Armageddone—Seo e Seng Sona

Leeto la hao le fella sebakana ho tloha Haifa. Har’a lebatama la letsatsi la Bochabela bo Hare, koloi ea hao e phulasa e lebile boroa e ikhohlile ka matsoeling-tsoeke a Nōka ea Kishone ho fihla moo sekhutlo se iketsang mochophoro. U tsoa ka lekhalo le pakeng tsa mokoloko oa Karmele o molelele le maralla a Galelia ho fihlela ha ka tšohanyetso sekhutlo se ahlama ka pel’a hao joaloka sejana se bulehileng—Lehoatata la Esdralone. Koloi ea hao e tsamaea ka boroa ho lehoatata ha mahlo a hao a haptjoa ke leralla le leng le nang le sehlaba. Ke sona seo u ntseng u se batla! Leralla la Megiddo, mohloli oa lentsoe Armageddone.

ARMAGEDDONE e koahetsoe ke sephiri le maikutlo a sa nepahalang. Maikutlo a mangata ka hore na e bolela eng. Leha ho le joalo, lentsoe Armageddone le tsoa ho Harmagedone, kapa Thaba ea Megiddo.a Ke lentsoe la Bibele le fumanoang ho Tšenolo 16:16, e reng: “Ea ba bokella thoteng e bitsoang Harmagedone [kapa, Armageddone], ka Seheberu.”

Ke bo-mang ba bokanang Armageddone hona ka lebaka lefe? Tšenolo 16:14 e-ea arabela: “Marena a lefatše le a linaha tsohle tseo ho ahiloeng ho tsona” a phuthehela “ntoa ea letsatsi le leholo la Molimo o matla ’ohle.”

Likarabelo tseo li hlahisa lipotso tse ling tse ngata. “Marena” a loana le mang, hona ho tsekoa eng? Ho tla loaneloa hokae? Na a tla sebelisa lihlomo tsa “nuclear”? Na ntoa e ka thibeloa? Ha e le hantle, Armageddone ke eng?

Hase Sebaka se Itseng Lefatšeng

Armageddone e ke ke ea e-ba sebaka se itseng lefatšeng. Ha ho na thaba e bitsoang joalo—le hoja thota e bitsoang Megiddo e sa le teng le kajeno. Leha ho le joalo, se hlileng se boleloang ke Armageddone se khutlisetsa menahano historing ea ntoa e neng e likoloha sebakeng seo sa Megiddo.

Megiddo ebile sebaka sa lintoa tse ling tse tšabehang ka ho fetisisa le tsa makhaola-khang historing ea Bochabela bo Hare. Hona hohle ho qalile seketeng sa bobeli sa lilemo B.C.E. ka morena oa Egepeta Thutmose III ha a hlōla marena a Palestina le Syria, ’me ha tšoarella ho fihlela selemong sa 1918 ha molaoli oa mabotho a Manyesemane Viscount Allenby a hlōla Turkey habohloko.

Empa habohlokoa haholo ho liithuti tsa Bibele, Megiddo ebile moo makhotla a Iseraele bolaoling ba Barake a ileng a hlōla ka ho totobetseng lebotho le matla la Morena Jabine oa Kanana le neng le eteletsoe pele ke molaoli oa ntoa Sisera. Jehova Molimo a kenya letsoho ’me a etsa hore Baiseraele ba hlōle pepenene.—Baahloli 4:7, 12-16, 23; 5:19-21.

Ka baka leo, Armageddone e qala ho ba le sebopeho sa ntoa ea bohlokoa, ho hlōla lehlakore le le leng feela.

Hase Ntoa Pakeng tsa Lichaba tsa Lefatše

Khang e mabapi le ntoa ea Armageddone—puso ea lefatše—ke khang e khōlō kajeno. Empa, le hoja mebuso e ’meli e meholo e hanyetsana e loanela ho busa lefatše hona joale, Armageddone ha e na ho ba ntoa ea lefatše e thulanyang mebuso ena. Ke ’nete hore historing eohle lefatše le tlhōlisanong e senyang chelete haholo le e befileng ea lihlomo, e susumelitseng tlhaloso ena ea India Today: “Hona hohle ka sehlōhō ho susumeletsa lefatše lintšing tsa Armageddone—ntoa ea ho qetela har’a lichaba.” Empa Tšenolo 16:14 e bontša hore ‘marena a lefatše lohle leo ho ahiloeng ho lona’ a ikopantse hammmoho ‘ntoeng ea letsatsi le leholo la Molimo o matla ’ohle.’

Ka baka leo, Armageddone hase ntoa ea motho. Ke ntoa ea Molimo. Armageddone e tla fihla lichaba tsohle tsa lefatše li kopane ho loantša ‘makhotla a leholimo’ a laoloang ke “Morena oa marena le ’Musi oa babusi,” Kreste Jesu. Ke morena ea loketseng oa lefatše hobane Molimo o boetse o “beile lintho tsohle ka tlas’a maoto a hae [Kreste].”—Tšenolo 19:14, 16; Ba-Efese 1:22.

Hase Pheliso ea “Nuclear”

Ho batho ba bangata, ntoa ea “nuclear” e tšosa haholo hore motho a ka nahana ka eona. Liphuputso tse neng li kopanetsoe ke bo-ramahlale ba 40 ka 1983 li hakanyetsa hore ntoeng e sebelisang feela “nuclear” karolo e le ’ngoe ho tse tharo ho isa halofong ea baahi bohle ba lefatše e ka shoa hang-hang. Tlaleho ea bona, e phatlalalitsoeng makasineng oa Science, e profeta bokamoso bo lefifi bakeng sa baphonyohi. E-ea lemosa: “Ha mebuso e meholo e ka fapanyetsana lihlomo tsa ‘nuclear’ ka tekanyo e khōlō, ho ka etsahala hore tikoloho ea lefatše e be le liphetoho tse lekaneng ho etsa hore karolo e khōlō ea limela le liphoofolo e fele Lefatšeng. Ha ho le joalo, ho bonolo hore batho le bona ba fele.”

Na Molimo o matla ’ohle Jehova o ka lumella ntho e tšabehang joalo? Che! Ha a ka a bōpela lefatše “lefeela,” empa o re tiisetsa hore, ‘o le bopetse hore le ahuoe.’ (Esaia 45:18) Ka Armageddone Molimo o tla “senya ba senyang lefatše,” e seng ho le halika phelisong ea mollo oa “nuclear.”—Tšenolo 11:18.

Hase Ntoa ea Mocha-o-chele Pakeng tsa Botle le Bobe

Baeta-pele ba bang ba bolumeli ba lumela hore Armageddone ke khohlano e sa khaotseng pakeng tsa makhotla a botle le bobe, ebang ke lefatšeng lohle kapa ka mohopolong. Mohlalosi e mong oa Bibele o hlokomela hore, “Armageddone e etsahala karolong e ’ngoe ea lefatše tsatsi le leng le le leng.” Hona ho ka ba joalo joang ha Bibele e tšepisa hore Armageddone e tla tlisa timetso e potlakileng holim’a lichaba le batho bohle ba babe? Ka Armageddone, Kreste e le Morena oa Molimo ea tlotsitsoeng, ‘o tla thumakanya lichaba ka molamu oa tšepe, a li silakanye joale ka pitsa ea letsopa.’—Pesaleme ea 2:9; bona le Liproverbia 2:21, 22; Tšenolo 19:11-21.

Hase ho Oa ha Moruo oa Lefatše

Mebuso e meholo ka ho fetisisa ea lefatše e tšohile hore ho hlōleha ha linaha tse fokolang moruong ho lefa melato ea tsona ho tla khannela boemo ba lefatše ba moruo ho seo makasine oa Business Life e se bitsang “Armageddone ea Moruo.” Ruri ho oa ha litsamaiso tsa lefatše tsa libanka ho ka ba kotsi, empa e ke ke ea e-ba Armageddone. Armageddone ea Bibele ke boemo ba lefatše lohle bo amang ntoa, e seng moruo. Moprofeta Jeremia o bo hlalosa ka mantsoe ana a hlakileng: “Jehova o na le tseko le lichaba, o tseka le bohle bao e leng nama; o neela ba babe lerumo.”—Jeremia 25:31.

Hase Ntoa ea Bochabela bo Hare

’Moleli oa Evangeli ea tsebisahalang lefatšeng lohle, Billy Graham o bolela hore, “Neng-neng, khohlano ea ho qetela e tla etsahala Bochabela bo Hare.” Tabeng ena o pheta maikutlo a bo-mphato ba hae ba bangata ba bolumeli. Graham o boetse o lumela hore Armageddone e ka liehisoa. O re: “Hona joale ke lumela hore lefatše le habile Armageddone. ’Me haeba batho ba ke ke ba tsoha moeeng ’me ba sokolohela ho Molimo, lefatše le ka ’na la talimana le Armageddone ea lona leshomeng lena la lilemo.”

Sebaka sa Megiddo se ke ke sa e-ba le hona ho phutha “marena a lefatše, le makhotla a ’ona.” (Tšenolo 19:19) Ka baka leo, na ha ho hanyetse thuto efe kapa efe ea hore Armageddone e tla ba ntoa ea lefatše e petellelitsoeng lehoatateng la sebele la Megiddo? Moprofeta Jeremia o bontša hore Armageddone e tla akaretsa ‘likhutlo tsa lefatše’ le hore ba bolailoeng ba tla bonoa “ho nka pheletsong e ’ngoe ea lefatše ho isa pheletsong e ’ngoe ea lefatše.”—Jeremia 25:32, 33.

’Me kaha Armageddone e bolela “ntoa ea letsatsi le leholo la Molimo o matla ’ohle,” ha ho ea ka e thibelang. Ha ho letho le ka etsoang ke batho ho e liehisa. Jehova ‘o beile nako’ bakeng sa hore ntoa e qale. ‘Ha e na ho lieha.’—Tšenolo 16:14; 11:18; Habakuke 2:3, NW.

Motheo oa Tšepo

Batho ba ratang ho loka ba ke ke ba tšoha Armageddone. Ho e-na le hoo, e ka ba motheo oa tšepo. Bibele e re: “Eaba ke bona leholimo le buloa, ’me ha hlaha pere e tšoeu, ’me ea e kaletseng o bitsoa Motšepehi le Oa ’nete; o ahlola, o loana ka ho loka.” (Tšenolo 19:11) Ntoa ea Armageddone e tla hleka lefatšeng bokhopo bohle ’me e bule tsela bakeng sa ho tsosolosoa ha maemo a ho loka.—Esaia 11:4, 5.

Ka lilemo tse fetang lekholo, lentsoe la Lipaki tsa Jehova le utloahetse le bolela tlhōlo e tlang ea Molimo o hlōla babusi ba babe, ba hanang ho nehela tsamaiso ena. Haholo-holo ho tloha selemong sa 1925 Lipaki li hlaketsoe hore na Armageddone ke eng ’me li hana ho khutsa ho bua ka eona. Takatso ea tsona ke ho thusa batho hore ba phonyohe Armageddone, e seng e ba bolaee. Ka hona li phehella bohle ba mamelang ho latela keletso ea Joele 2:31, 32, e buang ka ‘ho tla ha letsatsi la Jehova le leholo, le tšabehang’ ’me e-ea eketsa: “Ho tla bolokeha e mong le e mong ea rapelang lebitso la Jehova.”

Ba bang, leha ho le joalo, e ka ’na eaba ba sa ipotsa: Le hoja Armageddone e tla nka lefatše lohle, na e tla qala Bochabela bo Hare? Molimo o lerato o ka lumella Armageddone joang? Na Armageddone e tla lateloa ke khotso ea ’nete? Bala litokollo tse tharo tse latelang tsa Molula-Qhooa, hobane li tla arabela lipotso tsena.

[Mongolo o botlaaseng ba leqephe]

[Lebokose le leqepheng la 6]

Armageddone ke Eng?

Armageddone HASE . . .

◆ sebaka se itseng lefatšeng

◆ ntoa pakeng tsa lichaba

◆ pheliso ka “nuclear”

◆ ho oa ha moruo oa lefatše

◆ ntoa pakeng tsa botle le bobe

◆ khohlano ea Bochabela bo Hare

Armageddone KE . . .

◆ boemo ba lefatše lohle boo ho bona lichaba tsohle tsa lefatše li tla loana le Mora oa Molimo, Kreste Jesu, le lebotho la hae la mangeloi ’ntoeng ea letsatsi le leholo la Molimo o matla ’ohle’

[Setšoantšo se leqepheng la 7]

Armageddone Morena oa Molimo, Jesu Kreste, ‘o tla thumakanya lichaba tse mpe ka molamu oa tšepe, a li silakanye joale ka pitsa ea letsopa.’—Pesaleme ea 2:9.