Boka Lebitso la Jehova le Halalelang!
“Molomo oa ka o tla bolela thoriso ea Jehova; ’me nama eohle a e ke e boke lebitso la hae le halalelang ho isa nakong e ke keng ea lekanngoa, esita le ka ho sa feleng.”—PESALEME EA 145:21, “NW.”
1, 2. (a) Satane o phephelitse puso ea Molimo ka tsela efe? (b) Ho hlaha lipotso life mabapi le Pesaleme ea 145:11-21?
HA HO pelaelo hore Jehova ke ’Musi oa Bokahohle. Empa Satane o phephelitse ho loka le ho tšoaneleha ha bobusi ba Molimo. (Genese 2:16, 17; 3:1-5) Diabolose o boetse o hlahisitse pelaelo ka botšepehi ba bahlanka bohle ba Molimo ba leholimong le lefatšeng. (Jobo 1:6-11; 2:1-5; Luka 22:31) Kahoo Jehova o lumelletse nako hore e fete e le hore libōpuoa tsohle tse bohlale li bone litholoana tse mpe tsa ho fetohela puso ea hae le hore li bontše hore na li eme hokae litsekong tsena.
2 Pesaleme ea 145 e re thusa ho nka khato e tiileng ea ho emela puso ea Molimo. Joang? Davida o re’ng ka borena ba Jehova? Hona Molimo o tšoara batšehetsi ba oona joang? Likarabelo tse ka re thusang li hlaha Pesalemeng ea 145:11-21.
Bua ka Borena ba Jehova
3. Haeba re rata borena ba Jehova, re tla etsa’ng?
3 Puso ea Jehova e ne e le ntho e khōlō eo Davida a neng a amehile ka eona, kaha o ile a re: “Ba tla bua ka khanya ea borena ba hao, ’me ba tla bua ka matla a hao, ho tsebisa bara ba batho liketso tsa hae tse matla le khanya ea phatsimo ea borena ba hae.” (Pesaleme ea 145:11, 12, NW) Batho ba bua ka lintho tseo ba li thahasellang. Kahoo monna o bua ka lelapa la hae, lehae la hae, lijalo tsa hae. Jesu o itse: “Motho ea molemo o ntša litaba tse molemo letlotlong le molemo la pelo ea hae.” (Luka 6:45) Haeba lipelo tsa rōna li rata puso ea Molimo, re tla rapella hore ’Muso oa oona o tle, ’me re tla bolella ba bang ka toka, khotso, le ho loka tse tla rena tlas’a puso ea oona. Re tla rorisa Jehova joaloka “Morena oa bosafeleng,” ’me re tla bua ka ho emeloa ha bobusi ba hae ke ’Muso oa Bomessia o matsohong a Mora oa hae ea ratoang, Jesu Kreste. (Tšenolo 15:3, NW; Esaia 9:6, 7) Ke tokelo e khōlō hakaakang ho bua ka khanya ea leholimo ea borena ba Jehova, eo haufinyane e tla bonahatsoa ka har’a botle ba paradeise ea lefatše e tletseng libōpuoa tse thabileng ka ho phethahetseng!—Luka 23:43.
4. Re na le monyetla oa ho bua ka “matla” a Jehova neng, ’me re tšehelitsoe joang mosebetsing o joalo?
4 Kananelo e tla boela e re susumelletse ho bua ka “matla” a Jehova. Le hoja a “phahamile ka matla,” ha ho mohla a a sebelisang hampe. (Jobo 37:23) O ile a sebelisa matla a hae ho bōpa lefatše le batho ’me o tla a sebelisa ho timetsa ba khopo. Re na le monyetla oa ho bua ka matla a Molimo ha re bolela litaba tse molemo. Hape na ha re tlale teboho ka hore e be Mohloli ona o phahameng ka ho fetisisa oa matla o re fa matla a ho etsa mosebetsi oo? (Esaia 40:29-31) E, joaloka Lipaki tsa Jehova, matla a Molimo le moea oa oona aa re tšehetsa tšebeletsong e halalelang. Ke ka tsela ena feela molaetsa oa ’Muso o khonang ho boleloa ka katleho e tsotehang lefatšeng ka bophara.—Pesaleme ea 28:7, 8; Zakaria 4:6.
5. Kaha ba bangata haholo ha ba tsebe ‘liketso tse matla’ tsa Jehova, re lokela ho etsa eng?
5 Ho hlokahala hore re tsebise bara ba batho ‘liketso tsa Jehova tse matla,’ joalokaha le Baiseraele ba ile ba bolella bana ba bona ka tsela eo Molimo o ileng oa ba lopolla ka eona bokhobeng Egepeta. (Exoda 13:14-16) Batho ba hahela batho ba entseng liketso tse hlahelletseng liemahale, empa ke ba bakae ba tsebang ka liketso tse matla tsa Molimo? Ho joalokaha setsebi se seng se hlalositse: “Ba ngola liketso tsa bahale ba bona tšepeng ea brass, empa liketso tsa Jehova tse khanyang li ngoloa lehlabatheng, ’me ho feta ha nako ho li hlakola ho se hopoloang kajeno.” Liketso tseo ha li hlile ha lia hlakoha, le hoja batho ba bangata haholo ba sa li tsebe. Kahoo mosebetsing oa rōna oa ntlo le ntlo, ha re khanna lithuto tsa Bibele tsa mahae, le ka linako tse ling, a re bueng ka cheseho ka liketso tsa Molimo tse matla.
6. (a) Moea oa cheseho oo re phethahatsang tšebeletso ea rōna ka oona o ile oa bonahala hantle ketsahalong efe lilemong tse fetileng? (b) Ha e le hantle, ka 1922 ho ile ha thoe’ng ka ho phatlalatsa ’Muso?
6 Hape re lokela ho tsebahatsa khanya ea borena ba Molimo ka cheseho. Ka sebele ho chesehela tšebeletso e joalo ea ’Muso ho ile ha totobala ka 1922, ha J. F. Rutherford, eo ka nako eo e neng e le mopresidente oa Mokhatlo oa Watch Tower, a bua le ba neng ba le teng kopanong Cedar Point, Ohio, ’me a re: “Ho tloha ka 1914 Morena oa khanya o nkile matla a hae . . . ’Muso oa leholimo o atametse; Morena oa busa; ’muso oa Satane oa oa; ba limillione ba phelang hona joale ba ke ke ba shoa le ka mohla. Na lea lumela? . . . Joale khutlelang tšimong, Lōna bara ba Molimo o holimo-limo! Nkang lihlomo tsa lōna! Hlaphoheloang, le falimehe, le be mafolo-folo, le be sebete. E-bang lipaki tsa ’nete le tse tšepahalang tsa Morena. Hatelang pele ntoeng ho fihlela mosaletsa o mong le o mong oa Babylona o rapalletse e le lesupi. Phatlalatsang molaetsa hōle le haufi. Lefatše le tlameha ho tseba hore Jehova ke Molimo le hore Jesu Kreste ke Morena oa marena le ’Musi oa babusi. Lena ke letsatsi har’a matsatsi. Bonang, Morena oa busa! Lōna le baemeli ba hae ba mo tsebahatsang phatlalatsa. Ka hona phatlalatsang, phatlalatsang, phatlalatsang, Morena le ’muso oa hae.”
7. Re lokela ho ba le boikutlo bofe ka mosebetsi oa rōna joaloka baboleli ba ’Muso?
7 Ho thabisa hakaakang ho ‘nahana ka lebitso la Molimo,’ ho bolella ba bang ka puso ea oona, le ho phatlalatsa ’Muso oa Bomessia oa Mora oa oona ea ratoang! (Malakia 3:16, NW) Joaloka baboleli le batšehetsi ba ’Muso, re ananela joaloka letlotlo tokelo ea rōna ea ho bolela litaba tse molemo le ho etsa hore lipelo tsa ba bang li retelehele ho Molimo, Kreste, le ’Muso. Ka hare ho rōna ho lokela ho be le takatso e chesang ea ho bolella ba bang ka phatsimo e khanyang ea borena ba Jehova.—Bapisa le Jeremia 20:9.
8. (a) Puso ea Jehova e emeloa ke eng kajeno? (b) Ke hobane’ng ha ho ka boleloa hore Molimo o busa “ho isa melokong e sa feleng”?
8 Re lokela ho susumelletseha ho phatlalatsa ’Muso oa Molimo ka cheseho e khōlō, hobane ka mor’a moo Davida o ile a re: “’Muso oa hao ke ’muso oa ka mehla eohle, ’me borena ba hao bo hlola ho isa melokong e sa feleng.” (Pesaleme ea 145:13) Ha mopesaleme a ntse a tsoela pele ho thuisa ka borena ba Jehova, o ile a fetola liemeli ho tloha ho “hae” ho ea ho “hao,” a lebisitse mantsoe a hae a thapelo ho Molimo ka ho toba. Ka ho hlakileng, puso ea Jehova e emeloang ke ’Muso oa Bomessia ha e nkele borena ba Molimo bo sa feleng sebaka. Ha e le hantle, ha batho ba utloang ba se ba phahamiselitsoe phethehong, Kreste o tla nehelana ka ’Muso ho Ntat’ae. (1 Ba-Korinthe 15:24-28) Kahoo Molimo o busa “ho isa melokong e sa feleng.” Jehova e ne e le Morena ha Adama a bōptjoa ’me o tla tsoela pele ho busa batho ba lokileng ka ho sa feleng.
9. Pesalemeng ea 145, ho ka boleloa eng ka temana e qalang ka tlhaku ea Seheberu nun?
9 Pesalemeng ena eo litlhaku tse qalang litemana tsa eona li etsang alfabeta ha li kopana, taba e ngotsoeng ke bangoli ba Masora e siile temana e qalang ka tlhaku ea Seheberu nun. Empa tumellanong le Septuagint ea Segerike, Peshitta ea Sesyria, le Vulgate ea Selatine, buka e ’ngoe ea Seheberu e ngotsoeng ka letsoho e baleha tjena: “Jehova oa tšepahala mantsoeng ’ohle a hae, ’me ka lerato o mosa [kapa, “oa tšepahala”] mesebetsing eohle ea hae.” (New World Translation of the Holy Scriptures—With References, mongolo o botlaaseng ba leqephe) Molimo o phethahatsa litšepiso tsa oona kaofela ’me oa tšepahala, o lerato, o bile o mosa ho bohle ba ananelang molemo oa oona.—Joshua 23:14.
Le ka Mohla Jehova a ke ke a Hlōleha ho re Tšehetsa
10. Molimo o ‘re tšehetsa’ joang?
10 Le ka mohla Morena ea sa Feleng a ke ke a iphapanyetsa tlokotsi ea bahlanka ba hae. Ka hona, Davida o ne a ka re: “Jehova o fana ka tšehetso ho bohle ba oang, ’me o phahamisa bohle ba hlonameng.” (Pesaleme ea 145:14, NW) Ho tloha mehleng ea Abele, Jehova o ’nile a tšehetsa barapeli ba Hae. Haeba re ne re ka tloheloa feela, re ne re tla oela tlas’a meroalo ea rōna hangata. Re haelloa ke matla a lekaneng a ho jara litsietsi tsohle tsa bophelo le mahloriso a re tlelang joaloka batho ba Molimo, empa Jehova oa re tšehetsa. Mofuta oa leetsi la Seheberu le sebelisitsoeng mona o bontša hore Molimo ha o khaotse ho ‘re tšehetsa.’ Ho ke ho hlokomeloe hore Johanne Mokolobetsi le Mora oa Molimo ba ile ba thusa ho phahamisa baetsalibe ba oeleng boitšoarong. Ha batho bana ba baka ’me ba fetoha bahlanka ba Jehova, ba ile ba thabela tlhohonolofatso e hlollang ea tšehetso ea Molimo.—Mattheu 21:28-32; Mareka 2:15-17.
11. Jehova o ‘phahamisa bohle ba hlonameng’ joang?
11 Hoa tšelisa ho tseba hore ‘Jehova o phahamisa bohle ba hlonamisitsoeng’ ke liteko tse fapa-fapaneng. O fa ba nyahameng har’a rōna thabo, o tšelisa ba mahlomoleng, ’me o re thusa ho bolela lentsoe la hae ka sebete ha re hlorisoa. (Liketso 4:29-31) Le ka mohla a ke ke a lumella mejaro ea rōna ho re imela haeba feela re amohela thuso ea hae. (Pesaleme ea 55:22) Kahoo, joaloka “morali oa Abrahama” eo le hoja a ne a “futahane” Jesu a ileng a mo phekola ’meleng, re lokela ho “rorisa Molimo” ha o re phahamisa ka lerato moeeng. (Luka 13:10-17) Batlotsuoa ba neng ba hloname bokhobeng ba Babylona ba ile ba bontša teboho ha Molimo o ba phahamisa ka 1919, ’me o ’nile oa phahamisa “linku tse ling” tse nang le kananelo haesale ho tloha ka 1935.—Johanne 10:16.
12. ‘Mahlo a tsohle a talimile ho Molimo ka tšepo’ joang?
12 Le ka mohla Jehova a ke ke a hlōleha ho thusa batho ba hae, joalokaha ka mor’a ho bolela seo Davida a ile a tsoela pele ho se hlakisa ka ho re: “Mahlo a tsohle a talimile ho uena ka tšepo, ’me u li fa lijo tsa tsona ka nako ea tsona. U fuparolla seatla sa hao ’me u khotsofatsa takatso ea ntho e ’ngoe le e ’ngoe e phelang.” (Pesaleme ea 145:15, 16, NW) Ho tšoana leha eka mahlo a libōpuoa tsohle tse phelang a retelehetse ho Morena oa Bokahohleng. Mangeloi a talimile ho Molimo hore bophelo ba ’ona bo ’ne bo tsoele pele. ’Me joalokaha ngoana a talima ho motsoali bakeng sa ho fumana lintho tse hlokahalang, re talimile ho Ntat’a rōna oa leholimo. Ha e le hantle, ke eena ea hlokomelang batho le liphoofolo ka litlhoko tsa bophelo. Ha ho e mong ea ka khotsofatsang litlhoko tsa bona. Molimo o ba fa ‘lijo tsa bona ka nako ea tsona,’ ke hore, ha li hlokahala.
13. Jehova o ‘fuparolla seatla sa hae le ho khotsofatsa takatso ea ntho e ’ngoe le e ’ngoe e phelang’ ka litsela life?
13 Molimo ‘o fuparolla seatla sa oona ’me o khotsofatsa takatso ea ntho e ’ngoe le e ’ngoe e phelang.’ (Pesaleme ea 104:10-28) Ke ’nete hore liphoofolo tse ling li shoa ka lebaka la khaello ea lijo. Batho ba bangata baa lapa ka lebaka la boikhabi ba ba bang, khatello, le tšebeliso e mpe ea lintho tse hlahisoang ke naha. Ho feta moo, Jesu o boletse esale pele hore “likhaello tsa lijo” e ne e tla ba karolo ea “pontšo” ea ho ba teng ha hae mehleng ena ea qetello. (Mattheu 24:3, 7, NW) Empa ha ho le e ’ngoe ea lintho tsena e etsahalang kahobane Jehova a le lekhonatha kapa a hlōleha ho fana. Nahana ka libōpuoa tse likete tsa limillione tse hlokomeloang ka litlhoko tsa bophelo! Ho feta moo, pesaleme ena e fana ka tiiso ea hore tlas’a puso ea ’Muso, ha ‘motho a se a sa rene holim’a e mong ho mo etsa hampe,’ Molimo o tla khotsofatsa litlhoko tsa rōna tsa lintho tse bonahalang le tsa moea. (Moeklesia 8:9; Esaia 25:6) Esita le kajeno, ha ho hlokahale hore re lapele lijo tsa moea, hobane Molimo o fana ka tsona ka bongata ka “mohlanka ea khabane, ea bohlale,” nakong ea tsona. (Mattheu 24:45-47; 1 Petrose 2:2) Ha re bua ka puo ea moea, Lipaki tsa Jehova ke batho ba feptjoang hantle ka ho fetisisa lefatšeng. Na u bontša kananelo e tebileng bakeng sa lijo tse fanoang ka bongata hakaalo?
Jehova o Lebela ba Mo Ratang
14. Ke hobane’ng ha Davida a ne a ka bolela hore “Jehova o lokile litseleng tsa hae kaofela ’me oa tšepahala mesebetsing ea hae kaofela”?
14 Booatla ba rōna bo ka ’na ba ‘re khelosa tseleng’ ’me ba re tlisetsa mathata, empa le ka mohla ha rea lokela ho beha Molimo molato bakeng sa mathata ana. (Liproverbia 19:3) Davida o bontša lebaka la sena ha a re: “Jehova o lokile litseleng tsa hae kaofela ’me oa tšepahala mesebetsing ea hae kaofela.” (Pesaleme ea 145:17, NW) Ka mehla Molimo o etsa lintho ka tsela e lokileng, e nang le toka, le e mohau. Mohau oa oona o bonahala haholo-holo tokisetsong ea oona ea poloko ka sehlabelo sa topollo sa Jesu. (Liketso 2:21, NW; 4:8-12) Jehova o boetse “oa tšepahala mesebetsing ea hae kaofela,” ka mehla o boloka botšepehi, o lerato, ’me ha a ee ka tšobotsi. Ka hona, joaloka “baetsisi ba Molimo,” a re beng ba lokileng, ba nang le toka, ba mohau, ba sa eeng ka tšobotsi, le ba tšepahalang.—Ba-Efese 5:1, 2; Deuteronoma 32:4, NW; Pesaleme ea 7:10; 25:9; Esaia 49:7; Liketso 10:34, 35.
15. Re ‘bitsitse ho Molimo ka ’nete’ joang, ’me ho etsa joalo ho tlisitse phello efe?
15 Kaha Molimo o lokile o bile oa tšepahala, re atametsoa ho oona. Ho feta moo, Davida oa re tiisetsa: “Jehova o haufi le bohle ba bitsang ho eena, le bohle ba bitsang ho eena ka ’nete.” (Pesaleme ea 145:18, NW) Ha re kolobetsoa joaloka balumeli ba inehetseng, re ile ra bitsa lebitso la Jehova. (Liketso 8:12; 18:8; Ba-Roma 10:10-15) Kaha joale re ile ra atamela haufi le Molimo, o atamela haufi le rōna. (Jakobo 4:8) Re ‘bitsa ho oona ka ’nete’ hobane re etsa hoo ka tsela ea ’nete, ka Jesu Kreste. ’Me Jehova o tla lula a le haufi haeba re mo rapela “ka moea le ka ’nete,” re bonahatsa “tumelo e se nang boikaketsi,” ’me re ‘tsoela pele ho tiea joalokaha eka re bona Ea sa bonoeng.’ (Johanne 4:23, 24; 1 Timothea 1:5, NW; Ba-Heberu 11:27) Joale ha re na ho rapella lefeela kapa hona ho talimana le lefatše la Satane re le bang, empa re tla tsoela pele ho thabela thuso ea Molimo le tataiso ea oona. (Pesaleme ea 65:2; 1 Johanne 5:19) Seo se bolela tšireletseho e kaakang!
16. Ke hobane’ng ha Jehova a ‘phetha takatso ea ba mo tšabang,’ hona o etsa hoo joang?
16 Re boetse re na le tšireletseho ea ’nete ka lebaka la lintho tse ling tseo Jehova a li etsang molemong oa rōna. Davida o itse: “O phetha litakatso tsa ba mo tšabang, o utloa sello sa bona, ’me oa ba pholosa.” (Pesaleme ea 145:19, BPN) Jehova o ‘phetha takatso ea rōna’ ka lebaka la hore re na le tlhompho e tebileng ea borapeli ho Molimo le tšabo e ntle ea ho o halefisa. (Liproverbia 1:7) Lipelo tsa rōna tse utloang li ile tsa re susumelletsa ho inehela ho Jehova, ’me boikutlo ba rōna ke hore, “Thato ea hao e etsoe.” Kaha thato ea hae ke hore re bolele molaetsa oa ’Muso, o phethahatsa takatso ea rōna ea ho etsa mosebetsi oo. (Mattheu 6:10; Mareka 13:10) Molimo o ‘phethahatsa takatso ea rōna’ hobane ha re rapele ka boikhabi empa re kōpa lintho tse lumellanang le thato ea oona. O re fa se lumellanang le thato ea oona le se molemong oa rōna.—1 Johanne 3:21, 22; 5:14, 15; bapisa le Mattheu 26:36-44.
17. Ke hobane’ng ha re ka kholiseha hore Molimo o tla utloa “sello” sa rōna sa hore re thusoe?
17 Joaloka Lipaki tsa Jehova tse tšepahalang, e se eka re ka boela ra kholiseha hore le ka mohla o ke ke oa ithiba litsebe hore o se mamele “sello” sa rōna sa hore re thusoe. Molimo o ile oa lopolla Davida tlokotsing ’me oa boloka Jesu, oa ba oa mo tsosa bafung. Ha re hlaseloa ke sera, haholo-holo nakong ea tlhaselo ea Gogo, e se eka re ka kholiseha hore Jehova o tla re lopolla. (Ezekiele 38:1–39:16) Ha e le hantle, nakong efe kapa efe ea khathatso, joaloka Davida, ka kholiseho re ka rapela: “Jehova, nkutloele bohloko, hobane ke matsoalong! . . . hobane ke utloa litšebo tse oeoetsoang ke bongata; tšoho e ntlela kahohle, ha ba botsana hammoho bakeng sa ka, ba rera ho tlosa bophelo ba ka. Empa ke itšepela uena, Jehova; ke re: U Molimo oa ka!”—Pesaleme ea 31:9-14.
18. Re rua molemo joang tsebong ea hore Jehova ‘o lebela bohle ba mo ratang’ empa o tla ‘ripitla ba khopo’?
18 Ka mehla Jehova Molimo o itokiselitse ho re thusa. Ho joalokaha Davida a bolela: “Jehova o lebela bohle ba mo ratang, empa o tla ripitla bohle ba khopo.” (Pesaleme ea 145:20, NW) E, haeba re rata Molimo, o tla re hlohonolofatsa le ho re boloka. (Numere 6:24-26) O ‘otla baikhohomosi ka ho fetisisa’ empa o sireletsa bahlanka ba oona ba ikokobelitseng, ha o lumelle letho le tla ba ntša kotsi e sa feleng hore le etsahale. Kaha Jehova o na le rōna, a re beng sebete. (Pesaleme ea 31:20-24; Liketso 11:19-21) ‘Ha ho sebetsa se entsoeng khahlanong le rōna se tla atleha.’ (Esaia 54:17, NW; Pesaleme ea 9:17; 11:4-7) Eo ke phihlelo e latsuoang ke ba pakang lerato la bona ho Molimo joaloka bahlanka ba oona ba inehetseng ba tšepahalang. E le sehlopha, Lipaki tsa Jehova li tla feta li sireletsehile “mahlomoleng a maholo” a tla tlela ba khopo. (Tšenolo 7:14) ’Me ho rarolloa ha tseko e khōlō ea borena ba Jehova ba bokahohleng e tla ba tlhohonolofatso e kaakang ho “bohle ba mo ratang”!
Tsoela Pele ho Boka Lebitso la Jehova le Halalelang
19. Ke hobane’ng ha melomo ea rōna e bolela “thoriso ea Jehova”?
19 Davida o qetella pesaleme ena e susumetsang maikutlo ka mantsoe ana: “Molomo oa ka o tla bolela thoriso ea Jehova; ’me nama eohle a e ke e boke lebitso la hae le halalelang ho isa nakong e ke keng ea lekanngoa, esita le ka ho sa feleng.” (Pesaleme ea 145:21, NW) Joaloka Lipaki tsa Jehova, re ananela boholo, molemo, borena bo mosa, tšehetso e sa hlōleheng, le tlhokomelo e sa feleng ea Molimo. Kahoo, joaloka Davida, melomo ea rōna e bolela lithoriso tsa Molimo. Re susumelletseha ho o fa boinehelo bo khethehileng, ho o leboha bakeng sa mahlohonolo a mangata a oona, le ho rorisa ‘lebitso la oona le letle.’—1 Likronike 29:10-13, NW; Exoda 20:4-6, NW.
20. Re talimile bokamosong bo sa feleng, boikemisetso ba rōna e lokela ho ba bofe hona joale?
20 Kaha Jehova o re hlohonolofatsa letsatsi le letsatsi, a re ’mokeng ka mehla, kapa re bue hantle ka eena. A re boleleng litaba tse molemo ka cheseho ho rorisa Molimo, re bolelle ba bang hore haufinyane ‘nama eohle e tla boka lebitso la oona le halalelang.’ E tla ba ho babatsehang hakaakang ho phela nakong ea ha baahi bohle ba lefatše—ha e le hantle, libōpuoa tsohle tse bohlale bokahohleng—li se li binela Ntat’a rōna oa leholimo lithoriso! (Pesaleme ea 148:1-13) Ho bokoe Jehova ka lebaka la ho senola lebitso la hae le ho re fa tokelo ea ho ba Lipaki tsa hae. (Pesaleme ea 83:18; Esaia 43:10-12) E se eka re ka itšoara ka mokhoa o tšoanelang batho ba nkang lebitso leo le halalela le ba rapellang hore le halaletsoe. (Luka 11:2, NW) A re ke re sebeletseng Molimo ka botšepehi, e le hore tsamaisong ea oona e ncha, mantsoe a rōna a tle a utluoe har’a libini tse tla boka lebitso la Jehova le halalelang ka ho sa feleng.
Litlhaloso Tsa Hao ke Life?
◻ Haeba re rata borena ba Jehova re tla etsa eng?
◻ Borena ba Molimo bo emeloa ke eng kajeno?
◻ Jehova o ‘phahamisa bohle ba hlonameng’ joang?
◻ Molimo o ‘fuparolla seatla sa oona le ho khotsofatsa takatso ea ntho e ’ngoe le e ’ngoe e phelang’ ka litsela life?
◻ Re ka boka lebitso la Jehova le halalelang joang?
[Setšoantšo se leqepheng la 17]
Ka 1922 mantsoe ‘phatlalatsang Morena le ’Muso’ a ile a susumelletsa ba tšehetsang borena ba Jehova ho nka khato e kholoanyane