Moea Oo Jehova a o Hlohonolofatsang

“MORENA a be le moea oo u o bontšang. Mosa oa hae o sa tšoanelang o be le lōna.” Ka mantsoe ana, Pauluse o ne a phetha lengolo la hae la bobeli le eang ho Timothea. (2 Timothea 4:22, NW) E tlameha e be Timothea le bao a nang le bona ba ile ba thaba hakaakang ke ho babatsoa hoo—ho tseba hore ba bontšitse moea oo Jehova a o hlohonolofatsang!

Empa feela moea oo Jehova a o hlohonolofatsang ke eng? Ha e le hantle ho khethollang ba nang le moea oo ke eng? ’Me le rōna re ka bontša moea oo joang ’me ra amohela tlhohonolofatso ea Jehova?

Ho re thusa ho arabela lipotso tsena, a re khutleleng morao mehleng ea Moshe. Baiseraele ba lefeelleng. Jehova o sa tsoa thea selekane sa Molao le bona, ’me joale o ba laela tsela eo ba lokelang ho mo rapela ka eona. Hona ho akarelletsa ho haha tente ea pokano e nkehang e neng e tla hloka gauda e ngata, thepa ea bohlokoa e ngata le banna ba litsebi hore ba e hahe. Monyetla oa ho fana ka limpho ka boithatelo bakeng sa ho fana ka thepa e hlokahalang le basebetsi o beoa ho sechaba ka mantsoe ana: “Ntšang ho tsa lōna seo le se abelang Jehova. Motho ka mong eo pelo ea hae e ratang, a ke a tlise se abetsoeng Jehova, gauda, silevera, le koporo; purepera . . . Banna bohle ba masene ba har’a lōna ba tle ba tle, ba sebetse tsohle tseo Jehova a li laetseng; e le tabernakele le tente ea eona, le sekhurumetso sa eona.”—Exoda 35:5-19.

Sechaba se ile sa arabela joang monyetleng oo? Karolo e setseng ea khaolo ea 35 e bolela hore ‘ba susumelitsoeng ke lipelo tsa bona’ le ‘ba pelo tse ithatetseng’ ba ntšitse menehelo ’me ba itlhahisa mosebetsing ka matla ho bontša hore ba ne ba nka monyetla ona o neng o beiloe ka pele ho bona e le oa bohlokoa. (Temana ea 21, 22, 26) Tsela eo ba ileng ba arabela ka eona ke eo khaolo ea 36, temana 6, e re bolellang hore “Moshe [a] laela hore ho tumisoe liahelong taba e reng: Banna le basali ba se ke ba hlola ba tlisa likabelo tse abetsoeng mosebetsi oa sehalalelo. Sechaba sa thibeloa ka hoo ho ’na se tlisa.” E, ba ile ba tlameha ho thibeloa! Jehova ha a ka a sebelisa masene a hatellang ha a etsa hore ho phatlalatsoe: “Motho ka mong eo pelo ea hae e ratang, . . . ” Phello e bile hore sechaba se ile sa bontša moea oa boithaopo, ’me hona ha tlisa mahlohonolo ka sebopeho sa thabo e khōlō, hammoho le tšireletso ea Jehova le tataiso ea hae ho tsohle tseo ba ileng ba li etsa.

Lilemo hamorao, moea o tšoanang o ile oa boetse oa bontšoa hape. Hona ho etsahetse ha Morena Ezekiase a ne a sebeletsa ho tsosolosa borapeli bo hloekileng Iseraeleng. Tlaleho e re bolella hore, ha ba fuoa monyetla, “ba phutheho ba tlisa mahlabelo le liteboho, ’me bohle ba pelo li ratang ba hlahisa licheso.” Phello? “Ezekiase le sechaba sohle ba thaba, ke hobane Molimo o no o ratisitse sechaba; etsoe taba eo ea etsahala e sa ka ea reroa.”—2 Likronike 29:31-36.

Bakreste ba Bontša Moea o Nepahetseng

Na re bona moea o tšoanang oa ho ithaopela ho itela mehleng ea Bokreste? Hlokomela seo Pauluse a se ngotseng ka Bakreste ba Filippi ho Ba-Filippi 1:3-5: “Ke leboha Molimo oa ka ka mehla eohle ha ke le hopola; ke ntse ke le rapella bohle ka mehla, ka thabo, merapelong eohle eo ke e etsang, kahobane le fela le khomaretse [“le nkile karolo,” Kingdom Interlinear] Evangeli, ha e sa le mohla le qalang ho e utloa, ho fihlela joale.” Bakreste ba Filippi ba ne ba ikhethile ka litsela life ‘ho nkeng karolo ha bona evangeling’? Litemana tse latelang ha li hlakise feela hore ba ne ba ithaopela ho lumellanya tsela eo ba phelang ka eona le melao-metheo ea Bibele e le hore ba ka ntšetsa pele litaba tse molemo empa ba ne ba boetse ba cheseha boboleling ba bona le ho ruteng ba bang litaba tse molemo.

Hore Bakreste bohle ba lokela ho ithaopela ho kopanela mosebetsing oa ho bolela ka litsela tsena ho hatisoa ho Ba-Heberu 13:15: “A re hlahiseng ka mehla ho Molimo ka eena sehlabelo sa poko, e leng tholoana ea melomo e bolelang lebitso la hae.” Kahoo ho bolela litaba tse molemo ho etsoang ke Mokreste e mong le e mong ke tsela e ka sehloohong eo re ka bontšang moea oa boithaopo o khethollang barapeli ba ’nete ba Jehova kajeno. Ho phaella moo, Bakreste ba hopotsoa hore le ka mohla ba se ke ba “lebala ho etsa batho hantle, le ho [arolelana lintho le ba bang]; hobane Molimo o khahlisoa ke mahlabelo a joalo.”—Ba-Heberu 13:16.

Baena ba Filippi ba ile ba bontša moea ona oa boithaopo ka tsela e ’ngoe hape. Khaolong ea 4 Pauluse o bolela makhetlo a ’maloa ao ba ileng ba mo thusa ka oona ka chelete, hoo boboleli ba litaba tse molemo bo ileng ba ntšetsoa pele. (Ba-Filippi 4:14-17) Kahoo ba ile ba etsisa mohlala o motle oa barapeli bao ba pejana ba Jehova. Ka ho totobetseng ba ne ba “tlotlisa Jehova ka moruo oa [bona].” (Liproverbia 3:9) Na re bontša moea o tšoanang ha menyetla e joalo e beoa ka pel’a rōna?

Moea o Amohelehang oa Bonahala Kajeno

Pesaleme ea 110 e bontša hore ho ne ho tla ba le ba bangata ba bontšang oona moea ona oa ho ithaopela ho itela mehleng ea qetello ea tsamaiso ena ea hona joale ha boholo ba batho bo thahasella “’na” feela. Temaneng ea 3 (TLP) rea bolelloa hore, kamor’a hore Messia a nke taolo ’Musong ka 1914, batho ba Molimo ba ne ba tla “ithaopa” le hore ba etsang joalo ba ne ba tla tšoana le “phōka” ka bongata. Na hoo ho ipakile e le ’nete?

Ka ’Mesa 1881 The Watchtower e ile ea hatisa boipiletso bo batlang baboleli ba 1 000 hore ba nke mosebetsi oa ho bolela oa nako e tletseng. Tokollo ea Motšeanong 1881 e ile ea hatisa hore ba tšoarehang mosebetsing ona e tlameha ho ba ba neng ba tla “sebeletsa meputso ea leholimo.” Ka nako ea lilemo tse ’nè, ho ne ho arabetse ba fetang 300—ba khethehile ha ho talingoa palo e nyenyane ea Bakreste ba inehetseng ba neng ba kopanela le Mokhatlo oa Watch Tower ka nako eo.

Moea o tšoanang o tsoela pele ho bonahala kajeno. Ka mohlala, ka 1986 ho ne ho e-na le bo-pula-maliboho (basebeletsi ba nako e tletseng) ba 391 294 ba tlalehang, ka karolelano, khoeli e ’ngoe le e ’ngoe. Eo e ne e le keketseho ea karolo ea 21,2 lekholong, kapa ba 68 473 ho feta selemong se ka pele! Leha ho le joalo, moea ona oa boithaopo ha oa lekanyetsoa ho ba khonang ho qeta nako ea bona e tletseng mosebetsing oa ho bolela.a

Ba bangata ba nang le boikarabelo bo bong ba Mangolo—bo kang ba ho hlokomela lelapa, ba holofetseng kapa batsoali ba tsofetseng—le bao bophelo ba bona bo ke keng ba ba lumella ho kopanela tšebeletsong ea nako e tletseng ea Bokreste le bona ba bontša oona moea ona oa ho ithaopela ho itela o thabisang hakana ho Jehova. Hona ho bonahala ha motho a hlokomela hore boholo ba mosebetsi oa ho bolela ka ’Muso linaheng tse ngata o hlile o etsoa ke basebeletsi ba lokelang ho qeta karolo e kholoanyane ea nako ea bona ba sebetsa mosebetsing o mong oa boipheliso kapa ba hlokomela litlamo tsa lelapa kapa boikarabelo bo bong ba Mangolo. Kannete ke pontšo e babatsoang ea moea oo Jehova a o hlohonolofatsang.

Ho Bontša Moea o Nepahetseng Likarolong tse Ling tsa Bophelo

Joaloka mehleng ea Moshe le Ezekiase, menyetla ea ho bontša moea oa boithaopo ea hlaha kajeno ha liphutheho tsa libaka ka bomong li haha Holo ea ’Muso kapa meaho e meng e tšoanang. Na moea o tšoanang oa bonahala litabeng tse joalo? E, ka sebele ho joalo!

Hona ho bonahetse haholo-holo mokhoeng oa kajeno oa ho haha Liholo tsa ’Muso oo hangata o bitsoang merero ea Liholo tsa ’Muso tse hahuoang ka potlako. Makholo a mangata a Lipaki a tla bokana ’me a sebetse ho tloha ka Moqebelo hoseng-seng ho fihlela ka Sontaha mantsiboea—ba bang ba sebetsa bosiu bohle—ho phetha seo likoranta li se bitsang “mohlolo oa mafelo-beke.” Moo ho neng ho se na letho empa e le matlapa a konkreite a beiloeng fatše ka Labohlano, ke Holo ea ’Muso e qetiloeng e sebelisetsoang liboka ka mantsiboea a Sontaha!b

Esita le menyetla e meholoanyane ea ho bontša moea oa boithaopo ea itlhahisa mabapi le ho haha meaho ea makala linaheng tse sa tšoaneng. Mosebetsi oa boithaopo ka ho feletseng o tlatselitseng mosebetsing o entsoeng mererong ena e sa tšoaneng ke o hlollang. Ntle ho ho tlatsetsa ka lipotomane, ho ntse ho e-na le menehelo ea lichelete e nolofatsa ho rekoa ha thepa e hlokahalang. Hangata haholo, Lipaki li ithaopela ho fana ka lintho tse hlokahalang e leng ho fokotsang litšenyehelo tsa moaho haholo.

Mohlala oa sena o etsahetse ha ho hahoa lekala le lecha Sydney, Australia. Mono, baena ba phelang ka leboea le hōle ho Queensland ba ile ba lokisetsa le ho romella liforakha tse ’nè tsa lifate ka sekosekara se senyenyane tse hakanyetsoang ho ba R85 000 ho ea ho R100 000 ho ea setšeng sa moaho! Nakong ea khaho ea lekala, Lipaki tse tsamaeang ka libese tse tsoang Australia Bophirimela, bohole ba lik’hilomithara tse 4 000, li ne li tla ho tla ithaopela ho sebetsa ka libeke tse ’nè ka nako. Ka boithaopo litsebi tsa mesebetsi tse ’maloa li ile tsa sebetsa setšeng ka likhoeli, ’me tse seng kae tsa sebetsa selemo kapa ho feta. Kannete hona e ne e le pontšo ea moea o tšoanang le oo Jehova a o hlohonolofalitseng haholo ka makholo-kholo a lilemo a fetileng le o phetoang hangata kajeno linaheng tse ngata.

Menyetla e eketsehileng ea ho bontša moea oa ho ithaopa e hlaha ha Lipaki li bokana likopanong tse nyenyane le tse khōlō. E ’ngoe le e ’ngoe ea likopano tse joalo e hloka baithaopi ba bangata, hangata e le likhoeli pele ho ketsahalo eo, ho tiisa hore ntho e ’ngoe le e ’ngoe e tla tsamaea hantle ’me e hlophisoe hantle. ’Me hang ha li qalile, ka linako tse ling karolo e le ’ngoe ho tse ’nè ea Lipaki tse teng e tla ithaopela ho thusa ho etsa mesebetsi e mengata e hlokahalang e etsang hore kopano e be e thabisang le e atlehileng. Mosebetsi oo e ka ’na ea e-ba ho fepa lijo kapa ho hloekisa. E ka ’na ea e-ba mosebetsi o sa hlokomeloeng ke boholo ho ba bang teng. Empa Jehova oa o hlokomela! O putsa ba ithaopelang ho etsa se hlokahalang. Na le uena u amohela moputso o hlahang ha Bakreste ba ‘sebeletsana ka baka la lerato’ ka hore ka boithaopo u nehelane ka litšebeletso tsa hao linakong tsa kopano? Na le kile la nahana ho etsa joalo le le lelapa?—Ba-Galata 5:13.

Ha merero ena e khethehileng e re fa menyetla e metle ea ho ithaopa ka moea ona oa boithaopo, ho na le menyetla e meng e mengata ea ho bontša moea o tšoanang letsatsi le letsatsi le beke le beke. Ka mohlala, hang ha Holo ea ’Muso e hahiloe, na u kopanela ka botlalo ho e hloekisa le ho e boloka e le maemong a matle? Na u tšehetsa ho sebetsa ha eona ka ho etsa menehelo ea lichelete ha Jehova a u hlohonolofatsa linthong tse bonahalang? Na u tšehetsa mosebetsi oa ho bolela naheng ea heno ka ho etsa menehelo ofising ea lekala ea sebaka seo? ’Me habohlokoahali le ho feta, na u tšoareha kamehla mosebetsing oa ho bolela litaba tse molemo le ho etsa barutuoa sebakeng sa haeno? Ha ho letho ka sebele le ka hlang la nka sebaka sa ho kopanela ha rōna ha botho mosebetsing ona oo Jesu a o khethileng e le mosebetsi oa bohlokoahali o lokelang ho etsoa nakong ea hona joale, pele ho bofelo ba tsamaiso ena.—Mattheu 24:14; 28:19, 20; Liketso 1:8.

Bohle ba hlaolelang moea ona oo Jehova a o hlohonolofatsang ka ho enneng hakana ba o fumane e le ’nete hore Jehova ‘ha a khopo; a ke ke a lebala mesebetsi ea bona, le kamoo lerato la bona le sebelitseng kateng ka baka la lebitso la hae.’ Le uena, ka ho bontša moea ona oa ho ithaopela ho itela, u ka paka hore “lehlohonolo la Jehova le entša motho, hase mokhathala oa hae o mo ekeletsang leruo.”—Ba-Heberu 6:10; Liproverbia 10:22.

[Mongolo o botlaaseng ba leqephe]