Litsela Tsa ho Atolosa Tšebeletso ea Hao

HA HO fihla nako ea hore Jesu a rome barutuoa ba hae hore e be baboleli ba ’Muso, o ile a re ho bona: “E, kotulo e kholo, empa basebetsi ha ba bakae.” Mosebetsi o ne o le mongata, ke ka lebaka leo a ileng a re: “Le kope Mong’a kotulo hore a romele basebetsi kotulong ea hae.” (Mat. 9:​37, 38) Jesu o ile a bolella barutuoa ba hae hore na ba lokela ho phetha tšebeletso ea bona joang. Mantsoe a hae a ne a bontša hore nako e lekane motinyane ha a ne a re: “Ho hang le ke ke la phetha ho potoloha le metse ea Iseraele ho fihlela Mor’a motho a fihla.”​—Mat. 10:23.

² Le kajeno ho sa na le ho hongata ho lokelang ho etsoa tšebeletsong ea tšimo. Litaba tsena tse molemo tsa ’Muso li lokela ho boleloa kaha bofelo bo atametse. (Mar. 13:​10) Kaha tšimo ke lefatše, re etsa mosebetsi o tšoanang le oa Jesu le barutuoa ba hae, empa tšimo ea rona e kholo. Ha re bapisoa le batho ba libilione lefatšeng, rea fokola ka palo, empa re ka kholiseha hore Jehova o tla re thusa. Litaba tse molemo tsa ’Muso li tla boleloa lefatšeng lohle ’me bofelo bo tla tla hantle ka nako eo Jehova a e behileng. Na re tla etelletsa pele litaba tse amanang le ’Muso oa Molimo bophelong ba rona e le hore re phethe bosebeletsi ba rona ka botlalo? Ke lintho life tseo re ka hahamallang ho li etsa ho bontša hore re etelletsa pele litaba tse amanang le ’Muso oa Molimo bophelong ba rona?

³ Ha Jesu a bolela hore na Jehova o hloka’ng ho mohlanka e mong le e mong oa Hae ea inehetseng, o ile a re: “U rate Jehova Molimo oa hao ka pelo ea hao eohle le ka moea oa hao oohle le ka kelello ea hao eohle le ka matla a hao ’ohle.” (Mar. 12:​30) Kaofela ha rona re lokela ho sebeletsa Molimo ka moea oohle. Sena se bolela hore ha re etsa sohle se matleng a rona tšebeletsong, re bontša hore re inehetse ho Jehova e le kannete. (2 Tim. 2:​15) E mong le e mong oa rona o na le monyetla oa ho etsa ho hongata, ho latela maemo a hae le bokhoni ba hae. Ak’u hlahlobe hore na e meng ea menyetla ena ke efe, ’me u etse qeto ea hore u ka etsa’ng e le hore u phethe tšebeletso ea hao.

HO BA MOHOELETSI

⁴ Bohle ba utloang Lentsoe la Molimo ba fuoa tlotla ea ho phatlalatsa litaba tse molemo. Ona ke mosebetsi oa bohlokoa oo Jesu a ileng a o fa barutuoa ba hae. (Mat. 24:​14; 28:​19, 20) Hangata morutuoa oa Jesu Kreste o qala ho bolella ba bang litaba tse molemo hang feela ha a lemoha bohlokoa ba tsona. Sena ke seo Andrease, Filipi, Korneliase le ba bang ba ileng ba se etsa. (Joh. 1:​40, 41, 43-45; Lik. 10:​1, 2, 24; 16:​14, 15, 25-34) Na see se bolela hore motho a ka bolella ba bang litaba tse molemo le pele a kolobetsoa? E! Hang feela ha motho a tšoaneleha hore e be mohoeletsi ea sa kolobetsoang, o na le monyetla oa ho bolela litaba tse molemo ka ntlo le ntlo. Ntle ho moo, a ka boela a etsa mosebetsi oa boboleli ka litsela tse ling haeba maemo a mo lumella.

⁵ Ha mohoeletsi a se a kolobelitsoe, ha ho pelaelo hore o rata ho etsa sohle se matleng a hae ho bolella ba bang litaba tse molemo. Mosebetsi ona o ka etsoa ke banna esita le basali. Ka sebele ke tlotla ho kenya letsoho ka tsela leha e le efe ho ntšetsa pele mesebetsi e amanang le ’Muso oa Molimo. Mang kapa mang ea atolosang tšebeletso ea hae ka ho leka mekhoa e meng ea ho bolela o tla thaba e le kannete.

HO SEBELETSA MOO HO NANG LE BABOLELI BA SENG BAKAE

⁶ Mohlomong u sebeletsa phuthehong eo ho eona tšimo e sebetsoang khafetsa le moo batho ba seng ba tloaetse molaetsa oa rona. Haeba ho joalo, u ka ’na oa lakatsa ho atolosa tšebeletso ea hao ka ho fallela sebakeng seo ho nang le baboleli ba seng bakae. (Lik. 16:9) Haeba hona joale u sebeletsa u le moholo kapa mohlanka ea sebeletsang, ho ka ’na ha e-ba le phutheho e ’ngoe e ka ananelang thuso ea hao. Molebeli oa potoloho a ka u bolella litsela tseo ka tsona u ka thusang phutheho e ’ngoe hona potolohong ea heno. Haeba u batla ho sebeletsa sebakeng se seng hona naheng ea heno, ofisi ea lekala e ka u fa lintlha tse ka u thusang.

⁷ Na u ka rata ho sebeletsa naheng e ’ngoe? Haeba ho joalo, u lokela ho nahana ka hloko ka taba ena. U ka buisana le baholo phuthehong ea heno. Ha ho pelaelo hore sena se tla fetola bophelo ba hao le ba bao e ka ’nang eaba u falla le bona. (Luka 14:​28) Leha ho le joalo, haeba ha oa rera ho nka nako e telele sebakeng seo, ho ka ba molemo hore u sebeletse naheng ea heno.

⁸ Linaheng tse ling, boikarabelo ba bolebeli bo fuoa barab’abo rona bao e sa tsoa ba Lipaki. Barab’abo rona ba ikokobelitseng ba ikemiselitse ho lumella baholo ba tlang ba e-na le boiphihlelo hore ba ba thuse ho tsamaisa phutheho. Haeba u moholo ’me u ntse u nahana ho fallela naheng e kang eo, hopola hore morero oa hao ke ho thusa barab’abo rona ba sebakeng seo, eseng ho etsa mosebetsi oa bona. Ba khothalletse ho hahamalla litokelo ka phuthehong. (1 Tim. 3:1) E-ba le mamello ha lintho tse ling li sa etsoe ka tsela eo li neng li etsoa ka eona naheng ea heno. Sebelisa boiphihlelo ba hao ho thusa barab’abo rona. Kahoo, haeba ka mor’a nako e itseng u lokela ho khutlela naheng ea heno, baholo ba phuthehong eo ba tla be ba le boemong bo botle ba ho hlokomela phutheho.

⁹ Pele ofisi ea lekala e ka u fa mabitso a liphutheho tseo u ka li thusang, Komiti ea Tšebeletso ea Phutheho ea heno e lokela ho ngola lengolo le u buellang. U lokela ho etsetsoa lengolo lena ho sa tsotellehe hore na u moholo, mohlanka ea sebeletsang, pula-maliboho kapa mohoeletsi. Komiti ea tšebeletso e tla romela lengolo leo hammoho le kopo ea hao ofising ea lekala ea naha eo u batlang ho sebeletsa ho eona.

HO PAKA KA PUO E ’NGOE

¹⁰ E le hore u atolose tšebeletso ea hao, u ka ’na oa nahana ka ho ithuta puo e ’ngoe, ho akarelletsa le puo ea matsoho. Haeba u rera ho ithuta puo e ’ngoe e le hore u bolelle batho ba e buang litaba tse molemo, u lokela ho bua le baholo le molebeli oa potoloho. Ba ka ’na ba u eletsa le ho u khothatsa. Ofisi ea lekala e thusa lipotoloho tse ling hore li lokisetse lihlopha tsa ho ithuta puo e ’ngoe e le hore li ka koetlisa bahoeletsi le bo-pula-maliboho ba nang le bokhoni hore ba pake ka puo eo.

TŠEBELETSO EA BOPULA-MALIBOHO

¹¹ Bahoeletsi bohle ba lokela ho tseba hore na ho hlokahala eng e le hore e be bo-pula-maliboho ba thusang, ba kamehla le ba khethehileng esita le ho kenya letsoho mefuteng e meng ea tšebeletso ea nako e tletseng. Pula-maliboho e lokela ho ba mohoeletsi ea kolobelitsoeng ea behang mohlala le eo maemo a hae a mo lumellang hore a bolele litaba tse molemo ka lihora tseo ho lebeletsoeng hore a li qete tšebeletsong ea tšimo. Komiti ea Tšebeletso ea Phutheho ke eona e etsang qeto ea hore na mohoeletsi e ka ba pula-maliboho ea thusang kapa oa kamehla, empa bo-pula-maliboho ba khethehileng bona ba khethoa ke ofisi ea lekala.

¹² Bahoeletsi e ka ba bo-pula-maliboho ba thusang bonyane ka khoeli e le ’ngoe, likhoeli tse latellanang kapa ka nako e sa lekanyetsoang, ho itšetlehile ka maemo a bona. Bahoeletsi ba bangata ba thabela ho sebeletsa e le bo-pula-maliboho ba thusang linakong tse khethehileng, joaloka nakong ea Sehopotso kapa khoeling ea ketelo ea molebeli oa potoloho. Ba bang ba khetha likhoeli tsa ha ba le phomolong. Bahoeletsi ba kolobelitsoeng ba kenang sekolo ba ka ’na ba ngolisa e le bo-pula-maliboho ba thusang nakong ea ha likolo li koetsoe. Bahoeletsi ba bang ba ka ’na ba khetha ho nka bopula-maliboho bo thusang ba lihora tse fokolitsoeng khoeling ea March le ea April le khoeling ea ketelo ea molebeli oa potoloho. Haeba u itšoere hantle, u ka lokisa maemo a hao e le hore u finyelle lihora tse hlokahalang ’me u lumela hore u ka nka khoeli kapa ho feta u le pula-maliboho ea thusang, baholo ba tla thabela ho hlahloba kopo ea hao.

¹³ E le hore u tšoanelehe hore u be pula-maliboho ea kamehla, u lokela hore ebe hona joale u boemong ba ho finyella lihora tse hlokahalang ka selemo. Ha u le pula-maliboho oa kamehla, ka linako tsohle u lokela ho sebelisana haufi-ufi le phutheho ea heno. Bo-pula-maliboho ba chesehang ke tlhohonolofatso ho phutheho kaha ba khothalletsa ba bang ho chesehela tšebeletso ea tšimo le ho ba bo-pula-maliboho. Leha ho le joalo, pele u ka tlatsa foromo ea bopula-maliboho ba kamehla, u lokela hore u be u le mohoeletsi ea behang mohlala o motle ’me bonyane ho fetile likhoeli tse tšeletseng u kolobelitsoe.

¹⁴ Bo-pula maliboho ba khethehileng ba khethoa har’a bo-pula-maliboho ba kamehla ba bontšitseng hore baa atleha tšebeletsong ea bona le ba khonang ho sebeletsa kae kapa kae moo ofisi ea lekala e khethang ho ba isa teng. Hangata ba isoa sebakeng se ka thoko moo ba ka fumanang batho ba thahasellang ’me ba theha liphutheho. Ka linako tse ling, bo-pula-maliboho ba khethehileng ba isoa liphuthehong tse hlokang bahoeletsi ba li thusang hore li sebetse tšimo ea tsona kaofela. Bo-pula-maliboho ba bang ba khethehileng bao e leng baholo ba rometsoe ho ea thusa liphutheho tse nyenyane, esita le moo ho nang le bahoeletsi ba lekaneng. Bo-pula-maliboho ba khethehileng ba fuoa chelete e fokolang ea ho lefella litšenyehelo tsa bona. Bo-pula-maliboho ba bang ba kamehla ba koptjoa hore e be bo-pula-maliboho ba khethehileng ka nakoana.

BAROMUOA BA SEBELETSANG TŠIMONG

¹⁵ Komiti ea Tšebeletso ea Sehlopha se Busang ke eona e khethang baromuoa ba sebeletsang tšimong. Ka mor’a moo, Komiti ea Lekala ea sebakeng seo ba leng ho sona e ba fa kabelo ea ho sebeletsa libakeng tse nang le batho ba bangata. Ba sebetsa ka thata e le hore ba thuse liphutheho ho ntlafatsa tsela eo ka eona li etsang mosebetsi oa boboleli le mesebetsi e meng. Hangata baromuoa ba sebeletsang tšimong ba koetlisoa Sekolong sa Baevangeli ba ’Muso. Ba lokisetsoa bolulo le ho fuoa chelete e fokolang ea ho lefella litšenyehelo tsa bona.

MOSEBETSI OA POTOLOHO

¹⁶ Batho ba khethoang ke Sehlopha se Busang hore e be balebeli ba potoloho ba fumana koetliso le boiphihlelo ka hore pele ba sebeletse e le balebeli ba potoloho ba tšoarang molepo. Banna ba joalo ba rata mosebetsi oa boboleli ’me ba rata Bakreste-’moho le bona. Ke bo-pula-maliboho ba chesehang, ba khothalletseng ho ithuta Bibele ebile ke mesuoe le libui tse ipabolang. Ba bonahatsa litholoana tsa moea ka tsela e babatsehang ’me ba bontša ho leka-lekana, ho ba le kahlolo e molemo le ho ba le temoho. Haeba mor’abo rona a nyetse, mosali oa hae oa pula-maliboho o beha mohlala o motle ka boitšoaro ba hae le ka tsela eo a sebelisanang le ba bang ka eona. Ke ’moleli ea atlehang. O boetse oa lemoha hore o lokela ho ikokobelletsa bohlooho joaloka mosali oa Mokreste ’me ha a buelle monna oa hae kapa hore e be sa le e le eena ea buang. Balebeli ba potoloho le basali ba bona ba phathahane haholo, kahoo bohle ba lakatsang ho hahamalla tšebeletso ena e lokela ho ba batho ba phetseng hantle. Bo-pula-maliboho ha ba etse kopo ea ho kenela mosebetsi oa potoloho. Ho e-na le hoo, ba bolella molebeli oa bona oa potoloho hore ba ka rata ho etsa mosebetsi oa potoloho, ’me o tla ba fa likeletso.

LIKOLO TSA PUSO EA MOLIMO

¹⁷ Sekolo sa Baevangeli ba ’Muso: Ho hlokahala baboleli ba bangata ba litaba tse molemo ba tla sebeletsa libakeng tse sebetsoang ka seoelo ’me ba matlafatse liphutheho. Ka lebaka leo, bara le barali babo rona ba masoha le banyalani ba ka etsa kopo ea ho fumana koetliso e khethehileng Sekolong sa Baevangeli ba ’Muso. Ka mor’a ho koetlisoa sekolong seo, liithuti li romeloa libakeng tse nang le baboleli ba seng bakae linaheng tsa habo bona e le bo-pula-maliboho ba kamehla. Leha ho le joalo, bao maemo a bona a ba lumellang ba ka ’na ba fuoa likabelo tse ling naheng ea habo bona kapa naheng e ’ngoe. Ba seng bakae ba ka ’na ba romeloa hore ba sebeletse e le bo-pula-maliboho ba khethehileng ka nakoana kapa kamehla. Bo-pula-maliboho ba lakatsang ho ea sekolong sena, ba tla bolelloa se hlokahalang sebokeng se tšoaroang kopanong ea setereke.

¹⁸ Sekolo sa Bibele sa Gileade sa Watchtower: Bara le barali babo rona ba masoha hammoho le banyalani ba khethetsoeng ho ea sekolong sena, ba tseba Senyesemane ’me ba tšebeletsong e khethehileng ea nako e tletseng. Ba na le bokhoni ba ho matlafatsa le ho tsitsisa mosebetsi oa tšimo kapa tsamaiso ea makala. Ba se ba bontšitse hore ba thabela ho sebeletsa barab’abo bona le hore ba ka thusa ba bang ka mosa hore ba ithute litaelo tse hlahang Mangolong le tsa puso ea Molimo ’me ba li latele. Komiti ea Lekala ea linaheng tsa habo bona e khothalletsa liithuti tse nang le bokhoni hore li romele liforomo tsa tsona tsa kopo. Liithuti tse qetileng sekolong sena li abeloa hore li ee tšimong kapa ofising ea lekala naheng e ’ngoe kapa naheng ea habo tsona.

TŠEBELETSO EA BETHELE

¹⁹ Ho sebeletsa Bethele ke tokelo e khethehileng. Bethele e bolela “Ntlo ea Molimo,” ’me ka sebele lebitso lena le loketse litsi tsena tsa mosebetsi oa puso ea Molimo. Bara le barali babo rona ba tšebeletsong ea Bethele ba etsa mosebetsi oa bohlokoa oa ho hatisa, ho fetolela le ho aba lingoliloeng tse thehiloeng Bibeleng. Sehlopha se Busang e leng sona se hlokomelang liphutheho lefatšeng lohle le ho li tataisa, se nka mosebetsi oo ba o etsang e le oa bohlokoa. Bara le barali babo rona ba bangata ba etsang mosebetsi oa ho fetolela ba lula libakeng tseo ho tsona ho buuang puo eo ba e fetolelang. Sena se ba thusa ho utloa kamoo batho ba buang kateng. Ba ka boela ba bona ha batho ba utloisisa puo ka tsela eo e ngotsoeng ka eona ka har’a lingoliloeng tseo ba li fetoletseng.

²⁰ Boholo ba mosebetsi o etsoang Bethele ke mosebetsi o boima oa matsoho. Ke ka lebaka leo boholo ba barab’abo rona ba amoheloang Bethele e lokelang ho ba ba kolobelitsoeng, ba sa ntseng ba le bacha, ba phetseng hantle le ba matla. Haeba ho hlokahala basebetsi lekaleng le hlokomelang liphutheho tsa naha ea heno ’me u ka rata ho sebeletsa teng, u ka botsa baholo ba phutheho ea heno hore na ho hlokahala’ng hore u kenele tšebeletso ea Bethele.

MOSEBETSI OA HO HAHA

²¹ Ho haha libaka tsa borapeli ke mofuta o mong oa tšebeletso e halalelang, e tšoanang le e neng e etsoa ha ho hahoa tempele ea Solomone. (1 Mar. 8:​13-18) Bara le barali babo rona ba bangata ba bontša hore baa cheseha ha ba ithaopela ho tela nako ea bona le matlotlo e le hore ba etse mosebetsi ona.

²² Na u ka thusa? Haeba u mohoeletsi ea kolobelitsoeng ’me u ka rata ho kenya letsoho mosebetsing ona, barab’abo rona ba hlokomelang mosebetsi oa ho haha sebakeng sa heno ba ka ananela thuso ea hao haholo ’me ba ikemiselitse ho u koetlisa le haeba ho se na mosebetsi oo o u tsebang. Kahoo u lokela ho tsebisa baholo ba phutheho ea heno hore u ka khona ho thusa. Bakreste ba bang ba tšoanelehang ba ithaopetse ho thusa mosebetsing oa ho haha libaka tsa borapeli linaheng tse ling.

²³ Ho na le menyetla e mengata ea ho thusa mosebetsing oa ho haha. Bakreste ba behang mohlala ba nang le tsebo ea mosebetsi oa ho haha ’me ba khona ho thusa ha ho hahoa libaka tsa borapeli ha habo bona, e ka ba baithaopi Lefapheng la Meralo le Kaho. Ho na le ba bang ba ka khonang hore ka nakoana ba kenye letsoho mosebetsing o etsoang libakeng tse hole ’me ofisi ea lekala e ba khethela ho ba lihahi tsa baithaopi ka nako e etsang libeke tse peli ho isa likhoeling tse tharo. Ba khetheloang ho etsa mosebetsi ona ka nako e telele ba bitsoa lihahi tsa nako eohle. Ha sehahi se joalo se sebetsa linaheng tse ling ho thoe ke sehahi sa nako eohle se sebeletsang linaheng tse ling. Sehlopha sa Lihahi tsa nako eohle le tsa baithaopi li etella pele mosebetsing oa ho haha libakeng tsohle ’me se thusoa ke baithaopi Lefapheng la Meralo le Kaho le baithaopi ba liphuthehong. Lihlopha Tsa Lihahi li haha libaka tsa borapeli libakeng tse sa tšoaneng tšimong ea lekala leo li sebeletsang ho lona.

U RERA HO FINYELLA ENG KA PHUTHEHONG?

²⁴ Haeba u inehetse ho Jehova, e tlameha ebe u lakatsa ho mo sebeletsa ka ho sa feleng. Leha ho le joalo, u ikemiselitse ho etsa’ng e le hore u finyelle seo? Haeba ho na le lintho tseo u ikemiselitseng ho li finyella ka phuthehong, u tla sebelisa matla a hao le lintho tsa hao tsa bohlokoa ka bohlale. (1 Bakor. 9:​26) Ha u etsa joalo, u tla tiea tumelong ’me u amehe ka lintho tsa bohlokoa ha u ntse u hahamalla boikarabelo bo eketsehileng ka phuthehong.​—Bafil. 1:​10; 1 Tim. 4:​15, 16.

²⁵ Moapostola Pauluse o re behetse mohlala o motle oo re lokelang ho o etsisa ha re sebeletsa Molimo. (1 Bakor. 11:1) Pauluse o ile a ikitlaelletsa ho sebeletsa Jehova. O ile a hlokomela hore Jehova o mo file menyetla e mengata ea ho mo sebeletsa. O ile a ngolla barab’abo ba Korinthe a re: “Ke buletsoe monyako o moholo o isang tšebetsong.” Le rona re na le menyetla e mengata ea ho sebeletsa Jehova re momahane, haholo-holo ha re bolela litaba tse molemo tsa ’Muso. Empa ho kena ka “monyako o moholo” ho akarelletsa ho loana le “bahanyetsi ba bangata,” joalokaha sena se ile sa etsahalla Pauluse. (1 Bakor. 16:9) Pauluse o ne a ikemiselitse ho ithiba. O ile a re: “Ke teteka ’mele oa ka ’me ke o tšoara joaloka lekhoba.” (1 Bakor. 9:​24-27) Na le rona re etsa joalo?

²⁶ E mong le e mong o khothalletsoa ho ikemisetsa hore ho be le lintho tseo a li finyellang ka phuthehong ho latela maemo a hae. Batho ba bangata kajeno ba tšebeletsong ea nako e tletseng hobane ba ile ba ikemisetsa ho etsa mesebetsi e itseng ka phuthehong ba sa le bacha. Batsoali ba bona hammoho le ba bang ba ile ba ba khothalletsa ba sa le banyenyane hore ba etse joalo. Ka lebaka leo, ba ruile molemo o moholo tšebeletsong ea Jehova ’me ho hang ha ba ikoahlaee. (Liprov. 10:​22) Ntle ho tšebeletso ea nako e tletseng, re ka ikemisetsa ho ea tšebeletsong ea tšimo beke e ’ngoe le e ’ngoe, ho qala thuto ea lehae ea Bibele le ho e khanna kapa ho ipha nako e eketsehileng ea ho lokisetsa liboka. Ho bohlokoa hore re lule re tiile ’me re phethe bosebeletsi ba rona. Haeba re etsa joalo, re tla tlotlisa Jehova ’me re finyelle sepheo sa rona, e leng ho sebeletsa Jehova ka ho sa feleng.​—Luka 13:​24; 1 Tim. 4:7b, 8.