U ka Suthisa Lithaba!

HO EA ka litlaleho, la 29 Motšeanong, 1953, ke lekhetlo la pele leo ka lona motho a ileng a ema tlhōrōng ea thaba e telele ka ho fetisisa lefatšeng—Thaba ea Everest, e phahametseng leoatle ka limithara tse 8⁠848. Ka tšehetso ea banna ba fetang 450, Edmund Hillary oa New Zealand le Tenzing Norgay, setsebi sa ho hloa lithaba sa morabe oa Sherpa sa Nepal, ba ile ba atleha ho hlōla likotsi tsa leqhoa le thellang, lehloa le fahlang, le khaello ea oxygen ho ea fihla tlhōrōng ea pakane ea bona e neng e phahame ka lik’hilomithara tse 8,8.

Ho hloella ka holimo liqhooeng tsa lithaba tse telele haholo ka sebele ke ho finyella sepheo se ikhethang. Empa hase letho ha ho bapisoa le seo Jesu a ileng a se hlalosetsa barutuoa ba hae: “Ka ’nete ke re ho lōna, hoja le na le tumelo e ka ka hlaku ea mosetareta, leha le be le ka re ho thaba ena: Fallela mane; e ka fallela teng, ’me ho ka be ho se letho le le sitang.” Nahana, e seng ho hloa thaba empa ho suthisa thaba!—Mattheu 17:20.

Ke eng e ileng ea susumeletsa Jesu ho bua see ho barutuoa ba hae? Ba ne ba sa tsoa hlōleha ho phekola moshanyana ea nang le modemona. Jesu a hatisa hore na ba hlōlehile ka lebaka lefe: Ba ne ba hloka tumelo e eketsehileng. (Mattheu 17:14-20) O ile a tšoantša tumelo le tlhaku ea mosetareda, eo ba neng ba e tseba haholo. Le hoja e le har’a ‘litlhaku tse nyenyane ka ho fetisisa,’ tlhaku ea mosetareda ka mor’ a ho hōla ka likhoeli tse seng kae e ne e tla fetoha semela se kang sefate. (Mattheu 13:31, 32) Kahoo, Jesu o ne a tiisa matla a maholo ao tumelo e nyenyane e neng e ka ba le ’ona ha e hlokometsoe le ho feptjoa hantle—lintho tse neng li bonahala li ke ke tsa etsahala li ne li tla etsahala.

Ka mor’a ho baballa tumelo e joalo, ke lithaba tsa mofuta ofe tseo barutuoa ba Jesu ba neng ba tla khona ho li suthisa? Joalokaha thaba ea sebele e ka ema tseleng ea motho, litšitiso tse kang lithaba li ka thibela tsoelo-pele ea rōna tšebeletsong ea Jehova. E be “lithaba” tseo e ka ba eng hona re ka li “suthisa” joang?

Moapostola Pauluse ke mohlala oa Mokreste ea ileng a talimana le litšitiso tse ngata. Ho 2 Ba-Korinthe 6:4-10 le 2 Ba-Korinthe 11:23-28, u ka bala ka liphihlelo tsa hae tsa ho haelloa ke lijo, lichapo, litlamo, ho robeheloa ke sekepe, le litlokotsi tse ling tse ngata. Ho phaella linthong tsena, ho ne ho e-na le “phatsa” ea tšoantšetso “e hlabang ka nameng,” mohlomong bothata bo bong bo itseng ba mahlo a hae. (2 Ba-Korinthe 12:7; Liketso 14:15) O ne a khona joang ho hlōla mekoallo ee e kang lithaba ’me a atlehe ho finyella thato ea Molimo bakeng sa hae? Pauluse o ile a ngola: “Nka etsa tsohle ka Kreste ea mphang matla.” E le hore “matla ao a tlōlisang e be a Molimo, e seng a rōna.” (Ba-Filippi 4:13; 2 Ba-Korinthe 4:7) Ka hona, Pauluse o ne a e-na le tšepo e feletseng matleng a Jehova a ho mo matlafatsa ka motsotso oo o mahlonoko. O ne a e-na le tumelo.

Ho Suthisa Lithaba Kajeno

Na ke takatso ea hao ho eketsa tšebeletso ea hao ho Jehova? Joaloka ba makholo a likete ba ikopantseng le lenane le ntseng le eketseha la baboleli ba nako e tletseng (bopula-maliboho), le uena ua utloa hore linako li potlakile ’me mohlomong ka botebo u nahana ka ho atolosa tšebeletso ea hao. Leha ho le joalo, na tšitiso eo ho bonahalang e ke ke ea hlōloa e khōlo joaloka thaba e eme ka pel’a hao? Haeba ho joalo, na u ka suthisa lithaba? Ba likete ba entse joalo boitekong ba bona ba ho eketsa tšebeletso ea bona ho Jehova. Liphihlelo tsa bona tse seng kae ke tsena.

Khaitseli e mong e monyenyane ea neng a tla qeta sekolong a le ka holimo-limo sehlopheng sa habo o ne a lakatsa ho bula maliboho, empa khaello ea mesebetsi e ne e le thaba ea hae. Oa pheta:

“Monahano oa ka o sa nepahalang le lipelaelo tsa ka ka ho bula maliboho ha ka li ile tsa fetoha tšitiso eo ke neng ke lokela hore ke e hlōle. Kaha ke ne ke amehile haholo ka ho fumana mosebetsi pele ke qala ho bula maliboho, ke ne ke sa bea tšepo ea ka e feletseng le kholiseho e feletseng ho Jehova le matla a hae a ho lokisetsa ba eteletsang borapeli ba hae pele. Eaba ke ntse ke nahana, ‘Ke tla qala ka ho fumana mosebetsi, e be ke hona ke kenyang kōpo ea ka ea bopula-maliboho.’ Ke ne ke se pula-maliboho; ha e le hantle ke ne ke senya nako ea bohlokoa. Leha ho le joalo, e mong oa baholo ba phutheho a bontša hore ha ke ntse ke lieha ho qala ho bula maliboho, ke moo mesebetsi ea nako eohle e tla bonahala e khahleha haholoanyane, kaha ke ne ke tla be ke se na letho le nthibelang hore ke e amohele.”

O ile a etsa joang? “Ke ile ka rapela Jehova ke sa phetse hore moea oa hae o halalelang o tataise le ho tsamaisa liketso tsa ka le monahano oa ka.” Ka mor’a hore a qete sekolong khaitseli enoa o ile a sebetsa joaloka pula-maliboho ea thusang, eaba joale o kenela tšebeletso ea bopula-maliboho ba ka mehla. Nakoana ka morao ho moo, o ile a fumana mosebetsi oa boipheliso o tšoanelehang o neng o lumella kemiso ea hae ea bopula-maliboho.

Moholo e mong, eo mosali oa hae a neng a le tšebeletsong ea bopula-maliboho le ea neng a hōlisa bana ba babeli, o ile a ikutloa hore o lokela ho etsa ho eketsehileng ho feta feela ho tšehetsa lelapa la hae ka chelete. Ho ba bang ba neng ba shebeletse, maemo a neng a mo thibetse tšebeletso ea bopula-maliboho, a ne a bonahala a ke ke a hlōloa, empa leha ho le joalo o ne a lakatsa ho atolosa tšebeletso ea hae. Ke eng e neng e lokela ho fetoha?

O re: “Ke nahana hore tšitiso e kholohali eo ke neng ke lokela ho e hlōla e ne e le ’na. Tšebeletso ea tšimo e ne e le ntho eo ke e thabelang ka mehla, ’me ka ho buisana le ba tšebeletsong ea nako e tletseng le ho bona mahlohonolo a bona, ke ile ka fumana hore ke tšoaetsoa moea o motle oo ba o bontšang. Ke ne ke ipona ke le tšebeletsong ea nako e tletseng ka letsatsi le leng. Bothata ba monahano oa ka e ne e le hore bopula-maliboho e ne e le ntho eo ke neng ke nahana feela ka eona. Empa ho ne ho se mohla nkileng ka bea letsatsi la hore na ke ne ke lakatsa ho finyella pakane eo neng.”

Ka mor’a ho nahana ka thapelo, moena enoa o ile a qala ho sebeletsa pakaneng ea hae ea tšebeletso ea nako e tletseng. O ile a atamela motsamaisi oa hae mosebetsing, a mo hlalosetsa boikemisetso ba hae, ’me a kōpa hore a lumelloe hore a sebetse lihora tse seng kae beke le beke. Ho latela mokhoa oa tšebetso oa k’hamphani, o ne a batla kemiso e ncha ho hang.

O tsoela pele: “Motsamaisi oa ka o ile a emisa puisano ka hore o kholoa hore nke ke ka lumelloa ka kemiso eo ke e kōpang. Ke ne ke kholisehile ka ho feletseng hore haeba qeto e ne e itšetlehile ka eena feela, karabelo e ne e tla ba che. ’Me ka hona kamohelo e ne e ka tla feela ka tšehetso ea Jehova. Beke le halofo hamorao, kamohelo ea kemiso ea ka e ncha e ile ea tla e hlaha ho ba ka sehloohong. Ka mor’a ho leboha motsamaisi oa ka, ka ea koloing ea ka, ka khanna sebakana, ka khelohela ka thōko eaba ke bolela liteboho tsa ka le kananelo ea ka ho Jehova. E, pakane ea ka ea tšebeletso ea nako e tletseng e ne e ka fetoha ntho ea sebele.”

Khaitseli e mong ea nyetsoeng o ile a “suthisa” thaba ea hae joang? Oa pheta: “Ke na le bana ba bane le monna ea sa lumelang. Ha ke qala ho nahana ka ho bula maliboho, ke ne ke e-na le litšitiso tse seng kae. Lebaka le leng, ka nakoana monna oa ka o ne a sa sebetse, kaha mosebetsi oa hae ke oa linako tse itseng tsa selemo ’me ke ne ke sebetsa ka nakoana ho mo thusa ho lefa melato. Eaba ke ipolella hore le hoja ke e-na le takatso, nke ke ka bula maliboho ka lebaka la maemo a ka. Leha ho le joalo, ke hona mona moo ke neng ke lokela ho lokisa monahano oa ka. Ke ile ka hlokomela hore haeba ke tsoela pele ho nahana hore nke ke, ha ho mohla ke tla etsa boiteko ba hore ke leke. Potso e latelang ea bohlokoa eo ke neng ke lokela ho e arabela e ne e le hore na, Ke tla fumana matla a ho bula maliboho hokae? Ke ile ka fumana karabelo ho Ba-Filippi 4:13. Ha nka ka rapela Jehova feela ka taba ena empa ka qala ho itšetleha haholoanyane ka eena. Ka boela ka nka mehato e sebetsang e isang ho finyelleng pakane ea ka ka ho lokisetsa kemiso e ntle le ho ngolisa joaloka pula-maliboho ea thusang. Ha nako e ntse e feta, Jehova a tsoela pele ho mpulela tsela hore ke kenele tšebeletso ea bopula-maliboho. Monna oa ka o ile a khona ho khutlela mosebetsing, ’me ka khona ho lekanyetsa mosebetsi oa ka oa nakoana letsatsing le le leng ka beke. Nakoana ka morao ho mona, ka ba pula-maliboho oa ka mehla.”

Ho phaella moo, tokelo ea ho ba teng Sekolong sa Tšebeletso sa Bopula-maliboho e ile ea mo bulehela, ’me e ile ea ipaka ho ba thuso e khōlō tšebeletsong ea hae. O re: “Ke batla feela ho bolella e mong le e mong ea nahanang ka bopula-maliboho hore a rapele Jehova le hore a ho behe matsohong a hae. Joale a etse boiteko, ’me o tla mo hlohonolofaletsa ho iteka.”—Pesaleme ea 37:5.

Na liphihlelo tsee ha li u thuse ho bona kamoo tumelo, ha e sebelisoa e ka thusang Mokreste hore a hlōle litšitiso tse kang lithaba? Kahoo, haeba ke takatso ea hao ho bula maliboho, hlahloba maemo a hao. Buisana le ba bang ba bulang maliboho, ’me u ithute ka liphihlelo tsa bona. Nka mehato e sebetsang e isang tabeng ea hore u finyelle pakane ea hao. Ka holim’a tsohle, rapela Jehova ka takatso ea hao; e be joale u itšetleha ka eena hore a hlohonolofatse boiteko ba hao. E, le uena u ka suthisa lithaba!