O ne a Thabela Molao oa Jehova

ALBERT D. SCHROEDER, setho sa Sehlopha se Busang sa Lipaki Tsa Jehova, o ile a phetha tšebeletso ea hae ea lefatšeng ka Laboraro la la 8 March, 2006. O ne a le lilemo li 94 ’me o ne a qetile lilemo tse fetang 73 a le tšebeletsong ea nako e tletseng.

Mor’abo rōna Schroeder o hlahetse Saginaw, Michigan, U.S.A., ka 1911.a Ha e sa le ngoana, o ile a ithuta lintho tse ngata ka Bibele ho nkhono oa hae, ea ileng a boela a mo ruta hore a rate ho bala Lentsoe la Jehova. O ile a ithuta Selatine, Sejeremane le boejiniere ba motlakase Univesithing ea Michigan. Leha ho le joalo, ha kananelo ea hae bakeng sa Mangolo e ntse e eketseha, o ile a khaotsa lithuto tsa hae eaba o etsa mosebetsi oa ho bolela ka ’Muso ka nako e tletseng. Ka 1932 e ile ea e-ba setho sa lelapa la Bethele e Brooklyn, New York.

Ka 1937, ha Mor’abo rōna Schroeder a le lilemo li 26, o ile a behoa hore a okamele mosebetsi oa Lipaki Tsa Jehova Brithani. Cheseho ea hae bakeng sa mosebetsi oa boboleli e ile ea khothatsa ba bangata moo hore ba kene tšebeletsong ea nako e tletseng. Mohlankana e mong ea neng a sebetsa le eena Bethele e London e ne e le John E. Barr. Hamorao ba ile ba sebetsa hammoho ka lilemo tse ngata Sehlopheng se Busang.

Mosebetsi oo Mor’abo rōna Schroeder a ileng a o etsa molemong oa Lipaki Tsa Jehova o ile oa hlokomeleha lilemong tsa ntoa. Ka August 1942 o ile a lelekoa Brithani. Ka mor’a leeto la sekepe le tepelletsang la ho tšela Leoatle la Atlantic nakong eo ea ntoa, o ile a fihla Brooklyn hape ka September.

Ka nako eo, bahlanka ba Jehova ba ne ba se ntse ba lebeletse hore ho na le mosebetsi o moholo o lokelang ho etsoa ka mor’a Ntoa ea II ea Lefatše. Mor’abo rōna Schroeder o ile a makala a ba a thaba ha a ne a fuoa kabelo ea hae e latelang—e leng ea ho hlophisa thupelo ea thuto bakeng ea Sekolo sa Bibele sa Gileade sa Watchtower. Ke lilemo-lemo, e ile ea e-ba morupeli Sekolong sena, a thusa ho koetlisa baromuoa. Liithuti tseo a ileng a li ruta Gileade le tseo a ileng a li ruta hamorao Sekolong sa Tšebeletso sa ’Muso lia thaba ha li hopola nako ea ha a ne a li ruta. O ne a thabela ho ruta liithuti tsa hae ho rata melao ea Molimo ’me o ne a hatisa bohlokoa ba ho tseba Jehova.

Ka 1956, Mor’abo rōna Schroeder o ile a nyala Charlotte Bowin, ’me mora oa bona e leng Judah Ben o ile a hlaha ka 1958. Mor’abo rōna Schroeder e ne e le monna le ntate ea molemo oa Mokreste. Ka 1974, o ile a qala ho sebeletsa Sehlopheng se Busang, moo temohisiso ea hae e ileng ea ananeloa haholo. E ne e le motho ea mosa le ea ikokobelitseng eo, ka holim’a tsohle, a neng a batla ho tlotlisa lebitso la Molimo le phahameng. Re kholisehile hore Mor’abo rōna Schroeder o amohetse moputso oa hae oa leholimo joaloka Mokreste ea tlotsitsoeng eo ka sebele a neng a “thabela molao oa Jehova.”—Pesaleme ea 1:2.

[Mongolo o botlaaseng ba leqephe]