Bonngoe Ho Boleleng Lentsoe la Jehova

“Har’a lōna le be le boikutlo ba kelello bo kang bo bileng ho Jesu Kreste, hore ka kutloano le tle le tlotlise ka molomo o le mong Molimo le Ntate oa Morena oa rōna Jesu Kreste.”—BA-ROMA 15:5, 6, NW.

1. (a) Tokisetso ea Jehova ea ho kopanya batho ba hae ke efe? (b) Mangolo a bontša eng ka taolo ea ho kopanngoa hona?

JEHOVA o bokelletse lipaki tsa hae bonngoeng bo hlollang ba lefatše lohle. Hona ho tumellanong le tokisetso ea lelapa la Molimo e hlalosoang ke moapostola Pauluse ho Ba-Efese 1:10: “Hore, etlere nako tse beiloeng ke oona ha li se li phethehile, o tle o bokellele tsohle ho Kreste, leha e le tse leholimong, leha e le tse lefatšeng.” Ba tlang ho bokelloa pele ke ba “mohlatsoana” oa Bakreste ba tlotsitsoeng ba tla ea leholimong ’me kamorao ho moo “bongata bo boholo . . . ba lichaba tsohle” bo lebelletseng ho phonyoha ho kena ‘lefatšeng le lecha’ le tšepisitsoeng ke Molimo.—Luka 12:32; Tšenolo 7:3, 4, 9, 13-17; 21:1, 5.

2. Ke eng e nolofaletsang Lipaki tsa Jehova ho bua “ka kutloano”?

² “Ka kutloano”—ke tsela eo ka eona Lipaki tsena tsa Jehova li buang molaetsa oa ’Muso oa hae. Ke hobane’ng ha li khona ho etsa joalo? Ke kahobane, lefatšeng la rōna, li bontša “boikutlo ba kelello bo kang bo bileng ho Jesu Kreste” ha a le lefatšeng. E ne e se karolo ea lefatše lena le ikhohomosang. Ho e-na le hoo, a ikokobetsa ho etseng thato ea Molimo le ho haheng bonngoe bo mofuthu le bo lerato har’a barutuoa ba hae. Hona e bile qaleho ea bonngoe bo khethollang Bakreste ba ’nete makholong a lilemo a ileng a latela.—Ba-Filippi 2:5-8; Johanne 13:34, 35; 17:14.

3. (a) Ke phapang efe e matla e bonoang lefatšeng kajeno? (b) Mangolo a thusa joang ho khetholla mokhatlo oa lefatše lohle oa Bakreste ba ’nete?

³ Bonngoe bona ba phutheho bo fihlile moo bo bonahatsoang ka ho babatsehang ka ho fetisisa ‘mehleng ena ea qetello,’ bo ema bo fapane hole le likarohano tse hlasetseng tsamaiso ea lintho ea Satane, moo lehloeo le tlōlo ea molao li atileng. (2 Timothea 3:1-5, 13; Mattheu 24:3, 12) Historing ea batho ha ho mohla ho kileng ha e-ba teng lefatšeng, linaheng tse 203, phutheho e lumellanang ka botlalo tumelong, morerong le ketsong. Mokhatlo ona oa lefatše lohle oa barutuoa ba Jesu o ka hlokomeloa ka litholoana tseo o li beang.—Johanne 15:8; Ba-Heberu 13:15; Ba-Galata 5:22, 23.

Bonngoe ba Ketso

4. (a) Ke ho hloka kutloano hofe ho ileng ha hlaha phuthehong ea lekholo la pele la lilemo? (b) Ho ea ka Liketso 15:1-6, ha qalisoa bohato bofe ba puso ea leholimo?

⁴ Bonngoe bona ba ketso ka phuthehong ea Jehova re bo bontšoa ho Liketso khaolo ea 15. Ka leihlo la hao la kelello, bona lipaki tse hōlileng tsebong tsa Jehova—baapostola ba 12, baholo ba bang ba phutheho ea Jerusalema le Pauluse le Barnabase le baholo ba phutheho ea Antioke. Antioke le Jerusalema, basokolohi ba bang ba Bajode ba tsitlelletse hore batho ba lichaba ba bolotsoe le hore ba boloke Molao oa Moshe e le hore ba bolokehe. Ka hona baapostola le baholo ba phuthehile “ho rerisana taba eo.”—Liketso 15:1-6.

5-7. (a) Ke ka kutloisiso efe ho ileng ha ‘fetolanoa haholo’? (b) Ha fanoa ka bopaki bofe? (c) Mangolo a etsoa hore a pakele taba joang? (d) Jakobo a etsa qeto efe e hōlileng tsebong, e isa qetong efe? (e) Ha latela ketso ea mofuta ofe?

⁵ Bothata bona bo buisanoa ka maikutlo a bulehileng, ka banna bao ba inehetseng ba bea mabaka ’ohle a emelang taba le a e tsoang. Ha baa kopana ba se ntse ba entse qeto. Ba utloisisa ho hlahloba taba ka nģa tsohle. Ho ‘fetolanoa haholo,’ empa ka ho totobetseng ba boloka taolo ’me ho mameloa ka hloko maikutlo a e mong le e mong. Moapostola Petrose o paka ’nete ea hore Molimo o neile batho ba sa bollang ba lichaba moea o halalelang—ruri ke bopaki bo matla ba hore lebollo la nama ha le sa hlokahala bakeng sa ho bolokeha. Barnabase le Pauluse ba tlatsetsa bopaking bona, ba hlalosa lintho tse ngata tse babatsehang tseo Molimo o li finyelletseng ka tšebeletso ea bona ho lichaba.—Liketso 15:7-12.

⁶ Ho latelang, Jakobo o qotsa Mangolo a tšehetsang mabaka a qetang ho behoa. O hlalosa hore Amose 9:11, 12 e supa ho tsosolosoeng ha mohau oa Molimo tlas’a Davida e Moholo, Jesu Kreste, le ho atolosoeng ha mosa o sa tšoanelang oa Jehova ho ea ho ‘lichaba tsohle tse bitsoang ka lebitso la hae.’ Jakobo ha a bone bohlokoa ba ho tšoenya basokolohi ba lichaba ka ho tsitlella hore ba bolotsoe le hore ba boloke melao eohle e Molaong oa Moshe. Leha ho le joalo, ho na le lintho tse seng kae tse hlokahalang: Ba tele borapeli ba litšoantšo, ho ja mali a mofuta ofe kapa ofe le boitšoaro bo litšila.—Liketso 15:13-21.

⁷ Sehlopha se busang se Jerusalema se fihlela qeto ka ntsoe le le leng. Se ntša manģosa ka lengolo le eang phuthehong ea Antioke le qetellang ka khothatso: “Ha le itima ntho tseo, etlaba le etsa hantle. Salang ka khotso!”—Liketso 15:22-29.

Mokhoa oa Tšebetso oa Puso ea Leholimo

8. (a) Sehlopha se Busang sa kajeno se tataisoa joang ho etsa liqeto? (b) Litaba tse ling tse hlakisitsoeng morao tjee ke life?

⁸ Mehleng ea kajeno, Sehlopha se Busang sa Lipaki tsa Jehova, se emelang “mohlanka ea khabane, ea bohlale” oa Morena lefatšeng, se latela mokhoa ona oa baapostola. (Mattheu 24:45-47) Ka hona, phihlelo ea Bokreste, tataiso e tsoang Bibeleng, le ketello-pele ea moea oa Jehova li tsamaisa sehlopha sena sa Lipaki tse tlotsitsoeng ho fihlela liqeto tsa puso ea leholimo litabeng tsa bohlokoa ka phuthehong. Ka mohlala, lilemong tsa morao tjena Sehlopha se Busang se latetse mokhoa oa tšebetso oa Mangolo mabapi le ho hlakisa litaba tse amanang le pono ea Molimo ka “basebeletsi,” letsoalo le fanoeng ke Molimo, ho nka lihlomo tse bolaeang, le hore na boprofeta ba Esaia bo sebetsa ho fihlela kae Paradeiseng ea kamoso lefatšeng.—Bapisa Johanne 14:26; 1 Ba-Korinthe 2:10.

9. Ke mokhoa ofe oa tšebetso oo baholo ba tlamehang ho o latela ha ba sebetsa mathata kajeno?

⁹ Mokhoa o tšoanang oa ho sebetsa litaba o ho Liketso khaolo ea 15 o tlameha ho lateloa le ke baholo ba liphutheho ha ba sebetsa mathata kajeno. Pele, ho tekoe bothata le lintlha tse amanang le bona. E be joale lipaki tse tšepahalang li fana ka bopaki bo hlakileng le bo nang le mabaka tabeng. Ba batlisise Mangolo ho fumana maikutlo a Jehova, hape ba sebelisa thuso e ka ’nang ea e-ba teng libukeng tsa Mokhatlo oa Watch Tower. Ka thapelo ba sebeletsa ho fihlela qeto e phekolang bothata ka lentsoe le le leng, tumellanong le thuto ea Lentsoe la Jehova, molemong oa phutheho.—Esaia 48:17; 1 Ba-Korinthe 14:33.

Thabo—Nakong Eo le Hona Joale

10. (a) Joaloka phuthehong ea lekholo la pele la lilemo, liqeto tsa puso ea leholimo li lokela ho re ama joang kajeno? (b) Liphetoho tsa kajeno li entse hore batho ba Molimo ba matlafale le ho eketseha joang?

¹⁰ Litho tsa phutheho ea Antioke ha li utloa ka qeto ea sehlopha se busang, tsa “thaba haholo ka baka la khothatso ea bona.” Ka ho tšoanang kajeno, Lipaki tsa Jehova li thabela ho tseba ka liqeto tse amang tsamaiso ea phutheho le ho hlakisoa ha thuto e ntlafatsang bophelo ba moea ba batho ba Molimo le ho hōla ha mosebetsi oa Jehova. (Bapisa Tite 2:1.) Empa ha ho sa hlokahala hore Sehlopha se Busang se ngole mangolo a taeo ka letsoho le ho a tsamaisa ka manģosa a tsamaeang ka maoto. Mekhoa ea kajeno ea puisano le khatiso makaleng a fetang 30 a Watch Tower lefatšeng lohle e nolofalitse ho fetisetsa ‘litaba tse molemo tsa lentsoe la Jehova’ ho batho ba limillione ba Molimo ka nako e khutšoaane. Hona ho etsoa haholo-holo ka makasine oa Molula-Qhooa. Ka hona, liphutheho lefatšeng lohle li ntse li ‘tiisoa tumelong, ’me li anafala ka matsatsi ’ohle.’—Liketso 15:30–16:5.

11. Jehova o sebelisitse Molula-Qhooa joang ho phethahatsa Esaia 30:18-21?

¹¹ Ba ’nileng ba bala Molula-Qhooa ka lilemo tsena tsohle ba nyakalletse le ho bona khatiso ea oona e eketseha. E se e le lilemo tse 105 o hatisoa, o eketsehile ho tloha limakasineng tsa Senyesemane tse 6 000 tse neng li tsoa hanngoe ka khoeli, ho ea ho tse 11 150 000 ka lipuo tse 102, limakasine tsohle tse ngotsoeng ka lipuo tse sebelisoang haholo li hatisoa habeli ka khoeli. Ha ho pelaelo hore Molula-Qhooa o sebelisitsoe ka matla ke Moruti e Moholo oa rōna, Jehova Molimo ho phethahatsa tšepiso ena: “Ho lehlohonolo ba mo tšepang [“ba mo lebelletseng,” NW] . . . Litsebe tsa hao li tla utloa lentsoe ka mora’ hao, le reng: Tsela ke eona ena, tsamaeang ho eona, e se re la ea ka ho le letona, kapa ho le letšehali.”—Esaia 30:18-21.

12. (a) Ke hobane’ng ha hona joale re na le lebaka le leng la ho thaba? (b) Tokisetso ee e ncha e ka re tsoela molemo joang?

¹² Joale ho na le lebaka le leng la ho thaba. Ho tloha mathoasong a 1985, lihlooho tsa Molula-Qhooa li hatisoa ka nako e le ’ngoe ka lipuo tse 22!a Litokollo tsena kaofela li na le setšoantšo se tšoanang sekoahelong sa tsona. Li na le letoto le tšoanang la lihlooho tse qalang le lihlooho tse tšoanang tse ithutoang. Hona ho lokisetsa lenaneo la “phepo” le tlang ka nako e le ’ngoe le tla kopanya batho ba Jehova ha ba hōla moeeng hore ‘ba tle ba finyelle bohle bonngoeng ba tumelo.’ Ho lokela ho re susumetsa haholoanyane hore ‘ka kutloano re tle re tlotlise ka molomo o le mong Molimo le Ntate oa Morena oa rōna Jesu Kreste.’—Ba-Efese 4:13; Ba-Roma 15:6, NW.

13. (a) Lenaneo lee le leholo hakae? (b) Ka baka leo 1 Ba-Korinthe 1:10 e ka sebelisoa joang?

¹³ Ha u tšoere makasine ona letsohong thutong ea beke le beke ea phutheho ea Molula-Qhooa, na ha ho u thabise ho tseba hore boholo ba banab’eno lefatšeng lohle ba tla be ba kopane ho ja lijo tsona tsee tsa moea ka letsatsi le tšoanang? E, hona ho tla be ho etsahala hohle Amerika e ka Leboea le e ka boroa, boholo ba Europa, Japane le libakeng tse ngata Afrika boroa! Ho hakanyetsoa hore hona joale batho ba fetang karolo ea 90 lekholong ba bang teng thutong ea Molula-Qhooa lefatšeng lohle—ba ka bang 2 500 000 beke le beke—hona joale ba kopanela tokisetsong ena ea “ho fepuoa” ka nako e le ’ngoe. Ba ‘phethehile boikutlong bo le bong le khopolong e le ’ngoe.’ (1 Ba-Korinthe 1:10) Ha maemo a lumela, ho tla eketsoa lipuo tse ling.

14. Malapa a tla rua molemo joang?

¹⁴ Ho tla fihlela joale, ka baka la ho se tšoane ha lipuo, litho tsa lelapa le le leng li ne li siana ka likhoeli ha li ithuta lihlooho tse itseng tsa Molula-Qhooa. Empa hona joale li ka kopana thutong ena. Ka mohlala, batsoali ba bafalli ba itsebelang puo e le ’ngoe feela ba ka lula fatše le bana ba bona ho lokisetsa hammoho thuto ea beke e tšoanang ea Molula-Qhooa ka lipuo ka bobeli. Malapeng a buang lipuo tse peli, batsoali ba tla hlomelloa hamolemonyana ho phethahatsa taelo e ho Ba-Efese 6:4 le; 2 Timothea 3:14, 15.

15. (a) Tšebeletsong ea rōna ea pontšeng, joale re ka etsa joang tumellanong le Esaia 52:8, 9? (b) Ho entsoe eng bakeng sa mathoaso a 1985, le kamoso?

¹⁵ Hape, nahana ka tšebeletso ea rōna ea pontšeng ka limakasine. Ka tsela ena e eketsehileng, baboleli ba ’Muso lefatšeng lohle joale ba ka ‘lumisa litlatse hammoho’ ha ba fana ka boitsebiso bo tšoanang bathong ba lefatše ka nako e tšoanang. (Esaia 52:8, 9) Ha bahoeletsi ba etsa bopaki ba limakasine seterateng tšimong e buang lipuo tse ngata, ba ka bontša limakasine tse nang le sekoahelo se tšoanang ka lipuo tse peli kapa ho feta. Ak’u inahanele feela! Mathoasong a 1985, baboleli ba ’Muso lefatšeng lohle ba tla be ba fana ka bopaki bo phahamisang le bo kopaneng bo amanang le Armageddone! Ka nako ea teng, Jehova o tla tataisa batho ba hae hore ba etse lipolelo tse ling tse matla tse kopaneng lefatšeng lohle ha ba sebeletsa “hammoho tumelo ea Evangeli.” (Ba-Filippi 1:27) Ho hatisoa ha Molula-Qhooa ka nako e le ’ngoe ka lipuo tse ngata ho tla nolofatsa lipolelo tse joalo.—Bapisa Daniele 11:44.

Ho Sheba Pele

16. (a) Molula-Qhooa ona o re bolella eng ka mosebetsi oa limakasine maqepheng a 8, 9 le 22? (b) Ke hobane’ng ha batho ba batla limakasine tsa rōna kajeno?

¹⁶ Selemong sa 1984, Lipaki tsa Jehova li fane haholo ka limakasine tse peli Molula-Qhooa le Tsoha! Jehova o hlohonolofalitse mosebetsi ona haholo, joalokaha ho bonoa lipalong tse hatisitsoeng maqepheng 8, 9 le 22 makasineng ona. Lefatšeng lohle, kabo ea rōna ea limakasine tšimong ka 1984 e eketsehile ka 11,1 lekholong ho etsa palo-khōlō ea 287 358 064, ha lipeeletso tsa limakasine li ile tsa eketseha ka 3,2 lekholong ho ea ho 1 812 221. Ha ho pelaelo hore palo ea batho ba batlang ho tseba hore na ke hobane’ng ha lichaba li tsielehile, ‘li sa tsebe moo li tsoang le teng,’ e ntse e eketseha. (Luka 21:25, 26) Batsoali ba batlela bana ba bona bokamoso bo thabileng—ntho e ’ngoe e molemo ho feta lefatše le halikiloeng ka ntoa ea “nuclear.” Limakasine tsa rōna li na le tšepo e phelang!—Mattheu 12:18, 21; Ba-Roma 15:4.

17. Limakasine tsa rōna li tla re thusa joang ho hanela Diabolose?

¹⁷ Ho thoe’ng ka 1985? Molaetsa o ho Molula-Qhooa le ho Tsoha! o ntse o toba taba ho ea pele. Ke ho ka lebelloang ha mehla ea qetello ea lefatše la Satane e ea pheletsong. (Tšenolo 12:12) U se lobe litaba! Diabolose o rata ho re nyahamisa ho kopaneleng kamehla tšebeletsong ea Jehova. E, Satane o tla leka ho re arohanya le sehlopha sa batho ba Molimo le mesebetsi ea sona, e be o-oa re harola. (1 Petrose 5:8) Empa re ka mo hanela ka hore kamehla re ee libokeng ho ea fumana tsebo e nepahetseng, le ka ho sebelisa tsebo ena e eketsehileng ho sebeletseng Jehova.—Ba-Efese 6:11, 14-16; Ba-Kolosse 1:9-11.

18. (a) Boikarabelo ba hao bo boholo hakae u le mohoeletsi oa ’Muso? (b) Re ka sebelisa keletso ea Ba-Roma 12:10, 11 le 15:5, 6 joang?

¹⁸ Na u mohoeletsi oa ’Muso? Haeba ho joalo, u boemong bo ka sehloohong mokhatlong oa kajeno oa puso ea leholimo. Joaloka Mokreste ea inehetseng, mohlomong u na le boikarabelo bo bong ka phuthehong. Empa leha ho le joalo, ha u phelela lebitso la Jehova, u tlameha ho ba mosebeletsi ea chesehang tšimong. Re kopane leratong la boena re bile re ratana, bohle re tsoela pele ho cheseha moeeng ha re ‘sebeletsa Jehova.’ (Ba-Roma 12:10, 11) Ho sa tsotellehe likhatello tseo re li utloisoang ke Satane le lefatše la hae, re tlameha ho tsoela pele re le sehlopha se le seng, e, ‘ka kutloano le ka molomo o le mong,’ ho tlotlisa Jehova ka ho tsebahatsa merero ea hae ea ’Muso.

19. (a) Re ka loana joang ka katleho le mahloriso le mathata a mang? (b) Sofonia 3:8, 9 e re nea keletso efe?

¹⁹ Ba bangata ho rōna ba tlameha ho loana le mahloriso kapa tšimo e sa arabeleng boboleling ba rōna. Leha ho le joalo, a re tsoeleng pele ho bontša boikutlo bo kang bo bileng ho Kreste Jesu. (Johanne 16:33; 1 Petrose 4:1, 2) Re bontše sebete sa ’nete re le sehlopha se kopaneng—matla a ka hare a moea a tiisetsang ’me a sa fele tlas’a khatello. (Pesaleme ea 27:14; Ba-Filippi 1:14) Re se khoehlise letsoho ho batla ba kang linku. Re lule re ‘lebeletse’ Jehova le letsatsi la hae la liphetetso, re mo sebeletsa re momahane ha re bitsa lebitso la hae le ho bua ‘puo e hloekileng’ ea ’nete.—Sofonia 3:8, 9, NW.

20. (a) Re ka fumana thabo ea ’nete joang? (b) Esaia 11:6-9 e phethahetse ka ho tsotehang joang?

²⁰ Ka ho momahana, e se eka bohle ba tlotlisang Molimo ‘ba ka apara motho e mocha ea bōpiloeng ka thato ea Molimo ho lokeng le khalalelong ea ’nete.’ (Ba-Efese 4:24) Hona ho fella ka thabo ea ’nete. Ho bontšitsoe ho Esaia 11:6-9, e re bolellang ka paradeise ea moea e teng hona joale har’a batho ba tsosolositsoeng ba Jehova. A khotso le kutloano! A bosieo ba meharo le botho bo kotsi! Tlhorong ea tlhaloso ena ea paradeise, re hlokomela mantsoe ana: “Ha ho sa tla hlola ho senngoa thabeng eohle e halalelang ea ka, hobane lefatše le tla tlala tsebo ea Jehova, joale ka ha metsi a aparetse leoatle.” ‘Thaba e halalelang’ ea Jehova ea borapeli bo kopaneng e theiloe ka ho tiea kajeno lefatšeng lohle. Hobane’ng? Hobane Jehova o susumelitse lipaki tsa hae hore li tlotlise lebitso la hae ka ‘kutloano le ka molomo o le mong.’ Ka baka leo “lefatše,” boemo ba moea ba batho ba Hae, le tla tlala ka “tsebo ea Jehova.”

21. Ke hobane’ng ha re lokela ho aba limakasine tsa rōna haholo kamoo ho ka khonehang?

²¹ E se eka rōna, ka matla a fanoang ke Jehova, re ka fana ka Molula-Qhooa le molekane oa oona Tsoha! ka bophara kamoo re ka khonang. ’Me re etse joalo ka tšepo ea hore lipheletso tsa lefatše le malapa ’ohle a lichaba, a emetsoeng, a tla ‘hopola Jehova, a sokolohele ho eena.’—Pesaleme ea 22:27; Tšenolo 15:4.

[Mongolo botlaaseng ba leqephe]

Ho re Hopotsa Lintlha tsa Sehlooho Sena—

◻ Phutheho ea lekholo la pele la lilemo e ne e sebetsa joang?

◻ Ke melemo efe e lokelang ho hlahisoa ke khatiso ea nako e le ’ngoe ea Molula-Qhooa?

◻ Ke boiteko bofe bo botle bo entsoeng ka limakasine ka 1984?

◻ Re ka atleha joang moeeng, le linakong tsa liteko?