Baboleli ba ’Muso Baa Tlaleha

Ho Phehella Thōmong ea Tsona ea Bomolimo

LIPAKI TSA JEHOVA li nka ka ho teba thōmo ea tsona ea bomolimo ea ho bolela litaba tse molemo tsa ’Muso oa Molimo. (1 Ba-Korinthe 9:16, NW; Liketso 20:26, 27) Banyalani ba bang Fora ba ile ba utloa tšusumetso ea thōmo ena ho finyella e mong le e mong ka litaba tse molemo. Tšimong ea bona ho ne ho e-na le sebaka sa bolulo se bolokileng batšabeli ba lipolotiki le basebetsi ba bacha ba tsoang kantle ho naha. Banyalani bana ba hlalosa: “Re ne re ipotsa hore na ke joang re tla ke re kene kahare ntle leha re menngoe ke e mong ea lulang kamoo. Ka hona ra etsa qeto ea ho buisana le batho ba kantle feela ’me mohlomong re ka fumana memo ea ho ba etela kahare. Mohlankana e mong a amohela limakasine ka cheseho ’me a kōpa hore a eteloe.

“Re ile ra etela mohlankana enoa, ’me thuto ea qalisoa hang-hang. Nako e ’ngoe le e ’ngoe motsoalle oa hae o ne a e-ba teng, empa ha ho mohla a kileng a bua. Qetellong ea thuto ea bobeli, ha re ’motsa hore na le eena o ne a ka rata ho ithuta ka ho eketsehileng ka Lentsoe la Molimo, o ile a arabela: ‘Ho hana eng?’ Ka hona thuto ea bobeli ea qalisoa. Ho tloha qalong feela re ile ra ba memela ho ea libokeng, ’me ha ba s’o lobe le se seng. Tsoelo-pele ea bona e ne e totobetse haholo, haholo-holo sebakeng sa bona sa bolulo, moo kapele-pele ba ileng ba qala ho qoqa ka lintho tseo ba neng ba ithuta tsona, ho ileng ha fella ka thuto ea boraro e ileng ea qalisoa le banyalani. Ka letsatsi le leng sehlopha sohle se ne se le monyako, se se se itokiselitse ho ea sebokeng, ha motsoalle e mong a etsa qeto ea ho ea le sona. O ne a tletse cheseho ’me o ne a batla hore mohlankana oa hae le eena a ithute ka sena sohle. Ka bobeli ba qalisa ho ithuta.

“Ho tla fihlela ka nako eo, ho ne ho tsamaisoa lithuto tse hlano. E ’ngoe le e ’ngoe e ne e ka seboka. E mong le e mong o ne a kopanela thutong ea e mong, ’me le ba bacha ba ne ba kopanela. Kaofela ba ne ba bua ka ’nete, ’me ka baka leo, thuto ea botšelela e ile ea qalisoa le monna e mong, eo le eena a ileng a qala ho ea libokeng le ho pakela kharebe ea hae.

“Ka sebele, hona hohle e ne e le bopaki bo babatsehang sebakeng sena sa bolulo. Ho ne ho se bonolo hore bacha bana ba apare botho bo bocha. Ba ne ba tlameha ho hlōla ho tsuba, bokhoba ba joala, pefo, boitšoaro bo hlephileng le botsoalle bo bobe. Satane o ile a etsa hore metsoalle ea bona ea pele e leke ho sitisa tsoelo-pele ea bona, e ba hohela hore ba tsube kapa hore ba etse meketjana e lerata. E mong oa banna ba thahasellang o ne a tšepisane lenyalo le ngoanana e mong eo e neng e le oa bolumeli ba mehlolo. Ngoanana o ile a leka ho mo khelosa ’neteng. Leha ho le joalo, qetellong ngoanana eo o ile a qalisa ho ithuta ’me ho tloha ka nako eo o entse tsoelo-pele e ntle.”

Banyalani bao baa tlaleha, “Ho latela litaba tsa morao-rao, e mong oa bahlankana bao o ile a ea chankaneng ka baka la ho ema ha hae a sa jele paate. Ka nako e katlaase ho selemo, ba bang ba tšeletseng ba ile ba kolobetsoa, bao ba bahlano ho bona ba ileng ba kenela tšebeletso ea bopula-maliboho bo thusang hang-hang. Ho sehlopha seo sohle, ba tšeletseng hona joale ke bo-pula-maliboho ba kamehla, ’me ba na le pakane ea mosebetsi oa bopula-maliboho bo khethehileng.”

Banyalani baa ba ile ba putsoa ka ho enneng hakaakang ka baka la ho phehella ha bona ho ntšetsa pele thōmo ea bona ea bomolimo ea ho batla ba seka linku! Jehova ka sebele o ile a hlohonolofatsa boiteko ba bona bo tšepahalang. Le haeba re ke ke ra ba le liphihlelo tse joalo tse ikhethang, kamehla re batla ho ntšetsa pele ka botšepehi thōmo ea rōna ea bomolimo ea ho bolela litaba tse molemo tsa ’Muso.—Mattheu 24:14.

[Setšoantšo se leqepheng la 21]

Banyalani ba Fora le bo-pula-maliboho ba tšeletseng ba kamehla