo ba babeli (e mong e be setho sa komiti ea tšebeletso) ba buisane ka taba ena le uena hammoho le seithuti sa hao. Liphuthehong tseo ho nang le baholo ba seng bakae ho tsona, moholo le mohlanka ea sebeletsang ea tšoanelehang ba ka etsa sena. Barab’abo rona ba khethiloeng ba lokela ho leka ka matla hore ba se ke ba lieha ho buisana le lona. Ha e le hantle, haeba u ba bolella le sa le libokeng, ba ka ’na ba khona ho buisana le uena hammoho le seithuti sa hao letsatsing lona leo ka mor’a liboka. Ba lokela ho etsa hore bohle ba ikutloe ba phutholohile. Pele seithuti se lumelloa ho ea tšimong e le mohoeletsi ea sa kolobetsoang, baholo ba lokela ho kholiseha hore:

1. (1) Se lumela hore Bibele ke Lentsoe la Molimo le bululetsoeng.​—2 Tim. 3:​16.

2. (2) Se tseba lithuto tsa motheo tsa Mangolo ebile sea li lumela e le hore ha se botsoa lipotso, se arabe ho latela seo Bibele e se rutang eseng ho ea ka lithuto tsa bolumeli ba bohata kapa likhopolo tsa sona.​—Mat. 7:​21-23; 2 Tim. 2:​15.

3. (3) Se phetha taelo ea Bibele ea hore se be teng libokeng tsa batho ba Jehova haeba se khona.​—Pes. 122:1; Baheb. 10:​24, 25.

4. (4) Se tseba seo Bibele e se rutang ka ho kopanela likobo, ho akarelletsa le bofebe, sethepu le bosodoma, ’me se phela tumellanong le lithuto tseo. Haeba se lula le motho oa bong bo fapaneng eo ba sa amaneng, ba lokela ho ngolisa lenyalo la bona ka molao.​—Mat. 19:9; 1 Bakor. 6:​9, 10; 1 Tim. 3:​2, 12; Baheb. 13:4.

5. (5) Se mamela litaelo tsa Bibele tse nyatsang botahoa le tšebeliso ea lithethefatsi leha e le life tse ka lematsang kelello.​—2 Bakor. 7:1; Baef. 5:​18; 1 Pet. 4:​3, 4.

6. (6) Se bona bohlokoa ba ho qoba setsoalle se sebe.​—1 Bakor. 15:​33.

7. (7) Se khaolitse ho ba setho sa likereke leha e le life tseo se neng se li kena. Ha se sa ea likerekeng tseo le ho li tšehetsa ka tsela leha e le efe.​—2 Bakor. 6:​14-18; Tšen. 18:4.

8. (8) Se tsoile ka ho feletseng litabeng tsa lipolotiki.​—Joh. 6:​15; 15:​19; Jak. 1:​27.

9. (9) Se lumela seo Bibele e se bolelang ho Esaia 2:4 mabapi le ho ea ntoeng kapa ho ba le moea oa bochaba.

10. (10) Se ikemiselitse ho ba Paki ea Jehova.​—Pes. 110:3.

⁹ Haeba baholo ba sa kholiseha hore na seithuti se ikutloa joang ka tse ling tsa lintlha tsena, ba lokela hore ba mo botse lipotso mohlomong ba sebelisa mangolo ana a ka holimo. Ke habohlokoa hore se utloisise hore ba etsang mosebetsi oa boboleli le Lipaki Tsa Jehova ba lokela ho phela tumellanong le seo Bibele e se rutang. Likarabo tsa sona li tla thusa baholo ho etsa qeto ea hore na se tseba lithuto tsa motheo le hore na sea tšoaneleha hore se ee tšebeletsong ea tšimo.

¹⁰ Haeba seithuti se tšoaneleha, baholo ba lokela ho se bolella hang-hang. Hangata seo se ka etsoa qetellong ea puisano. Haeba se tšoaneleha, baholo ba ka mo amohela ka liatla tse peli lenaneng la bahoeletsi. (Bar. 15:7) Se lokela ho khothalletsoa hore se qale ho ea tšimong kapele kamoo ho ka khonehang ’me se tlise tlaleho ea sona ea tšebeletso ea tšimo ha khoeli e fela. Baholo ba ka hlalosa hore ha seithuti sa Bibele se tšoaneleha hore e be mohoeletsi ea sa kolobetsoang ’me se tlaleha tšebeletso ea sona ea tšimo ka lekhetlo la pele, se etsetsoa Tlaleho ea Mohoeletsi ea Phutheho e ngotsoeng lebitso la sona ’me e kenngoa faeleng ea phutheho. Baholo ba boloka boitsebiso bo kareteng eo, e le hore mokhatlo o ka hlokomela mesebetsi ea Lipaki Tsa Jehova lefatšeng ka bophara le hore mohoeletsi a tle a khone ho kenya letsoho mesebetsing ea mokhatlo le hore a tle a fuoe lintho tse tla matlafatsa tumelo ea hae. Baholo ba nka boitsibiso bona a Ho ekelletsa moo, baholo ba ka hopotsa bahoelehetsi ba bacha hore boitsebiso ba bona bo tla bolokoa le ho sebelisoa ho ipapisitsoe le tataiso e karolong ea Leano la Mokhatlo ho jw.org.

¹¹ Ho tseba mohoeletsi e mocha hantle le ho thahasella seo a se finyeletseng ho ka mo khothatsa haholo. Sena se ka ’na sa mo thusa hore a ikitlaelletse ho sebeletsa Jehova le ho feta le hore a fane ka tlaleho ea tšebeletso ea tšimo khoeli le khoeli.​—Bafil. 2:4; Baheb. 13:2.

¹² Hang ha baholo ba entse qeto ea hore seithuti sa Bibele sea tšoaneleha hore se ee tšimong, ho loketse hore le sona se fuoe buka ena ea Ho Hlophisetsoa ho Etsa Thato ea Jehova. Ha se qeta ho tlaleha tšebeletso ea tšimo ka lekhetlo la pele, ho lokela hore ho etsoe tsebiso e khutšoanyane phuthehong ea hore joale ke mohoeletsi ea sa kolobetsoang.

HO THUSA BACHA

¹³ Bana ba banyenyane le bona ba ka tšoaneleha hore e be baboleli ba molaetsa oa ’Muso oa Molimo. Jesu o ne a amohela bana ba banyenyane ha ba tla ho eena ’me a ba hlohonolofatsa. (Mat. 19:​13-15; 21:​15, 16) Le hoja batsoali ba na le boikarabelo ba ho thusa bana ba bona, ba bang ka phuthehong ba ka thusa bana ba ratang mosebetsi oa boboleli. Haeba u motsoali, mohlala oa hao o motle boboleling o tla khothalletsa bana ba hao ho sebeletsa Molimo ka cheseho. Ha ngoana ea itšoereng hantle a batla ho ba mohoeletsi ea sa kolobetsoang a ka thusoa joang?

¹⁴ Motsoali o lokela ho ea ho e mong oa baholo ba Komiting ea Tšebeletso ea Phutheho ’me a buisane le eena ka hore na ngoana eo oa tšoaneleha hore e be mohoeletsi kapa che. Mohokahanyi oa sehlopha sa baholo o tla lokisetsa hore baholo ba babeli (e mong e be setho sa komiti ea tšebeletso) ba kopane le ngoana eo le motsoali kapa batsoali ka bobeli. Haeba ngoana eo a tseba lithuto tsa Bibele tsa motheo ’me ho totobetse hore o batla ho ea tšebeletsong ea tšimo, sena se bontša hore o tsoela pele hantle. Ka mor’a hore baholo ba babeli ba tšohle lintlha tsena le tse ling tse tšohloang le batho ba baholo, ba tla etsa qeto ea hore na ebe ngoana eo oa tšoaneleha hore e be mohoeletsi ea sa kolobetsoang kapa che. (Luka 6:​45; Bar. 10:​10) Ha ho buisanoa le ngoana e monyenyane, ho ka ’na ha se ke ha hlokahala hore ho buuoe ka tse ling tsa lintlha tseo hangata li amang batho ba baholo le tseo ho hlakileng hore ha li mo ame.

¹⁵ Ha baholo ba ntse ba buisana le ngoana eo ba lokela ho mo babatsa ka hore ebe o hatetse pele tsebong ’me ba mo khothalletse hore a be le sepheo sa ho kolobetsoa. Kaha ntle ho pelaelo batsoali ba ngoana eo ba sebelitse ka thata ho kenya ’nete butle-butle pelong ea ngoana oa bona, le bona ba lokela ho babatsoa. Baholo ba lokela ho thusa batsoali hore ba tataise bana ba bona ka ho ba bontša sehlooho se reng, “Molaetsa o Eang ho Batsoali ba Bakreste,” o leqepheng la 179-181.

BOINEHELO LE KOLOBETSO

¹⁶ Haeba u se u tseba Jehova, u mo rata ’me u mamela melao ea hae ebile u ea tšimong, u lokela ho matlafatsa kamano ea hao le eena ka hore u inehele ho eena u be u kolobetsoe.​—Mat. 28:​19, 20.

¹⁷ Ho inehela ho bolela ho behella ntho e itseng ka thoko bakeng sa morero o halalelang. Ha motho a inehela ho Molimo o bua le eena ka thapelo ’me o mo tšepisa hore o tla mo sebeletsa ka botšepehi. Seo se bolela hore o entse qeto ea ho sebeletsa eena feela. (Deut. 5:9) Ena ke qeto eo motho a lokelang ho iketsetsa eona.

¹⁸ Leha ho le joalo, ha hoa lekana ho bolella Jehova boinotšing hore u batla ho ba oa hae. Ho hlokahala hore u bontše ba bang hore u inehetse ho Molimo. U ka etsa sena ka ho etsisa Jesu ’me u kolobetsoe metsing. (1 Pet. 2:​21; 3:​21) Haeba u entse qeto ea ho sebeletsa Jehova ’me u batla ho kolobetsoa, u lokela ho etsa’ng? U lokela ho bolella mohokahanyi oa sehlopha sa baholo. O tla lokisetsa hore baholo ba ’maloa ba buisane le uena ho tiisa hore u na le litšoaneleho tseo Molimo a hlokang hore batho ba batlang ho kolobetsoa ba be le tsona. E le hore u fumane lintlha tse ling, re kopa u bale “Molaetsa o Eang ho Mohoeletsi ea sa Kolobetsoang,” o leqepheng la 182-184 bukeng ena le “Lipotso Tsa ba Batlang ho Kolobetsoa,” leqepheng la 185-207.

TLALEHO E BONTŠANG KHATELO-PELE

¹⁹ Batho ba Jehova ba ’nile ba khothatsoa ke litlaleho tse bontšang kamoo palo ea bona e ntseng e eketseha kateng lefatšeng lohle. Ho tloha ha Jesu Kreste a ne a bolella barutuoa ba hae ka lekhetlo la pele hore litaba tse molemo li tla boleloa lefatšeng lohle, Bakreste ba ’nete ba ’nile ba ameha haholo ka ho tseba hore na sena se ne se tla etsoa joang.​—Mat. 28:​19, 20; Mar. 13:​10; Lik. 1:8.

²⁰ Balateli ba pele ba Jesu ba ne ba thabela ho mamela litlaleho tsa kamoo mosebetsi oa boboleli o atlehang kateng. (Mar. 6:​30) Buka ea Bibele ea Liketso e re bolella hore ho ne ho e-na le batho ba ka bang 120 ha moea o halalelang o ne o tšolleloa holim’a barutuoa ka Pentekonta ea selemo sa 33. Ka mor’a nakoana e seng kae, palo ea barutuoa e ile ea eketseha ’me ba e-ba 3 000, ka mor’a moo ba e-ba 5 000. Ho ile ha fanoa ka tlaleho ea hore ‘Jehova o tsoela pele ho ba eketsa letsatsi le letsatsi ka ba ntseng ba pholosoa’ le hore “bongata bo boholo ba baprista ba qala ho mamela tumelo.” (Lik. 1:​15; 2:​5-11, 41, 47; 4:4; 6:7) E tlameha ebe litaba tsa keketseho ee li ile tsa khothatsa barutuoa hakaakang! Litlaleho tsena tse thabisang li ile tsa ba susumetsa hore ba tsoele pele ho etsa mosebetsi oo ba o filoeng ke Molimo, ho sa tsotellehe mahloriso a sehloho a neng a hlohlelletsoa ke baeta-pele ba bolumeli ba Bajuda.

²¹ Hoo e ka bang selemong sa 60 ho ea ho sa 61, Pauluse o ile a ngolla Bakolose a re, litaba tse molemo “li beha litholoana le ho eketseha lefatšeng lohle” le hore li ‘boletsoe popong eohle e tlas’a leholimo.’ (Bakol. 1:​5, 6, 23) Bakreste ba pele ba ne ba mamela Lentsoe, ’me moea o halalelang oa ba fa matla a ho etsa mosebetsi oa boboleli lefatšeng lohle pele tsamaiso ea lintho ea Sejuda e fela ka selemo sa 70. Basebetsi bao ba tšepahalang ba Bakreste ba ile ba khothala ha ba utloa litlaleho tsa litholoana tsa mosebetsi oa bona.

²² Ka ho tšoanang, mokhatlo oa Jehova oa kajeno o leka ho boloka litlaleho tse nepahetseng tsa mosebetsi o etsoang ho phethahatsa Matheu 24:​14, e reng: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.” Kaha re bahlanka ba Molimo ba inehetseng, ho na le mosebetsi o potlakileng oo re lokelang ho o etsa. Ka hona, re le batho ka bomong re lokela ho ikitlaelletsa ho phetha mosebetsi oa boboleli ka botlalo pele bofelo bo fihla. Jehova o tla tiisa hore mosebetsi ona oa phethoa, ’me haeba re o etsa re tla mo thabisa.​—Ezek. 3:​18-21.

TLALEHO EA HAO EA TŠEBELETSO EA TŠIMO

²³ Re lokela ho tlaleha eng? Leqetšoana la Tlaleho ea Tšebeletso ea Tšimo leo mokhatlo o fanang ka lona le bontša hore na ke lintho life tse lokelang ho kenyelletsoa. Leha ho le joalo, mohlomong lintlha tse latelang li tla u thusa.

²⁴ Tlas’a likarolo tse reng, “Libuka le Livideo Tsa Puo ea Matsoho,” “Libukana le Lipampitšana” le “Limakasine,” ngola lingoliloeng tsohle tseo u li fileng batho bao e seng Lipaki tse kolobelitsoeng.

²⁵ Ha u tlaleha “Maeto a ho Boela,” bala maeto ’ohle a ho boela ao u a entseng ka morero oa ho ntšetsa pele thahasello e ileng ea bontšoa nakong e fetileng ke motho eo e seng Paki e kolobelitsoeng. Leoto la ho boela le etsoa ka hore re ee ho motho eo ka ho toba, re mo ngolle lengolo, re mo letsetse, re mo romelle molaetsa ka selefouno kapa ka e-mail le ha re mo isetsa lingoliloeng. Lekhetlo ka leng ha ho khannoa thuto ea Bibele ho ka tlalehoa le leeto la ho boela. Motsoali a ka tlaleha leoto le le leng ka beke ha a khanna borapeli ba lelapa haeba a e-na le ngoana ea e-s’o kolobetsoe.

²⁶ Mohoeletsi o lokela ho tlaleha motho ka mong e le thuto e le ’ngoe ho sa tsotellehe hore na o balile le eena ka makhetlo a makae ka khoeli. Bahoeletsi ba lokela ho ngola palo ea lithuto tseo ba li khannileng khoeling eo lebokoseng le botlaaseng ba leqetšoana la Tlaleho ea Tšebeletso ea Tšimo ka lehlakoreng le letona. Lithuto tsa Bibele tse tlalehiloeng li ka ’na tsa akarelletsa batho bao e seng Lipaki tse kolobelitsoeng. U ka tlaleha thuto ea Bibele eo setho sa komiti ea tšebeletso se u kopileng hore u e khannele mora kapa morali oabo rona ea seng a sa ee tšimong kapa motho ea sa tsoa kolobetsoa ’me a e-s’o qete ho bala buka ea Re ka Ithuta Eng Bibeleng? le ea Le Ipoloke Leratong la Molimo.

²⁷ Ke habohlokoa hore u tlalehe “Lihora” tse nepahetseng. Ha e le hantle, ena ke nako eo u e qetang u pakela batho bao e seng Lipaki ka ntlo le ntlo, u etsa maeto a ho boela, u ithuta Bibele le batho kapa u ba pakela ka tsela e reriloeng le e sa reroang. Haeba bahoeletsi ba babeli ba ile thutong ea Bibele hammoho, ba ka tlaleha nako eo ba e sebelitseng empa ke mong’a thuto eo feela ea lokelang ho tlaleha leeto la ho boela kapa thuto. Ha batsoali ba thusana ho ruta bana ba bona nakong ea Borapeli ba Lelapa, e mong le e mong o tlaleha hora e le ’ngoe ka beke. Barab’abo rona ba ka tlaleha nako ea ha ba fana ka puo ea phatlalatsa. Motho ea fetolelang puo le eena a ka tlaleha nako eo. Ho na le lintho tsa bohlokoa tse etsoang tseo nako ea tsona e sa lokelang ho tlalehoa, joaloka ho itokisetsa ho ea tšebeletsong ea tšimo, ho ba teng sebokeng sa tšebeletso ea tšimo le ho phetha mabaka a mang.

²⁸ Mohoeletsi ka mong o lokela ho tataisoa ke letsoalo la hae le koetlisitsoeng ka Bibele ha a etsa qeto ea hore na o tla tlaleha nako e kae ea tšebeletso ea tšimo. Bahoeletsi ba bang ba bolela libakeng tse nang le baahi ba bangata ha ba bang bona ba bolela ho tse nang le baahi ba ’maloa ’me ba lokela ho tsamaea nako e telele. Kaha libaka lia fapana, tsela eo bahoeletsi ba talimang tšebeletso ea bona ka eona ea fapana. Ntle ho moo, Sehlopha se Busang ha se qobelle bahoeletsi hore ba tlalehe tšebeletso ea bona ho latela matsoalo a sona, ebile ha ho na motho ea lokelang ho etsetsa ba bang qeto tabeng ena.​—Mat. 6:1; 7:1; 1 Tim. 1:5.

²⁹ Re lokela ho ngola lihora tse feletseng ha re tlaleha nako eo re e qetang tšebeletsong ea tšimo. Leha ho le joalo, ho na le tokisetso e fapaneng bakeng sa bahoeletsi ba holileng, ba seng ba sa tsoe ka tlung, ba lulang lehaeng la batho ba hlokang tlhokomelo kapa ba holofetseng. Mohoeletsi ea joalo a ka tlaleha metsotso e 15 ka khoeli. O tla ’ne a nkoe e le mohoeletsi ea etsang mosebetsi oa boboleli khoeli le khoeli. Tokisetso ena e boetse e sebetsa ho mohoeletsi eo ka nakoana a sitoang ho etsa ho hokaalo, mohlomong khoeling eo o sitoa ho tsamaea ka lebaka la ho kula haholo kapa kotsi e itseng e mpe. Tokisetso ena e etsetsoa feela batho ba fokolloang ke bophelo hoo ba sitoang ho ea tšimong. Komiti ea tšebeletso ke eona e etsang qeto ea hore na mohoeletsi a ka kenngoa sehlopheng sena kapa che.

TLALEHO EA MOHOELETSI EA PHUTHEHO

³⁰ Tlaleho ea hao ea tšebeletso ea tšimo ea khoeli le khoeli e ngoloa Tlalehong ea Mohoeletsi ea Phutheho. Tlaleho ena ke ea phutheho eo mohoelehetsi a leng ho eona. Haeba u rera ho fallela phuthehong e ’ngoe, etsa bonnete ba hore u tsebisa baholo. Mongoli o tla etsa bonnete ba hore o romela tlaleho ea hao ho phutheho e ncha eo u falellang ho eona. Sena se tla nolofalletsa baholo ba phutheho eo hore ba u amohele le ho u thusa. Haeba u tla ba sieo phuthehong ea heno ka nako e ka tlaase ho likhoeli tse tharo, tsoela pele ho romela litlaleho tsa hao tsa tšebeletso ea tšimo phuthehong ea heno.

LEBAKA LEO RE TLALEHANG TŠEBELETSO EA RONA EA TŠIMO

³¹ Na ka linako tse ling u lebala ho isa tlaleho ea tšebeletso ea hao ea tšimo? Ha ho pelaelo hore kaofela ha rona re hloka ho hopotsoa nako le nako. Empa haeba re leka ho ba le boikutlo bo nepahetseng ka ho tlaleha tšebeletso ea rona ea tšimo ’me re utloisisa hore na ke hobane’ng ha ho le bohlokoa ho etsa joalo, ho ka ’na ha e-ba bonolo hore re hopole ho tlaleha tšebeletso ea rona ea tšimo.

³² Ba bang ba ’nile ba re: “Kaha Jehova o tseba seo ke se etsang tšebeletsong ea hae, ke hobane’ng ha ke lokela ho fana ka tlaleho phuthehong?” Ke ’nete hore Jehova o tseba seo re se etsang ’me o bona hore na re mo sebeletsa ka pelo eohle kapa che. Leha ho le joalo, hopola hore Jehova o ile a tlaleha palo ea matsatsi ao Noe a a qetileng ka arekeng le palo ea lilemo tseo Baiseraele ba li qetileng ba tsamaea lefeelleng. Molimo o ile a boloka tlaleho ea palo ea ba neng ba tšepahala le ea ba neng ba sa tšepahale. O ile a tlaleha kamoo naha ea Kanana e ileng ea haptjoa butle-butle kateng le seo baahloli ba tšepahalang ba Iseraele ba ileng ba se etsa. A boela a tlaleha lintlha tse ngata mabapi le liketso tsa bahlanka ba hae le seo ba ileng ba se finyella. O ile a bululela tlaleho ena e ngotsoeng ea se etsahetseng, e le hore a re hlakisetse hore o nka ho boloka litlaleho tse nepahetseng e le ntho ea bohlokoa.

³³ Liketsahalo tsa histori tse tlalehiloeng ka Bibeleng li bontša hore litlaleho tseo batho ba Jehova ba li ngotseng li nepahetse. Maemong a mangata, tlaleho ea Bibele e ne e ke ke ea hlaka ka ho feletseng haeba ho ne ho sa tlalehoa lipalo tse tobileng. Nahana ka mehlala e latelang: Genese 46:​27 le Exoda 12:​37; Baahloli 7:7; 2 Marena 19:​35; 2 Likronike 14:​9-13; Johanne 6:​10; 21:​11; Liketso 2:​41; 19:19.

³⁴ Le hoja ho hlakile hore litlaleho tsena ha li akarelletse sohle seo re se etsang ha re sebeletsa Jehova, se tlalehoang se phetha morero oa bohlokoa mokhatlong oa Jehova. Lekholong la pele la lilemo, ha baapostola ba ne ba tsoa letšolong la ho bolela, ba ile ba tlalehela Jesu “lintho tsohle tseo ba neng ba li entse le ho li ruta.” (Mar. 6:​30) Ka linako tse ling, litlaleho li ka ’na tsa bontša moo re lokelang ho ntlafatsa teng. Ka mohlala, li ka re thusa ho bona hore le hoja ho bile le khatelo-pele likarolong tse ling, palo ea bahoeletsi e fokotsehile. Ho ka etsahala hore ebe phutheho e hloka khothatso kapa ho na le mathata a lokelang ho rarolloa. Balebeli ba sebetsanang le litlaleho tsena ba tla ikitlaelletsa ho lokisa boemo leha e le bofe boo e ka ’nang eaba bo sitisa batho ba itseng kapa phutheho ho ntlafatsa boboleling.

³⁵ Ntle ho moo, litlaleho li thusa mokhatlo hore o tsebe libaka tse hlokang bahoeletsi ba eketsehileng. Ke libaka life tse behang litholoana tse ngata le tse sa beheng hakaalo? Batho ba hloka lingoliloeng life e le hore ba ithute Bibele? Litlaleho li thusa mokhatlo ho bona esale pele hore na ho hlokahala lingoliloeng life libakeng tse sa tšoaneng o be o lokisetse hore li hatisoe.

³⁶ Hangata litlaleho lia re khothatsa. Ruri rea thaba ha re utloa hore barab’abo rona ba bolela litaba tse molemo lefatšeng lohle. Litlaleho tse bontšang hore bahoeletsi baa eketseha li re thusa ho bona kamoo mokhatlo oa Jehova o holang kateng. Ha re utloa kamoo banab’abo rona ba etsang mosebetsi oa boboleli kateng, rea khothala ’me re etsa mosebetsi oa boboleli ka cheseho le ka pelo eohle. (Lik. 15:3) Ke habohlokoa hore re fane ka litlaleho tsa tšebeletso ea tšimo kaha seo se tla bontša hore re amehile ka barab’abo rona ba libakeng tsohle. Ha re etsa joalo re bontša hore re ikokobelletsa mokhatlo oa Jehova.​—Luka 16:​10; Baheb. 13:17.

RERA SEO U BATLANG HO SE FINYELLA

³⁷ Ha ho hlokahale hore re bapise tšebeletso ea rona ea tšimo le ea motho e mong. (Bagal. 5:​26; 6:4) Maemo a batho aa fapana. Ka lehlakoreng le leng, re ka rua molemo o moholo ka ho rera seo re batlang ho se finyella tšimong e le hore re bone hore na re hatela pele hakae. Ha re se re se finyeletse re tla khotsofala.

³⁸ Ho hlakile hore hona joale Jehova o potlakisa mosebetsi oa ho bokella batho bao a tla ba sireletsa nakong ea ‘matšoenyeho a maholo.’ Re phela nakong eo ho phethahalang boprofeta ba Esaia bo reng: “E monyenyane o tla fetoha ba sekete, ’me ea fokolang e be sechaba se matla. ’Na, Jehova, ke tla ho potlakisa ka nako ea teng.” (Tšen. 7:​9, 14; Esa. 60:​22) Ka sebele re ikutloa re le motlotlo ha e le mona re fuoe boikarabelo ba ho bolela litaba tse molemo matsatsing ana a ho qetela.​—Mat. 24:​14.