Baboleli ba ’Muso Baa Tlaleha

Kopano e Thabisang Brazil

Ba 63 ho baromuoa ba 67 ba koetlisitsoeng Gileade bao hona joale ba ntseng ba sebeletsa Brazil ba ile ba itlhahisa ho nkoa setšoantšo sena sa bohlokoa. Kopano ena e thabisang e etsahetse ka la 18 Pulungoana, 1986, nakong ea ketelo ea A. D. Schroeder, setho sa Sehlopha se Busang sa Lipaki tsa Jehova Brooklyn, New York.

E ka batla e e-ba lilemo tse 41 hantle pejana ho letsatsi leo—ka la 17 Pulungoana, 1945—ha liithuti tse peli tse qetileng thupelo ea tsona sehlopheng sa pele sa Sekolo sa Bibele sa Watchtower Gileade li e-tla Brazil. Bakeng sa se seng sa tsona, Charles Leathco (ea kamorao, ka letsohong le letšehali ho ea bohareng), ena e ne e le kopano e khethehileng hobane eena le moeti Charlotte Schroeder ba ne ba le sehlopheng se le seng Gileade, ’me Moena Schroeder e ne e le e mong oa barupeli ba bona.

Ho tloha ka sehlopha seo sa pele, kakaretso ea baromuoa ba 285 e ile ea tla Brazil. Har’a bona ho ne ho e-na le matsoalloa a 16 a Brazil. E mong oa bona, Augusto Machado (ea ka letsohong le letšehali moleng o kapele), o ne a ithutile ’nete ho e mong oa baromuoa ba pele, a ea Gileade ’me a khutlela Brazil. O sebelitse ofising ea lekala ka lilemo tse fetileng tse 30 ’me hona joale ke mohokahanyi oa Komiti ea Lekala. Le hoja baromuoa ba bangata e se e se baromuoa, mosebetsi o motle oo ba o entseng o ntse o setse. Ka 1945 ho ne ho e-na le bahoeletsi ba ’Muso ba 394 feela naheng eo, empa hona joale Brazil e fetile pakane ea ba 200 000, ’me e tlalehile tlhoro ea bahoeletsi ba 201 226 ka Tlhakola 1987.

Ebile thabo e kaakang ho baromuoa ba Brazil, ba bacha le ba hōlileng, ho ikhopotsa kopanong ena e thabisang tšebeletso eohle e tsotehang ea lilemo tse 41 tse fetileng.