Fumana ’Nete Eohle!

“HA KE e-s’o bone lebitso leo Bibeleng ea ka,” ho boletse Francisco. Lebitso Jehova le ne le sa tsoa hlaha puisanong ea hae le e mong oa Lipaki tsa Jehova. Ke ’nete, e ka ’na eaba ha a e-s’o bone lebitso la Molimo Bibeleng ea hae, khatiso ea 1969 ea phetolelo ea Sepotoketsi ea Almeida. Lebitso Jehova ha le hlahe ho eona. Joaloka Mok’hatholike oa Brazil, Francisco o ba teng ka mehla ’Miseng ka Lisontaha ebile o thabela ho bala Bibele lapeng la hae. Empa lebitso Jehova le ile la tsosa khahleho ea hae.

Molimo ke Mang?

Bekeng e latelang, Paki ea mo tlisetsa khatiso e ’ngoe ea phetolelo ea Almeida. Ba bapisa likhatiso tseo tse peli ho Pesaleme ea 83:18. ’Me ke eng seo ba ileng ba se fumana? Khatisong eo ea 1966, temana ena e baleha tjena: “Uena, eo lebitso JEHOVA e leng la hao u le mong, u ea Phahameng ka ho Fetisisa holima lefatše”! Leha ho le joalo, khatisong ea 1969, bakeng sa “JEHOVA” ho sebelisitsoe lentsoe “MORENA.” “Ua bona, ba fetotse ho hong mona,” ho rialo Paki, ’me ea botsa: “‘Morena’ e hlile hase lebitso, na ha ho joalo?” “Che,” ho rialo Francisco. A eketsa, a halefile: “Ke hobane’ng ha ba etsa sena?”

Sena sa bula tsela ea hore a etse patlisiso e nyenyane ka lebitso la Molimo. Ka mohlala, Francisco a ithuta hore ho ea ka The Catholic Encyclopedia (1910), Jehova ke “lebitso la Molimo Testamenteng ea Khale.” A ba a ithuta hore “Testamente ea Khale” eo boholo ba eona e neng e ngotsoe ka puo ea Seheberu, lebitso leo le hlaha hoo e batlang e le ka makhetlo a 7 000. Ha ho mofetoleli ea nang le tokelo ea ho fetolela lebitso la Jehova ho tlotla e sa utloahaleng e leng Morena. Francisco o ne a batla ho tseba ’nete ka lebitso Jehova, ’me a e fumana Bibeleng ka boeona le ka patlisiso e tataisitsoeng hantle.

Boemo ba Jesu ke Bofe?

Joalokaha ho hlokometsoe sehloohong se fetileng, malumeli a lefatše a silafalitse linnete tse ngata. Ebile Lipaki tsa Jehova li na le monyetla oa ho fumana seo batho ba se lumelang tšebeletsong ea tsona ea ntlo le ntlo. Ke ’nete hore hona ho ka fapana ho ea ka libaka, empa likhopolo tse ling li tloaelehile. Ka mohlala, ha ba botsoa, ‘Molimo ke Mang?’ beng ba matlo ba bang ba re, ‘Jesu.’ Ka sena ba bolela hore Jesu ke Molimo o Matla ’Ohle. Empa na ebe khopolo ena e emela ’nete?

Nahana ka lintlha tse latelang. Jesu o ile a rapela Ntat’ae: “’Me bophelo bo sa feleng ke hore ba u tsebe, uena Molimo o ’notši oa ’nete, le Jesu Kreste eo u mo romileng.” (Johanne 17:3) Na u hlokometse hore Jesu o ne a sa lebisa ho eena empa ho Ntate oa hae oa leholimo e le “Molimo o ’notši oa ’nete”? Kahoo, barutuoa ba Jesu ba pele ba ne ba nepile ha ba ne ba re ho eena: “Efela u Mor’a Molimo ruri.” Jesu ka boeena o itse: “Ke Mor’a Molimo.” Kahoo, ’nete ke hore Jesu hase Molimo o Matla ’Ohle, empa ke Mora oa Jehova Molimo.—Mattheu 14:33; Johanne 10:36.

Bokamoso ba Lefatše ke Bofe?

Ho thoe’ng ka bokamoso ba moloko ona le ba lefatše? John F. Kennedy, mookameli ea seng a hlokahetse oa United States, ha a buisana le Lekhotla le Akaretsang la Machaba a Kopaneng o itse: “Re na le matla a ho etsa moloko ona oa batho e be o molemo haholo historing ea lefatše—kapa re o etse oa ho qetela.” Kamoo ho bonahalang ka teng baeta-pele ba mehla ea kajeno ba ikutloa ka tsela e tšoanang. Seo Lipaki tsa Jehova li atisang ho se utloa tšebeletsong ea tsona ke hore bofelong ba lefatše, naletsana Lefatše e tla senngoa ka mollo kapa ka ntoa ea nuclear. Ho tšehetseng tumelo ena, ba bang ba supa ho Tšenolo 21:1, e reng: “Eaba ke bona leholimo le lecha le lefatše le lecha; hobane leholimo la pele le lefatše la pele li ne li fetile, le lona leoatle le ne le se le le sieo.”

Bibele e atisa ho sebelisa lentsoe “lefatše” ka kutloisiso ea ho bapisa, e lebisitse ho batho. Mohlala o fumanoa ho Genese 11:1, e reng: “Lefatše lohle le ne le na le puo e le ’ngoe le mantsoe a le mang.” (Bona le 1 Marena 2:1, 2; Pesaleme ea 96:1.) Ho Tšenolo 21:1, “lefatše la pele” le lebisitse eseng ho naletsana ena, empa ho mokhatlo o khopo oa batho o tla felisoa. Hona ho tla bula tsela bakeng sa ho tsosolosoa ha Paradeise lefatšeng. (Luka 23:43, NW; 2 Ba-Thessalonika 1:6-9; Tšenolo 21:4) ’Me hona ho lumellana le Bibele eohle, e bontšang hore lefatše la sebele le ke ke la felisoa. Ka mohlala, Pesaleme ea 104:5 e bolela hore Molimo “o tiisitse lefatše metheong ea lona; le ke ke la sisinyeha le ka mohla o le mong.” (Bapisa le Moeklesia 1:4.) Ka sebele, Jehova o bōpetse ‘lefatše hore le ahuoe’ ka ho sa feleng.—Esaia 45:18.

U Fumane ’Nete Eohle Hobane’ng?

Litaba tseo re sa tsoa bua ka tsona e mpa feela e le mehlala ea likhopolo tse fosahetseng tse atileng kajeno. Leha ho le joalo, ha mong’a ntlo a lumela ho beha mabaka, joalokaha Francisco a entse, Lipaki tsa Jehova lia thaba hobane sena se bula tsela bakeng sa puisano e rutang ea linnete tsa Mangolo.

Ho se fumane ’nete eohle ho ka lebisa liphellong tse soabisang. Ka mohlala: Ha Jesu a ne a le lefatšeng, ba bangata ba ile ba susumelletseha ho lumela hore e ne e le mora e mong feela oa Maria le Josefa, eo e neng e mpa e le ’metli ea tsoang Nazaretha. Kahoo, ha baa ka ba lebisa tlhokomelo e khōlō ho eena. Ho isa bohōleng bo itseng, ba ne ba nepile. Jesu e ne e le mora oa Maria, ea neng a emolisitsoe ke moea o halalelang. E ne e le mora eo Josefa a mo amohetseng joaloka oa hae, ’me o hlile a sebetsa joaloka ’metli. (Mareka 6:3) Leha ho le joalo, na eo e ne e le ’nete eohle ka eena? Che! E ne e hlile e le Messia le eo e neng e tla ba “Morena oa marena”! (Tšenolo 17:14; Luka 1:32-35; Liketso 2:36) Ho se fumane ’nete eohle ka Jesu ho entse hore batho ba bangata ba lahleheloe ke tokelo e ke keng ea phetoa—ho thabela ho ba le botsoalle le Jesu lefatšeng.

Batla ’Nete Eohle

Motse oa Berea (hona joale o bitsoa Véroia) o Macedonia ea boholo-holo o tsebahala haholo ho babali ba Bibele ka baka la boikutlo bo babatsoang ba baahi ba oona ba lekholo la pele la lilemo. E ne e le boikutlo bofe boo? Tlaleho e re: “Ba amohetse lentsoe [le neng le boleloa ke Pauluse] ka cheseho e khōlō, ba hlahlobisisa Mangolo ka mehla ho tseba hore na litaba tseo li joalo ruri na.” Phello? “Ba bangata ba bona ea e-ba balumeli, le basali ba hlomphehang ba Bagerike le banna ba bangata.”—Liketso 17:11, 12, NW.

Ka ho tšoanang boikutlo ba baprofeta ba khale ba Molimo bo ne bo tšoaneloa ke tlhompho. Ba entse “patlisiso e mafolo-folo le ho hlahlobisisa ka hloko” mabapi le poloko e neng e tla tla ka Messia. (1 Petrose 1:10, NW) Molimo o hlohonolofalitse boiteko ba bona. Ho hlakile hore ha ho na tsela e khaoletsang. Ho batlisisa ka phehello le ho hlahlobisisa lithuto ka hloko—ena ke tsela ea ho fumana ’nete eohle Bibeleng!

U ka ipotsa, ‘Ke lokela ho qala hokae?’ Ka mor’a ho bala likhatiso tsa Bokreste, mosali e mong ea phelang Brazil o ile a ngola: “Re [eena le monna oa hae] ile ra elelloa kapele hore re hloka tsebo ea mofuta oo, ho fumana likarabo lipotsong tse ngata tseo re nang le tsona . . . Ka kōpo, nka fumana joang Bibele le libuka tse ling tse tla nthusa ho tseba haholoanyane ka Ntate oa rōna oa leholimo?” O ne a nepile: ho bala Bibele hammoho le libuka tsa ’nete tse theiloeng Bibeleng. Haeba le uena u batla ’nete eohle, phetlela Jehova Molimo pelo ea hao ’me u kōpe thuso ea hae. ’Me ka kōpo hlokomela mantsoe ana a khothatsang: “Ha e mong ho lōna a hloka bohlale, a bo kōpe ho Molimo, o sitsang bohle ka phano e kholo, o se na ho khanana, ’me o tla bo neoa. Feela, a kōpe ka tumelo, a se ke a lika-lika.”—Jakobo 1:5, 6.

Batho ba limillione ba buisana le Lipaki tsa Jehova ka Bibele, kahoo ba etsa patlisiso ka mafolo-folo ’me ba batla ’nete ka hloko. Ho ba le tsebo e nepahetseng ka Molimo oa ’nete le ka Jesu Kreste le ho sebelisa tsebo e joalo ho bolela bophelo bo sa feleng. (Johanne 17:3, NW) Hoo e ka ba tlhohonolofatso ea hao e khōlō haeba u batla ka khothalo le ho fumana ’nete eohle.

[Setšoantšo se leqepheng la 7]

’Nete eohle ka Jesu ke hore e ne e le Messia, eseng feela ’metli